Life in Fukuoka "Nepali"

【फुकुओका प्रान्तका सरकारी विद्यालयहरुमा साइकल चढेर विद्यालय जाने विद्यार्थीहरुका लागि हेलमेट अनिवार्य】

फुकुओका प्रिफेक्चरल एजुकेशन बोर्डले यस वर्षको अप्रिल महिनाबाट, सबै सरकारी विद्यालयका साइलबाट विद्यालय जाने विद्यार्थीहरूलाई हेलमेट लगाउनु अनिवार्य गर्ने निर्णय गरेको छ। फुकुओका प्रान्तमा हेलमेटको प्रयोग दर निकै कम छ, र तीमध्ये पनि हाईस्कूलका विद्यार्थीहरूमा यो दर सबैभन्दा कम रहेको छ। अध्ययन अनुसार, हेलमेट नलगाएमा, टाउकोमा परेको झट्का हेलमेट लगाउँदा भन्दा लगभग ४ गुणा बढी हुने देखिएको छ।

फुकुओका प्रान्तका सरकारी हाईस्कूलका लगभग ६०% विद्यार्थीहरू साइकलबाट स्कूल जान्छन्। नयाँ शैक्षिक सत्रको सुरुवातमा, स्कूलका नियमहरूमा साइकलबाट स्कूल जान अनुमति दिनुका शर्तमा हेलमेट लगाउनु पर्ने कुरा थपिने छ।

साइकल चलाउँदा हेलमेट लगाउनु अनिवार्य छ भन्ने चेतना अझ फैलाउनु, हाम्रो ज्यान जोगाउन महत्त्वपूर्ण छ। हेलमेट छनोट गर्दा, जापानको सुरक्षा मापदण्ड पुरा गरेको "SG मार्क" भएको हेलमेट छनोट गर्न महत्त्वपूर्ण छ।

हेलमेटको सही प्रयोग गर्न महत्त्वपूर्ण छ। यसलाई ठीक ढंगले, बायाँदायाँ समान रूपमा र चिउडोको पट्टा एक औंला मात्र अड्काउने गरी कस्नुपर्छ।

हाईस्कूलका विद्यार्थी मात्र होइन, सबैलाई साइकल चलाउँदा हेलमेट लगाउन र यातायात नियमहरू पालना गर्दै सुरक्षित यात्रा गर्न ध्यान दिनु पर्छ, जसले गर्दा दुर्घटना रोक्न सकिन्छ।

【फुकुओका शहरको सूचना】

“नोरोभाइरसदेखि सावधान!”

जाडोमानोरोभाइरसको कारण वान्ता हुने, पखाला हुने, पेट दुख्ने र बान्ता आउला जस्तो हुने समस्या बढी हुने गर्छ। यो भाइरस निकै शक्तिशाली हुन्छ र थोरै मात्रामा शरीरमा प्रवेश गरे पनि संक्रमित हुन्छ। भाइरस युक्त हात वा खानेकुराबाट भाइरस शरीरमा प्रवेश गर्दछ र त्यसलेपखाला, वाकवाकी, बान्ता र ज्वरो निम्त्याउँछ। संक्रमण भएका व्यक्तिको वान्ता वा पेचिसबाट हावा मार्फत भाइरस फैलन सक्छ, साथै संक्रमित व्यक्तिले पकाएको खाना खाने पनि संक्रमणको कारण बन्न सक्छ। अर्को कुरा, भाइरस युक्त ओइस्टर जस्ता शेलफिशलाई नतताईकन खाँदा पनि संक्रमण हुन सक्छ।

यदि वान्ता र पखाला निकै गम्भीर भएमा, शरीरमा पानीको कमी (डिहाइड्रेशन) हुन सक्छ। त्यसैले, चाँडो भन्दा चाँडो चिकित्सकसँग परामर्श गर्नु महत्त्वपूर्ण छ। सामान्यतया २-३ दिनमा लक्षण सुधार हुन्छ, तर लक्षण हराए पनि १ हप्ता देखि १ महिना सम्म भाइरस शरीरबाट बाहिर निस्कने गर्दछ र यसले अन्यलाई संक्रमित गर्न सक्छ, त्यसैले सावधानी अपनाउनु पर्छ।

संक्रमण फैलिन नदिनका लागि केहि सावधानीहरु अपनाउनु महत्त्वपूर्ण छ:

खाना पकाउनु अघि, खाना खानु अघि, शौचालय पछि आदिमा, अवश्य साबुन पानीले हात धुनुहोस्।

खाना पकाउने सामग्री र भाँडाहरू हरेक पटक प्रयोग गरेपछि राम्रोसँग धोएर तातो पानी वा क्लोरीन ब्लीचले कीटाणुरहित पार्नुहोस्।

अल्कोहल स्यानिटाइजर नोरोभाइरसमा प्रभावकारी हुँदैन।

नोरोभाइरस ८५℃ देखि ९०℃ तापक्रममा ९० सेकेन्डभन्दा बढी समयसम्म तातो गरेपछि मर्छ।

खाद्य सामग्रीलाई राम्रोसँग पकाउनुहोस् र नपकाइएको फलफूल र सागसब्जी राम्ररी पखाल्नुहोस्।

यदि स्वास्थ्य खराब छ भने, खाना पकाउनबाट बच्नु महत्त्वपूर्ण छ।

स्वास्थ्य खराब हुँदा अस्पताल जानु परेमा, फुकुओका सिटीमा मेडिकल अनुवाद कल सेन्टर उपलब्ध छ। यसलाई प्रयोग गरेर अस्पतालमा डाक्टरसँग कुरा गर्न वा औषधि लिनको लागि प्रयोग गर्न सकिन्छ। साथै, कुन अस्पतालमा जानु पर्ने हो थाहा नभएमा पनि परामर्श लिन सकिन्छ।

कल सेन्टरको फोन नम्बर ०९२-७३३-५४२९ हो। 

यो सेवा २४ घण्टा, हप्ताका सबै दिनहरूमा, २० भाषामा उपलब्ध भएकोले, समस्या परेमाउपयोग गर्नुहोस्।

【गोखाकु किगान्】

परीक्षाको मौसम चलिरहदा, यस साता अन्त्यमा परीक्षा दिने विद्यार्थीहरू धेरै हुनुहुन्छ होला। जापानमा, परीक्षा र चयन प्रक्रिया जस्ता चुनौतीहरूको सामना गर्दा, विद्यार्थीहरूले राम्रो नतिजा प्राप्त गर्न र लक्ष्य पूरा गर्न 【गोखाकु किगान्】अर्थात् परीक्षामा सफलताको लागि प्रार्थना गर्ने परम्परा छ। यसका लागि, मन्दिरमा गएर भगवानसँग सफलताको लागी प्रार्थना गर्ने र मेहनेत गर्छु भनी संकल्प लिने गरिन्छ।

फुकुओका सिटीको हिगासी वार्डमा रहेको 【हाकोजाकिगू】 जापानका तीन प्रमुख मन्दिरहरूमध्ये एक हो। यस मन्दिरलाई “संकट हटाउने र विजयको देवता” को रूपमा पनि चिनिन्छ र यहाँ परीक्षा सिजनमा धेरै विद्यार्थीहरू सफलताको लागि प्रार्थना गर्न जान्छन्। त्यस्तै, तेंन्जिन क्षेत्रमा स्थित【सुइक्यो-तेन्मान्गू)】 मन्दिरमा पनि शिक्षाको देवता पूजा गरिन्छ र यहाँ पनि धेरै विद्यार्थीहरू सफलताको लागी प्रार्थना गर्न जान्छन्।

