Life in Fukuoka "Nepali"

【नेपाल फेस्टिवल फुकुओका】

वसन्तको आगमनसँगै बाहिर घुमघाम गर्नको लागि मौसम राम्रो हुँदै गएको छ। यस हप्ता अन्त्यत: १२ अप्रिल (शनिवार) र १३ अप्रिल (आइतबार) का दिनहरूमा, तेन्जिन चुओ पार्कमा 【नेपाल फेस्टिवल फुकुओका】 आयोजना हुन गईरहेको छ। यस फेस्टिवलमा, नेपालका परम्परागत कला र संस्कृतिको परिचय, स्वादिष्ट नेपाली खाना तथा लोकप्रिय कलाकारहरूको प्रस्तुति अनुभव गर्न सक्नुहुनेछ।

फुकुओका शहरमा अहिले १०,००० भन्दा बढी नेपालीहरू बसोबास गरिरहेका छन्, जसमा धेरैजसो विद्यार्थीहरू छन्। यसले फुकुओकालाई जापानभर नेपालीहरूको धेरै जनसंख्या भएको क्षेत्रहरू मध्ये एक बनाएको छ। साथै, यस वर्ष अप्रिल १४ मा नेपाली विक्रम संवत अनुसार नयाँ वर्ष पर्दछ। नयाँ वर्षलाई मनाउने कार्यक्रमको रूपमा, फुकुओकामा सन् २०१० देखि 'नेपाल फेस्टिवल फुकुओका' आयोजना हुँदै आएको छ, र यो पटक फेस्टिवलको १२औं संस्करण हो।

यो फेस्टिवल मुख्य रूपमा फुकुओकामा बसोबास गर्ने नेपाली विद्यार्थीहरू र नेपाली समुदायका व्यक्तिहरूको नेतृत्वमा आयोजना गरिन्छ। महोत्सवमा नेपाली खानाका परिकार र सामग्रीको बिक्री, सांस्कृतिक नृत्य र संगीत प्रदर्शन, परम्परागत बाजा परेड, नेपाली पहिरन सारीको अनुभव, कला प्रदर्शनी, पर्यटन जानकारी जस्ता कार्यक्रमहरू समावेश गरिएको छ। विविध कार्यक्रमहरूले भरिएको यस महोत्सवमा, हरेक वर्ष धेरै मानिसहरू सहभागी हुने गर्दछन्।

फेस्टिवलको दुवै दिन बिहान १० बजे देखि साँझ ६ बजे सम्म कार्यक्रम सञ्चालन हुनेछ। प्रवेश निःशुल्क छ। फुकुओकामा रहँदा नेपाली संस्कृति अनुभव गर्ने दुर्लभ अवसरका रूपमा, यस दुई दिने कार्यक्रममा सहभागी भई, हामीसँगै नेपाली नयाँ वर्षको उत्सव मनाऔं!

【फुकुओका शहरको सूचना】

“विदेशीहरूले परामर्श लिन सकिने काउन्टरको परिचय”

नयाँ जीवनमा कुनै समस्या वा नबुझेको कुरा छ कि?

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धि परामर्श कहाँ लिने भनेर थाहा नभएको समयमा, उपयुक्त सम्पर्क काउन्टर तथा अन्य जानकारीहरु प्रदान गर्दै आईरहेको छ।

फोन नम्बर, ०१२०-६६-१७९९ ।

सम्पर्क समय ९:०० देखि ५:३० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

राष्ट्रिय स्वास्थ्य बीमा, फोहोर, कर, आदि जस्ता फुकुओका शहरका प्रक्रियाहरूको बारेमा बुझ्नु परेमा, दोभाषे सेन्टरमा कल गरेर, आफू बस्ने वार्डमा सम्पर्क गरि परामर्श लिन सक्नुहुन्छ।

फोन नम्बर, ०९२-७५३-६११३ । 

सम्पर्क समय ९:०० देखि ५:०० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

यस अतिरिक्त, चिकित्सा संस्था खोज्दा, अस्पतालमा डाक्टरसँग कुरा गर्दा, अस्पताल वा सिफारिस गरिएको फार्मेसीमा औषधि लिँदा, Fukuoka City Medical Interpreting Call Center को टेलिफोन अनुवाद सेवा प्रयोग गर्न सक्नुहुन्छ।

फोन नम्बर, ०९२-७३३-५४२९ हो।

चौबीसैघण्टा हरेक दिनलिन सकिने यो सेवा, २० वटा भाषाहरुमा उपलब्ध छ। 

उपयोग शुल्क निःशुल्क छ, तर फोनको शुल्क भने फोन गर्ने व्यक्तिले तिर्नु पर्छ।

【फुकुओका ज्योउ साकुरा माचुरी】

तपाईंहरुले यस वर्षको साकुरा फुलेको देखिसक्नु भयो कि? हरेक वर्ष मार्चको अन्त्यदेखि अप्रिलको शुरुवातसम्म, फुकुओका शहरको "माइजुरु पार्क" मा साकुरा फूल फुल्ने समयमा 【फुकुओका ज्योउ साकुरा माचुरी】 आयोजना गरिन्छ।

माइजुरु पार्क एक प्रसिद्ध स्थल हो, जहाँ सोमेइयोशिनो र शिडारेजाकुरा जस्ता १९ प्रकारका साकुराका फूलहरू फुल्छन्। यस वर्ष पनि 【फुकुओका ज्योउ साकुरा माचुरी】 यहाँ भइरहेको छ।

यस महोत्सवको आकर्षण भनेको, यहाँ विभिन्न स्वादिष्ट खानाका स्टल र किचन कारहरू राखिएका छन्। साकुराको दृश्यलाई हेर्दै वसन्तका परिकारहरूको मजा लिन सक्नुहुन्छ। फुकुओका शहरका लोकप्रिय रेस्टुरेन्टका स्टलहरू, उत्सवका परिकारहरूको स्टलहरू, यामे चिया, मिठाइ र जापानी मदिरासम्मका स्टलहरू छन्। त्यसमाथि, बच्चाहरूको लागि खेलकुदका उपकरणहरू, सडक कलाकारहरूको प्रदर्शन, र स्ट्याम्प र्याली जस्ता गतिविधिहरू पनि छन्, जसले गर्दा परिवारसँग जान उपयुक्त हुनेछ।

राति साकुरा र फुकुओका दरबार उज्यालोमा प्रकाशित हुन्छ, र रातको साकुरा फूलको दृश्य अति आकर्षक हुन्छ। पानीमा साकुराका रुखहरूको प्रतिबिम्ब “उल्टो साकुरा” पनि निकै सुन्दर देखिन्छ। यो दृश्य दिनको भन्दा बिल्कुलै फरक र रमाइलो हुन्छ।

यस हप्ता आइतबारसम्म जारी हुने यस【फुकुओका ज्योउ साकुरा माचुरी】, यदि अझै जानु भएको छैन भने, पक्कै पनि भ्रमण गर्नुहोस्!

