Life in Fukuoka "Nepali"

【मोमिजिगारी" वा "शरद ऋतुका पातहरूको दृश्यावलोकन】

तापक्रम पनि घट्दै गई शरद ऋतु लागि नै सकेको छ। यस मौसममा रूखहरुका पातहरु रातो, हरियो, पहेंलो, सुन्तला आदि बिभिन्न रङ्गहरुमा परिवर्तन भएको देख्न भएको होला। जापानमा, जसरी मानिसहरूले वसन्तमा चेरी ब्लोसम हेरेर आनन्द लिने गर्छन्, त्यसरि नै शरद ऋतुको　दृश्यावलोकनको आनन्द लिने सांस्कृतिक परम्परा छ।

यस परम्परालाई "मोमिजिगारी" वा "शरद ऋतुका पातहरूको दृश्यावलोकन" भनेर चिनिन्छ। शरद ऋतुका पातहरू हेर्न मिल्ने स्थलहरुमा मानिसहरू पैदल यात्रा, हाइकिंग, अनि अलिटाढाका स्थानहरूमा ड्राइभ वा ओन्सेन्को आनन्दसँगै शरदका पातहरूको दृश्यावलोकन गर्न जान्छन्। यस मौसमको आनन्द लिने विभिन्न तरिकाहरू छन्, जस्तै शरद ऋतुका विभिन्न रंगका पातहरुको फोटो खिच्ने, त्यसबाट प्रेरित कला सिर्जना गर्ने, प्राकृतिक दृश्यहरूको आनन्द लिंदै परिवार वा साथीहरुसँग खानपान गरेर रमाइलो समय बिताउने आदि।

अर्को टपिकमा शरदका पातहरू हेर्नका लागि नाम चलेका फुकुओका शहरका केही स्थलहरूको जानकारी दिनेछु! सुन्दै गर्नुहोला।

 

 

【फुकुओका शहरको सूचना】

पानी बगैचा・शरदका पातहरु

फुकुओका शहरमा धेरै जापानी बगैंचाहरु छन्।

युउसेन्तेइ कोउयेन, स्योउफुउयेन, राकुसुइयेन, ओहोरी कोउयेन र निहोन्तेइयेन, जस्ता जापानी बगैंचाहरु शहरको केन्द्रमा भएकाले सजिलै जान सक्नुहुन्छ।

जापानी बगैचाहरु, सीमित स्थानमा भए पनि चारै थरिका ऋतुहरुको दृश्यावलोकन गरेर आनन्द लिन सक्नुहुन्छ।

शुल्क तिरेर माच्च्याको स्वाद लिने सुबिधाको साथै, यस ऋतुमा, बगैंचा हेरी आनन्दमय समय बिताउने र रुखहरुका रंगिन पातहरुको मनोरञ्जन लिनका लागि अति उपयुक्त समय हो।

फुकुओका शहरमा, शरदका पातहरूको दृश्यावलोकन लागि अरु पनि लोकप्रिय धेरै ठाउँहरु छन्।

फुकुओका सिटि म्युजियमको वरिपरि, आबुरायामा नागरिक वन, मोमीजी हाचीमान्गुउ आदि, नोभेम्बरदेखि डिसेम्बरतिर शरदका पातहरूको दृश्यावलोकन लागि उत्तम समय हो। अवश्य तपाईहरु पनि, फुकुओकाको शरद ऋतुको आनन्द लिनुहोस्।

 

साईकल पार्किङ नियम सम्बन्धि

 

प्रायःजसो दैनिक रुपमा साईकल चलाउँछु भन्ने व्यक्तिहरु धेरै हुनुहुन्छ होला।

साईकल पार्किंग गर्दा, तोकिएको पार्किंग स्थलमा पार्क गर्ने गरौं।

साईकल पार्किङस्थल बाहेक सडक वा पार्कमा पार्किङ गरिएका साईकलहरू पैदल यात्रुलाई बाधा वा अवरोध हुने भएकोले, अवैध रूपमा पार्किङ गरिएका साईकलहरुलाई उठाएर लैजाने नियम छ।

फुकुओका शहरमा, यसरी उठाएर लगेका साईकल फिर्ता लिन २,५०० येन तिर्नु पर्छ, यदि निश्चित समय भित्र दावी गरेन भने, यसलाई खारेज गरिन्छ।

व्यावसायिक सुविधा र स्टेशन वरपर छोटो समयको प्रयोजनका लागि नि:शुल्क पार्किङ क्षेत्रहरू पनि हुने भएकोले अवश्य प्रयोग गरेर हेरौं।

【Say Cheese Day】

जापानमा अगस्ट २२ मा, " Say Cheese Day " मनाईन्छ। 

फोटो खिच्ने समयमा, फोटो खिच्ने व्यक्तिले " Say Cheese " भन्ने गरेको देख्नु भएको होला वा तपाईंहरु पनि गर्नु हुन्छ होला। संसारका विभिन्न देशहरूमा फोटो खिच्ने समयमा भनिने कुनै न कुनै वाक्यांश हुने गरेको पाईन्छ, जस्तै कि जापानमा "हाई, चीजु!", अंग्रेजी मूलका देशहरुमा "से, चीज!" त्यस्तै, नेपालमा पनि बिदेशी प्रभावका कारण "चीज!" भन्ने गरेको पाईन्छ। फोटोग्राफरले Say Cheese भनेपछि फोटो खिचाउन बसेका व्यक्तिहरुले पनि "चीज!" भन्ने चलन, एक किसिमको अब क्यामरामा क्लिक गरे भयो भन्ने संकेत हो तर, प्रायः जापानमा फोटोग्राफरले संकेत दिएपछि, फोटो खिचाउने व्यक्तिले मुस्कान सहितको पोज दिए पुग्छ। 

अचानक सडकमा जापानीहरुले फोटो खिचि दिन अनुरोध गर्दा होस् वा जापानी साथीहरूसँग फोटो खिच्दा,  

तपाईहरु पनि जापानी शैलीमा फोटो खिच्ने र खिचाउनेको मनोरञ्जन लिनुहोस् !

 

 

【फुकुओका शहरको सूचना】

मापसे ड्राइभिंग उन्मूलनको बारेमा

तपाईहरुलाई, २००६ अगस्त २५ मा फुकुओका शहरमा घटेको, मदिरा सेवन सवारी दुर्घटनाको बारेमा थाहा छ?