प्रार्थना गर्दा, आफ्नो नाम, ठेगाना, प्रार्थना गर्ने बिषय, इच्छाएको विद्यालय र परीक्षाको नाम बताउनुपर्छ। प्रार्थना गरेपछि, ताबीज किनेर राख्न वा 【एमा】 भनिने काठको पाटीमा आफ्नो इच्छा लेखेर मन्दिरमा चढाउनु पनि प्रभावकारी मानिन्छ। परीक्षा सकिएपछि, ताबीज मन्दिरमा फर्काउन र परीक्षा उत्तीर्ण भएमा, मन्दिरमा गएर भगवानलाई धन्यवाद दिनु पर्छ।

परीक्षार्थी मात्रै होइन, आफ्ना परिवार, साथीहरू र अन्य प्रियजनहरूको लागि पनि प्रार्थना गर्नु प्रभावकारी मानिन्छ। यस वर्ष पनि धेरै विद्यार्थीहरूको परिश्रम रंग ल्याओस्। परीक्षा दिने सबै विद्यार्थीहरूलाई शुभकामना!

【फुकुओका शहरको सूचना】

तोच्योजी सेचुबुन् ताइसाइ- अन्तर्राष्ट्रिय विद्यार्थीहरूको लागि मामेमाकी कार्यक्रम

सेचुबुन्, वर्षमा एकपटक मनाईन्छ, जसमा खराब चीजहरू जस्तै बिरामी र प्रकोप आदिबाट बच्न, र सुस्वास्थ्यका साथ बाँच्नका लागि प्रार्थना गर्ने गरिन्छ। जापानमा प्राचीन कालदेखि नै ‘मामेमाकी’ को चलन रही आएको छ, जसमा प्रकोप निम्त्याउने राक्षसहरूलाई भगाउन सेतो भटमास फ्याँक्ने गरिन्छ। "भाग्य भित्र! राक्षसहरू बाहिर!" भन्दै सेतो भटमास फ्याँक्दै, दुष्ट आत्माहरूबाट जोगिन प्रार्थना गर्छन्।

सेचुबुन् ताइसाइ, हरेक वर्ष फेब्रुअरी ३ मा हाकाटा वार्डको तोच्योजी मन्दिरमा आयोजना गरिन्छ। हरेक वर्ष धेरै दर्शनार्थीहरुको भीड लाग्छ। सात भाग्यका देवताहरु, ओताफुकु, आखाओनी, र आओ ओनी यस महोत्सवमा देखा पर्ने हुनाले अत्यन्तै रोमाञ्चक हुन्छ।

यसका साथै, जनवरी २४ (शुक्रबार) मा, सेचुबुन् महोत्सवको प्रचारको लागि, फुकुओकामा बसोबास गर्ने अन्तर्राष्ट्रिय विद्यार्थीहरूले भाग्यका देवताहरु तथा राक्षसहरूको रूपमा पोशाक लगाएर, फुकुओका सिटी हलमा भटमास फ्याँक्ने कार्यक्रममा सहभागी हुन्छन्। विद्यार्थीहरूले ओनीको रूपमा गर्ने प्रदर्शन मामेमाकीको मुख्य आकर्षण हुनेछ।

जापानी परम्परागत सेचुबुन् महोत्सव हेर्न चाहनुहुन्छ भने, फेब्रुअरी ३ को "सेचुबुन् महोत्सव" तथा जनवरी २४ को "मामेमाकी" सम्बन्धी विस्तृत जानकारीको लागि, कृपया अग्रिम रूपमाफुकुओका शहरवातोच्योजीको आधिकारिक वेबसाइटबाट जानकारी प्राप्त गर्नुहोस्।

मामेमाकीको अनुभव लिँदै जापानी संस्कृतिलाई नजिकबाट बुझ्ने र आफ्नो जीवनमा भाग्य ल्याउने एउटा राम्रो अवसर हुन सक्छ!

【हाताचि नो चुदोई" अर्थात् वयस्क दिवस】

फुकुओका शहरमा २० वर्ष उमेरका व्यक्तिहरूका लागि, रेइवा ७ को जनवरी १३, का दिन, जुन अर्को हप्ता सोमबार सार्वजनिक बिदाको दिन पर्छ, हाकाटा वार्डस्थित मरीनमेस्से फुकुओकामा "हाताचि नो चुदोई" अर्थात् वयस्क दिवसको स्मृति कार्यक्रम आयोजना गरिनेछ।
वयस्क दिवस भनेको नयाँ वयस्कहरूले एक जिम्मेवार व्यक्तिको रूपमा पहिलो कदम चाल्ने दिन हो। यो २० वर्ष पुगेको खुशीयाली मनाउने दिन हो, र जापानमा यो सार्वजनिक बिदाको रूपमा मनाइन्छ।
कार्यक्रममा, नगरप्रमुखको बधाई सन्देश, आयोजन समिति द्वारा तयार पारिएका रोचक योजनाहरू, र फुकुओका संग सम्बन्ध भएका प्रख्यात व्यक्तिहरूका भिडियो सन्देशहरू समावेश गरिएका छन्।
त्यसैगरी, कार्यक्रम स्थलको बाहिर, पुराना साथीहरू र सहपाठीहरूसँग पुनर्मिलन गर्ने र तस्वीर खिच्ने नयाँ वयस्कहरूको उत्साहपूर्ण दृश्यहरू देख्न सकिन्छ, जसले निकै रमाइलो वातावरण सिर्जना गर्छ।
यो दिन परम्परागत रूपमा औपचारिक पोशाक लगाएर सहभागी हुने चलन छ। धेरैजसोले जापानी परम्परागत पहिरनजस्तै किमोनो वा हाकामा लगाउँछन्। कोहीले आफ्नो परिवारबाट पुस्तौँदेखिको अमूल्य किमोनो, कोहीले नयाँ सुट, र कोहीले विशेष मौलिक डिजाईनको पहिरन लगाउँछन्। उनीहरू बिहानैदेखि तयार भएर सजिन्छन्।
यस दिनको सम्झनालाई स्थायी बनाउन फोटो स्टुडियोमा फोटो खिच्ने, परिवारसँग विशेष खानाको मजा लिने, र पुराना साथीहरूसँग पुनर्मिलन कार्यक्रममा सहभागी हुने चलन पनि छ। यो आफ्ना अभिभावक र आफूलाई हुर्काउनेहरूप्रति कृतज्ञता व्यक्त गर्ने महत्वपूर्ण दिन पनि हो।
यस वर्ष २० वर्ष पुग्न लागेका सबैलाई र उहाँहरूको परिवारलाई यो विशेष दिन खुसीमय रहोस्! धेरै धेरै बधाई!