【फुकुओका शहरको सूचना】

विदेशीहरूले परामर्श लिन सकिने काउन्टरको परिचय

नयाँ जीवनमा कुनै समस्या वा नबुझेको कुरा छ कि?

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धि परामर्श कहाँ लिने भनेर थाहा नभएको समयमा, उपयुक्त सम्पर्क काउन्टर तथा अन्य जानकारीहरु प्रदान गर्दै आईरहेको छ।

फोन नम्बर, (०१२०-६६-१७९९) ।

सम्पर्क समय ९:०० देखि ५:३० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

राष्ट्रिय स्वास्थ्य बीमा, फोहोर, कर, आदि जस्ता फुकुओका शहरका प्रक्रियाहरूको बारेमा बुझ्नु परेमा, दोभाषे सेन्टरमा कल गरेर, आफू बस्ने वार्डमा सम्पर्क गरि परामर्श लिन सक्नुहुन्छ।

फोन नम्बर, (०९२-७५३-६११३) । 

सम्पर्क समय ९:०० देखि ५:०० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

यस अतिरिक्त, चिकित्सा संस्था खोज्दा, अस्पतालमा डाक्टरसँग कुरा गर्दा, अस्पताल वा सिफारिस गरिएको फार्मेसीमा औषधि लिँदा, Fukuoka City Medical Interpreting Call Center को टेलिफोन अनुवाद सेवा प्रयोग गर्न सक्नुहुन्छ।

फोन नम्बर, (०९२-७३३-५४२९) हो।

चौबीसैघण्टा हरेक दिनलिन सकिने यो सेवा, २० वटा भाषाहरुमा उपलब्ध छ। 

उपयोग शुल्क निःशुल्क छ, तर फोनको शुल्क भने फोन गर्ने व्यक्तिले तिर्नु पर्छ।

【फुकुओका टावरमा साकुरा इभेन्ट】

वसन्तको रमाइलो अनुभवगर्न सकिने इभेन्टको जानकारी छ। फुकुओका टावरमा अहिले जापानको वसन्तको अनुभूति गर्न सकिने साकुरा इभेन्ट भइरहेको छ।
टावरको शिखरमा साकुराको इल्युमिनेशन बत्तीले सजाइएको छ, जसले ३ प्रतिशतदेखि ५ प्रतिशत फुलेकोबाट पूर्ण रूपमा फुलेको साकुरालाई उज्यालोमा फुलाउँदै देखाउँछ। टावरको अगाडिको क्षेत्र पनि साकुराको रंगमा प्रकाशमय गरिएको छ, जसले वसन्तको रातको आकाशको जस्तो सुन्दर दृश्य प्रस्तुत गर्दछ। लाइट अपको समय हरेक रात ७ बजे देखि ११ बजे सम्म हो। यो वसन्तको रातको पैदल यात्रा गर्न उपयुक्त अवसर पनि हो।
त्यस्तै, टावरको तेस्रो तल्लामा रहेको अवलोकन कक्षमा, साकुराको सुगन्धको अनुभव गर्न सक्नुहुन्छ। लिफ्टको ढोका खोल्दा, साकुराको सुगन्ध फैलिन्छ र अवलोकन अनुभवलाई अझ विशेष बनाउँछ। यो साँच्चिकै पाँचौं इन्द्रियबाट वसन्तको अनुभव गर्न सकिने स्थान हो।
त्यसै गरी, दोस्रो तल्लामा रहेको " Refuge Sky Cafe & Dining" मा साकुरा विषयमा आधारित विशेष मेनुहरू उपलब्ध छन्। साकुराको स्वाद भएको माचो लाटे, गुलाबी रंगको आकर्षक चेरि लेमोन सोडा, र चेरि क्रीमसँग माचो प्यानकेकहरू समेत, वसन्तको स्वादका मिठाइ र पेय पदार्थहरू पाइन्छ।
यो इभेन्ट १३ अप्रिल, आइतबारसम्म चल्नेछ। पक्कै पनि फुकुओका टावरको साकुरा इभेन्टमा सहभागी भएर वसन्तको रमाइलो अनुभव गर्नुहोस्।

【फुकुओका शहरको सूचना】

फोहर फ्याँक्ने नियम सम्बन्धी

फुकुओकामा नयाँ जीवनयापन शुरु गर्नुहुने धेरै संख्यामा हुनुहुन्छ होला।

यसपटक, फोहर फ्याँक्ने नियम सम्बन्धी सूचना रहेको छ।

फुकुओकामा फोहरलाई "जल्ने फोहर", "नजल्ने फोहर", "खाली सिसाको बोतल/प्लास्टिकको बोतल", अनि "ठूला आकारको फोहर" मा विभाजन गरी फ्याँक्ने गरिन्छ। "ठूला आकारको फोहर" बाहेक अन्य सबै फोहरहरूका लागि, कन्भिनियन्स स्टोर वा सुपर मार्केटमा बेची राखेको, फुकुओका शहरको फोहर-फाल्ने-झोला प्रयोग गरेर फोहोर फाल्ने गर्नुहोस्।

जल्ने फोहरको लागि, रातो रंगको फोहर-फाल्ने-झोला हो।

कच्चा फोहोर, कागज, कपडा, प्लास्टिक आदि फाल्ने बेलामा, रातो झोला प्रयोग गर्नुहोस्।

खाली क्यान र गिलास जस्तालाई, नजल्ने फोहरको रुपमा, निलो फोहर-फाल्ने-झोलामा फाल्ने गर्नुहोस्।

खाली सिसाको बोतल र प्लास्टिकको बोतल फाल्नको लागि, पहेंलो रंगको फोहर-फाल्ने-झोला प्रयोग गर्नुहोस्।

बसोबास गर्ने ठाउँ अनुसार फाल्ने दिन तोकिएको हुन्छ।  

जल्ने फोहर हप्तामा २ पटक, खाली सिसाको बोतल/प्लास्टिकको बोतल र नजल्ने फोहर चाहिँ महिनाको १ पटक संकलन हुन्छ।

फोहर मध्यरात संकलन हुनेभएकोले अँध्यारो भएदेखि रातिको १२ बजे सम्ममा, फोहर फाल्ने निश्चित ठाउँमा फाल्ने गर्नुहोस्।

फुकुओका शहरको आधिकारिक LINE ID मा Friendadd गरेर, तपाईंको ठेगाना सेट गर्नुभयो भने, फोहोर फाल्ने दिनमा सूचना प्राप्त गर्नुहुनेछ।

