Life in Fukuoka "Nepali"

【फोहोर फाल्न प्रयोग गर्न मिल्ने रेजिझोला "फुकुरेजि"】

वर्षको अन्त्य र नयाँ वर्षको तयारीका लागि किनमेलको आवृत्ति र परिमाण बढ्ने यो समयमा, तपाईँले आफ्नो "माई ब्याग" बिर्सनु भएको अवस्थामा वा ल्याएको माई ब्याग पर्याप्त नहुने अवस्थामा प्रयोग गर्न मिल्ने "रेजि ब्याग" को बारेमा थाहा पाउनु भएको छ? फुकुओका शहरभित्रका कनभिनि, सुपरमार्केट, ड्रगस्टोर आदिका रेजि काउन्टर नजिकै, फोहोर फाल्न प्रयोग गर्न मिल्ने रेजिझोला "फुकुरेजि"बिक्रीमा उपलब्ध छ।

अन्तिम वर्षहरूमा, रेजिझोलाको शुल्क लाग्न थालेपछि माईब्यागको प्रयोगको विस्तार भएको छ। तर, प्लास्टिक फोहोरमध्ये एक हुने रेजि ब्याग अझै पनि फुकुओका शहरमा वार्षिक करिब २,६०० टन फ्याँकिएको तथ्य पत्ता लागेको छ। यसै कारण, किनमेलको समयमा रेजि ब्यागको प्रयोग घटाउनका लागि एउटा नयाँ विकल्पको रूपमा, फुकुओका शहरमा फोहोर फाल्दा प्रयोग गर्न मिल्ने रेजिझोला "फुकुरेजि"को शुरुवात गरिएको छ।

माई ब्याग बिर्सनु भएको बेला वा अचानक किनमेलको अवस्थामा रेजि ब्याग किन्ने आवश्यकता परेमा, प्लास्टिक फोहोर घटाउने र रेजि ब्यागको खर्च जोगाउने "फुकुरेजि" लाई रोज्नुहोस्।

फुकुरेजि, १५ लिटरको १५ येन तथा १० लिटरको १० येन गरि २ प्रकारको साइजहरुमा उपलब्ध छ। रेजिझोलाको रूपमा प्रयोग गरेपछि, त्यसलाई घरेलू फोहोर फाल्दा, जल्ने फोहोरको झोलाको रुपमा प्रयोग गर्न सकिन्छ। नियमित फोहोर निकाल्ने बेला जस्तै, फुकुओका शहरले तोकिएको समय र स्थानमा फोहोर फ्याँक्न सकिन्छ।

झोलाको डिजाइन कलाकार इफुकु खाजुहिकोले ल "मानिस र प्रकृतिप्रति सहानुभूतिका भावनाले सिर्जना गर्ने 'सहानुभूतिको चक्र'"लाई चित्रित गरेर तयार गर्नुभएको हो।

प्लास्टिक फोहोर घटाउनका लागि, कनभिनि, सुपरमार्केट, ड्रगस्टोरमा रेजिझोलाको आवश्यकता पर्दा, "फुकुरेजि" लाई रोज्नुहोस्।

【यो फुकुओका शरहको सूचना हो।】

 “नयाँ वर्षको बिदाहरुमा वार्ड अफिस काउण्टर अनि फोहोर फाल्ने दिनसम्बन्धि सूचना”

नयाँ वर्षको बिदाहरुमा, वार्ड अफिसको काउण्टर र फोहोर फाल्ने दिन परिवर्तन हुने भएकाले, कृपया ध्यान दिनुहोला।वार्ड अफिसको काउण्टर, डिसेम्बर २८ (शनिबार) देखि जनवरी ५(आइतबार) सम्म बन्द रहनेछ।

नयाँ वर्षको बिदाहरुको अघिपछि वार्ड अफिसको काउण्टर भीड हुने भएकोले, धेरै समय राखेर जाने गरौँ।

डिसेम्बर ३१ (मङ्गलबार) देखि जनवरी ३ (शुक्रबार) सम्म, फोहर संकलन हुनेछैन।

जल्ने फोहरको मात्र संकलन, डिसेम्बर ३० (सोमबार) सम्ममा हुनेछ। 

नयाँ बर्षको जनवरी ५ (आइतबार) बाट संकलन पुनः शुरु हुने हुनाले तोकिएको बारमा फोहर बाहिर राख्नुहोस्।

सँधै मंगलबार र शुक्रबार फोहर संकलन हुने क्षेत्रहरुमा, त्यसको सट्टा जनवरी ४ (शनिबार) मा संकलन हुनेछ।

नजल्ने फोहर तथा खाली सिसाको बोतल, प्लास्टिकको बोतल फाल्नका लागि, 

जनवरी १ (बुधबार) मा संकलन हुने क्षेत्रमा डिसेम्बर २९ (आइतबार) मा र

जनवरी २ (बिहीबार) मा संकलन हुने क्षेत्रमा डिसेम्बर ३० (सोमबार) फोहर बाहिर राख्नुहोस्। 

त्यसैगरी, ठूलो आकारका फोहरको काउण्टर तथा संकलन, डिसेम्बर २९ (आइतबार) देखि जनवरी ३ (शुक्रबार) सम्म बन्द हुनेछ।

फोहोर बाहिर राख्ने बारेमा जानकारी प्राप्त गर्न चाहनुहुन्छ भने, अनुवाद सेवा केन्द्रमा फोन गरेर आफ्नो वार्ड कार्यालयमा सम्पर्क गर्न सक्नुहुन्छ। 

फोन नम्बर （०९२-७५३-६११३） हो। 

कृपया आफू बस्ने वार्ड र फोहोर बाहिर राख्ने सम्बन्धी सोधपुछको बारेमा भन्नुहोस्। 

समय, ९:०० बजेदेखि १७:०० बजेसम्म।शनिबार, आइतबार, सार्वजनिक बिदा, र डिसेम्बर२९ देखि १ जनवरी ३ बन्द हुनेछ।

【भारतको महावाणिज्य दूतावास】

यहाँ फुकुओकामा, नयाँ "भारतको महावाणिज्य दूतावास" स्थापना हुँदैछ।
अहिले भारतको महावाणिज्य दूतावास ओसाकामा रहेको छ, र अब फुकुओका दोस्रो स्थान हुनेछ।

फुकुओकामा अहिले अमेरिका, चीन, दक्षिण कोरिया, भियतनाम, र थाइल्यान्डको महावाणिज्य दूतावासहरू छन्। तर, अब क्युशु क्षेत्रमा काम गर्ने भारतीय नागरिक र कम्पनीहरूको संख्या बढ्ने अपेक्षा गरिएकोले, डिसेम्बरमा यो दूतावास स्थापना गरिनेछ।

नयाँ महावाणिज्य दूतावासमा भिसा जारी गर्नका साथै, यहाँ बस्ने भारतीयहरूको सुरक्षाको व्यवस्थापन र अन्य कानुनी प्रक्रियाहरू, साथै भारतीय अर्थतन्त्र र संस्कृतिसम्बन्धी जानकारी उपलब्ध गराइनेछ।
एशियाको प्रवेशद्वार फुकुओका शहर अब अझ बढी जीवन्त र चहलपहल हुने भएको छ!