【फुकुओका सिटी इन्टरनेशनल फाउण्डेसनको सूचना】

"संयुक्त राष्ट्रका कर्मचारीसँग मिलेर सहर निर्माण गरौँ!" सहभागीताको लागि आवेदन खुला

फुकुओका सिटी इन्टरनेशनल फाउण्डेसनले UN-Habitat Fukuoka Headquarter का कर्मचारीलाई प्रशिक्षकको रूपमा आमन्त्रण गरी सहर निर्माण सम्बन्धी कार्यशाला आयोजना गर्ने भएको छ।

यस कार्यशालामा सहभागी हुन चाहने व्यक्तिहरूको उमेर सीमा कक्षा ४ देखि कक्षा ९ सम्मका प्राथमिक विद्यालयदेखि माध्यमिक विद्यालयका विद्यार्थीहरु हुन्।
कार्यक्रम, जनवरी १९, आइतवार; १०:०० बजे देखि ११:३०बजे सम्म आयोजना हुनेछ। कार्यक्रम स्थल ACROS Fukuoka को सभा कक्ष हो।

UN-Habitat Fukuoka Headquarter, क्यूसु क्षेत्रको एक मात्र संयुक्त राष्ट्रको संस्था हो, जसले "मानव बसोबास" सम्बन्धी विभिन्न परियोजनाहरू सञ्चालन गर्छ।

कार्यशालामा सहभागीहरू आफूलाई Habitat गाउँका बासिन्दाको रुपमा सोची, भारी वर्षाबाट धेरै क्षति भएको गाउँको पुन:निर्माणको लागि सबैजना मिलेर योजना बनाउनेछन्।

कार्यशाला सरल जापानी भाषामा सञ्चालन हुने भएकोले विदेशी मूलका बालबालिकाहरू पनि सहज रूपमा सहभागी हुन सक्छन्।
संयुक्त राष्ट्रका विश्वव्यापी गतिविधिहरूमा रुचि राख्नुहुने सबैलाई सहभागिताको लागि स्वागत छ।

सहभागिता निःशुल्क छ, तर अग्रिम बुकिंग अनिवार्य छ।
बुकिंग प्रक्रिया र अन्य जानकारीको लागि फुकुओका सिटी इन्टरनेशनल फाउण्डेसनको वेबसाइट वा फेसबुक पेज हेर्नुहोस्।
फाउन्डेसनको वेबसाइट『www.fcif.or.jp』।

‘विदेशीहरुका लागि आप्रवासन, आवास र राष्ट्रियता सम्बन्धि परामर्श’

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्शका लागि, १ हप्ता अगाडि सम्पर्क गर्नुहोला।

गोपनीयता कडा पालना गर्ने भएकोले ढुक्क भएर परामर्श लिनुहोस्।

विस्तृत जानकारीका लागि, फोन नम्बर ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

नयाँ वर्ष २०२५ को हार्दिक मंगलमय शुभकामना！
वर्ष २०२५ को आज यो पहिलो प्रसारण!
तपाईंहरुको नयाँ वर्षको बिदा कस्तो हुँदैछ? पक्कै पनि रमाइलोसँग नै बितिरहेको होला!

यस वर्ष पनि 【LIFE IN FUKUOKA】 तपाईँहरू सबैका लागि राम्रो मार्गनिर्देशन बन्न सकोस् भन्ने आशा गर्दछु♪
आगामी दिनहरूमा पनि सहयोग र सहकार्यको अपेक्षा गर्दछु।
वर्षको पहिलो प्रसारणमा, नयाँ वर्षको शुभकामनासँग सम्बन्धित परिकार【ओसेची र्योउरी】को बिषय लिएर आएकी छु।

【ओसेची र्योउरी】

तपाईँहरूले जापानमा नयाँ वर्षमा के खाने गर्नुहुन्छ?
जापानमा नयाँ वर्षका लागि भाग्यमानी मानिने विभिन्न परिकारहरू खाने चलन छ। जापानी नयाँ वर्ष भन्नासाथ सबैभन्दा प्रख्यात परिकार भनेको【ओसेची र्योउरी】हो।

【ओसेची】को मूल अर्थ भनेको मौसम परिवर्तनका विशेष अवसरहरूमा, राम्रो उत्पादनको लागि भगवानप्रति कृतज्ञता व्यक्त गर्न "चढाइने परिकार" हो।
आधुनिक समयमा यो परिकार नयाँ वर्षको शुभकामना आदान-प्रदान गर्न परिवारका सदस्यहरूसँग बसेर खाने चलन बनेको छ। साथै, आगन्तुकहरूलाई समेत यो परिकार पस्कने गरिन्छ।

【ओसेची र्योउरी】 विशेष गरिज्युबाकोअर्थात् परम्परागत बक्समा राखिन्छ। यसको पछाडि केही कारणहरू छन्। एउटा कारण भनेको “बक्सलाई तह लगाउनु भनेको खुशी थुपार्नु" भन्ने अर्थ हो। त्यस्तै, ज्युबाकोमा खाना राख्दा कम ठाउँ लिन्छ, र आगन्तुकलाई सजिलै पस्कन सकिन्छ भन्ने व्यावहारिक कारण पनि छ।

वर्षको अन्त्यमा 【ओसेची】 वा नयाँ वर्षमा खाइने परिकारहरू तयार गर्ने, र नयाँ वर्षको दिनमा खाना नपकाइ यी परिकारहरू खाएर समय बिताउने परम्परा छ। नयाँ वर्षको १ तारिकदेखि ३ दिनसम्म, भगवानलाई स्वागत गरेर, वर्षभरि राम्रो बाली र परिवारको सुरक्षाको कामना गरिन्छ। त्यसैले नयाँ वर्षमाचुल्हो बाल्नवाआगो प्रयोग गरिंदैन। साथै, खाना पकाउने व्यक्तिलाई आराम दिने उद्देश्यले भान्साको काम घटाउन, नयाँ वर्षको केही दिन अगाडि नै 【ओसेची र्योउरी】 तयार गरिन्छ। चिसो हुँदा पनि स्वादिलो हुने र लामो समयसम्म टिक्ने गरी विशेष रूपले 【ओसेची र्योउरी】 तयार पारिन्छ।

【ओसेची र्योउरी】को प्रत्येक परिकारमा शुभ संकेत वा कामना समावेश गरिएको हुन्छ। ओसेची खानाका सामग्रीहरू क्षेत्र अनुसार फरक हुन सक्छन्, तर समग्रमा करिब २० देखि ३० प्रकारका परिकारहरू समेटिन्छन्। विभिन्न प्रकारका सामग्री र परिकारहरू स्वाद लिन सकिने कुरामा 【ओसेची र्योउरी】 को विशेषता छ। "नयाँ वर्षमनाउने ३ परिकारहरु" सन्तानको वृद्धि, स्वास्थ्यको दीर्घायु, र राम्रो उत्पादनको प्रतीकहुन्। यसमा, "मदिरासँग खाने परिकार," "समुद्री खानाबाट बनेको ग्रिल परिकार," "सागपात तरकारीको परिकार" र "अचार" गरी ५ प्रकारका परिकारहरू समाबेश हुन्छन्। 