फाल्न चाहनुभएको फोहोरको नाम राख्नुभयो भने, फोहोरको किसिम पनि जान्न मिल्ने भएकोले यो एकदम उपयोगी छ।

एउटा झोलामा नअट्ने ठूला आकारको फोहर वा झोला नै च्यात्ने किसिमको भारी फोहरलाई, ठूला आकारको फोहरको रुपमा फाल्नुहोस्।

ठूला आकारको फोहरका लागि, फोन, इन्टरनेट, वा LINE द्वारा ‘फुकुओका शी सोदाई गोमी उकेचुके’ मा सम्पर्क गर्नुहोस्। शुल्क, फोहोर फाल्ने ठाउँ, फाल्ने दिन, इत्यादि जाँच गरेर फोहोर बाहिर राख्नुहोस्।

फोनमार्फत सम्पर्कका लागि, ठुलो आकारको फोहर फाल्ने सेन्टरको फोन नम्बर, ०९२-७३१-११५३ । 

टेलिफोन अनुवाद मार्फत् २३ वटा  भाषाहरुमा सेवा उपलब्ध छ।

यस अतिरिक्त, QR कोड स्क्यान गरेर १० विभिन्न भाषाहरूमा फोहोर फाल्ने नियमहरूको बारेमा जानकारी प्रदान गर्ने सेवा पनि राखिएको छ। कृपया फुकुओका शहरको वेबसाइट हेर्नुहोस्।

【फुकुओकामा इन्डियन फेस्टिवल】

यो साता अन्त्यमा, यहाँ फुकुओका शहरमा क्युशु क्षेत्रको सबैभन्दा ठूलो इन्डियन फेस्टिवल हुँदैछ।
२२ तारिक शनिबार र २३ आइतबार, तेन्जिन च्यूओ पार्कमा हुने "होली महोत्सव"। नेपालमा जस्तै "होली" भनेको इन्डियामा वसन्त ऋतुको आगमनलाई मनाउने महोत्सव हो। "ह्यापी होली" भन्दै, रंगका पाउडरले एक अर्कामा रंग लगाउने र रंगीन पानी छर्केर उत्सव मनाइन्छ।
कार्यक्रम स्थलमा, देशभरका ५० भन्दा बढी प्रसिद्ध स्टलहरू जम्मा हुनेछन्, जहाँ इन्डियन करी लगायत इन्डियन परिकार, मसला, रंगीन गहना र हस्तकलाका सामग्रीहरू बिक्री हुनेछ। त्यस्तै, इन्डियन संगीत, शास्त्रीय नृत्यका स्टेज प्रदर्शनहरू, इन्डियन चलचित्रका गीत-संगीतका दृश्यहरूमा प्रायः देखिने "बोलिवुड डान्स" पनि प्रस्तुत हुने भएकोले उत्सवलाई झनै रोमाञ्चक बनाउने पक्का छ! थप रूपमा, विशेष अतिथिको रूपमा, लोकप्रिय डीजे, डान्सर र प्रभावकारी व्यक्तिहरू पनि उपस्थित हुनेछन्। प्रवेश निशुल्क छ।
इन्डियन संस्कृतिको आकर्षणले भरिएको यो दुई दिनको रंगीन महोत्सवमा वसन्तको उत्सव मनाऔं।

【फुकुओका सिटी इन्टरनेशनल फाउण्डेसनको सूचना】

विदेशीहरुका लागि आप्रवासन, आवास र राष्ट्रियता सम्बन्धि परामर्श

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्शका लागि, २ हप्ता अगाडि सम्पर्क गर्नुहोला।

गोपनीयता कडा पालना गर्ने भएकोले ढुक्क भएर परामर्श लिनुहोस्।

विस्तृत जानकारीका लागि, फोन नम्बर ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

LINE कल मार्फत परामर्श लिन सकिन्छ!

फाउण्डेशनको LINE आधिकारिक Account बाट प्रत्यक्ष कल गरी जीवनयापनसँग सम्बन्धित परामर्श वा निःशुल्क परामर्शको लागि बुकिंग आदि गर्नका लागि सम्पर्क गर्न सक्नुहुन्छ। फोन अनुवाद सेवाबाट बहुभाषी सहयोग पनि उपलब्ध छ।

थप रूपमा, फाउण्डेशनको कार्यक्रम र विदेशी बासिन्दाको लागि जानकारीहरू पनि प्राप्त गर्न सकिन्छ।

फुकुओका सिटी इन्टरनेशनल फाउण्डेसनको होमपेजबाट अवश्य पनि "Friend Add" गर्नुहोला।

च्याट सेवा उपलब्ध छैन। लेखेर परामर्श गर्न चाहनुहुन्छ भने, फाउण्डेशनको होमपेजमा रहेको सम्पर्क फारम प्रयोग गर्नुहोस्।

【फुकुओका एयरपोर्ट अन्तर्राष्ट्रिय उडानको ग्राण्ड ओपनिङ】

२०२२ देखि नवीकरण हुँदै आएको फुकुओका अन्तर्राष्ट्रिय एयरपोर्ट अब अझ बढी सुविधाजनक र आरामदायक रूपमा पुनर्निर्माण हुने भएको छ। फुकुओका एयरपोर्टको अन्तर्राष्ट्रिय उडान टर्मिनल भवन यस महिना २८मा ग्राण्ड ओपन हुन गईरहेको छ! “सहज, छिटो, रमाइलो” भन्ने अवधारणामा आधारित, यो अझै आरामदायक स्थानको रूपमा रूपान्तरण हुनेछ।

सुगम प्रस्थान प्रक्रियालाई सुनिश्चित गर्न, सुरक्षा जाँच क्षेत्र र आवगमन जाँच क्षेत्रको विस्तार र स्थानान्तरण गरिएको छ। यहाँ अधिकतम ४जनाले एकसाथ तयारी गर्न सक्ने र तयार भएका व्यक्तिहरूलाई सुरक्षा जाँचमा अघि बढ्न अनुमति दिने “स्मार्ट लेन” प्रणालीको प्रयोग गरिएको छ। साथै, कुनै लामो लाइन बिना, प्राथमिकताका आधारमा सुरक्षा जाँच लिने “प्रायोरिटी लेन” प्रणाली, जुन क्युशु क्षेत्रमा पहिलो पटक लागू गरिएको छ।

त्यसै गरी, प्रस्थान अघि आनन्द लिन सकिने स्थान पनि थप सुसज्जित गरिएको छ! ड्यूटी-फ्री स्टोरको क्षेत्र चार गुणा बढाइएको छ र फुकुओका र क्युशुको खाद्य संस्कृतिलाई अनुभव गर्न सकिने फूड कोर्ट पनि खुल्ला हुनेछ। विभिन्न प्रकारका स्टोरहरू यस स्थानमा छन्, र प्रस्थानको समयमा फुकुओका र क्युशुको स्वाद र वातावरणको आनन्द लिन सकिने यस स्थानमा परिणत भएको छ।

फुकुओका, क्युशु र पश्चिमी जापानको प्रवेशद्वारको रूपमा, यो नवीनीकरण पछि अझ बढी सुविधाजनक र आरामदायक बनाइएको, फुकुओका एयरपोर्ट अन्तर्राष्ट्रिय उडान टर्मिनललाई अवश्य चेक गरि हेर्नुहोस्!