【फुकुओका शहरको सूचना】

“विश्व एड्स दिवस सम्बन्धि”

HIV सङ्क्रमण भएपछि, केही वर्षसम्म कुनै लक्षण नदेखिन सक्ने भएकाले धेरै मानिसहरूलाई एड्सको लक्षण देखिएपछि मात्र यसको निदान हुन्छ भन्ने अनुमान गरिएको छ।
तर, HIV सङ्क्रमणलाई चाँडै पत्ता लगाएर सही स्वास्थ्य हेरचाह र उपचार गर्दा एड्सको लक्षण विकास हुनबाट बचाउन सकिन्छ। सङ्क्रमण हुँदा पनि लक्षण नदेखिने अवधि लामो हुने भएकाले, चाँडै परीक्षण गराउन सल्लाह दिइन्छ। प्रत्येक क्षेत्रमा रहेको स्वास्थ्य तथा कल्याण केन्द्रहरूमा निःशुल्क र गोप्य रूपमा HIV परीक्षण गराउन सकिन्छ। परीक्षणका दिन निश्चित गरिएका हुन्छन्, त्यसैले जानुअघि अग्रिम जानकारी लिनुहोस्।

एड्सबाट पीडित मानिसहरूप्रति सहानुभूति र सहयोगको प्रतीक "रेड रिबन" हो। रेड रिबनले तपाईँको एड्सबारे कुनै पूर्वाग्रह नरहेको र एड्ससँग जीवन बिताइरहेका मानिसहरूप्रति भेदभाव नगर्ने सन्देश दिन्छ।

रेड रिबनलाई सम्झेर, डिसेम्बर १ देखि ७ सम्म, Hakata Port Tower र Fukuoka Red Brick Culture Museum  रातो रङ्गले झिलिमिली बनाइनेछ।

विश्व एड्स दिवसलाई अवसर बनाएर, एड्सप्रति चासो बढाई, सही जानकारी र बच्नका उपायहरूबारे सबैले सोचेर हेरौं।

“फोहरको गैरकानूनी डम्पिङ”

जंगल, समुद्र तट, नदी, सडक, पार्क आदि ठाउँमा फोहोर फाल्नुलाई गैरकानूनी डम्पिङ भनिन्छ। फुकुओका शहरमा, वर्षको अन्त्यमा धेरै सफाइ गर्दा फोहोरको मात्रा बढ्ने भएकोले डिसेम्बर महिनालाई "गैरकानूनी डम्पिङ रोकथाम सुदृढीकरण महिना" को रूपमा लिइन्छ, र यस महिनामा गैरकानूनी डम्पिङ रोकथामका लागि गतिविधिहरूलाई अझ सुदृढ बनाइन्छ।

शहरले प्रहरीसँग सहकार्य गरी गस्ती गर्ने, तथा गैरकानूनी डम्पिङ हुने ठाउँहरूमा निगरानी क्यामेरा र चेतावनी बोर्डहरू राख्ने कार्य गरिरहेको छ। 

टिभी, फ्रिज/फ्रिजर, वाशिंग मेसिन/कपडा सुकाउने मेसिन, र एसीलाई घरायसी उपकरण पुन:प्रक्रिया कानुनअनुसार तोकिएको विधिबाट नै फाल्नुपर्छ। नयाँ सामान किन्दा पुराना सामान फिर्ता दिनुहोस्, वा जहाँबाट किन्नुभएको थियो, त्यहीँ पसलमा फिर्ता गर्नुस्।

यस बाहेकका सामानहरुसङ्कलनकालागि, आफ्नो नजिकको Yamada Denki मा लिनुहुन्छ कि भनेर सोधपुछ गर्नुहोला वा फुकुओका शहरसँग सम्झौता गरेको Rinet Japan Recycle तथा SG Moving कम्पनीलाई संकलनको लागि सम्पर्क गर्न सक्नुहुन्छ। रिसाइकल शुल्क र संकलन ढुवानी खर्च लाग्नेछ।

साथै, कम्प्युटरको सङ्कलन लागि त्यहि कम्युटर कम्पनि वा Rinet Japan Recycle मा अनुरोध गर्नुहोस्।

घरबाट निस्कने अनावश्यक वस्तुहरूको संकलन गराउन, सामान्य फोहोर संकलन/ढुवानी अनुमति प्राप्त संस्थासँग मात्र सम्पर्क गर्नुहोस्। अनुमति नभएको संस्थालाई सम्पर्क गर्दा, फोहोरको गैरकानूनी डम्पिङ, उच्च शुल्कको माग, जस्ता समस्याहरू आउन सक्छन्, त्यसैले प्रयोग नगर्नुहोस्।

【फुकुओका सिटी चिडियाखानामा हात्ती आइपुगेको छ!】

फुकुओका सिटी चिडियाखानामा चारवटा हात्तीहरु, हालै म्यानमारबाट आएका छन्! ती चारमध्ये एउटा भाले र तीनवटा पोथीहरु छन्। उनीहरूलाई तीन महिना जति नयाँ वातावरणमा अनुकूलन गरिनेछ, त्यसपछि उनीहरूलाई यस शरद ऋतुमा सर्वसाधारणका लागि प्रदर्शन गरिने योजना रहेको छ। अहिले ती चारै हात्तीहरू स्वस्थ छन् र कुनै स्वास्थ्य समस्या छैन। चिडियाखानामा नयाँ हात्तीहरूको तस्बिर र भिडियो पनि हेर्न सकिन्छ। साथै, अगस्त ८ सम्ममा, ती चार हात्तीहरूको नामको लागि सुझाव पनि मागिएको छ।

अहिले, गर्मी मौसमको विशेष कार्यक्रम "रातको चिडियाखाना" पनि ९ सेप्टेम्बरसम्म प्रत्येक शनिवार आयोजना भइरहेको छ। यस कार्यक्रमको क्रममा, रातमा सक्रिय हुने जनावरहरूको व्यवहार र उनीहरूको खाना खुवाउने समयको अवलोकन गर्न सक्नुहुन्छ। यो विशेष अनुभवलाई मिस नगर्नुहोस् र गर्मीको समयमा मात्र खुला हुने, यस कार्यक्रमको मजा लिन फुकुओका सिटी चिडियाखानामा घुम्न जानुहोस्!