ज्युबाको अर्थात् खाना राख्ने बक्समा कुन तहमा कुन परिकार राख्ने भन्ने पनि निर्धारित गरिएको हुन्छ। परम्परागत रूपमा, पाँच तहको ज्युबाकोमा परिकारहरू राखिन्छ। क्षेत्र अनुसार समावेश गरिने परिकार फरक हुन सक्छन्। पहिलो तहमा" नयाँ वर्षको शुभकामना दिने ३ परिकार" र "मदिरासँग खाने परिकार" राखिन्छ। दोस्रो तहमा,"ग्रिल परिकार"। त्यस्तै तेस्रो र चौथो तहमा, "सागपात तरकारीको परिकार" र "अचार"। पाँचौं तह चाहिं, भाग्य भर्ने ठाउँको रूपमा खाली राखिन्छ।

हालैका वर्षहरूमा, तीन तहको ज्युबाकोप्रयोग गर्ने चलन बढ्दो छ। पहिलो तहमा "नयाँ वर्षको शुभकामना दिने ३ परिकार" र "मदिरासँग खाने परिकार" राखिन्छ। दोस्रो तहमा, " ग्रिल परिकार" र "अचार"। तेस्रो तहमा, "सागपात तरकारीको परिकार" राखिन्छ।

"नयाँ वर्षको शुभकामना दिने ३ परिकारहरु" मा, कुरोमामे: मीठो बनाएर पकाइएको कालो भटमास। खाजुनोको: निसिन माछाको अण्डा नुन राखेर तयार पारिएको परिकार। ताजुकुरी: सुकेको इवासीको साना माछाहरु भुटेर, त्यसमा चिनी, सोयासस र मिरिनले गुलियो र पिरो स्वाद दिने गरी बनाइएको परिकार। ताताकीगोबो जस्ता प्रमुख छन्।

"मदिरासँग खाने परिकारहरु"मा, कुरि किन्तोन: चेस्टनट र आलु प्रयोग गरेर बनाइएको गुलियो पेस्ट। कोहाकु कामाबोको: गुलाफी र सेतो रंगको माछाको पेस्ट। दातेमाकी: अण्डा र माछाको पेस्ट, चिनी मिसाएर पकाइएको परिकार। कोंबुमाकी: निसिनलाई कंबुमा मोलेर, कान्प्योले बाँधेर गुलियो र नरम पकाइएको परिकारहरु प्रमुख छन्। 

त्यस बाहेक, राम्रो भाग्यको प्रतीक मानिने समुद्री खानाहरू जस्तै बुरी, ताई, र इसेइबी प्रयोग गरेर बनाइएको "ग्रिल परिकार", गाजर र मुला प्रयोग गरेर बनाइएको अमिलो खाना "कोहाकु नामासु", त्यस्तै, रेनकोन, सातोइमो, मुला, गाजर, र कोंन्याकु प्रयोग गरेर बनाइएको "सागपात तरकारीको परिकार" खाने गरिन्छ।

हरेक परिकारमा विशेष अर्थ र शुभकामना समेटिएको हुन्छ, र समय दिएर मिहिनेतका साथ 【ओसेची र्योउरी】तयार गरिन्छ । नयाँ वर्षमा विभिन्न शुभ संकेतले भरिएको 【ओसेची र्योउरी】 खाने परम्परा अझै पनि जापानी संस्कृतिको गहिरो छाप छ। 【ओसेची】 सम्बन्धी चलन क्षेत्र अनुसार फरक हुन सक्छ, तर आधुनिक समयमा 【ओसेची र्योउरी】मा पनि विविधतामा आएको छ। आफ्नो परिवारको शैली अनुसारको 【ओसेची र्योउरी】 बनाएर, वर्षभरि स्वास्थ्य र सुखको कामना गरौं।

नयाँ वर्ष २०२५ सबैको लागि सुखद रहोस्। तपाईंहरुको इच्छा आकांक्षा पूरा होस् भनि कामना गर्दछु♡

【सीसाइड मोमोची ICE SKATING PARK】

श्रोताहरू, के तपाईंहरूले कहिल्यै आइस स्केटिङ गर्नुभएको छ? यो जाडो मौसमको विशेष गतिविधि हो। यस जाडोमा, फुकुओकाको प्रसिद्ध पर्यटकीय क्षेत्रमोमोचिहामामा, आइस्केटिङ पार्क "सीसाइड मोमोची ICE SKATING PARK" खुल्ला भएको छ।

यो पार्क २४ फेब्रुअरीसम्म मात्र खुल्ला रहने छ, र "फुकुओका टावर" अगाडि रहेको हरियाली पार्कमा स्केटिङ गर्न पाइनेछ। साथै, मौसम अनुसारका विभिन्न कार्यक्रमहरू आयोजना गरिनेछन्।

२५ डिसेम्बरसम्म, मोमोचिमा पहिलो पटक आयोजना हुने क्रिसमस मार्केट हुनेछ। डिसेम्बर २८ देखि २०२५ को जनवरी १३ सम्म, द्वार, तोरि गेट, र पूजास्थलहरू जस्ता नयाँ वर्षको विशेष सजावटहरु हुनेछन्। १६ जनवरीदेखि २४ फेब्रुअरीसम्म, भ्यालेन्टाइन माहोल बनाउन हार्ट मोन्युमेन्ट स्थापना हुनेभएको छ।

त्यस अतिरिक्त, स्केटिङ सिक्ने कक्षाहरू र स्केट शोहरू पनि आयोजना हुनेछन्।

"सीसाइड मोमोची ICE SKATING PARK" को सञ्चालन समय बिहान ११:०० बजेदेखि राति ९ बजेसम्म हो। मौसमका कारण सञ्चालन समय परिवर्तन हुन सक्छ, त्यसैले जानुअघि आधिकारिक वेबसाइट जाँच गर्नुहोस्।

टिकट मूल्य, बयस्कका लागि १७०० येन र माध्यमिक तहका विद्यार्थीहरू वा सो भन्दा मुनिका लागि १२०० येन हो, जसमा जुत्ताको शुल्क समावेश छ।

बयस्क र बच्चा दुवैले रमाइलो गर्न सक्ने यो अवसर नछुटाउनुहोस्। यस जाडोमा, आइस स्केटिङको आनन्द लिन सीसाइड मोमोची मा अवश्य जानुहोस्!

 シーサイドももち ICE SKATING PARK🔎https://fuk-sc.com/

【यो फुकुओका शरहको सूचना हो।】

“वर्षको समाप्ति र नयाँ वर्ष सुरक्षित र ढुक्क साथ बिताउनका लागि”

वर्षको अन्त्य र नयाँ वर्षमा प्रायः मदिरा पिउने अवसर धेरै हुन्छ।

मदिरा पिएपछि, आफैं वा अरू कसैलाई गाडी चलाउन कहिल्यै अनुमति दिनु हुँदैन।

मदिरा पिएपछि साइकल चलाउनु पनि कानुनले प्रतिबन्धित गरेको छ।

भोलिपल्ट बिहान मदिरा अलिकति पनि बाँकी छ भन्ने लागेको अवस्थामा सवारी चलाउन हुँदैन।

यस अतिरिक्त, वर्षको अन्त्यमा सडक दुर्घटनाको संख्या बढ्ने गर्दछ।

राति बाहिर निस्कँदा, चालकहरूले सजिलै देख्न सक्ने गरी उज्यालो लुगा वा राती चम्किलो देखिने लुगा लगाउनुस्।