【फुकुओका शहरको सूचना】

बसाईसराई फोहर सम्बन्धि

वसन्त ऋतुमा स्थान परिवर्तनको कारण फर्निचर र घरेलू उपकरण जस्ता ठूला आकारको फोहर बढ्ने समय हो।

यस पटक, ठूला आकारको फोहोर फाल्ने तरिका सम्बन्धि जानकारी दिनेछु।

ठूला आकारको फोहोर फाल्न, फोन, इन्टरनेट वा फुकुओका सिटीको LINE मार्फत अग्रिम आवेदन दिई, कन्भिनीयन्स स्टोर आदिमा प्रशोधन टिकट खरीद गर्नुहोस्।

फोहर संकलन, आवेदन दिएको मितिबाट एक हप्ता लाग्नेछ।

संकलनको दिनमा बिहान ८:३० सम्म तोकिएको ठाउँमा राख्नुहोस्।

ठूला आकारको फोहोर रिसेप्शन सेन्टरको फोन नम्बर ०९२-७३१-११५३ ।

इन्टरनेट वा LINE मार्फत २४ घण्टा जहिलेपनि आवेदन दिन सकिने भएकोले सुविधाजनक छ।

फुकुओका शहरको होमपेजमा खोजि हेर्नुहोला।

यद्यपि टिभी, फ्रिज, फ्रिजर, वाशिंग मेशिन, कपडा ड्रायर र एयर कन्डिशनरहरूको हकमा घरायसी सामान प्रशोधन कानुन बमोजिम फोहर फाल्ने विधि तोकिएको छ। 

नयाँ खरिद गर्नु हुँदा भएको पुरानो झिकेर लैजाने वा खरिद गर्नुभएको पसलबाट नै पुरानो झिकिदिने गर्नुहोस्। खरिद गर्नुभएको पसल थाहा नभएमा, नजिकैको Yamada Denki मा सङ्कलन बारे सोधपुछ गर्नुहोस्।संकलनगर्न लगाउँदा, रिसाइकल शुल्क, संकलन र यातायात शुल्क तिर्नु पर्छ।

नागरिक विपद् रोकथामदिवस

यस वर्ष, सन् २००५ मार्च २० मा गएको फुकुओका प्रान्त पश्चिम तट भूकम्प गएको २० वर्ष भएको छ। फुकुओका शहरले यस भूकम्पको अनुभवलाई नबिर्सन मार्च २० लाई "नागरिक विपद् रोकथाम दिवस" को रूपमा तोकिएको छ।

पछिल्ला वर्षहरूमा विभिन्न ठाउँहरुमा भूकम्प, भारी वर्षा जस्ता ठूला प्रकोपहरू भएका छन्। विपद् कहिले आउँछ भनेर थाहा हुँदैन। 

विपद् आईपर्दा, प्रत्येक व्यक्तिले उपयुक्त कदम चाल्नको लागि, दैनिक आधारमा तयारी गर्न महत्त्वपूर्ण छ।

फुकुओका शहरको वेबसाइटबाट HazardMap वा विपद् सम्बन्धि जानकारी लिने, आश्रय लिने स्थानमा जाँदा लिएर जानुपर्ने सामान पहिलेदेखि तयारी र जाँच गरि राख्ने गर्नुहोस्।

"नागरिक विपद् रोकथाम दिवस" को अवसरमा, आफ्नो, आफ्नो परिवार र समुदायको सुरक्षाको लागि विपद् रोकथामको बारेमा सोचौं।

【फुकुओका ह्यान्डमेड र विबिध सामान महोत्सव】

आज हस्तकला सामानका प्रेमीहरूका लागि उपयुक्त जानकारी लिएर आएकी छु!
【फुकुओका ह्यान्डमेड र विबिध सामान महोत्सव】 यस हप्ता शनिबार ८ र आइतबार ९ गरि २ दिन, फुकुओका कोकुसाई सेन्टरमा आयोजना हुन गईरहेको छ। 

यो कार्यक्रम क्यूशुको सबैभन्दा ठूलो हस्तकला सामान लगायत विबिध सामानको मेला हो, जसमा देशभरबाट लगभग ६६० वटा स्टलहरू लाग्नेछन्। कार्यक्रममा हस्तकलाबाट बनेको लुगा, हस्तकला सामग्रीको बिक्री, गहना, फर्निचर र माटोका भाँडा, बगैचाका सामानहरू र अन्य धेरै प्रकारका सामानहरू पाइन्छ। थप रूपमा, कार्यशालामा तपाईंले पनि बनाउने अनुभव लिन सक्नुहुन्छ, जुन बच्चासँगै रमाइलो गर्ने राम्रो अवसर हुन सक्छ। साथै, स्थलमा विश्रामको लागि स्थान र खानपान सेवा लगायत बाहिर किचन कारहरू पनि उपलब्ध हुनेछन्, जसले गर्दा दिनभर रमाइलो गर्न सक्नुहुन्छ।

यस पटक कार्यक्रमको बिषयबस्तु हो, " आरामदायी जीवनको प्रस्ताव"।
वसन्तको लागि नयाँ जीवन र जीवनशैली अपडेट गर्न उपयुक्त सामग्रीहरू पनि पाउन सकिन्छ। अहिलेसम्म नदेख्नुभएका र अनौठो हस्तनिर्मित सामानहरु देख्न सक्नुहुन्छ! यस हप्ताको अन्त्यमा, तपाईंहरु पनि 【फुकुओका ह्यान्डमेड र विबिध सामान महोत्सव】 मा गएर हेर्दा कसो होला!