【फुकुओका शहरको सूचना】

मापसे ड्राइभिंग उन्मूलनको बारेमा

२००६ अगस्त २५ मा, हिगासी वार्डको "उमि नो नाखा मिची ओहाशी" मा, मापसे गरि सवारी चलाउँदा, तीन जना बच्चाहरुको ज्यान जाने गरि दुर्घटना भएको यस वर्षबाट १८ वर्ष पुग्यो। फुकुओका सिटीले यस दुर्घटनालाई मध्यनजर गरि, मद्यपान गरेर सवारी चलाउने कार्यलाई अन्त्य गर्नका लागि विभिन्न पहलहरू गर्दै आएको छ।

मदिरा सेवन गरि गाडी चलाउनु अपराध हो। 

मदिराको सेवन गरेपछि कार, मोपेड, वा साइकल नचलाउनुहोस्।

मदिराको सेवन गरेको व्यक्तिलाई कार भाँडामा दिने वा गाडी चलाउने व्यक्तिलाई रक्सी पिउन प्रोत्साहन नगर्नुहोस्। साथै, सवारी चालकले मदिराको सेवन गरेको थाहा पाउँदा, त्यस कारमा नचढ्नुहोस्।

मदिरा सेवन गरि गाडी चलाउँदा, ध्यान र निर्णय गर्ने क्षमता कम हुन्छ। यसले गर्दा खतराको आभास ढिलो हुने,अत्यधिक गति गर्ने जस्ता कार्यहरू हुन सक्छ, जसले गर्दा सडक दुर्घटनाको सम्भावना बढ्छ।

साथै, निम्न किसिमको गाडीहरुलाई हेरेरचालकले मदिरा सेवन गरि चलाएको थाहा हुन सक्छ। यदि यस्तो देख्नु भएमा, कृपया ११० नम्बरमा सम्पर्क गर्नुहोस्।

• ट्राफिक लाइटमा स्टप लाइनभन्दा निकै अघि गाडी रोकिन्दा 

• ट्राफिक लाइट हरियो बले पनि, गाडी नचलाउँदा 

• अनियन्त्रित रुपले गाडी गुड्दा

• गाडीको गति अचानक बढ्ने-घट्ने भई रहँदा

"मदिरा सेवन गरि सवारी नचलाऔं, चलाउन नदिऔं, यस्तो काम गर्नेलाई माफी नदिऔं र देखेपछि बेवास्ता नगरौँ"  भन्ने दृढ इच्छाशक्ति प्रत्येक व्यक्तिमा हुनु आवश्यक छ। 

हामी सबै मिलेर मदिरा सेवन गरेर गाडी चलाउने कार्यलाई पूर्ण रूपमा अन्त्य गरौँ!

 Fukuoka Prize को बारेमा

 फुकुओका शहरले एशियाली शैक्षिक अनुसन्धान, कला र संस्कृतिमा उल्लेखनिय योगदान पुर्‍याउनेव्यक्तिहरुलाई Fukuoka Prize ले सम्मान गर्दै आईरहेको छ। 

यस वर्षको ३४औँ Fukuoka Prize का विजेताहरुमा,

The Grand Prize कोविजेतामा, मिडिया आर्टको क्षेत्रमा सक्रिय हुनुहुने मानाबे डाइतो 

The Academic Prize मा, इतिहासविद् सुनील अमृत

The Arts and Culture Prize मा, कलाकार किमसुजा छनोट भएका छन्।

पुरस्कार समारोह सेप्टेम्बर २६ (बिहीबार) र त्यसपछि सेप्टेम्बर २७ (शुक्रबार) र २८ (शनिबार) मा नागरिक मञ्चको आयोजना हुनेछन्।

२७  (शुक्रबार) The Grand Prize विजेता मानाबे डाइतोको लेक्चर, २८ (शनिबार) दिउँसो, The Academic Prize प्राप्त गर्ने सुनिल अमृत, र साँझमा The Arts and Culture Prize विजेता किम सुजाको लेक्चर हुनेछन्।

सबैमा निःशुल्क सहभागी हुनसक्नुहुन्छ।

आवेदन दिनका लागि, "福岡アジア文化賞" वा "Fukuoka Prize" भनि खोजी, आधिकारिक होमपेजमा

हेर्नुहोला।

आवेदनको अन्तिम मिति सेप्टेम्बर ५ (बिहिबार) सम्म। पुरस्कार समारोह वा नागरिक फोरम जुन कार्यक्रम भए पनि दुई दिन अघि आवेदन दिन आवश्यक छ।

【हियाशी च्युखा अर्थात् चिसो चाइनीज नूडल्स】

 यस समयतिर, खानपानका पसलहरुमा "हियाशी च्युखा शुरु गरियो!" भन्ने सूचना बोर्ड कहिल्यै देख्नुभएको छ? वा तपाईंहरूले यो "हियाशी च्युखा" कहिल्यै खानु भएको छ? "हियाशी च्युखा" को अर्थ के होला भनेर सोचिरहनुभएकाहरु पनि हुनुहुन्छ होला!

हियाशी च्युखा भन्ने शब्दमा "चाइनीज" भाषा छ, र यसको अर्थ "चाइनीज नूडललाई चिसो पानीमा भिजाएर बनाइएको परिकार" हो तर, वास्तबमा यो चाइनीज परिकार भने होइन। यसको उत्पत्ति जापानमा भएको हो। पहाड जस्तै धेरै हालिएको नूडलमा, काक्रो, ह्याम, गोलभेंडा आदि वरिपरि घेरामा राखिन्छ, जसले माउन्ट फुजीको सम्झना दिन्छ रे। यसलाई खाँदा, भिनेगर सोया सस वा तिलको सस हालेमा ताजा र स्वादिलो हुन्छ।

 चासो लाग्ने "हियाशी च्युखा शुरु गरियो" भन्ने वाक्यांशको उत्पत्तिका बारेमा विभिन्न भनाइहरू छन्, तर सामान्य अर्थमा "गर्मीको मौसम आएकोले चिसो नूडल्स तयार छ, खान आउनुहोस्!" भन्ने कुरा संक्षेपमा व्यक्त गर्छ।

अत्यधिक गर्मीले खानाको इच्छा घट्ने गर्मीमा, गर्मीको थकान रोक्नका लागि यो मेनु उत्तम छ!