साँझपख गाडी वा साइकल चलाउँदा छिट्टै बत्ती बाल्न नबिर्सनुहोस्।

अब, सामाजिक मिडिया मार्फत गरिने लगानी ठगी र रोमान्स ठगीबारे जानकारी गराउँदै छु।सामाजिक मिडिया वा डेटिङ एप्स मार्फत चिनजान गरिएका मानिसहरूबाट वा चर्चित व्यक्तिका रूपमा प्रस्तुत भई लगानी गर्न सुझाउनेहरूबाट ठगीका घटनाहरू बढिरहेका छन्।यस्ता ठगीबाट जोगिनका लागि

१. सामाजिक मिडिया वा इन्टरनेटमा गरिने लगानीको आग्रहमा सजग रहनुहोस्। 

२. प्रत्यक्ष रूपमा भेट नभएका व्यक्तिले तपाईंलाई पैसासँग सम्बन्धित कुरा गरे भने, त्यो ठगी हुन सक्छ भनेर शङ्का गर्नुहोस्। 

३. "निश्चित रुपमा लाभ हुन्छ", "मूलधनको ग्यारेन्टी" जस्ता शब्दहरू प्रयोग गरेर गरिने लगानीको आग्रह ठगी हो।

यी तीन कुराहरुमा ध्यान दिनुहोस्।

अर्को कुरा, बाहिर हिंड्दा वा साइकल चलाउँदा धूम्रपान नगर्नुहोस्।वरपर मानिस भएको बेला बाहिर धूम्रपान नगर्नुहोस्। तपाईंहरुको सहकार्यको अनुरोध गर्दछौं।

आफू र आफ्ना प्रियजनहरुलाई सुरक्षित राख्दै रमाइलो नयाँ वर्ष मनाउनुहोस्।

【फोहोर फाल्न प्रयोग गर्न मिल्ने रेजिझोला "फुकुरेजि"】

वर्षको अन्त्य र नयाँ वर्षको तयारीका लागि किनमेलको आवृत्ति र परिमाण बढ्ने यो समयमा, तपाईँले आफ्नो "माई ब्याग" बिर्सनु भएको अवस्थामा वा ल्याएको माई ब्याग पर्याप्त नहुने अवस्थामा प्रयोग गर्न मिल्ने "रेजि ब्याग" को बारेमा थाहा पाउनु भएको छ? फुकुओका शहरभित्रका कनभिनि, सुपरमार्केट, ड्रगस्टोर आदिका रेजि काउन्टर नजिकै, फोहोर फाल्न प्रयोग गर्न मिल्ने रेजिझोला "फुकुरेजि"बिक्रीमा उपलब्ध छ।

अन्तिम वर्षहरूमा, रेजिझोलाको शुल्क लाग्न थालेपछि माईब्यागको प्रयोगको विस्तार भएको छ। तर, प्लास्टिक फोहोरमध्ये एक हुने रेजि ब्याग अझै पनि फुकुओका शहरमा वार्षिक करिब २,६०० टन फ्याँकिएको तथ्य पत्ता लागेको छ। यसै कारण, किनमेलको समयमा रेजि ब्यागको प्रयोग घटाउनका लागि एउटा नयाँ विकल्पको रूपमा, फुकुओका शहरमा फोहोर फाल्दा प्रयोग गर्न मिल्ने रेजिझोला "फुकुरेजि"को शुरुवात गरिएको छ।

माई ब्याग बिर्सनु भएको बेला वा अचानक किनमेलको अवस्थामा रेजि ब्याग किन्ने आवश्यकता परेमा, प्लास्टिक फोहोर घटाउने र रेजि ब्यागको खर्च जोगाउने "फुकुरेजि" लाई रोज्नुहोस्।

फुकुरेजि, १५ लिटरको १५ येन तथा १० लिटरको १० येन गरि २ प्रकारको साइजहरुमा उपलब्ध छ। रेजिझोलाको रूपमा प्रयोग गरेपछि, त्यसलाई घरेलू फोहोर फाल्दा, जल्ने फोहोरको झोलाको रुपमा प्रयोग गर्न सकिन्छ। नियमित फोहोर निकाल्ने बेला जस्तै, फुकुओका शहरले तोकिएको समय र स्थानमा फोहोर फ्याँक्न सकिन्छ।

झोलाको डिजाइन कलाकार इफुकु खाजुहिकोले ल "मानिस र प्रकृतिप्रति सहानुभूतिका भावनाले सिर्जना गर्ने 'सहानुभूतिको चक्र'"लाई चित्रित गरेर तयार गर्नुभएको हो।

प्लास्टिक फोहोर घटाउनका लागि, कनभिनि, सुपरमार्केट, ड्रगस्टोरमा रेजिझोलाको आवश्यकता पर्दा, "फुकुरेजि" लाई रोज्नुहोस्।

【यो फुकुओका शरहको सूचना हो।】

 “नयाँ वर्षको बिदाहरुमा वार्ड अफिस काउण्टर अनि फोहोर फाल्ने दिनसम्बन्धि सूचना”

नयाँ वर्षको बिदाहरुमा, वार्ड अफिसको काउण्टर र फोहोर फाल्ने दिन परिवर्तन हुने भएकाले, कृपया ध्यान दिनुहोला।वार्ड अफिसको काउण्टर, डिसेम्बर २८ (शनिबार) देखि जनवरी ५(आइतबार) सम्म बन्द रहनेछ।

नयाँ वर्षको बिदाहरुको अघिपछि वार्ड अफिसको काउण्टर भीड हुने भएकोले, धेरै समय राखेर जाने गरौँ।

डिसेम्बर ३१ (मङ्गलबार) देखि जनवरी ३ (शुक्रबार) सम्म, फोहर संकलन हुनेछैन।

जल्ने फोहरको मात्र संकलन, डिसेम्बर ३० (सोमबार) सम्ममा हुनेछ। 

नयाँ बर्षको जनवरी ५ (आइतबार) बाट संकलन पुनः शुरु हुने हुनाले तोकिएको बारमा फोहर बाहिर राख्नुहोस्।

सँधै मंगलबार र शुक्रबार फोहर संकलन हुने क्षेत्रहरुमा, त्यसको सट्टा जनवरी ४ (शनिबार) मा संकलन हुनेछ।

नजल्ने फोहर तथा खाली सिसाको बोतल, प्लास्टिकको बोतल फाल्नका लागि, 

जनवरी १ (बुधबार) मा संकलन हुने क्षेत्रमा डिसेम्बर २९ (आइतबार) मा र

जनवरी २ (बिहीबार) मा संकलन हुने क्षेत्रमा डिसेम्बर ३० (सोमबार) फोहर बाहिर राख्नुहोस्। 

त्यसैगरी, ठूलो आकारका फोहरको काउण्टर तथा संकलन, डिसेम्बर २९ (आइतबार) देखि जनवरी ३ (शुक्रबार) सम्म बन्द हुनेछ।

फोहोर बाहिर राख्ने बारेमा जानकारी प्राप्त गर्न चाहनुहुन्छ भने, अनुवाद सेवा केन्द्रमा फोन गरेर आफ्नो वार्ड कार्यालयमा सम्पर्क गर्न सक्नुहुन्छ। 