【फुकुओका शहरको सूचना】

भीडभाड नगरी बसाईसराईको प्रक्रिया चाल्नु

मार्च र अप्रिलमा बसाईसराई धेरै हुने भई वार्ड अफिसको काउण्टरमा भीड हुने समय हो।

विशेष गरी मार्च २१ देखि अप्रिल ११ सम्म, २-३ घण्टा कुर्नुपर्ने जत्तिको भीड हुने भएकोले, सकेसम्म यस अवधिमा कार्यालय भ्रमण नगरिदिनु होला। 

सप्ताहका दिनहरुमा व्यस्त भई बसाईसराईको सूचना दर्ता गर्न जान असमर्थ हुनुहुने महानुभावहरुले, बिदाका दिनमा बसाईसराईको प्रक्रिया गर्न सकिने गरि मार्च ३० र अप्रिल ६ को आइतबार, प्रत्येक वार्ड कार्यालय र शाखा कार्यालयका काउण्टरहरू अस्थायी रूपमा खोलिनेछन्। बिहान ९:०० बजेदेखि दिउँसो १:०० बजेसम्म,बसाईसराईको सूचना वा बसाईसराई सम्बन्धित सूचना दर्ताहरू स्वीकार गर्दछौं।

वार्ड अफिसमा बसाईसराईको प्रक्रियाका लागि सुविधाजनक अनलाइन सेवा पनि छ।

शनिवार, आइतवारर सार्वजनिक बिदाहरुमा बाहेक, प्रकिया चलाउन अपेक्षित मिति भन्दा कम्तिमा ५ दिन अगाडि ८:३० बजेसम्ममा स्मार्टफोन आदिबाट, ठेगाना परिवर्तन वा प्रक्रियाको अपेक्षित मिति आदिको जानकारी पठाउनुभयो भने, बुकिङ गर्न सक्नुहुन्छ र काउण्टरमा प्रक्रियाको समय कम लाग्ने र प्रकिया पनि सहज हुन्छ।

फुकुओका शहरभन्दा बाहिर बसाई सर्दै हुनुहुन्छ भने, वार्ड अफिसमा नगईकन पनि, हुलाक मार्फत् वा माइनम्बर कार्ड हुनेहरुले अनलाइनबाट सूचना दर्ता गर्न सक्नुहुन्छ।

यद्यपि, विदेशमा सर्दै हुनुहुन्छ भने, कृपया ध्यान दिनुहोस् कि अनलाइनबाट बसाईसराईको प्रक्रिया गर्न सक्नुहुन्न।

यदि फुकुओका शहरभित्र बसाई सर्दै हुनुहुन्छ भने, बसाईसराई सूचना दर्ता गर्न आवश्यक छैन तर, नयाँ ठेगानामा बस्न थाल्नु भएदेखि आफू सर्नुभएको वार्ड अफिसमा बसाईसराई सूचना बुझाउनुपर्छ।

नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

फोन नम्बर, ०९२-७५३-६११३ हो।

तपाईं आफू बस्ने वार्ड र बसाईसराईको प्रक्रियाको बारे बुझ्न चाहेको भन्नुहोला।

यस अतिरिक्त, बसाईसराई गर्दा, खानेपानी आपूर्ति शुरु गर्न वा रोक्नका लागि सुचना दिन आवश्यक छ। शनिवार, आइतवार र सार्वजनिक बिदाका बाहेक, सर्ने दिनभन्दा कम्तिमा ४ दिन अगाडिसम्ममा फोनमार्फत सम्पर्क गर्नुहोस्।

फोन नम्बर ०९२-५३२-१०१० हो। आफूले चाहेको विदेशी भाषामा कल गर्न सक्नुहुन्छ।

अनलाइनबाट पनि आवेदन दिन सक्नुहुन्छ।

【एकिबेन】

तपाईहरुले कहिल्यै  【एकिबेन】 खानुभएको छ ? 【एकिबेन】 भनेको स्टेशन र ट्रेनको भित्र यात्रुहरूलाई बिक्री गर्ने बेंटो हो, जसमा प्रायः उक्त स्थानको प्रसिद्ध खाना र विशेष उत्पादनहरू राखिएका हुन्छन्। यसले जापानको खाद्य संस्कृति र उक्त स्थानको विशेषताहरूलाई दर्शाउँछ।

जापानका सबै स्टेशनहरूमा 【एकिबेन】 पाइन्छ र धेरै प्रकारमा उपलब्ध हुने गर्छ। केहि बेंटोहरूमा ताजा समुद्री खाना, केहिमा जापानी गाईको मासु हुन्छ भने केहि बेंटोहरूमा स्थानिय परिकार समावेश हुन्छ। अहिले, केहि बेंटोहरूमा धागो तान्दा तातो हुने प्रणाली छ, जसले गर्दा ट्रेनको भित्र पनि तातो बेंटो खान सक्नुहुन्छ!

तपाईं त्यस स्थानमा नगईकन पनि 【एकिबेन】 खाएर अनुभव गर्न सक्नुहुन्छ। यस हप्ताको फेब्रुअरी २६ देखि मार्च ४ सम्म, हाकाता हांक्यूमा स्थानीय प्रसिद्ध【एकिबेन】 को प्रदर्शनी आयोजना हुन गईरहेको छ। "जापानभरिका प्रसिद्ध 【एकिबेन】 र स्वादिष्ट खाना महोत्सव" भन्ने नामको यस प्रदर्शनीमा १०० भन्दा बढी किसिमका स्थानीय स्वादका 【एकिबेन】 हरू समाबेश हुनेछन्। साथै, 【एकिबेन】बाहेक, ग्रूमेट र मिठाईदेखि लिएर जापानका सबै स्थानीय विशेषताहरू र स्वादिष्ट खानेकुरा पनि उपलब्ध हुनेछन्। अवश्य जानुहोस्। जापानका विभिन्न स्थानका स्वादहरू यात्राको अनुभवमा मजा लिनुहोस्!

【तेन्जिनको समाचार स्थान ”SOLARIA DAIGAMEN””HULIC SQUARE FUKUOKA TENJIN”】

पहिलो कुरा, तेन्जिनको प्रसिद्ध स्थान सोलारिया स्टेज भवनको पहिलो तलामा रहेको "स्टेज हिरोबा" मा स्थित ठूलो स्क्रीन अब नयाँ रूपमा पुनः सुरु गरिएको छ। यो स्क्रीनको आकार पहिलेको भन्दा ९ गुणा ठूलो भएको छ, यसको चौडाइ ८ मिटर र उचाइ ९ मिटर भएको छ।

यसको नवीकरणको अवसरमा, "मरीन वर्ल्ड मिचीनो नाखामिचि" नामक जलजीव संग्रहालयसँगको सहकार्यमा विशेष भिडियो चलाइएको छ। यो भिडियोमा, ठूलो स्क्रिनमा पेंग्विनहरू पानीको ट्यांकबाट निस्किरहेको जस्तो देखिने दृश्य प्रस्तुत गरिएको छ, जसले दर्शकलाई भ्रम उत्पन्न गर्छ। पर्खाइको समयमा पनि रमाइलो गर्न सकिने यो राम्रो स्थान हो भन्न मिल्छ। तेन्जिनको नजिक जानु हुँदा पक्कै पनि【SOLARIA DAIGAMEN】पनि चेक गर्नुहोला।