हिगासी वार्डको "उमि नो नाका मिची ओहाशी" मा, मापसे गरि सवारी चलाउँदा, तीन जना बच्चाहरुको ज्यान जाने गरि दुर्घटना भएको यस वर्षबाट १७ वर्ष पुग्यो। फुकुओका शहरमा, यस दुर्घटनाको कारण, मादक पदार्थ सेवन गरि सवारी चलाउन रोक्नका लागि विभिन्न प्रयासहरू हुँदै आईरहेको छ। 

तर पनि यो अहिलेसम्म रोकिएको छैन। २०२२ मा, मापसेका कारण २८ वटा दुर्घटनाहरू भएको पाईन्छ। मदिरा सेवन गरि गाडी चलाउनु अपराध हो।

• मदिराको सेवन गरेपछि कार, मोपेड, वा साइकल नचलाउनुहोस्।
• मदिराको सेवन गरेको व्यक्तिलाई कार भाँडामा दिने वा गाडी चलाउने व्यक्तिलाई रक्सी पिउन प्रोत्साहन नगर्नुहोस्।
• साथै, सवारी चालकले मदिराको सेवन गरेको थाहा पाउँदा, त्यस कारमा नचढ्नुहोस्।

मदिरा पिएर गाडी चलाउनाले, ट्राफिक दुर्घटनाको जोखिम बढाउँछ।

उदाहरणको लागी,

• सुरक्षित ड्राइभिंगका लागि आवश्यक पर्ने ध्यान र निर्णय क्षमतामा कमी हुन्छ।
• अत्यधिक गति र खतरा पत्ता लगाउन ढिलाइ हुन्छ।
• ब्रेक लगाउन लामो समय लिन्छ।

साथै, निम्न किसिमको गाडी मदिरा सेवन गरि चलाएको हुन सक्छ। यदि देख्नु भएमा, कृपया ११० नम्बरमा फोन गर्नुहोस्।

• ट्राफिक लाइटमा स्टप लाइनभन्दा केही अगाडि गाडी रोकिन्दा
• ट्राफिक लाइट हरियो बले पनि, गाडी नचल्दा
• अनियन्त्रित रुपले गाडी गुड्दा
• गाडीको गति अचानक बढ्ने-घट्ने भई रहँदा

"मदिरा सेवन गरि सवारी नचलाऔं, चलाउन नदिऔं, गर्नेलाई माफी नदिऔं र बेवास्ता नगरौँ"  भन्ने दृढ इच्छाशक्ति प्रत्येक व्यक्तिमा हुनु आवश्यक छ। 

हामी सबैले मापसे ड्राइभिंगलाई बन्द गरौँ!

【ग्रीष्मकालीन संक्रांति】

अर्को हप्ता, जुन २१ मा, Summer Solstice पर्दछ। जापानी भाषामा "गेशी" भनिन्छ।

यसको अर्थ, सूर्योदय देखि सूर्यास्त सम्मको अवधि सबैभन्दा लामो भएको दिन हो।

वर्षको सबैभन्दा लामो दिनलाई जनाउने Summer Solstice; वर्षको सबैभन्दा छोटो दिन हुने Winter Solstice भन्दा लगभग ४ घण्टा ५० मिनेट लामो हुन्छ।

यस दिन पछि, वास्तबमै गर्मीको शुरुवात भएको, तापक्रम बढ्दै गएको महसुस हुन्छ।

गर्मी बढ्दै जाँदा, भोक कम लाग्नु सामान्य कुरा हो, अनि त्यस्तो समयमा हल्काफुल्का  खाना खाने धेरै हुन्छ, जसले गर्दा कहिलेकाहीं पोषणको कमी निम्त्याउन सक्छ। सन्तुलित आहार कायम राख्नु र गर्मीमा भिटामिन सी र पोटासियम जस्ता अत्यावश्यक पोषक तत्वहरूले भरिपूर्ण खानेकुराहरू खानु महत्त्वपूर्ण छ।

यसको अतिरिक्त, मध्यम किसिमको व्यायाममा संलग्न हुनु र पर्याप्त सुत्नु पनि गर्मीको मौसमको लागि महत्त्वपूर्ण छ।

हामी सबै, स्वस्थ र तन्दुरुस्त भई गर्मीको लागि तयार होऔं।

 

 

【फुकुओका शहरको सूचना】

कर सम्बन्धि

यो फुकुओका शहरको सूचना हो।

जनवरी १ देखि फुकुओकामा बस्दै आउनुभएको व्यक्तिको यदि अघिल्लो वर्षको आय १० लाख नाघेको भएमा फुकुओका प्रान्तको कर तिर्नु पर्ने हुन सक्दछ।

जुन १५ तिर कर तिर्न सूचना आउन सक्ने भएकोले, अवश्य पनि खामभित्रको ध्यानपूर्वक पढ्नुहोला।

तिर्नुपर्ने म्याद र शुल्क लेखिएको हुन्छ। कोन्भिनी, बैंक वा हुलाक मार्फत तिर्नुहोला। 

त्यस्तै, कम्पनीमा कार्यरत व्यक्तिहरुको हकमा, कर सीधै तलबबाट कटौती हुन सक्छ।

शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जपत गर्ने सम्भावना हुन सक्दछ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत् परामर्श लिन सक्नुहुन्छ।

फोन नम्बर, ०९२-७५३-६११३ हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

 

 

रेइवा ५ को “अन्तर्राष्ट्रिय विद्यार्थीहरुद्वारा पढाइने विदेशी भाषा कक्षाहरुमा विद्यार्थी भर्ना’”को सूचना

 त्यस्तै, फुकुओका सिटी इन्टरनेशनल फाउण्डेसनको सुचना रहेको छ।

फुकुओका सिटी इन्टरनेशनल फाउण्डेसनमा, रेइवा ५ को अन्तर्राष्ट्रिय विद्यार्थीहरुद्वारा पढाइने विदेशी भाषा कक्षाहरुमा विद्यार्थी भर्ना लिईदैछ।

यस कक्षामा; चाइनिज, कोरियाली, स्पेनी, भियतनामी, जर्मन, अरबी आदि विश्वका विभिन्न देशहरूका भाषाहरू सिक्न सक्नुहुन्छ। अन्तर्राष्ट्रिय विद्यार्थी प्रशिक्षकहरूसँगको अन्तरक्रिया मार्फत, भाषा मात्र नभई, तिनीहरूको आफ्नो देशको खाना, संस्कृति आदिको बारेमा पनि सिक्न सक्नुहुनेछ। कक्षाहरू जापानी भाषामा सञ्चालन हुनेछन्।