【फुकुओका शहरको सूचना】

फुकुओका शहरबाट, “फुकुओका शहर राष्ट्रिय स्वास्थ्य बिमा” सम्बन्धि सूचना छ।

जापानमा, बिरामी पर्दा वा चोट लागेमा, कम खर्चमा निश्चिन्त भएर उपचार सेवा प्राप्त गर्नका लागि, सबै व्यक्तिहरूलाई सार्वजनिक स्वास्थ्य बिमा प्रणालीमा सामेल हुने व्यवस्था गरिएको छ। ३ महिनाभन्दा बढी समयसम्म जापानमा बस्न अनुमति प्राप्त गरेका व्यक्तिहरूले, कम्पनीको स्वास्थ्य बिमा नभएका हकमा, राष्ट्रिय स्वास्थ्य बिमा लिनु अनिवार्य छ। यो बिमा लिन, तपाईं बसोबास गरिरहनु भएको क्षेत्रको वार्ड कार्यालयमा गएर प्रक्रिया पूरा गर्नु पर्छ।

फुकुओका शहरको राष्ट्रिय स्वास्थ्य बिमा लिनुभएको व्यक्तिले बिमा शुल्क तिर्नु पर्छ। बिमा शुल्क तपाईंहरूको स्वास्थ्य उपचार खर्चका लागि महत्त्वपूर्ण स्रोत हो। २०२४ अप्रिलदेखि २०२५ मार्चसम्मको बिमा शुल्क, गत वर्षको आम्दानी लगायतका आधारमा जुन महिनामा निर्धारण गरिएको छ।

राष्ट्रिय स्वास्थ्य बिमा लिने व्यक्तिहरूलाई, जुन महिनाको मध्यमा नीलो रंगको खाममा तिर्नुपर्ने सम्बन्धि सूचना पठाइएको छ, कृपया जाँच गर्नुहोस्। खामभित्रका कागजातमा लेखिएको बिमा शुल्कको रकम जाँच गरेर, तोकिएको म्याद भित्र बिमा शुल्क तिर्नुहोस्। यदि बिमा शुल्क समयमै तिरेन भने, तपाईंको सम्पत्ति छानबिन गरेर, बचत वा तलब जफत गर्न सकिन्छ, त्यसैले ध्यान दिनुहोस्। 

यदि कुनै कुरा बुझ्न गाह्रो भएमा, फोन मार्फत १८ वटा भाषाहरुमा परामर्श लिन सकिन्छ। फोन नम्बर ०९२-७५३-६११३ हो। यो नम्बरमा फोन गर्दा पहिले दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ। आफू बस्ने वार्ड अनि तपाईंले बुझ्न चाहेको कुरा भन्नुहोला।

【फुकुओका सिटी इन्टरनेशनल फाउण्डेसनको सूचना】

“विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४” आयोजना

फुकुओका सिटी इन्टरनेशनल फाउण्डेनमा, NPOफुकुओका कम्युनिटी लिभिङ टुगेदर रपब्लिक इन्टरेस्ट इन्कर्पोरेटेड फाउन्डेसन फुकुओका YWCA सँगको सहकार्यमा, "विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४" आयोजना हुने भएको छ।

यस परामर्श कार्यक्रममा, विदेशी मूलका बालबालिकाहरूका लागि प्रिस्कूलरदेखि हाई स्कूल सम्मको शैक्षिक परामर्श दिईन्छ। यस अतिरिक्त, अध्यागमन ब्यूरो र प्रशासनिक कानूनी सल्लाहकारहरूद्वारा बसोबास सम्बन्धी परामर्श पनि लिन सक्नुहुन्छ।

परामर्श नि:शुल्क हो। जापानी, अंग्रेजी र चाइनिज भाषाहरुमा परामर्श उपलब्ध छन्।

कार्यक्रम हुने दिन: जुलाई १३, शनिबार दिउँसो १:०० देखि बेलुकी ५:०० बजेसम्म

आयोजना स्थल: हाकाता वार्डको तेन्यामाचीमा स्थित फुकुओका सिटी इन्टरनेशनल सेन्टर

सोधपुछको लागि, कृपया फुकुओका सिटी इन्टरनेशनल फाउण्डेसनमा सम्पर्क गर्नुहोस्। 

फोन मार्फत् वा फाउण्डेसनको वेबसाइटमा राखिएको सोधपुछ फारम मार्फत् सम्पर्क गर्न सक्नुहुन्छ। फोन नम्बर, ०९२-२६२-१७४४ हो।

【हाकाता ओरी】

फुकुओका हाकाताको परम्परागत शिल्पकला उत्पादन "हाकाता ओरी" को बारेमा थाहा छ ? 

"हाकाता ओरी" भनेको, फुकुओका शहरको मुख्यतया हाकाता क्षेत्रमा विशेष उत्पादन गरिएको रेशमी कपडा हो।

धेरै चरणहरू र कुशल कालिगरहरूको मेहनतबाट, कयौ महिना देखि आधा वर्षसम्मको लामो समय लिएर तयार गरिने, यो जापानको परम्परागत शिल्पकला उत्पादनहरू मध्ये एक हो।

"हाकाता ओरी" भन्ने बित्तिकै, हाकाता ओबीको नाम आई हाल्छ। यो बलियो अनि टिकाउ कपडाले बनेको हुन्छ, जसलाई कडा तान्दा पनि चाँडै बिग्रँदैन, त्यसैले यो किमोनोको ओबीको रूपमा अत्यन्त लोकप्रिय छ। वास्तवमा, यो ओबीलाई सुमो पहलवानहरूले पनि धेरै प्रयोग गर्छन्। ओबी सजिलै खुकुलो हुँदैन, र कस्सिने गरि बाँध्न सकिन्छ। ओबीलाई कसाउँदा आउने "क्युचु" आवाज, यसको विशेषता मानिन्छ।

"हाकाता ओरी" का ढाँचाहरूमा केही प्रकारहरू छन्, तर प्रमुख "खेन्ज्योउ गारा" भनेको फुकुओका सहरको प्रतीकको रूपमा JR हाकाता स्टेशन र फुकुओका एयरपोर्ट जस्ता ठाउँहरूमा प्रयोग गरिएको देख्न सकिन्छ।

हाल, दैनिक जीवनमा प्रयोग गर्न मिल्ने किसिमका हाकाता ओरीको प्रदर्शनी सावारा वार्डकोमोमोचीहामा स्थित "Hakata Traditional Craft and Design Museum"मा भइरहेको छ। यस प्रदर्शनीमा बलपेन, पेनकेस जस्ता लेखन सामग्रीहरू, वालेट, पाउच, नेमकार्ड राख्ने केशहरू जस्ता साना सामानहरू, व्यापारिक प्रयोजनका सामानहरु लगायत उपहारको रूपमा दिन मिल्ने करीब २०० थरि वस्तुहरूको प्रदर्शनी र बिक्री भइरहेको छ। यो प्रदर्शनी यस हप्ताको आइतबार, २३ तारिखसम्म सञ्चालन हुनेछ।

"Hakata Traditional Craft and Design Museum",  फुकुओका हाकाता क्षेत्रसँग सम्बन्धित परम्परागत शिल्पकला उत्पादनहरूको उत्कृष्ट सिर्जनाहरूको प्रदर्शनी र परिचय गराउने निःशुल्क थलो हो। प्रत्येक महिनाको पहिलो, दोस्रो, र तेस्रो आइतबार परम्परागत शिल्पकला कार्यशाला कक्षाहरू पनि सञ्चालन गरिन्छ।

