Life in Fukuoka "Nepali"

【बालिक दिवस】

जनवरीको दोस्रो सोमबार, ‘सेईजिन् नो हि’ अर्थात् ‘बालिक दिवस’ को सार्वजनिक बिदा हो।

बालिक भएको महसुस गरेर, आफ्नै खुट्टामा बाँच्न प्रयास गर्ने युवायुवतीहरुलाई शुभकामना दिएर मनाउने, प्रोत्साहन दिने यो दिनको मुख्य उद्देश्य हो।

प्रत्येक नगरपालिकामा बालिक समारोह, २० बर्ष उमेर पुगेका महिला-पुरुषहरूलाई आमन्त्रित गरेर गरिन्छ।

यस वर्ष नयाँ कोरोना भाइरसको प्रभावको कारण, रद्द हुने वा केही स्थानीय सरकारले यसलाई एकै चोटी नगरिकन  छुट्टाछुट्टै समयमा आयोजना गर्न पनि सक्दछन्।

यस समारोहमा, पुरुषहरूले सूट र महिलाहरूले किमोनो लगाउनेको संख्या धेरै हुन्छ, तर बिभिन्न पात्रको कोस्प्ले वा धेरै उज्याला पोशाक लगाएका युवायुवतीहरु पनि हुन्छन्।

त्यस्तै १० बर्ष उमेरका बच्चाहरूको लागि, ‘नि बुन् नो इची सेईजिन् सिकी’ मनाउने प्राथमिक विद्यालयहरूको संख्या बढ्दो छ।

नेपालमा १८ वर्ष पुगेपछि वयस्क मानिन्छ नि है? तर हाम्रोमा, जापानमा जस्तो स्थानीय सरकारको तर्फबाट बालिकहरुलाई शुभकामना दिएर मनाउने कुनै कार्यक्रम छ र ? मलाई चै छैन जस्तो लाग्छ, तपाईंलाई थाहा भए पक्कै जानकारी दिनुहोला है!

【नोरोभाइरसदेखि सावधान !】

जाडोमा, नोरोभाइरसको कारण वान्ता हुने, पखाला हुने, पेट दुख्ने र बान्ता आउला जस्तो हुने  समस्या बढी हुन्छ।

यो भाइरस शक्तिशाली हुन्छ र थोरै मात्रामा शरीरमा प्रवेश गरे पनि संक्रमित हुन्छ।

भाइरस हात वा खानाद्वारा शरीरमा प्रवेश भई, यसले पखाला, वाकवाकी, बान्ता र ज्वरो निम्त्याउँछ।

संक्रमित व्यक्तिको बान्ता वा पखालाको कारण हावामा भएको भाइरस, सास लिंदा संक्रमित हुने वा संक्रमित व्यक्तिले पकाएको खाना खाएर पनि सर्न सक्दछ।

साथै, भाइरस भएको oysters आदि जस्ता bivalves नतताईकन खाँदा पनि भाइरस सर्न सक्दछ।

धेरै मात्रामा बान्ता र पखालाबाट डिहाईड्रेसन हुन सक्छ।

तुरुन्तै चिकित्सकलाई देखाउने गरौं।

यो सामान्यतयाः २, ३ दिनमा ठीक हुन्छ, तर लक्षणहरू हराए पनि १ हप्तादेखि १ महिनासम्म, भाइरस दिसामा निस्कन्छ।

संक्रमणलाई बढ्न नदिन, निम्न रोकथामका बिधिहरू अपनाऔं।

खाना पकाउनु अघि, खाना खानु अघि, शौचालय पछि, आदि साबुनले राम्ररी हात धुने गरौं।

खाना पकाउने भाँडाहरू हरेक पटक प्रयोग गरेपछि राम्रोसँग धोएर उमालेको पानी वा क्लोरीन ब्लीचले कीटाणुरहित पार्ने गरौं।