स्थान रहेको छ, फुकुओका सिटी नाकासु कावाबाटा सबवे स्टेशनबाट केवल ५ मिनटको दूरीमा पर्ने फुकुओका सिटी इन्टरनेशनल सेन्टर।

पाठ्यक्रम, रेइवा ५ को जुलाईदेखि अर्को वर्षको फेब्रुअरीसम्म ८ महिनासम्म चल्नेछ, जसमा कुल २८ पाठहरु छन्। ट्युसन शुल्क, कर सहित ३३,००० येन हो।

उपलब्ध भाषा कक्षा, समयतालिका जस्ता विस्तृत जानकारीका लागि, कृपया फुकुओका सिटी इन्टरनेशनल फाउण्डेसनको होमपेजमा हेर्नुहोला।

नेटमा, “Ryugakusei kara manabu gaikokugo kyoushitsu” भनि खोज्नु भएमा, बिस्तृत जानकारी पाउन सक्नुहुन्छ।

आवेदन अवधि जुन २० सम्म हो। हामी तपाईंहरुको आवेदन पर्खिरहेका छौँ |

【बेबी स्टेशनहरू (आखाच्यान् नो एकी)】

फुकुओका शहरमा, "बेबी स्टेशनहरू" (आखाच्यान् नो एकी) नामक सुविधाहरू शहरभरि विभिन्न ठाउँहरूमा अवस्थित छन् जसले आमाबुबाहरूलाई आफ्ना शिशु र बच्चाहरूसँग बाहिर जान सजिलो बनाउन मद्दत गर्दछ। यी सुविधाहरूले स्तनपान र डायपर परिवर्तन जस्ता सेवाहरू प्रदान गर्दछ।

गुलाबी रङ्गको बच्चाको अनुहार, बेबी स्टेशनको प्रतीक चिन्ह हो।

फुकुओका शहरको LINE आधिकारिक खाता मार्फत यी सुविधाहरूको स्थान फेला पार्न सक्नुहुन्छ।

तपाईंले आफू भएको स्थान पठाउनु भयो भने, नजिकको बेबी स्टेशनहरुको जानकारी दिने भएकोले यो एकदमै सुविधाजनक छ।

शिशु र बच्चाहरूसँग बाहिर जाँदा स्तनपान र अन्य आवश्यकताहरूको चिन्ताले बाहिर जाँदा झन्झट महसुस हुन सक्छ, तर यी सुविधाहरूको प्रभावकारी रूपमा प्रयोग गरेर किनमेलको आनन्द लिनुहोस्!

 

 

【फुकुओका शहरको सूचना】

हलुका सवारी साधन कर सम्बन्धि

यो फुकुओका शहरको सूचना हो।

मोटरबाईक वा हलुका कार भएकाहरुले, अप्रिल १ मा हलुका सवारी साधन कर तिर्नु जरुरी छ।

यदि तपाईंसँग मोटरबाईक वा हलुका कार छ भने, हुलाक मार्फ कर तिर्नका लागि सूचना आउन सक्छ, अवश्य पनि भित्र हेर्नुहोला। मे को ३१ सम्ममा कोन्भिनी, बैंक वा हुलाक मार्फत तिर्नुहोला।

यदि तपाईंले मोटरबाईक आदिको शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले कब्जा गर्ने सम्भावना पनि छ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत परामर्श लिन सक्नुहुन्छ।

फोन नम्बर, ०९२-७५३-६११३ ।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

 

 

साईकल पार्किङ नियम सम्बन्धि

 प्रायःजसो दैनिक रुपमा साईकल चलाउँछु भन्ने व्यक्तिहरु धेरै हुनुहुन्छ होला।

साईकल पार्किंग गर्दा, तोकिएको पार्किंग स्थलमा पार्क गर्ने गरौं।

साईकल पार्किङस्थल बाहेक सडक वा पार्कमा पार्किङ गरिएका साईकलहरू पैदल यात्रुलाई बाधा वा अवरोध हुने भएकाले अवैध रूपमा पार्किङ गरिएका साईकलहरुलाई उठाएर लैजाने नियम छ।

फुकुओका शहरमा, यसरी उठाएर लगेका साईकल फिर्ता लिन २,५०० येन तिर्नु पर्छ, यदि निश्चित समय भित्र दावी गरेन भने, यसलाई खारेज गरिन्छ।

व्यावसायिक सुविधा र स्टेशन वरपर छोटो समयको प्रयोजनका लागि नि:शुल्क पार्किङ क्षेत्रहरू पनि हुने भएकोले अवश्य प्रयोग गरेर हेरौं।

सबवे नानाकुमा लाइन "तेन्जिन मिनामी" देखि "हाकाता" सम्मको विस्तार खण्ड खोलियो!

विमानस्थलबाट शहरको केन्द्रको निकटता, उत्तर-दक्षिण-पूर्व-पश्चिम चल्ने रेल र सबवेहरु, अनि धेरै बस मार्गहरू आदिको सुबिधा भएको फुकुओका शहरले जापानको सबैभन्दा राम्रो यातायात पहुँचको गर्व गर्दछ। सबवेमा, तेन्जिन र हाकातालाई जोड्ने नयाँ लाइन थपिएको छ, जसले गर्दा अझ धेरै सुविधाजनक बनाएको छ!

"तेन्जिन मिनामी स्टेशन" र "हाकाता स्टेशन" बीचमा, "कुशिदा जिन्जा-माए" नामको नयाँ स्टेशन स्थापना गरिएको छ। बिशाल व्यावसायिक सुविधा "Canal City Hakata" सम्म पुग्न अहिले सम्म, नजिकैको सबवे स्टेशनबाट पैदल हिँड्दा ८-१० मिनेट लाग्थ्यो, तर अब लगभग २-३मिनेटमा पुग्न सकिने भएको छ! 

वसन्तको घमाइलो मौसममा, सार्वजनिक यातायातको कुशलतापूर्वक प्रयोग गरेर, पक्कै पनि, तपाईहरु पनि फुकुओका शहरको आकर्षण गन्तव्यहरु धेरैभन्दा धेरै खोज्दै, घुमघाम गरेर हेर्दा कसो होला!

 

 

फुकुओका शहरको सूचना

साईकल चलाउने नियम सम्बन्धि सूचना

प्रायःजसो दैनिक रुपमा साईकल चलाउँछु भन्ने व्यक्तिहरु धेरै हुनुहुन्छ होला।

के तपाईंहरुलाई साईकल चलाउने तरिका र नियमको बारेमा थाहा छ?