फोन नम्बर （०९२-७५३-६११३） हो। 

कृपया आफू बस्ने वार्ड र फोहोर बाहिर राख्ने सम्बन्धी सोधपुछको बारेमा भन्नुहोस्। 

समय, ९:०० बजेदेखि १७:०० बजेसम्म।शनिबार, आइतबार, सार्वजनिक बिदा, र डिसेम्बर२९ देखि १ जनवरी ३ बन्द हुनेछ।

【फुकुओका शहरको नयाँ आकर्षण: "उओजा"】

फुकुओका शहरको च्युओकु वार्डको तेंन्जिनबाट नजिकै रहेकोनागाहामा क्षेत्रमा नयाँ सुविधा "उओजा"खुलेको छ। योनागाहामा माछा बजारमा रहेको छ।

"उओजा" मा, माछाका पेशेवरहरूले सञ्चालन गर्ने विभिन्न सुविधाहरू छन्, जस्तै:

• बजारमा पाइने स्वादिष्ट माछा र समुद्री परिकारहरू चाख्न सकिनेफूड हल।

• माछाको परिकार बनाउन सिक्न मिल्ने "साशिमी डोजो"।

• पानीजन्य प्रशोधन सामग्री र मसला जस्ता सामग्रीहरू किन्न सकिनेबजार।

फूड हलको विशेष आकर्षण भनेको यसको उचाइ भएको छत र ठूला बत्तीहरूले लिलामी स्थलको अनुभव दिने वातावरण हो। यहाँ ताजा माछा सस्तो मूल्यमा पाइन्छ। तपाईंले साशिमी, ग्रिल माछा, फ्राई माछा जस्ता मनपर्ने खाना छानी, मिलाएर आफ्नो ओरिजिनल सेट मील वा समुद्री खानाको आनन्द लिन सक्नुहुन्छ।

बजार क्षेत्रमा, माछाका प्रशोधित सामग्री, मसला, र व्यावसायिक कुकहरूले प्रयोग गर्ने चक्कु तथा अन्य भान्साका सामग्रीहरू पनि उपलब्ध छन्।

खुल्ने समय,बिहान ११ बजेदेखि राति ९:३० सम्म।बुधबार र वर्षको अन्त्य तथा नयाँ वर्षको समय बन्द हुनेछ।

थप जानकारीका लागि, "उओजा" को आधिकारिक Instagram हेर्नुहोस्।

माछा खान मन पराउनेहरु अवश्य पनि "उओजा" मा जानुहोस् र ताजा समुद्री खानाको आनन्द लिनुहोस्। प्रशोधित समुद्री खाना उत्पादनहरू पनि किन्न सक्ने नागाहामाको यस नयाँ सुविधा "उओजा" मा गएर हेर्दा कसो होला!

 🔎 https://www.instagram.com/uoza_nagahama/

【फुकुओका सिटी इन्टरनेशनल फाउण्डेसनको सूचना】

"वर्षको समाप्ति र नववर्षको बिदाको सूचना”

फुकुओका सिटी इन्टरनेशनल फाउण्डेसन, डिसेम्बर २८ शनिबारदेखि जनवरी ५ आइतबारसम्म ९ दिनका लागि बन्द हुनेछ।नववर्ष २०२५ जनवरी ६ सोमबार, बिहान ९ बजेबाट फाउण्डेशन खुल्नेछ।

वर्ष २०२५ को प्रथम विदेशीहरूका लागि नि:शुल्क कानुनी परामर्श,जनवरी १५, बुधबार आयोजना हुनेछ।

कानुनी परामर्शको लागि अग्रिम बुकिङ आवश्यक हुने हुनाले, परामर्श लिन ईच्छुक महानुभावहरुले सकेसम्म छिटो सम्पर्क गर्नुहोस्। अग्रिम बुकिंग बिना उपलब्ध हुने प्रसाशनिक वकिलद्वाराको परामर्श,जनवरी १२ आइतबार आयोजना हुनेछ।

फुकुओका सिटी इन्टरनेशनल फाउण्डेसनले, फुकुओका शहरमा बसोबास गर्ने विदेशीहरूको लागि सहज र आरामदायी जीवनयापनका लागि, मुख्य संवाहकको रुपमा, आवश्यक जानकारी उपलब्ध गराउँदै सहयोग गर्दै आईरहेको छ। अवश्य पनि निःसंकोच परामर्श लिनुहोस्।

"LINE कल मार्फत परामर्श लिन सकिन्छ!" 

फाउण्डेशनको LINE आधिकारिक Account बाट प्रत्यक्ष कल गरी जीवनयापनसँग सम्बन्धित परामर्श वा निःशुल्क परामर्शको लागि दर्ता गर्न सक्नुहुन्छ। फोन अनुवाद सेवाबाट बहुभाषी सहयोग पनि उपलब्ध छ।

थप रूपमा, फाउण्डेशनको कार्यक्रम र विदेशी बासिन्दाको लागि जानकारीहरू पनि प्राप्त गर्न सकिन्छ।

फुकुओका सिटी इन्टरनेशनल फाउण्डेसनको होमपेजबाट अवश्य पनि "Friend Add" गर्नुहोला।

च्याट सेवा उपलब्ध छैन।
लेखेर परामर्श गर्न चाहनुहुन्छ भने, फाउण्डेशनको होमपेजमा रहेको सम्पर्क फारम प्रयोग गर्नुहोस्।

【मरीन वर्ल्ड उमी नो नाखामिचीमा डल्फिनको बच्चा जन्मियो!】

फुकुओका शहरको हिगासी वार्डमा रहेको एक्वेरियम "मरीन वर्ल्ड उमी नो नाखामिची" मा अक्टोबर महिनामा डल्फिनको बच्चा जन्मिएको छ।
जन्मिएको बन्डो डल्फिनको भाले बच्चा हो, जुन अक्टोबर २७ मा जन्मिएको हो, र यसको लम्बाई करिब १ मिटर छ।सामान्यतया, डल्फिनको बच्चा जन्मिन २ घण्टा भन्दा बढी समय लागेमा बच्चाको जीवित रहने सम्भावना कम हुन्छ भन्ने भनाइ छ। तर यो पटकको डल्फिनको जन्मलाई करिब साढे ३ घण्टा लागे पनि आमा र बच्चा दुवै स्वस्थ छन् र राम्रोसँग हुर्किरहेका छन्।

डल्फिन हेरचाह गर्ने व्यक्तिका अनुसार, "बच्चाको शरीर राम्रोसँग विकसित भएको देखिन्छ र पौडनमा पनि एकदम सिपालु छ। चम्किलो र ठूलो आँखा बच्चा डल्फिनको विशेष आकर्षण हो। नयाँ डल्फिनले सबैलाई खुशी बनाउने नाम पाओस् र सबैको मन जितोस्।"

बच्चाको नाम आगन्तुकहरूको भोटबाट चयन गरिनेछ, त्यसैले मरीन वर्ल्ड जानु भयो भने भोट गर्न नबिर्सनुस्।