सजिलैसँग हाकाताको संस्कृति अनुभव गर्न सकिने भएकाले, अवश्य पनि यस संग्राहलयको भ्रमण गर्नुहोस्। विस्तृत जानकारीका लागि, Hakata Traditional Craft and Design Museumको होमपेज हेर्नुहोस्।

【फुकुओका शहरको सूचना】

“कर सम्बन्धि”

जनवरी १ देखि फुकुओकामा बस्दै आउनुभएको व्यक्तिको यदि अघिल्लो वर्षको आय १० लाख नाघेको भएमा फुकुओका प्रान्तको कर तिर्नु पर्ने हुन सक्दछ।

 जुन १५ तिर कर तिर्न सूचना आउन सक्ने भएकोले, अवश्य पनि खामभित्रको ध्यानपूर्वक पढ्नुहोला। 

तिर्नुपर्ने म्याद र शुल्क लेखिएको हुन्छ। कोन्भिनी, बैंक वा हुलाक मार्फत तिर्नुहोला।

त्यस्तै, कम्पनीमा कार्यरत व्यक्तिहरुको हकमा, कर सीधै तलबबाट कटौती हुन सक्छ।

शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना हुन सक्दछ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत् परामर्श लिन सक्नुहुन्छ। 

फोन नम्बर, （०९२-७५३-६११३） हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

【पिउने पानी भर्ने स्पट / माई बोतल समर्थन स्टोर】

प्लास्टिकको प्रयोग कम गर्ने प्रयासमा, फुकुओका सिटीले शहरका बिभिन्न सार्वजनिक सुविधा स्थानहरूमा "आफ्नो बोतलमा पानी भर्न मिल्ने स्पटहरू" स्थापना गरेको छ। व्यक्तिगत बोतलको प्रयोगलाई बढावा दिन, सुरक्षित तथा स्वादिष्ट चिसो फुकुओकाको पिउने पानी निःशुल्क लाभ उठाउन सक्नुहुन्छ। आफ्नो बोतलमा जुनसुकै बेला पनि पानी भर्न सकून् भन्ने हेतुले वार्ड कार्यालयहरू, स्थानीय सामुदायिक केन्द्रहरू, व्यायामशाला र पार्कहरूमा यो सेवा उपलब्ध गरिएको छ।

यसका अतिरिक्त, फुकुओका शहरमा रहेका "फुकुओका सिटी माई बोतल समर्थन स्टोरहरु" मा बेच्न राखेका कफी र अन्य पेय पदार्थहरू, ग्राहकहरूले आफूसँग ल्याएका बोतलहरूमा दिने, त्यस्तै, स्टोर प्रयोग गर्ने ग्राहकहरूलाई निशुल्क पिउने पानी उनीहरुको बोतलमा भर्न दिने सेवा पनि प्रदान गर्दै आइरहेको छ।

"आफ्नै बोतलमा पानी भर्न मिल्ने स्पटहरू" र "फुकुओका सिटी माई बोतल समर्थन स्टोरहरू" कहाँ छन् भनेर "फुकुओका सिटी वेब म्याप" मा हेर्न सक्नुहुन्छ।

पक्कै पनि यस सेवाको लाभ लिनुहोस् र विश्वव्यापी वातावरण जोगाउन आफ्नो तर्फबाट मद्दत गर्नुहोस्।

【फुकुओका शहरको सूचना】

हलुका सवारी साधन कर सम्बन्धि

मोटरबाईक वा हलुका कार भएकाहरुले, अप्रिल १ मा हलुका सवारी साधन कर तिर्नु जरुरी छ।

यदि तपाईंसँग मोटरबाईक वा हलुका कार छ भने, हुलाक मार्फत कर तिर्नका लागि सूचना आउन सक्छ, अवश्य पनि भित्र राम्ररी हेर्नुहोला। 

मे को ३१ सम्ममा कोन्भिनी, बैंक वा हुलाक मार्फत तिर्नुहोला।

स्मार्टफोन भुक्तानी एप प्रयोग गरेर पनि कर शुल्क तिर्न सक्नुहुन्छ। 

यदि तपाईंले मोटरबाईक आदिको शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना पनि छ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत परामर्श लिन सक्नुहुन्छ। 

फोन नम्बर, (०९२-७५३-६११३) ।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

【हाकाता डोन्टाकु मिनातो महोत्सव】

फुकुओकाको गोल्डेन वीकलाई रंगीन बनाउने परम्परागत महोत्सव भनेको "हाकाता डोन्टाकु मिनातो महोत्सव" हो! यसलाई "फुकुओका नागरिकको महोत्सव" को रूपमा पनि चिनिन्छ, र यस वर्ष यो मे ३ र ४ तारिखमा दुई दिनसम्म मनाइनेछ।

यस महोत्सवको ८४० वर्ष भन्दा बढीको इतिहास रहेको छ, जुन हाकाताको परम्परागत कला 'माचुबायाशी' बाट सुरु भएको हो। यस महोत्सवमा सुन्दर रंगीन पोशाक लगाएर, शहर भरि "स्यामोजी" अर्थात् काठको पन्यू बोकेर नाच्दैहिँड्ने, विशेष किसिमको परेड हो।

परेडका साथै, शहरभर विभिन्न स्थानमा विविध कार्यक्रमहरू आयोजना हुन्छन्, जसमा परम्परागत कलाको प्रदर्शनी, कलाकारहरूको लाइभ प्रस्तुति र दिनभर स्टलहरू पनि राखिन्छन्। त्यहाँ फुकुओकाको प्रसिद्ध उमेगाए मोचि जस्ता खानाको  आनन्द पनि लिन सक्नुहुन्छ।

शहरवासीहरू मात्र नभई, देशभित्र र विदेशबाट पनि धेरै पर्यटकहरू आउने, र हरेक वर्ष २० लाख भन्दा बढी मानिसहरूको चहलपहल हुने "हाकाता डोन्टाकु मिनातो महोत्सव" हो। यो हाकाताको ईतिहास, संस्कृति, र मानिसहरूको जीवनशक्ति महसुस गर्ने एक उत्कृष्ट अवसर हो। अवश्य जानुहोस्!

【फुकुओका शहरको सूचना】

 साइकल चलाउने नियम सम्बन्धि सूचना

प्रायःजसो दैनिक रुपमा साइकल चलाउँछु भन्ने व्यक्तिहरु धेरै हुनुहुन्छ होला।

के तपाईंहरुलाई साइकल चलाउने तरिका र नियमको बारेमा थाहा छ?