जापानमा नियम अनुसार साईकल, मोटर-बाटोको बायाँ पट्टिबाट चलाउनु पर्छ।

सडक-पेटीमा पैदल यात्रीलाई प्राथमिकता दिनुपर्छ। सडक-पेटीबाट चलाउँदा मोटर-बाटो पट्टिको साइड भएर बिस्तारै चलाउने गरौं।  

साइकल चलाउने सबैले हेलमेट लगाउने गरौं।

राति नबिर्सिकन लाइट बाल्ने गरौं।

दुई जना चढ्ने र समानान्तर रूपमा सँगसँगै साईकल चलाउन निषेध भएकोले त्यस्तो कार्य नगरौं।

साथै, साईकलको हकमा पनि मादक पदार्थ सेवन गरी नचलाऔं।

छाता ओढेर चलाउने, मोबाइल फोन वा हेड फोन प्रयोग गरेर साईकल चलाउने गर्दा, दुर्घटनाको खतरा हुने भएकोले यस्ता कार्यहरु नगरौं।

साईकल पार्किंग गर्दा तोकिएको पार्किंग स्थलमा पार्क गर्ने गरौं।

साइकल पार्किङस्थल बाहेक सडक वा पार्कमा पार्किङ गरिएका साइकलहरू पैदल यात्रुलाई बाधा वा अवरोध हुने भएकाले अवैध रूपमा पार्किङ गरिएका साइकलहरुलाई उठाएर लैजाने नियम छ।

फुकुओका शहरमा, यसरी उठाएर लगेका साइकल फिर्ता लिन २,५०० येन तिर्नु पर्छ, यदि निश्चित समय भित्र दावी गरेन भने, यसलाई खारेज गरिन्छ।

व्यावसायिक सुविधा र स्टेशन वरपर छोटो समयको प्रयोजनका लागि नि:शुल्क पार्किङ क्षेत्रहरू पनि हुने भएकोले अवश्य प्रयोग गरेर हेरौं।

यस अतिरिक्त, फुकुओका शहरमा साईकल चालकहरूले साईकल बीमामा अनिवार्य सामेल हुनुपर्छ। साईकल दुर्घटना भयो भने, तपाईंले दुर्घटनामा परेको व्यक्तिलाई धेरै पैसा तिर्नुपर्ने हुन्छ।

तर, यदि तपाईंसँग साइकल बीमा छ भने, उदाहरणका लागि, तपाईं साइकल चलाउँदै गर्दा, यदि कसैलाई चोटपटक लाग्न गएमा, तपाईंको पक्षबाट औषधि उपचारको लागि भुक्तानी गरि दिन्छ।

हुन सक्ने दुर्घटनाको क्षतिपुर्तीबाट बच्न, साइकल बीमा लिऔं।

साइकल पर्यावरण अनुकूल र सुविधाजनक सवारी साधन हो। यसलाई चलाउँदा नियम तथा आचरणको पालन गर्ने गरौं।

【फुकुओका शहरको बारेमा】

यो वसन्तमा, फुकुओका शहरमा नयाँ जीवनयापन गर्न लागेका धेरैजना हुनुहुन्छ होला, त्यसैले आजको कार्यक्रममा फुकुओका शहरको बारेमा छोटो परिचय दिन चाहन्छु।

फुकुओका शहर, "एसियाको प्रवेशद्वार" को रूपमा, धेरै अन्तर्राष्ट्रिय उडानको सेवा भएको, 

क्युशुको राजनीति, अर्थव्यवस्था, संस्कृति र फेसनको केन्द्रको रूपमा समृद्ध भई अत्यन्तै स्फूर्त शहर हो।

१६ लाख भन्दा बढी जनसंख्या भएको, स्वदेशी र विदेशी दुवै क्षेत्रबाट धेरै आप्रवासीहरू भएको जसमा हाल यहाँ ४० हजार विदेशी बसोबास गरिरहेका छन् ।

यातायातको राम्रो सुविधा, जापानको उत्कृष्ट याताई, खाद्य संस्कृतिको उच्च गुणस्तरको अतिरिक्त, किनमेल सुविधाहरू पनि प्रशस्तै भई, शहरी पूर्वाधारहरू कम्प्याक्ट रूपमा ब्यबस्थित छन्।

साथै, समुद्र र पहाडले घेरिएको, धेरै पार्कहरू भएको, शहर र प्रकृतिको मेल पनि आकर्षित भएकोले, यहाँ बस्न धेरै सुविधाजनक र आरामदायी छ!

हावापानी राम्रो हुने यस मौसममा, तपाईहरु पनि पक्कै पनि बिदाको दिनमा शहर वरिपरि हिड्डुल गरेर आनन्द लिनुहोस्।

 

 

【फुकुओका शहरको सूचना】

फोहर फाल्ने नियम सम्बन्धी

फुकुओकामा नयाँ जीवनयापन शुरु गर्नुहुने धेरै संख्यामा हुनुहुन्छ होला।

यसपटक, फोहर फाल्ने नियम सम्बन्धी सूचना रहेको छ।

फुकुओकामा फोहरलाई तीन किसिममा विभाजन गरी फाल्ने गरिन्छ।

जल्ने फोहर, खाली सिसाको बोतल/प्लास्टिकको बोतल, अनि नजल्ने फोहर गरी ३ किसिमका हुन्छन्।

कन्भिनियन्स स्टोर वा सुपर मार्केटमा बेची राखेको, फुकुओका शहरको फोहर-फाल्ने-झोला प्रयोग गरेर फोहर फाल्ने गर्नुहोस्।

जल्ने फोहरको लागि, रातो रंगको फोहर-फाल्ने-झोला हो।

कच्चा फोहर, कागज, कपडा, प्लास्टिक आदि फाल्ने बेलामा, रातो झोला प्रयोग गर्नुहोस्।

खाली क्यान र गिलास जस्तालाई, नजल्ने फोहरको रुपमा, निलो फोहर-फाल्ने-झोलामा फाल्नुहोस्।

खाली सिसाको बोतल र प्लास्टिकको बोतल फाल्नको लागि, पहेंलो रंगको फोहर-फाल्ने-झोला प्रयोग गर्नुहोस्।

बसोबास गर्ने ठाउँ अनुसार फाल्ने दिन तोकिएको हुन्छ।  

जल्ने फोहर हप्तामा २ पटक, खाली सिसाको बोतल/प्लास्टिकको बोतल र नजल्ने फोहर चाहिँ महिनाको १पटक संकलन हुन्छ।