यस बाहेक, "मरीन वर्ल्ड उमी नो नाखामिची" मा विभिन्न रमाइला कार्यक्रमहरू पनि नियमित रूपमा आयोजना गरिन्छ। नयाँ क्षेत्र "खाइज्यु आइल्याण्ड" मा आज़ारासीको रमाइलो हाउभाउ र आवाज नजिकैबाट हेर्न पाइने स्टेज प्रदर्शन र डल्फिन तथा आज़ारासीलाई खुवाउने अनुभवले धेरैलाई आकर्षित गरिरहेको छ।

थप जानकारी र कार्यक्रमहरूका विवरणका लागि वेबसाइटमा हेर्नुहोस्।

 🔎https://marine-world.jp/news/post-6963/

【फुकुओका शहर/ फुकुओका सिटी इन्टरनेशनल फाउण्डेसनको सूचना】

 “विश्व मानव अधिकार दिवस र मानव अधिकार सप्ताहबारे”

"मानव अधिकार" भन्नाले हरेक व्यक्तिले जन्मदेखि नै पाउने "मानिसले मानिसजस्तै बाँच्न पाउने अधिकार" लाई जनाउँछ। डिसेम्बर १० तारिकलाई "विश्व मानव अधिकार दिवस" भनिन्छ, र यो दिन जापान मात्र नभई विश्वभर मानव अधिकारको महत्त्वबारे सोच्ने अवसरका रूपमा मनाइन्छ। डिसेम्बर ४ देखि १० सम्मको अवधिलाई "मानव अधिकार सप्ताह" मानिन्छ, र फुकुओका शहरले यसलाई "मानव अधिकार सम्मान सप्ताह" का रूपमा मनाउँदै, सबैको अधिकारको सम्मान हुने र भेदभावबाट मुक्त, बस्न योग्य शहर बनाउने लक्ष्य लिएको छ।

आफू मात्र होइन, अरू व्यक्तिहरू पनि बिशेष र महत्त्वपूर्ण छन् भन्ने कुरा अनुभूति दिने यो महत्त्वपूर्ण सप्ताह हो। SDGs(सस्टेनेबल डेभलपमेन्ट गोल्स) को "कसैलाई पनि पछाडि नछोड्ने" समाज निर्माण गर्न, महिला, बालबालिका, ज्येष्ठ नागरिक, विदेशी, र शारीरिक रूपमा असक्षम व्यक्तिहरूका विरुद्ध हुने भेदभाव र पूर्वाग्रहलाई हटाउनु आवश्यक छ। एक अर्काको अधिकारको सम्मान गर्न हामी सबैको भूमिका महत्त्वपूर्ण छ।

शहर प्रशासनको डिसेम्बर १ को अंकमा, "फुकुओका शहरमा सक्रिय विदेशीहरू र बहुसांस्कृतिक सहकार्य" भन्ने विषय समेटिएको छ। यसमा फुकुओका शहरमा योगदान दिइरहेका विदेशीहरू र स्थानीय बासिन्दासँगको सहकार्य सम्बन्धी गतिविधिहरूको परिचय दिइएको छ। अवश्य हेर्नु होला।

हामीहरु सबैजनाले "दयालु हृदय" र " अमूल्य जीवन" बारे फेरि एक पटक सोच्ने प्रयास गरौँ।

डिसेम्बर १० तारिक, नाराया सामुदायिक केन्द्रमा “शिशु तथा बालबालिका अन्तरक्रिया कक्षा” सम्बन्धी सूचना

तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, आमाबुबा र बच्चाहरुले रमाइलो समय बिताउन सक्ने "शिशु तथा बालबालिका अन्तरक्रिया कक्षा" (याराना हिरोबा) सञ्चालन भइरहेको छ।

डिसेम्बर महिनामा यो कार्यक्रम१० तारिक मंगलबारहुनेछ। समय बिहान१०:३० देखि ११:३० सम्महो। कार्यक्रमको मुख्य विषय "क्रिसमस उत्सव"रहेको छ। यसमा, कथा पुस्तकको वाचन, गीत गाउँदै रमाइलो गर्ने, र स्टिकर जस्ता सामग्रीले खेल्ने गतिविधिहरू समावेश छन्। सबै मिलेर रमाइलो वातावरणमा समय बिताऔं।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनकोहोमपेज वा फेसबुकमा हेर्नुहोस्।

【भारतको महावाणिज्य दूतावास】

यहाँ फुकुओकामा, नयाँ "भारतको महावाणिज्य दूतावास" स्थापना हुँदैछ।
अहिले भारतको महावाणिज्य दूतावास ओसाकामा रहेको छ, र अब फुकुओका दोस्रो स्थान हुनेछ।

फुकुओकामा अहिले अमेरिका, चीन, दक्षिण कोरिया, भियतनाम, र थाइल्यान्डको महावाणिज्य दूतावासहरू छन्। तर, अब क्युशु क्षेत्रमा काम गर्ने भारतीय नागरिक र कम्पनीहरूको संख्या बढ्ने अपेक्षा गरिएकोले, डिसेम्बरमा यो दूतावास स्थापना गरिनेछ।

नयाँ महावाणिज्य दूतावासमा भिसा जारी गर्नका साथै, यहाँ बस्ने भारतीयहरूको सुरक्षाको व्यवस्थापन र अन्य कानुनी प्रक्रियाहरू, साथै भारतीय अर्थतन्त्र र संस्कृतिसम्बन्धी जानकारी उपलब्ध गराइनेछ।
एशियाको प्रवेशद्वार फुकुओका शहर अब अझ बढी जीवन्त र चहलपहल हुने भएको छ!

【फुकुओका शहरको सूचना】

“विश्व एड्स दिवस सम्बन्धि”

HIV सङ्क्रमण भएपछि, केही वर्षसम्म कुनै लक्षण नदेखिन सक्ने भएकाले धेरै मानिसहरूलाई एड्सको लक्षण देखिएपछि मात्र यसको निदान हुन्छ भन्ने अनुमान गरिएको छ।
तर, HIV सङ्क्रमणलाई चाँडै पत्ता लगाएर सही स्वास्थ्य हेरचाह र उपचार गर्दा एड्सको लक्षण विकास हुनबाट बचाउन सकिन्छ। सङ्क्रमण हुँदा पनि लक्षण नदेखिने अवधि लामो हुने भएकाले, चाँडै परीक्षण गराउन सल्लाह दिइन्छ। प्रत्येक क्षेत्रमा रहेको स्वास्थ्य तथा कल्याण केन्द्रहरूमा निःशुल्क र गोप्य रूपमा HIV परीक्षण गराउन सकिन्छ। परीक्षणका दिन निश्चित गरिएका हुन्छन्, त्यसैले जानुअघि अग्रिम जानकारी लिनुहोस्।

एड्सबाट पीडित मानिसहरूप्रति सहानुभूति र सहयोगको प्रतीक "रेड रिबन" हो। रेड रिबनले तपाईँको एड्सबारे कुनै पूर्वाग्रह नरहेको र एड्ससँग जीवन बिताइरहेका मानिसहरूप्रति भेदभाव नगर्ने सन्देश दिन्छ।

रेड रिबनलाई सम्झेर, डिसेम्बर १ देखि ७ सम्म, Hakata Port Tower र Fukuoka Red Brick Culture Museum  रातो रङ्गले झिलिमिली बनाइनेछ।