जापानमा नियम अनुसार साइकल, मोटर-बाटोको बायाँ पट्टिबाट चलाउनु पर्छ।

सडक-पेटीमा पैदल यात्रीलाई प्राथमिकता दिनुपर्छ। सडक-पेटीबाट चलाउँदा मोटर-बाटो पट्टिको साइड भएर बिस्तारै चलाउने गरौं।  

साइकल चलाउने सबैले हेलमेट लगाउने गरौं।

राति नबिर्सिकन लाइट बाल्ने गरौं।

दुई जना चढ्ने र समानान्तर रूपमा सँगसँगै साइकल चलाउन निषेध भएकोले त्यस्तो कार्य नगरौं।

साथै, साइकलको हकमा पनि मादक पदार्थ सेवन गरी नचलाऔं।

छाता ओढेर चलाउने, मोबाइल फोन वा हेड फोन प्रयोग गरेर साइकल चलाउने गर्दा, दुर्घटनाको खतरा हुने भएकोले यस्ता कार्यहरु नगरौं।

साइकल पार्किंग गर्दा तोकिएको पार्किंग स्थलमा पार्क गर्ने गरौं।

साइकल पार्किङस्थल बाहेकका सडकमा पार्क गरिएका साइकलहरू, पैदल यात्रुहरुलाई समस्या पुर्‍याउने वा अवरोध हुने भएकाले, अनावश्यक रूपमा छाडिएका साइकलको रूपमा सारिन्छ।

फुकुओका शहरमा, यसरी उठाएर लगेका साइकल फिर्ता लिन २,५०० येन तिर्नु पर्छ, यदि निश्चित समय भित्र दावी गरेन भने, यसलाई खारेज गरिन्छ।

व्यावसायिक सुविधा र स्टेशन वरपर छोटो समयको प्रयोजनका लागि नि:शुल्क पार्किङ क्षेत्रहरू पनि हुने भएकोले अवश्य प्रयोग गरेर हेरौं।

यस अतिरिक्त, फुकुओका शहरमा साइकल चालकहरूले अनिवार्य रुपमा साइकल बीमा गर्नुपर्छ। साइकल दुर्घटना भयो भने, तपाईंले दुर्घटनामा परेको व्यक्तिलाई धेरै पैसा तिर्नुपर्ने अवस्था आउन सक्छ। 

तर, साइकल बीमा लिएको खण्डमा, उदाहरणका लागि, साइकल चलाउँदै गर्दा, कसैलाई चोटपटक पुगाएमा उपचार खर्च जस्ता खर्चहरू तपाईंको साटोमा बीमा कम्पनीले तिर्नेछ। 

सम्भावित दुर्घटनाको लागि तयारीका स्वरूप, अवश्य पनिसाइकल बीमा लिऔं।

पर्यावरण अनुकूल र सुविधाजनक सवारी साधन हो, साइकल। यसलाई चलाउँदा नियम तथा आचरणको पालन गर्ने गरौं।

【बेल्जियन बियर विकेन्ड】

बाहिर समय बिताउन राम्रो मौसम हुँदै आएको छ।यो सप्ताहको १७ तारिकबुधबारदेखि २१ तारिक आइतबारसम्म, फुकुओका सिटी हलको पश्चिम तिरको फुरेआई हिरोबामा "बेल्जियन बियर विकेन्ड" को आयोजन भइरहेको छ।

तपाईंहरुलाई बियर मन पर्छ? यहाँ फुकुओकामा बेल्जियम बियर आउँदैछ!

बेल्जियम ''बियरको स्वर्ग'' भन्दा पनि हुन्छ। तपाईंहरुलाई थाहा छ, बेल्जियममा, १६०० प्रकारभन्दा बढी बियरहरु बनाईन्छ र युनेस्कोको अमूर्त सांस्कृतिक सम्पदाको रूपमा पनि दर्ता भएको छ।

बेल्जियमको प्रतिनिधित्व गर्ने प्रमुख प्रकारहरू "व्हाइट बियर" र "फ्रुट बियर" जस्ता, १२ प्रकारका ५२ थरीका बेल्जियम बियरहरु चाख्न सकिन्छ। अनि, बियरको साथ रमाइलो गर्नको लागि गउरमेन्ट खानाको रूपमा, फ्लफी बेल्जियन फ्राइहरू ``फ्राइट्स'' र स्ट्युड बीफ ``कार्बोनेड'' जस्ता परम्परागत बेल्जियमका परिकारहरूको पनि मजा लिन सक्नुहुन्छ।

 थप रूपमा, बेल्जियमबाट "MaxPacemaker" को फुकुओकामा उपस्थिति हुनुका साथै, सप्ताहन्तको रातमा टेक्नो ध्वनिहरूको साथ कार्यक्रम स्थललाई जीवन्त बनाईनेछ। LOVEFM बाट पनि DJ को सहभागीता हुने, वार्ता, खेल, आदि मार्फत् कार्यक्रम निकै मनोरञ्जक हुनेछ!

सोमबारदेखि शुक्रबार १६:००देखि २२:००सम्म, तथा शनिबार र आइतबार ११:००देखि २०:०० सम्म कार्यक्रम आयोजना हुनेछ।

यस वसन्त ऋतुको राम्रो मौसममा, बाहिर घुमघाम गर्ने, अनि बेल्जियमको बियर, खाना र संगीतको आनन्द लिएर हेर्दा कसो होला! 

 【फुकुओका शहरको सूचना】

 फोहर फ्याँक्ने नियम सम्बन्धी

फुकुओकामा नयाँ जीवनयापन शुरु गर्नुहुने धेरै संख्यामा हुनुहुन्छ होला।

यसपटक, फोहर फ्याँक्ने नियम सम्बन्धी सूचना रहेको छ।

फुकुओकामा फोहरलाई "जल्ने फोहर", "नजल्ने फोहर", "खाली सिसाको बोतल/प्लास्टिकको बोतल", अनि "ठूला आकारको फोहर" मा विभाजन गरी फ्याँक्ने गरिन्छ। "ठूला आकारको फोहर" बाहेक अन्य सबै फोहरहरूका लागि, कन्भिनियन्स स्टोर वा सुपर मार्केटमा बेची राखेको, फुकुओका शहरको फोहर-फाल्ने-झोला प्रयोग गरेर फोहोर फाल्ने गर्नुहोस्।

जल्ने फोहरको लागि, रातो रंगको फोहर-फाल्ने-झोला हो।

कच्चा फोहोर, कागज, कपडा, प्लास्टिक आदि फाल्ने बेलामा, रातो झोला प्रयोग गर्नुहोस्।

खाली क्यान र गिलास जस्तालाई, नजल्ने फोहरको रुपमा, निलो फोहर-फाल्ने-झोलामा फाल्ने गर्नुहोस्।

खाली सिसाको बोतल र प्लास्टिकको बोतल फाल्नको लागि, पहेंलो रंगको फोहर-फाल्ने-झोला प्रयोग गर्नुहोस्।