फोहर मध्यरात संकलन हुनेभएकोले अँध्यारो भएदेखि रातिको १२ बजे सम्ममा, फोहर फाल्ने निश्चित ठाउँमा फाल्नुहोस।

फुकुओका शहरको आधिकारिक LINE ID मा Friend add गरेर, तपाईंको ठेगाना राख्नु भयो भने, LINE बाट फोहर फाल्ने दिनको बारेमा जानकारी उपलब्ध गराईन्छ।

फाल्न चाहनुभएको फोहरको नाम राख्नुभयो भने, फोहरको किसिम पनि जान्न मिल्ने भएकोले यो एकदम उपयोगी छ।

एउटा झोलामा नअट्ने ठूला आकारको फोहर वा भारी फोहरलाई, ठूला आकारको फोहरको रुपमा फाल्नुहोस्।

ठूला आकारको फोहरका लागि, फोन, इन्टरनेट, वा LINE द्वारा ‘फुकुओका शी सोदाई गोमी उकेचुके’ मा सम्पर्क गरेर  संकलन गराउन सक्नुहुन्छ।

कृपया शुल्क, फोहर फाल्ने ठाउँ, मिति, इत्यादि जाँच गरेर फोहर बाहिर राख्नुहोस्।

फोनमार्फत सम्पर्कका लागि, ठुलो आकारको फोहर फाल्ने सेन्टरको फोन नम्बर, 

०९२-७३१-११५३ । दोभाषे सेन्टर मार्फत् १८ वटा भाषाहरुमा यो सेवा उपलब्ध हुँदै आइरहेको छ।

यस अतिरिक्त, QR कोड इस्क्यान् गर्नुभयो भने, १० वटा भाषाहरुमा, फोहर फाल्ने नियमहरू जानकारी दिने सेवा पनि उपलब्ध छ। फुकुओका शहरको होमपेजमा हेर्नुहोला।

【मार्चको मौसमी तरकारी, निरा】

मार्चको शुरुवातसँगै न्यानोपन बढ्ढै आएको छ, तैपनि, राती अझै जाडै छ।

मौसममा तापक्रम घटबढको कारण बिरामी हुनबाट बच्नका लागि, जाडोको समयमा कमजोर शरीरलाई स्वस्थ राख्न मद्दत पुर्याउने, पौष्टिक तत्वहरुले भरिपूर्ण मौसमी खानाहरु खान सल्लाह दिईन्छ!

मार्च महिनाको मौसमी तरकारी चाहिं, "निरा" हो।

 

निरामा पाईने विशेष किसिमको सुगन्धित तत्व, एलिसीन (Allicin) ले भिटामिन B1 को अवशोषण दर बढाउनुको साथै चिनीलाई ऊर्जामा परिणत गर्दछ भन्ने गरिन्छ।

त्यसकारण, भिटामिन B1 प्रशस्त पाईने कलेजोसँग खाईने "कलेजो निरा फ्राइड" परिकारमा, निराले भिटामिन B1 को अवशोषणलाई सहज बनाई दिने भएकोले, शक्तिवर्धक खानाको रुपमा लिईन्छ।

 

निरा किन्दा, पूरै भाग हरियो चम्किलो रङ भएको, पातहरुको टुप्पोसम्म चुच्चो परेको, अनि रसिलोपन भएको ताजा हो भन्ने कुरा सम्झिराख्नु राम्रो होला कि।

रोग प्रतिरोधात्मक क्षमता बढाउने मौसमी खानाहरुको लाभ उठाऔं अनि, नियमित रुपमा खाने गरौं।

 

 

【फुकुओका शहरको सूचना】

भीडभाडबाट बचि बसाईसराईको प्रक्रिया चाल्नु

मार्च र अप्रिलमा बसाईसराई धेरै हुने भई वार्ड अफिसको काउण्टरमा भीड हुने समय हो।

 

विशेष गरी मार्च २० देखि अप्रिल १० सम्म, २-३ घण्टा कुर्नुपर्ने जत्तिको भीड हुने भएकोले, सकेसम्म यस अवधिमा कार्यालय भ्रमण नगरिदिनु होला।

सप्ताहका दिनहरुमा व्यस्त भई बसाईसराईको सूचना दर्ता गर्न जान असमर्थ हुनुहुने महानुभावहरुले, बिदाका दिनमा बसाईसराईको प्रक्रिया गर्न सकिने गरि मार्च २६ र अप्रिल २ को आइतबार, प्रत्येक वार्ड कार्यालय र शाखा कार्यालयका काउण्टरहरू अस्थायी रूपमा खोलिनेछन्।

बिहान १०:०० बजेदेखि दिउँसो २:०० बजेसम्म, बसाईसराईको सूचना वा बसाईसराई सम्बन्धित सूचना दर्ताहरू स्वीकार गर्दछौं।

 

फुकुओका शहरभन्दा बाहिर बसाई सर्दै हुनुहुन्छ भने, वार्ड अफिसमा नगईकन पनि, हुलाक मार्फत् वा माइनम्बर कार्ड हुनेहरुले अनलाइनबाट सूचना दर्ता गर्न सक्नुहुन्छ।

यदि फुकुओका शहरभित्र बसाई सर्दै हुनुहुन्छ भने, बसाईसराई सूचना दर्ता गर्न आवश्यक छैन तर, नयाँ ठेगानामा बस्न थाल्नु भएदेखि आफू सर्नुभएको वार्ड अफिसमा बसाईसराई सूचना बुझाउनुपर्छ।

 

वार्ड अफिसमा बसाईसराईको प्रक्रियाका लागि सुविधाजनक अनलाइन सेवा पनि छ।

शनिवार, आइतवार र सार्वजनिक बिदाहरुमा बाहेक, प्रकिया चलाउन अपेक्षित मिति भन्दा कम्तिमा ५ दिन अगाडि ८:३० बजेसम्ममा स्मार्टफोन आदिबाट, ठेगाना परिवर्तन वा प्रक्रियाको अपेक्षित मिति आदिको जानकारी पठाउनुभयो भने, बुकिङ गर्न सक्नुहुन्छ र काउण्टरमा प्रक्रियाको समय कम लाग्ने र प्रकिया पनि सहज हुन्छ।

 

नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

फोन नम्बर, ०९२-७५३-६११३ हो।

तपाईं आफू बस्ने वार्ड र बसाईसराईको प्रक्रियाको बारे बुझ्न चाहेको भन्नुहोला।

 