विश्व एड्स दिवसलाई अवसर बनाएर, एड्सप्रति चासो बढाई, सही जानकारी र बच्नका उपायहरूबारे सबैले सोचेर हेरौं।

“फोहरको गैरकानूनी डम्पिङ”

जंगल, समुद्र तट, नदी, सडक, पार्क आदि ठाउँमा फोहोर फाल्नुलाई गैरकानूनी डम्पिङ भनिन्छ। फुकुओका शहरमा, वर्षको अन्त्यमा धेरै सफाइ गर्दा फोहोरको मात्रा बढ्ने भएकोले डिसेम्बर महिनालाई "गैरकानूनी डम्पिङ रोकथाम सुदृढीकरण महिना" को रूपमा लिइन्छ, र यस महिनामा गैरकानूनी डम्पिङ रोकथामका लागि गतिविधिहरूलाई अझ सुदृढ बनाइन्छ।

शहरले प्रहरीसँग सहकार्य गरी गस्ती गर्ने, तथा गैरकानूनी डम्पिङ हुने ठाउँहरूमा निगरानी क्यामेरा र चेतावनी बोर्डहरू राख्ने कार्य गरिरहेको छ। 

टिभी, फ्रिज/फ्रिजर, वाशिंग मेसिन/कपडा सुकाउने मेसिन, र एसीलाई घरायसी उपकरण पुन:प्रक्रिया कानुनअनुसार तोकिएको विधिबाट नै फाल्नुपर्छ। नयाँ सामान किन्दा पुराना सामान फिर्ता दिनुहोस्, वा जहाँबाट किन्नुभएको थियो, त्यहीँ पसलमा फिर्ता गर्नुस्।

यस बाहेकका सामानहरुसङ्कलनकालागि, आफ्नो नजिकको Yamada Denki मा लिनुहुन्छ कि भनेर सोधपुछ गर्नुहोला वा फुकुओका शहरसँग सम्झौता गरेको Rinet Japan Recycle तथा SG Moving कम्पनीलाई संकलनको लागि सम्पर्क गर्न सक्नुहुन्छ। रिसाइकल शुल्क र संकलन ढुवानी खर्च लाग्नेछ।

साथै, कम्प्युटरको सङ्कलन लागि त्यहि कम्युटर कम्पनि वा Rinet Japan Recycle मा अनुरोध गर्नुहोस्।

घरबाट निस्कने अनावश्यक वस्तुहरूको संकलन गराउन, सामान्य फोहोर संकलन/ढुवानी अनुमति प्राप्त संस्थासँग मात्र सम्पर्क गर्नुहोस्। अनुमति नभएको संस्थालाई सम्पर्क गर्दा, फोहोरको गैरकानूनी डम्पिङ, उच्च शुल्कको माग, जस्ता समस्याहरू आउन सक्छन्, त्यसैले प्रयोग नगर्नुहोस्।

【Christmas Advent】

यस वर्ष पनि फुकुओकाको जाडो मौसमलाई रंगिन बनाउने "Christmas Advent"शुरु भएको छ। क्रिसमसको दिनसम्म "पाँच इन्द्रियहरूलाई गुन्जाउने क्रिसमस" भन्ने विषयमा, फुकुओकाको शहर पैदल घुम्न रमाइलो र अनुभव गर्न रमाइलो क्रिसमसको माहोल बनाइएको छ। यहाँका झिलिमिली सजावटहरू हेर्दै हिँड्न सक्नुहुन्छ, "फुकुओका क्लासिक संगीत महोत्सव" मा सहभागी हुन सक्नुहुन्छ। त्यस्तै,स्वादिलो खाना र कलाका रमाइला प्रदर्शनीहरूको मनोरञ्जन लिन सक्नुहुन्छ।

मुख्य स्थानहरूमा, फुकुओका एयरपोर्ट,JR हाकाता स्टेशन अगाडिको चोक, किहिन्खान् अगाडिको चोक, तेंन्जिन सेन्ट्रल पार्क, फुकुओका सिटी हलको पश्चिमपट्टि रहेको चोक, र फुकुओका डाइम्यो गार्डेन सिटी पर्दछन्। यहाँ हाकातादेखि नाकासु हुँदै तेंन्जिनसम्म झिलिमिली बत्तीहरू र क्रिसमस मार्केट राखिएको छ।

प्रत्येक स्थानमा बत्तीका आकर्षक सजावट र काठका साना बुथहरू राखिएका छन्, जहाँ तातो वाइन, तातो चकलेट, ससेज र युरोपबाट ल्याइएका क्रिसमस सजावटका सामानहरू पाइन्छन्। यसरी फुकुओकामै बसेर युरोपको वास्तविक क्रिसमसको माहोल अनुभव गर्न सक्नुहुन्छ। यो शहरकै बिचमा आयोजना हुने भएकाले, किनमेलको बिचमा पनि सजिलै जान सक्नुहुन्छ। 

त्यसैगरी, प्रत्येक घण्टामा एक पटक हुने संगीत मञ्च, र केही स्थानहरूमा हुने कार्यशालाहरूलेसबै उमेरका मानिसहरूलाई रमाइलो गर्ने मौका दिन्छ। हरेक वर्ष छिट्टै बिक्ने विशेष मग कप किन्न चाहनुहुन्छ भने, छिट्टै जानुहोस्। फुकुओकामा क्रिसमसको आनन्द लिनुहोस्।

【फुकुओका सिटी इन्टरनेशनल फाउण्डेसनको सूचना】

“नोभेम्बर २६ तारिक, नाराया सामुदायिक केन्द्रमा शिशु तथा बालबालिका अन्तरक्रिया कक्षा” सम्बन्धी सूचना

तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, हरेक महिनाको चौथो मंगलबार, आमाबुबा र बच्चाहरुले रमाइलो समय बिताउन सक्ने "शिशु तथा बालबालिका अन्तरक्रिया कक्षा" (याराना हिरोबा) सञ्चालन भइरहेको छ।

नोभेम्बरमा यो कार्यक्रम २६ तारिकमा हुनेछ। 

समय बिहान १०:३० देखि ११:३० सम्म हो। 

यसपटकको कार्यक्रमको विषय "आइकुरु डेमाए" हो।

केन्द्रीय बालबालिका केन्द्र "आइकुरु" नाराया सार्वजनिक हलमा आउनेछ। विभिन्न खेलकुद तथा कथा किताबहरू सुनेर अभिभावक र बालबालिकाहरुले सँगै रमाइलो समय बिताउन सक्नुहुन्छ।
साथै, अभिभावकहरू बीचमा पनि कुराकानी र अन्तरक्रिया गर्ने अवसर हुनेछ।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनकोहोमपेज वा फेसबुकमा हेर्नुहोस्।

“विदेशीहरुका लागि आप्रवासन, आवास र राष्ट्रियता सम्बन्धि परामर्श”

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्श लिन चाहनुहुने महानुभावहरुले, २ हप्ता अगाडि सम्ममा सम्पर्क गर्नुहोला।

जुनसुकै परामर्श पनि गोपनीयता कडा पालन गर्ने भएकोले ढुक्क भएर परामर्श लिनुहोस्।

बिस्तृत जानकारीका लागि, फोन नम्बर, ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।