बसोबास गर्ने ठाउँ अनुसार फाल्ने दिन तोकिएको हुन्छ।  

जल्ने फोहर हप्तामा २ पटक, खाली सिसाको बोतल/प्लास्टिकको बोतल र नजल्ने फोहर चाहिँ महिनाको १ पटक संकलन हुन्छ।

फोहर मध्यरात संकलन हुनेभएकोले अँध्यारो भएदेखि रातिको १२ बजे सम्ममा, फोहर फाल्ने निश्चित ठाउँमा फाल्ने गर्नुहोस्।

फुकुओका शहरको आधिकारिक LINE ID मा Friendadd गरेर, तपाईंको ठेगाना सेट गर्नुभयो भने, फोहोर फाल्ने दिनमा सूचना प्राप्त गर्नुहुनेछ।

फाल्न चाहनुभएको फोहोरको नाम राख्नुभयो भने, फोहोरको किसिम पनि जान्न मिल्ने भएकोले यो एकदम उपयोगी छ।

एउटा झोलामा नअट्ने ठूला आकारको फोहर वा झोला नै च्यात्ने किसिमको भारी फोहरलाई, ठूला आकारको फोहरको रुपमा फाल्नुहोस्।

ठूला आकारको फोहरका लागि, फोन, इन्टरनेट, वा LINE द्वारा ‘फुकुओका शी सोदाई गोमी उकेचुके’ मा सम्पर्क गर्नुहोस्। शुल्क, फोहोर फाल्ने ठाउँ, फाल्ने दिन, इत्यादि जाँच गरेर फोहोर बाहिर राख्नुहोस्।

फोनमार्फत सम्पर्कका लागि, ठुलो आकारको फोहर फाल्ने सेन्टरको फोन नम्बर, ०९२-७३१-११५३ । 

टेलिफोन अनुवाद मार्फत् १८ वटा  भाषाहरुमा सेवा उपलब्ध छ।

यस अतिरिक्त, QR कोड स्क्यान गरेर १० विभिन्न भाषाहरूमा फोहोर फाल्ने नियमहरूको बारेमा जानकारी प्रदान गर्ने सेवा पनि राखिएको छ। कृपया फुकुओका शहरको वेबसाइट हेर्नुहोस्।

【साकुराको ओहानामी अर्थात् साकुरा फूल फुलेको हेर्ने मेला】

 फुकुओकामा साकुराको ओहानामी अर्थात् साकुरा फूल फुलेको हेर्ने सिजन आउनै लागेको छ।

यस हप्ता, फुकुओका शहरमा साकुराको ओहानामी हेर्ने ठाउँहरूको जानकारी लिएर आएकी छु।

सर्वप्रथम, तेन्जिनबाट १५ मिनेट पैदल दूरीमा रहेको, माइजुरु पार्क।

यस पार्कको प्रतीक चिन्ह भन्नु पर्दा, पक्कै पनि फुकुओका दरबारको भग्नावशेष हो! फुकुओका दरबार वरपरका १००० वटा साकुरा रूखका फूलहरू अति सुन्दर, अनि त्यस माथि रातमा लाइट अप डिस्प्ले अति मनोरञ्जक हुने गर्छ। पानीको सतहमा प्रतिबिम्बित सुन्दर साकुराहरू देख्न सक्नुहुन्छ। यस सिजनको समयमा, त्यहाँ धेरै स्टलहरू र खानाका भ्यानहरू लाग्ने, अनि धेरै मानिसहरुको भीड हुने गर्छ।

अर्को छ, फुकुओका शहरको लगभग केन्द्रमा अवस्थित निशी पार्क ।

यो प्रिफेक्चरमा एक मात्र यस्तो स्थल हो, जुन ‘जापानमा १०० प्रसिद्ध साकुरा ओहानामी स्पटहरू’ मा पर्न सफल भएको छ। निशी पार्कमा १३०० साकुरा रूखका फूलहरूको आनन्द लिन सक्नुहुन्छ। यहाँ पनि, रातमा लाइट अप डिस्प्ले र धेरै स्टलहरूको मजा लिन सक्नुहुन्छ। यहाँको प्रसिद्ध ‘इमाया ह्याम्बर्गर’ खान चाहिं नछुटाउनु होला।

अन्य स्थलहरुमा, Fukuoka Zoo & Botanical Garden वरिपरीको Minami Park, हिगाशी वार्डको Uminonakamichi Seaside Park, र पैदल यात्रा गर्दै जंगलको स्वच्छ हावा र दृश्यको आनन्द लिन सकिने Aburayama Citizen's Forest, त्यस्तै, ‘शुभ साकुरा फूल’ भनि लोकप्रिय रहेको आतागो जिन्ज्या आदि थुप्रै साकुरा ओहानामी स्पटहरू छन्।

साकुरा ओहानामीको सिजन छोटो भएकोले यसलाई नछुटाउनुहोस्!

आशा छ, यस वर्ष पनि सुन्दर साकुरा फूलहरू देख्न सक्छौं ♪

【फुकुओका शहरको सूचना】

बसाईसराई फोहर सम्बन्धि

वसन्त ऋतुमा स्थान परिवर्तनको कारण फर्निचर र घरेलू उपकरण जस्ता ठूला आकारको फोहर बढ्ने समय हो।

यस पटक, ठूला आकारको फोहोर फाल्ने तरिका सम्बन्धि जानकारी दिनेछु।

ठूला आकारको फोहोर फाल्न, फोन, इन्टरनेट वा फुकुओका सिटीको LINE मार्फत अग्रिम आवेदन दिई, कन्भिनीयन्स स्टोर आदिमा प्रशोधन टिकट खरीद गर्नुहोस्।

फोहर संकलन, आवेदन दिएको मितिबाट एक हप्ता लाग्नेछ।

संकलनको दिनमा बिहान ८:३० सम्म तोकिएको ठाउँमा राख्नुहोस्।

ठूला आकारको फोहोर रिसेप्शन सेन्टरको फोन नम्बर ०९२-७३१-११५३ ।

इन्टरनेट वा LINE मार्फत २४ घण्टा जहिलेपनि आवेदन दिन सकिने भएकोले सुविधाजनक छ।

टिभी, फ्रिज, फ्रिजर, वाशिंग मेशिन, कपडा ड्रायर र एयर कन्डिशनरहरूको हकमा घरायसी सामान प्रशोधन कानुन बमोजिम फोहर फाल्ने विधि तोकिएको छ। 

नयाँ खरिद गर्नु हुँदा भएको पुरानो झिकेर लैजाने वा खरिद गर्नुभएको पसलबाट नै पुरानो झिकिदिने गर्नुहोस्। खरिद गर्नुभएको पसल थाहा नभएमा, नजिकैको Yamada Denki मा सङ्कलन बारे सोधपुछ गर्नुहोस्। संकलन गर्न लगाउँदा, रिसाइकल शुल्क, संकलन र यातायात शुल्क तिर्नु पर्छ।