यस अतिरिक्त, बसाईसराई गर्दा, खानेपानी आपूर्ति शुरु गर्न वा रोक्नका लागि सुचना दिन आवश्यक छ। शनिवार, आइतवार र सार्वजनिक बिदाका बाहेक, सर्ने दिनभन्दा कम्तिमा ४ दिन अगाडिसम्ममा फोनमार्फत सम्पर्क गर्नुहोस्।

फोन नम्बर ०९२-५३२-१०१० हो। आफूले चाहेको विदेशी भाषामा कल गर्न सक्नुहुन्छ।

अनलाइनबाट पनि आवेदन दिन सक्नुहुन्छ।

 

बसाईसराई फोहर सम्बन्धि

वसन्त ऋतुमा स्थान परिवर्तनको कारण फर्निचर र घरेलू उपकरण जस्ता ठूला आकारको फोहर बढ्ने समय हो।

यस पटक, ठूला आकारको फोहोर रिसेप्शन सेन्टरमा आबेदन दिने तरिका सम्बन्धि जानकारी दिनेछु।

 

फोन, इन्टरनेट वा फुकुओका सिटीको LINE मार्फत अग्रिम आवेदन दिई, कन्भिनीयन्स स्टोर आदिमा प्रशोधन टिकट खरीद गर्नुहोस्।

फोहर संकलन, आवेदन दिएको मितिबाट एक हप्ता लाग्नेछ।

संकलनको दिनमा बिहान ८:३० सम्म तोकिएको ठाउँमा राख्नुहोस्।

ठूला आकारको फोहोर रिसेप्शन सेन्टरको फोन नम्बर ०९२-७३१-११५३ ।

इन्टरनेट वा LINE मार्फत २४ घण्टा जहिलेपनि आवेदन दिन सकिने भएकोले सुविधाजनक छ।

 

टिभी, फ्रिज, फ्रिजर, वाशिंग मेशिन, कपडा ड्रायर र एयर कन्डिशनरहरूको हकमा घरायसी सामान प्रशोधन कानुन बमोजिम फोहर फाल्ने विधि तोकिएको छ।

नयाँ जडान गर्ने बेला लगिदिनुहुन्छ कि भनेर खरिद गर्नुभएको पसल वा नजिकैको Yamada Denki मा अनुरोध गर्नुहोला। रिसाइकल शुल्क, संकलन र यातायात शुल्क तिर्नु पर्छ।

【मौसमी फूल: नानो हाना】

चम्किलो पहेंलो रङ्गको फूल हुने नानो हाना, चेरी अर्थात् साकुराको फूल जस्तै "वसन्तको प्रतीक" को रूपमा मन पराउँदै आएको फूल हो।

 

वास्तवमा, नानो हाना, क्रूसिफेरस जातमा पर्ने र जापानी तोरीको पालक अनि चिन्गेन्साई नामको हरियो सागसँग सम्बन्धित छ।

फूलको आनन्द लिने मात्र नभई "वसन्तको सुगन्धको आनन्द लिन सकिने खाद्य सामाग्री" को रूपमा पनि, यो फूल परापूर्वकालदेखि महत्वपूर्ण रहँदै आएको छ।

 

फुकुओकामा नानो हाना फूलको सिजन अपेक्षाकृत लामो छ, फेब्रुअरीको शुरुदेखि अप्रिलको मध्यसम्म, भन्नाले वसन्तको प्रारम्भदेखि लामो समय यस फूलको आनन्द लिन सकिन्छ। मौसम न्यानो भएर आएपछि धेरै मानिसहरू नानो हानाको लागि रमणीय स्थलहरू भ्रमण गर्ने गर्छन्।

साथै, साकुराको फूल फुल्ने समय ठ्याक्कै त्यहि समयतिर हुने भएकोले एकै समयमा साकुरा फूल र नानो हानाको आनन्द लिन सक्नुहुन्छ।

 

फुकुओका प्रिफेक्चरभित्रको ठाउँ अनुसार, "चाडो फुल्ने नानो हाना" र "ढिलो फुल्ने नानो हाना" गरि २ प्रकारका छन्, जसले गर्दा सिजनमा यस फूलको प्रशस्त मनोरञ्जन लिन सक्नुहुन्छ।

Umino-nakamichi-kaihin-ko-en, Nokonoshima-island-park आदि स्थानहरुमा धेरै पहेंला फूलहरु तपाईंहरुको प्रतिक्षा गरिरहका छन्।

 

 

【फुकुओका शहरको सूचना】

शहर तथा प्रान्तीय कर फाइल गर्ने सम्बन्धि

फुकुओका शहरले रेइवा ५ को शहर तथा प्रान्तीय कर फाइल लिईदैछ।

कर फाइल गर्ने म्याद, मार्च १५ बुधबारसम्म हो।

कर फाइल बुझाउने काउन्टर चाहिं वार्ड कार्यालयको कर बिभागमा, सोमबारदेखि शुक्रबार बिहान ९:०० बजेदेखि बेलुका ५:०० बजेसम्म खुला रहनेछ।

काउण्टर भिडभाड हुने भएकोले, कृपया हुलाक वा अनलाइन मार्फत् कर फाइल गर्न अनुरोध गरिन्छ।

 

फुकुओका शहरमा कर फाइल गर्न आवश्यक व्यक्तिहरु भन्नाले, २०२३ को जनवरी १ देखि फुकुओका शहरभित्र ठेगाना भई २०२२ मा आम्दानी भएका व्यक्तिहरु पर्दछन्।

कर कार्यालयमा अन्तिम कर फिर्ती निवेदन पेश गर्नुहुने वा तलब आय मात्र भएको व्यक्तिको हकमा कम्पनीमा वर्षान्तको समायोजन गर्नुहुने आदिले कर फाइल गर्न आवश्यक छैन।

 

कर फाइलका लागि आवश्यक कागजातहरु,

• माइनम्बर कार्ड वा माइनम्बर बुझ्न सजिलो कागजपत्र र सवारीचालक परिचय पत्र, पासपोर्ट, बसोबास कार्ड आदि पहिचान खुल्ने कागजातहरू
• गेन्सेन्च्योउस्युउह्योउ आदि जस्ता २०२२ को आय देखाउने कागजातहरु
• २०२२ मा गरिएको कटौतीहरुको कागजातहरू

 