अब अर्को जानकारी छ, 【HULIC SQUARE FUKUOKA TENJIN】को बारेमा। यो नयाँ समाचार स्थान फुकुओका शहरको पुनर्विकास परियोजना "तेन्जिन बिग ब्यान" अन्तर्गत बनाइएको नयाँ भवन हो। यो तेन्जिनको मेइजी सडकको छेउमा र "फुकुओका पार्को"को नजिकै छ।

【HULIC SQUARE FUKUOKA TENJIN】, भूमिगत ३ तला र १९ तलाको एक बहुउद्देशीय भवन हो। यो मेट्रो स्टेशनसँग सिधै जोडिएको छ र यहाँ ८ नयाँ रेस्टुरेन्टहरूको संग्रह पनि छ। यहाँ बार्बेक्यु, चाइनिज र वाइन पब जस्ता विभिन्न प्रकारका रेस्टुरेन्टहरु छन। 

रेस्टुरेन्टहरू बाहेक, यहाँ ड्रगस्टोर, कपडा पसल र स्वास्थ्य क्लिनिक पनि छन्। माथिल्लो तल्लामा होटल पनि बनाइएको छ र यो अप्रिल महिनामा खोलिने योजना रहेको छ।

फुकुओका तेन्जिन अब अझै रमाइलो र व्यस्त स्थान बन्नेछ। यहाँ आगन्तुक र स्थानिय नागरिकहरूका लागि नयाँ र आकर्षक स्थानहरू खुल्नेछन्। साँच्चिकै रमाइलो हुनेछ! नयाँ स्थान र सुविधाहरूले फुकुओका टेन्जिनलाई अझ आकर्षक बनाउनेछन्। यहाँको यात्रा र अनुभवहरू निकै मनोरञ्जक हुनेछन्!

【त्रीय बिरालो गतिविधि】

फेब्रुअरी २२ तारिक बिरालो दिवस हो। "बिरालोको साथ बस्न पाएको खुशीको लागि धन्यवाद व्यक्त गर्ने र बिरालोसँग यो खुशीलाई अनुभव गर्ने "स्मरणीय दिन" भन्ने उद्देश्यले यो दिवस मनाईन्छ।

तपाईंहरूलाई【क्षेत्रीय बिरालो】 थाहा छ कि छैन? क्षेत्रीय बिरालो भनेको क्षेत्रमै व्यवस्थापन गरिएका सडकमा फेला पर्ने बिरालोहरू हुन्। क्षेत्रीय बिरालोहरूलाई प्रजनन नियन्त्रण गर्न शल्यक्रिया गरिन्छ र चिन्हको लागि कानको अग्रभाग थोरै काटिन्छ या कान छेडिएको हुन्छ। यदि तपाईंले बाटोमा यस्तो बिरालो देख्नुभयो भने, त्यो बिरालो पक्कै पनि नजिकैको क्षेत्रमा पालिएको क्षेत्रीय बिरालो हुनेछ।

सडकमा बिरालोहरूलाई छोड्दा, शौचालय र आवाजको कारणले वरपरको पर्यावरणमा समस्या पर्न सक्छ। कसैलाई बिरालो मनपर्ने र बाहिरी बिरालोहरूको मद्दत गर्न चाहने, हेरचाह गर्न चाहने व्यक्तिहरू हुन्छन् भने, केहीलाई एलर्जी वा बिरालो मन नपर्ने हुन्छन्। यी दुबै प्रकारका मानिसहरूलाई बिरालोहरूबाट उत्पन्न हुने समस्याबाट बच्न, वा बिरालोको संख्या नबढाउन समाधान गर्ने तरिका भनेको, 【क्षेत्रीय बिरालो गतिविधि】हो।

यसलाई क्षेत्रीय पर्यावरणको रूपमा बुझेर, क्षेत्रीय बासिन्दाहरुको सहमति र सहयोगमा, प्रजनन नियन्त्रण शल्यक्रिया गरिन्छ, निश्चित नियमहरूको आधारमा खाना दिने, शौचालय व्यवस्थापन जस्ता कार्यहरू संचालन गर्छन्। सडक बिरालोलाई हटाउने होइन, तर केही वर्षको अवधिमा क्षेत्रबाट मालिकविहीन बिरालोहरू हट्छ भन्ने लक्ष्य हो। क्षेत्रीय बिरालो गतिविधिहरूमा पनि क्षेत्रीय बासिन्दाहरुको सहयोग र समझदारी आवश्यक छ। सबैको बसोबासलाई सहज बनाउन, नजिकका क्षेत्रहरूमा भइरहेको 【क्षेत्रीय बिरालो गतिविधि】तर्फ चासो दिएर हेर्दा कसो होला।

【फुकुओका शहरको सूचना】

शहर तथा प्रान्तीय कर फाइल गर्ने सम्बन्धि

फुकुओका शहरले रेइवा ७ को शहर तथा प्रान्तीय कर फाइल लिईदैछ। 

कर फाइल गर्ने म्याद, मार्च १७ सोमबारसम्म हो। 

कर फाइल बुझाउने काउन्टर चाहिं वार्ड कार्यालयको कर बिभाग हो।

काउण्टर भिडभाड हुने भएकोले, कृपया हुलाक वा अनलाइन मार्फत् कर फाइल गर्न अनुरोध गरिन्छ।

फुकुओका शहरमा कर फाइल गर्न आवश्यक व्यक्तिहरु भन्नाले, २०२५ को जनवरी १ देखि फुकुओका शहरभित्र ठेगाना भई २०२४ मा आम्दानी भएका व्यक्तिहरु पर्दछन्।

कर कार्यालयमा अन्तिम कर फिर्ती निवेदन पेश गर्नुहुने वा तलब आय मात्र भएको व्यक्तिको हकमा कम्पनीमा वर्षान्तको समायोजन गर्नुहुने आदिले कर फाइल गर्न आवश्यक छैन।

 कर फाइलका लागि आवश्यक कागजातहरु,

• माइनम्बर कार्ड भएका व्यक्तिहरुले माइनम्बर कार्ड
• माइनम्बर कार्ड नभएका व्यक्तिहरुले माइनम्बर उल्लेख गरिएको बसोबास प्रमाणपत्रको प्रतिलिपि जस्ता माइनम्बर थाहा हुने कागजातहरू। सवारीचालक परिचय पत्र, पासपोर्ट, बसोबास कार्ड आदि पहिचान खुल्ने प्रमाणपत्रहरू
• गेन्सेन्च्योउस्युउह्योउ आदि जस्ता गतवर्ष २०२४ को आय देखाउने कागजातहरु
• २०२४ मा गरिएका कटौतीहरुको कागजातहरू

आवश्यक कागजात वा कर फाइल गर्न आवश्यक छ छैन आदि बारे बिस्तृत जानकारीका लागि कृपया आफू बसोबास गर्दै आएको स्थानीय वार्ड कार्यालयको होमपेजमा हेर्नुहोला।