नागरिक विपद् रोकथाम दिवस

फुकुओका शहरमा, सन् २००५ मार्च २० मा गएको फुकुओका प्रान्त पश्चिम अपतटीय भूकम्पको अनुभवलाई नबिर्सन मार्च २० लाई "नागरिक विपद् रोकथाम दिवस" को रूपमा तोकिएको छ।

पछिल्ला वर्षहरूमा विभिन्न ठाउँहरुमा भूकम्प, भारी वर्षा जस्ता ठूला प्रकोपहरू भएका छन्। विपद् कहिले आउँछ भनेर थाहा हुँदैन। 

विपद् आईपर्दा, प्रत्येक व्यक्तिले उपयुक्त कदम चाल्नको लागि, दैनिक आधारमा तयारी गर्न महत्त्वपूर्ण छ।

फुकुओका शहरको वेबसाइटबाट Hazard Map वा विपद् सम्बन्धि जानकारी लिने, आश्रय लिने स्थानमा जाँदा लिएर जानुपर्ने सामान पहिलेदेखि तयारी र जाँच गरि राख्ने गर्नुहोस्।

"नागरिक विपद् रोकथाम दिवस" को अवसरमा, आफ्नो, आफ्नो परिवार र समुदायको सुरक्षाको लागि विपद् रोकथामको बारेमा सोचौं।

【माउन्ट फुजी】

भोलि शुक्रबार, फेब्रुअरी २३ तारिख "माउन्ट फुजी दिवस" ​​हो। के तपाईंले कहिल्यै "Mt. Fuji" देख्नुभएको छ? जापानका हिमालहरु भनेपछि, पहिलो नाम आउँछ माउन्ट फुजीको। यो जापानको सबैभन्दा अग्लो हिमाल हो, जसको उचाई ३,७७६ मिटर छ। अहिले पनि यो हिमालमा ज्वालामुखी सक्रिय छ। 

यो यामानाशी प्रिफेक्चर र शिजुओका प्रिफेक्चरको बीचमा अवस्थित छ, उत्तरमा यामानाशी प्रिफेक्चर र दक्षिणमा शिजुओका प्रिफेक्चर पर्दछन्। तर, पहाडको टुप्पोतिर भने कुनै प्रीफेक्चरल सीमानाहरू छैनन्, त्यसैले कुनै पनि प्रान्तमा पर्दैन जस्तो देखिन्छ। यद्यपि, पहाडको टुप्पोमा रहेको हुलाक कार्यालय भने शिजुओका प्रिफेक्चरभित्र पर्छ। त्यहाँ एउटा मन्दिर पनि छ, जहाँ विवाह समारोह पनि गरिन्छ। माउन्ट फुजी जापानमा स्कीइङको उद्गम स्थल हो, त्यसैले यहाँस्कीइङका लागि बर्सेनि ठूलो घुइँचो लाग्ने गर्छ। माउन्ट फुजीलाई फोटोमा वा टेलिभिजनमा हेर्दै आए पनि एकचोटी वास्तबमा गएर हेर्न भने मलाई मन छ।

जापानका सार्वजनिक स्नानगृहमा जानुभएकाहरुले, पक्कै पनि त्यहाँ माउन्ट फुजीको सुन्दर कला कोरिएको देख्नु भएको हुनुपर्छ। माउन्ट फुजी प्रायः जापानी सार्वजनिक स्नानगृहको नुहाउने ठाउँको भित्तामा चित्रित हुन्छ। त्यस्तै, जापानी कविता, साहित्यिक लेख, पैसाको नोट आदिमा पनि जापानको प्रतीकको रुपमा यसलाई प्रयोग गर्दै आईरहेको छ। माउन्ट फुजी विश्वभर चिनिएको, दायाँबायाँ दुबैबाट समान आकार भएको दुर्लभ सुन्दर हिमाल हो, जुन विश्व सांस्कृतिक सम्पदा स्थलको रूपमा पनि दर्ता भएको छ।

 【फुकुओका शहरको सूचना】

“शहर तथा प्रान्तीय करफाइल गर्ने सम्बन्धि”

फुकुओका शहरले रेइवा ६ को शहर तथा प्रान्तीय कर फाइल लिईदैछ। 

कर फाइल गर्ने म्याद, मार्च १५ शुक्रबारसम्म हो। 

कर फाइल बुझाउने काउन्टर चाहिं वार्ड कार्यालयको कर बिभागमा, सोमबारदेखि शुक्रबार बिहान ९:०० बजेदेखि बेलुका ५:०० बजेसम्म खुला रहनेछ।

काउण्टर भिडभाड हुने भएकोले, कृपया हुलाक वा अनलाइन मार्फत् कर फाइल गर्न अनुरोध गरिन्छ।

फुकुओका शहरमा कर फाइल गर्न आवश्यक व्यक्तिहरु भन्नाले, २०२४ को जनवरी १ देखि फुकुओका शहरभित्र ठेगाना भई २०२३ मा आम्दानी भएका व्यक्तिहरु पर्दछन्।

कर कार्यालयमा अन्तिम कर फिर्ती निवेदन पेश गर्नुहुने वा तलब आय मात्र भएको व्यक्तिको हकमा कम्पनीमा वर्षान्तको समायोजन गर्नुहुने आदिले कर फाइल गर्न आवश्यक छैन

 कर फाइलका लागि आवश्यक कागजातहरु,

• माइनम्बर कार्ड वा माइनम्बर बुझ्न सजिलो कागजपत्र 

• सवारीचालक परिचय पत्र, पासपोर्ट, बसोबास कार्ड आदि पहिचान खुल्ने कागजातहरू

• गेन्सेन्च्योउस्युउह्योउ आदि जस्ता गतवर्ष २०२३ को आय देखाउने कागजातहरु

• २०२३ मा गरिएका कटौतीहरुको कागजातहरू

आवश्यक कागजात वा कर फाइल गर्न आवश्यक छ छैन आदि बारे बिस्तृत जानकारीका लागि कृपया आफू बसोबास गर्दै आएको स्थानीय वार्ड कार्यालयको होमपेजमा हेर्नुहोला। नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

अंग्रेजी, चाइनिज, कोरियाली, भियतनामी र नेपाली जस्ता १८ वटा भाषाहरुमा परामर्श लिन सकिन्छ।

फोन नम्बर, ०९२-७५३-६११३ हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुन्छ।

तपाईं आफू बस्ने वार्ड र कर फाइलबारे बुझ्न चाहेको भन्नुहोला।

यस अतिरिक्त, वार्ड कार्यालयमा जानुहुँदा पनि आफ्नो फोन प्रयोग गरेर यस सेवा मार्फत् अनुवाद गर्न सकिने भएकोले नहिच्किचाइकन यसको प्रयोग गर्नुहोला।