आवश्यक कागजात वा कर फाइल गर्न आवश्यक छ छैन आदि बारे बिस्तृत जानकारीका लागि कृपया आफू बसोबास गर्दै आएको स्थानीय वार्ड कार्यालयको होमपेजमा हेर्नुहोला। नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

अंग्रेजी, चाइनिज, कोरियाली, भियतनामी र नेपाली जस्ता १८ वटा भाषाहरुमा परामर्श लिन सकिन्छ।

फोन नम्बर, ०९२-७५३-६११३ हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुन्छ।

तपाईं आफू बस्ने वार्ड र कर फाइलबारे बुझ्न चाहेको भन्नुहोला।

यस अतिरिक्त, वार्ड कार्यालयमा जानुहुँदा पनि आफ्नो फोन प्रयोग गरेर यस सेवा मार्फत् अनुवाद गर्न सकिने भएकोले नहिच्किचाइकन यसको प्रयोग गर्नुहोला।

【वर्षको समाप्ति र नयाँ वर्षको बिदा बिताउने तरिका】

क्रिसमस पार्टी, नयाँ वर्ष आदि जस्ता वर्षको समाप्ति र नयाँ वर्षको बिदाहरूमा, खाने र पिउने अवसरहरु धेरै हुने गर्छन्। अधिक खानाले पेटमा बोझ पर्न गई, शारीरिक अवस्था बिग्रन सक्छ अनि पेट दुख्ने सम्भावना पनि बढाउन सक्छ। विशेष गरी, मासु, कफी, मदिरा, कडा मसला, कडा कोच्या, ग्रिन चिया आदिले पेटको ग्यास्ट्रिक एसिडको स्रावलाई बढाउने भएकोले धेरै नखान प्रति सावधान रहनु आवश्यक छ।

स्वस्थ रहने उपायहरुमध्ये धेरै भनिने एक हो, "नियमित तथा पौष्टिक सन्तुलित आहार खानु"। यो पेटलाई स्वस्थ कायम राख्नको लागि मात्र नभई, शरीरको रोग प्रतिरोधात्मक क्षमता बढाउन र बिरामी हुने सम्भावना कम राख्नको लागि पनि उतिकै महत्त्वपूर्ण छ।

नयाँ वर्षको मौसम वास्तविक रूपमा कठिनपूर्ण हुन सक्छ, तर पनि, कम्तिमा घरमा बेलुकाको खानामा नाबे, उडोंन् जस्ता पचाउन सजिलो खानेकुराहरू खाने, खाना बीचको अनियमित अन्तराल नराख्ने आदि जस्ता कुराहरुमा ध्यान दिने गरौं।

स्वस्थ पेटलाई कायम राख्दै नयाँ वर्षलाई स्फूर्तिदायी बनाऔँ।

 

 

【फुकुओका शहरको सूचना】

नयाँ वर्षको बिदाहरुमा वार्ड अफिस काउण्टर अनि फोहोर फाल्ने दिन सम्बन्धि

नयाँ वर्षको बिदाहरुमा, वार्ड अफिसको काउण्टर र फोहोर फाल्ने दिन परिवर्तन हुने भएकोले कृपया ध्यान दिनुहोला।

वार्ड अफिसको काउण्टर, डिसेम्बर २९ (बिहिबार) देखि जनवरी ३(मंगलबार) सम्म बन्द रहनेछ।

नयाँ वर्षको बिदाहरुको अघिपछि वार्ड अफिसको काउण्टर भिडभाड हुने भएकोले, धेरै समय राखेर जाने गरौँ।

 

डिसेम्बर ३१ (शनिबार) देखि जनवरी ३ (मंगलबार) सम्म, फोहर संकलन गर्न आउँदैन।

जल्ने फोहर, डिसेम्बर ३० (शुक्रबार) सम्ममा तथा जनवरी ४ (बुधबार) पछि मात्र तोकिएको दिनमा बाहिर राख्नुहोस्।

नजल्ने फोहर तथा खाली सिसाको बोतल, प्लास्टिकको बोतल फाल्नका लागि,

जनवरी १ (आइतबार) मा संकलन हुने क्षेत्रमा डिसेम्बर २९ (बिहिबार),

जनवरी २ (सोमबार) को क्षेत्रमा डिसेम्बर ३० (शुक्रबार),

त्यस्तै, जनवरी ३ (मंगलबार) को क्षेत्रमा जनवरी ६ (शुक्रबार) को दिन फोहर फाल्नुहोस्।

यसका साथै, ठूलो आकारका फोहरको काउण्टर तथा संकलन, डिसेम्बर २९ (बिहिबार) देखि जनवरी ३ (मंगलबार) सम्म बन्द रहनेछ।

 

 

वर्षको समाप्ति र नयाँ वर्ष सुरक्षित र ढुक्क साथ बिताउनका लागि

वर्षको समाप्ति र नयाँ वर्षको बिदाहरूमा रक्सी पिउने धेरै अवसरहरू हुने गर्छन्।

“मादकपदार्थ सेवन गरि गाडि नचलाउने, चलाउन नदिने, चलाउनेलाई बिल्कुल माफी नदिने, र बेवास्ता नगर्ने” प्रति निश्चित होऔं।

रक्सी पिएर साइकल चलाउनु पनि कानूनले निषेध गरेको छ।

विशेष ध्यान दिनुपर्ने भनेको, अर्को दिन रक्सीको ह्यांगओभर हो।

अलिकति भए पनि रक्सी लागेको बाँकी छ जस्तो लागेमा, गाडि नचलाऔं।

 

यस अतिरिक्त, हरेक वर्षको अन्ततिर ट्राफिक दुर्घटनाहरू बढ्ने गरेको पाईएको छ।

राती बाहिर निस्कँदा, ड्राइभरले देख्न सजिलो हुने, चम्किलो लुगा वा चमकदार वस्तुको प्रयोग गरौँ।

कार चलाउँदा, चाँडै बत्तीहरू अन गरौं।

 

अर्को जानकारी, बाटोमा हुने लुटपाटको बारेमा।

कम ट्राफिक भएको स्थानमा, साँझदेखि मध्यरातसम्म धेरै अपराधहरू हुने गरेको, अझ, लुटेराहरु प्रायः मोपेड बाइकमा आएका घटनाहरु धेरै छन्।

खोस्नबाट जोगिन, झोला सडकको अर्को पट्टि समात्ने गरौँ।

साथै, मान्छेको संकेत वा बाइकको आवाज सुन्नुभएमा पछाडी फर्केर हेर्ने आदि जस्ता, आफ्नो वरपर ध्यान दिने गरौँ।

 