जानकारीहरु अंग्रेजी, चाइनिज, कोरियाली, भियतनामी र नेपाली भाषामा उपलब्ध छन्।

नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

अंग्रेजी, चाइनिज, कोरियाली, भियतनामी र नेपाली जस्ता २३ वटा भाषाहरुमा परामर्श लिन सकिन्छ।

फोन नम्बर, (०९२-७५३-६११३) हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुन्छ।

तपाईं आफू बस्ने वार्ड र कर फाइलबारे बुझ्न चाहेको भन्नुहोला।

यस अतिरिक्त, वार्ड कार्यालयमा जानुहुँदा पनि आफ्नो फोन प्रयोग गरेर यस सेवा मार्फत् अनुवाद गर्न सकिने भएकोले नहिच्किचाइकन यसको प्रयोग गर्नुहोला।

【आकुतागावा पुरस्कार / नाओकी पुरस्कार】

जापानका प्रमुख साहित्य पुरस्कारहरू मध्ये एक हो, 【आकुतागावा पुरस्कार】। यस वर्ष फुकुओका शहरको सेइनान् गाकुइन विश्वविद्यालयको स्नातकोत्तर विद्यार्थी २३ वर्षीया 【सुजुकी युई】ले प्राप्त गर्नुभएको छ। उहाँ, विश्वविद्यालयमा अंग्रेजी साहित्यको अध्ययन सँगसँगै सिर्जनात्मक कार्यमा पनि संलग्न हुनुहुन्छ।

जापानी साहित्यको दुनियाँमा थुप्रै पुरस्कारहरू छन्, तर तीमध्ये विशेष गरी सम्मान र इतिहासको गर्व गर्ने पुरस्कारहरू हुन् 【आकुतागावा पुरस्कार】 र 【नाओकी पुरस्कार】।
【आकुतागावा पुरस्कार】 भनेको पत्रिकामा प्रकाशित नयाँ लेखकद्वारा लेखिएका शुद्ध साहित्यका मध्य र छोटो कथाहरूबाट चयन गरिन्छ। 【नाओकी पुरस्कार】 भनेको नयाँ र मझौला लेखकद्वारा लेखिएका मनोरन्जनात्मक कृतिहरू, एकल पुस्तक, लामो उपन्यास वा सङ्ग्रहित कथाहरूको लागि हुन्छ।

दुवै पुरस्कारको चयन प्रक्रिया वर्षमा दुईपटक हुन्छ—पहिलो अर्धवार्षिक चयन जुलाईमा र दोस्रो अर्धवार्षिक चयन अर्को वर्षको जनवरीमा गरिन्छ। दुवै पुरस्कारहरू सार्वजनिक प्रतियोगिता द्वारा दिइने पुरस्कार होइन। 【आकुतागावा पुरस्कार】 पत्रिकामा प्रकाशित कृतिहरूको लागि हुन्छ, भने 【नाओकी पुरस्कार】 पुस्तकको रूपमा प्रकाशित कृतिहरूको लागि। दुवै पुरस्कारका लागि, निर्धारित अवधिमा प्रकाशित कृतिहरूको मध्यबाट, कयौं प्राथमिक चयन पछि अन्तिम उम्मेदवारहरू छनोट गरिन्छ र चयन प्रक्रिया द्वारा पुरस्कार चयन गरिन्छ। कहिलेकाहीं, कुनै पुरस्कार बिना पनि सकिन्छ।

पुरस्कार प्राप्त कृतिहरू प्रायः सो समयका सामाजिक पृष्ठभूमि र मूल्यहरूलाई प्रतिध्वनित गर्छन्, जसबाट समकालीन जापानी संस्कृति र इतिहासको बारेमा बुझ्न सकिन्छ।
यस पटकको पुरस्कार प्राप्त कृति एक जर्मन साहित्यकार, गोएथेका अनुसन्धानकर्ता एक पुरुष प्राध्यापकको कथामा आधारित छ। मौका मिल्यो भने, पक्कै पनि यो कृति पढ्नुहोला।

【फुकुओका सिटी इन्टरनेशनल फाउण्डेसनको सूचना】

कानूनी परामर्श र मानसिक परामर्श अर्थात् व्यक्तिगत परामर्शको परिचय

फुकुओका सिटी इन्टरनेशनल सेन्टरमा रहेको फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क “कानूनी परामर्श” र “मानसिक परामर्श अर्थात् व्यक्तिगत परामर्श” प्रदान गर्दैआईरहेको छ।

“कानूनी परामर्श”, हरेक महिनाको पहिलो शनिबार, बिहान १०:३० देखि दिउँसो १:३० बजेसम्म र

तेस्रो बुधबारको दिउँसो १:०० बजेदेखि ४:०० बजेसम्म, प्रदान गरिंदै आइरहेको छ। परामर्श अवधि ४५ मिनेट।

बुकिंगको आधारमा Fukuoka Bar Association को प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ। भाषा अनुवादकको आवश्यकता भएमा, निःशुल्क अंग्रेजी अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

मानसिक परामर्श अर्थात् व्यक्तिगत परामर्श, हरेक हप्ताको सोमबार, मंगलबार, र विहिबार, जापानी क्लिनिकल मनोवैज्ञानिकहरुद्वारा, अंग्रेजी र जापानी भाषामा परामर्श प्रदान गरिंदै आइरहेको छ। चाहनुहुने महानुभावहरुले बुकिंग गर्नुहोला।

जुनसुकै परामर्श पनि, गोपनीयता कडा पालन गर्ने भएकोले ढुक्क भएर परामर्श लिनुहोस्।

सम्पर्क काउन्टर खुल्ने समय, सोमबारदेखि शुक्रबार, बिहान ९ बजेदेखि बेलुका ५:३० बजेसम्म हो। 

फोन नम्बर (०१२०-६६-१७९९) हो।

LINE कल मार्फत परामर्श लिन सकिन्छ!