आफू र आफ्नो बहुमूल्य सामानहरूको ध्यान दिई, नयाँ वर्षको बिदा सुरक्षित र आनन्दपूर्वक बिताऔं।

【डिसेम्बर बिताउने तरिका】

डिसेम्बर महिनालाई शिवासु पनि भनिन्छ। किनभने, "बौद्ध मन्दिरहरुको पूजारीको भिक्षुहरु सूत्र जप गर्न पूर्वबाट पश्चिमतर्फ जाने व्यस्त महिना हो" भन्ने बलियो सिद्धान्त छ।

परापूर्वकालमा १३ औँ दिनलाई "नयाँ वर्षको शुरुवात"को रुपमा मानिन्थ्यो, वर्षभरीको फोहोरहरु हटाउने "सुसुहाराई" बनाउन र Kadomatsu आदिको तयारीको लागि सल्लोको संकलन गरिन्थ्यो तर, यो आधुनिक युगको सरसफाई गर्ने तरिकामा परिवर्तन हुँदै गयो। यसका अतिरिक्त, वर्षको सबैभन्दा छोटो दिन, टौउजी (Touji) को २२ तारिखतिरदेखि जाडो बढ्दै जान्छ। त्यसैले, युजु अर्थात् निबुवा हालेको ओफुरोमा बस्यो भने, चिसो नलागीकन स्वस्थ भई जाडो कटाउन सकिन्छ भन्ने चलन छ।

भन्दाभन्दै वर्षको अन्त्यतिर आईसक्यौं, अब २०२२ सकिनै लाग्यो। बिना विघ्नबाधा २०२३ शुरु गर्न, आफ्नो कामहरू कुन क्रममा पूरा गर्ने भन्ने कल्पना गर्दै योजना बनाऔं। किनमेल लिस्ट, गर्नु पर्ने कामहरुको लिस्ट बनाई क्यालेन्डरमा लक्ष्य पूरा गर्ने दिनमा चिन्ह लगाउने पनि राम्रो उपाय होला। साथै, बिदाको मौसमको आनन्द लिन पनि नबिर्सनुहोस्।

 

 

【फुकुओका शहरको सूचना】

विश्व एड्स दिवस सम्बन्धि

डिसेम्बर १ विश्व एड्स दिवस हो। हरेक वर्ष डिसेम्बर १ लाई केन्द्रित गरि, विश्वभर एड्स सम्बन्धि जनचेतना जगाउने गतिविधिहरू आयोजना गरिन्छ।

एचआईभी संक्रमण पछि, धेरै वर्षसम्म यसको प्रत्यक्ष लक्षण बिनाको अवधि जारी रहने भएकोले, एड्स नलागेसम्म रोग पत्ता नलगाएका संक्रमित व्यक्तिहरू धेरै छन् भन्ने अनुमान गरिन्छ।

HIV संक्रमणको प्रारम्भिक पहिचान र उचित स्वास्थ्य सेवा र उपचारले एड्स फैलिने गतिलाई ढिलाइ गर्न सक्दछ। त्यसैले, प्रारम्भिक परिक्षण गर्ने गरौँ।

प्रत्येक वार्डको Health and Welfare Center मा, HIV परिक्षण निःशुल्क र गोप्य रूपमा गर्न सक्नुहुन्छ।

परिक्षण गर्न मिल्ने दिनको निश्चित समय भएकोले, कृपया जानुअघि अग्रिम जानकारी लिनुहोला।

यसका अतिरिक्त, एड्स पीडित व्यक्तिहरूलाई बुझ्ने र समर्थन गर्ने ईच्छुकत्तालाई रातो रिबनको प्रतिकले दर्शाउँछ। रातो रिबनले, एड्सको बारेमा कुनै पूर्वाग्रह नभएको र एड्स भएकासाथ बस्नेहरूसँग भेदभाव गर्दैनौं भन्ने सन्देश दिन्छ। रातो रिबन पछि डिसेम्बर १ देखि ७ सम्म ७ दिन को लागी, Hakata Port Tower र Fukuoka Red Brick Culture Museum रातो रंगको बत्ति बालि उज्यालो पारिन्छ।

विश्व एड्स दिवसको अवसरमा, एड्सको बारेमा सही ज्ञान र यसको रोकथाम उपायहरूको बारेमा सबैजनाले मनन गरेर हेरौं।

 

 

फोहरको अवैध डम्पिंग

जंगल, समुद्रीतट, नदी, सडक, पार्क आदिमा ठूलो आकारका फोहर वा घरको फोहर फाल्नेलाई अवैध डम्पिंग भनिन्छ।

फुकुओका शहरमा, बर्षको अन्त्यमा सरसफाईको कारण फोहरको मात्रा बढ्ने डिसेम्बरमा, “अवैध डम्पिंग रोकथाम सुदृढीकरण महिना" को रूपमा, अवैध फोहर फाल्न रोक्नका लागि गतिविधिहरू थप सुदृढ गरिन्छ।

फुकुओका शहरले पुलिसको सहयोगमा, धेरै अवैध फोहर फाल्ने स्थानहरुमा, निगरानी क्यामेरा वा चेताउनी संकेतहरू राख्ने र गस्तीहरू सञ्चालन गरिंदै आईरहेको छ।

टिभी, फ्रिज, फ्रिजर, वाशिंग मेशिन, कपडा ड्रायर, र एयर कन्डिशनरहरू घरायसी सामान प्रशोधन कानुन बमोजिम फोहर फाल्ने विधि तोकिएको छ।

नयाँ जडान गर्ने बेलामा लगिदिनुहुन्छ कि भनेर खरिद गरेको पसल वा नजिकको Yamada Denki मा सोध्नुहोला। रिसाइकल शुल्क, संकलन र यातायात शुल्क आवश्यक पर्छ।

शहरमा गस्ती गर्नेहरू, पर्चाहरू, इन्टरनेट आदि मार्फत् "अनावश्यक सामानहरू कम शुल्कमा संकलन गरिदिन्छौं” भनि विज्ञापन गर्नेहरु, फुकुओका शहरको अनुमति बिना अवैध रूपमा संकलन गर्ने ठेकेदारहरु हुन्। अनुमति प्राप्त नभएका ठेकेदार मार्फत् गराउनु भयो भने, अवैध डम्पिंग वा अनुचित प्रशोधन गर्ने, अधिक शुल्क लिने जस्ता समस्याहरू निम्त्याउने हुनाले कृपया यसको प्रयोग नगर्नुहोस्।