फाउण्डेशनको LINE आधिकारिक Account बाट प्रत्यक्ष कल गरी जीवनयापनसँग सम्बन्धित परामर्श वा निःशुल्क परामर्शको लागि बुकिंग आदि गर्नका लागि सम्पर्क गर्न सक्नुहुन्छ। फोन अनुवाद सेवाबाट बहुभाषी सहयोग पनि उपलब्ध छ।

थप रूपमा, फाउण्डेशनको कार्यक्रम र विदेशी बासिन्दाको लागि जानकारीहरू पनि प्राप्त गर्न सकिन्छ।

फुकुओका सिटी इन्टरनेशनल फाउण्डेसनको होमपेजबाट अवश्य पनि "Friend Add" गर्नुहोला।

च्याट सेवा उपलब्ध छैन। 
लेखेर परामर्श गर्न चाहनुहुन्छ भने, फाउण्डेशनको होमपेजमा रहेको सम्पर्क फारम प्रयोग गर्नुहोस्।

【फुकुओका आरिआके नोरी】

हालको समयमा, फुकुओका प्रान्तले जापानभर गर्वले प्रस्तुत गर्ने उच्चतम गुणस्तरको नोरी हो,【फुकुओका अरिआके नोरी】! प्रान्तको दक्षिण भागमा फैलिएको आरिआके समुद्र,जापानका तीन प्रमुख उत्पादन क्षेत्रहरुमध्ये एक हो। यहाँको नोरीको सुगन्ध र जिब्रोमा फैलिने स्वाद यसको विशेषता हो।

ओनिगिरि देखि विभिन्न परिकारका टपिङसम्म, जापानको परम्परागत खानामा नोरी एक अपरिहार्य सामग्री हो। वास्तवमा, यसमा धेरै पोषक तत्वहरू हुन्छन्, जस्तै प्रोटिन, भिटामिन, खनिज, फलाम, क्याल्सियम, फाइबर र अन्य थुप्रै पोषक तत्वहरू, जसले यसलाई एक बहुप्रयोजनीय आहार बनाउँछ। 

नोरीको स्वाद, उत्पादन स्थान र मौसम अनुसार फरक पर्छ। फुकुओका आरिआके नोरी स्वादिलो हुनुको कारण भनेको अरिआके समुद्रमा प्रवेश गर्ने नदिहरूबाट आउने समुद्री पोषक तत्व र उपयुक्त नूनको मात्रासमेत समावेश भएकोले हो। साथै समुद्रको कम चढाइका समयमा भएको सुकाइ पनि एउटा कारण हो। प्राकृतिक अनुकम्पा र कुशल प्रविधिहरूले यसको स्वादलाई विशेष बनाउँछ। फुकुओका प्रान्तको आरिआके समुद्रको नोरीको सिजन, अक्टोबर मध्यदेखि अप्रिलको सुरु सम्म हुन्छ। संकलन समयको अवधिमा, नोरीको वास्तविक सुगन्ध पनि अनुभव गर्न सकिन्छ, जसले गर्दा चाख्न मन लागेर आउँछ। 

तर, यति स्वादिष्ट नोरी किनेर पनि यदि यो राम्रोसँग संरक्षित नगरेमा यसको स्वाद घट्न सक्छ। त्यसैले सुक्खा नोरीलाई राम्रोसँग बन्द गर्न मिल्ने कन्टेनरमा सुखा राख्ने पदार्थको साथ राखेर, प्रत्यक्ष सूर्यको प्रकाशबाट टाढा अँध्यारो स्थानमा राख्नुपर्छ। यो सामान्य तापक्रममा सुरक्षित राख्न सकिन्छ, तर फ्रिजमा राख्न पनि सक्नुहुन्छ। साथै, खाने अगाडि हल्का आगोमा सेकेर वा माइक्रोवेवमा तताएर नरमपनालाई हटाइदिंदा, यसलाई कुरकुरे स्वादिष्ट तरिकाले खान मिल्छ।

यस सिजनमा, स्वादिष्ट 【फुकुओका आरिआके नोरी】लाई भातसँग खाएर फुकुओकाको खानाको मजा लिनुहोस्♪

【फुकुओका शहरको सूचना】

जीवनशैलीसँग सम्बन्धित रोगहरूको रोकथाम महिना

 फेब्रुअरी महिना जीवनशैलीसँग सम्बन्धित रोगहरूको रोकथाम महिना हो।

जीवनशैलीसँग सम्बन्धित रोगहरू "जीवनशैली" को कारणले हुने रोगहरू हुन्।

जीवनशैलीसँग सम्बन्धित रोगहरू जस्तै मधुमेह, उच्च रक्तचाप, CKD (दीर्घकालीन मिर्गौला रोग), हृदयाघात जस्ता रोगहरु असन्तुलित आहार र व्यायामको कमीले गर्दा हुन्छ।

साथै, धुम्रपान, अत्याधिक मद्यपान र तनावका कारण पनि जीवनशैलीसँग सम्बन्धित रोगहरू निम्त्याउन सक्छ।

 स्वस्थ जीवन जिउनका लागि दिनको तीन पटक निश्चित समयमा सन्तुलित र उचित मात्रामा खाना खानु जरुरी छ। बजारमा पाईने तयारी खानेकुरा र चिल्लो खानेकुरा जस्ता पौष्टिक तत्व कम हुने आहारलाई निरन्तरता दिँदा मोटोपना र मधुमेह जस्ता रोग लाग्न सक्छ।

खानेबेला राम्रोसँग चपाउँदा पाचन प्रणालीमा भार कम हुन्छ र मुखको वरपरका मांसपेशीहरू पनि बलियो हुन्छ। कम्तिमा पनि २० मिनेटको हाराहारीमा बिस्तारै खाने गरौं।

 व्यायामको कमीको कारण मांसपेशिहरु घट्नाले, शरीरलाई चाहिने उर्जामा कम हुन गई, तौल बढ्ने सम्भावना बढी हुनेछ।

मांसपेशी र शरीरलाई तन्दुरुस्त कायम राख्न व्यायाम जारी राख्ने गरौं।

व्यायाम गर्ने अवसर कम भएका व्यक्तिहरुले, बजार जाँदा हिडेर जाने, लिफ्ट तथा इस्क्यालेटरको प्रयोग नगरी सकेसम्म भर्याङको प्रयोग गर्ने आदि जस्ता दैनिक जीवनमा थोरै मात्र भए पनि मिल्ने समयमा, अहिलेको भन्दा लगभग १० मिनेट बढि व्यायाम गरौं।

निद्राले मानसिक र शारीरिक थकान हटाउन र रोग प्रतिरोधात्मक क्षमता बढाउन भूमिका खेल्छ।

रोग प्रतिरोधात्मक क्षमता कायम राख्न, निद्राको समय सुरक्षित गर्न र निद्राको गुणस्तर सुधार गर्न आवश्यक छ।

सुत्नुअघि स्मार्टफोन चलाउने, टिभी हेर्ने, क्याफिन खाने तथा अल्कोहल पिउने बानी नगरौं  किनभने यसले तपाईंको निद्राको गुणस्तर घटाउँछ।

साथै, मनतातो पानीमा बस्ने जस्ता आफ्नै किसिमको आराम गर्ने तरिकाहरु पत्ता लगाई, तनावमुक्त जीवन बिताउने प्रयास गरौं।

यस अवसरमा, तपाईं हामी पनि आफ्नो दैनिक जीवनशैलीको बारेमा सोचेर हेर्ने होइन त?