अल्कोहल युक्त किटनाशक भने नोरोभाइरस विरुद्ध कम प्रभावी हुन्छ।

नोरोभाइरस ८५℃ देखि ९०℃ तापक्रममा ९० सेकेन्ड वा सो भन्दा बढि ततायो भने मर्छ।

खानेकुरालाई पर्याप्त मात्रामा तताउने गरौं। काँचो खाने तरकारी र फलफूल राम्रोसँग धोएर प्रयोग गरौं। शरीर सन्चो नभएको बेला खाना नपकाउनु राम्रो हुन्छ।

【कोरोना भाइरस संक्रमण रोकथामका लागि अनुरोध】

आजकल, कोरोनाभाइरस संक्रमण बिरूद्ध कदम चाले पछि, मानिसहरुको सम्पर्कमा आउने गतिबिधि अलि बढेर आएको छ। मास्क लगाउने, हात धुने, राम्ररी मुख कुल्ला गर्ने, साथै सान्मिचु (तीन कुरा बन्द) बाट टाढा रहौं। ३ कुराहरु भन्नाले, हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, कसैसँग पनि सम्पर्कमा आउँदा वा कुराकानी गर्दा दूरी बनाएर बस्ने होI प्रत्येक व्यक्तिले, आधारभूत संक्रमण रोकथामका उपायहरू अपनाउन हुन विनम्र अनुरोध गर्दछौंI

【Winter Solstice】 को परिचय

डिसेम्बर २१, “नीज्युउसिसेक्की” भन्ने पुरानो क्यालेन्डरमध्ये एक, “तोउजी” अर्थात् Winter Solstice हो I Winter Solstice, वर्षको सबैभन्दा छोटो दिन होI

जापानमा Winter Solstice को दिन,  ओफुरोमा युजु अर्थात् Citron लाई राखेर, “युजुयु तातो पानी” मा बस्ने, फर्सी खाने चलन छ।

भनिन्छ, युजुयुले रक्त संचारमा सुधार गर्ने, शरीरलाई न्यानो पार्ने, र चिसो हुनबाट बचाउने काम गर्दछI

साथै, फर्सीले छाला र श्लेष्म झिल्ली (mucous membranes)लाई सशक्त बनाउने, संक्रामक रोगहरूको प्रतिरोध क्षमता सुधार गर्ने भएकोले, Winter Solstice मा फर्सी खायो भने चिसो लाग्दैन भन्ने भनाई जापानमा लामो समयदेखि रही आएको छ।

कोरोना भाइरस र इन्फ्लूएन्जालाई हराउन, उचित पोषण लिई, वर्षको अन्त्य पार गरौँI

【फाउन्डेशन परामर्श काउण्टर】

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धित बिषयमा परामर्शका लागि, उपयुक्त सम्पर्क तथा अन्य जानकारीहरु प्रदान गर्दै आईरहेको छ। फोन नम्बर, ०९२-२६२-१७९९, फेरि एकपटक, ०९२-२६२-१७९९ I

सम्पर्क समय ८:४५ देखि ६:०० बजेसम्मI शनिवार, आइतवार, सार्वजनिक बिदा, वर्षको अन्त्य र नयाँ वर्षको दिन बिदा हुन्छ।

परामर्श सेवा १९ भाषाहरूमा प्रदान गरिन्छI

【क्रिसमस मार्केट】

फुकुओका क्रिसमस मार्केट, हरेक वर्ष नोभेम्बरदेखि डिसेम्बरको क्रिसमसको दिनसम्म, हाकाता र तेन्जिनमा एकै साथ आयोजना भइरहेको फुकुओका शहरको हिउँदको एक परम्परा हो।

जापानको एकमध्ये सबैभन्दा ठूलो यस क्रिसमस मार्केटमा, खुला परिसरमा धेरै स्टलहरू पंक्तिबद्ध राखिएका हुन्छन्, जहाँ क्रिसमसको झिलिमिली बत्ती वा सजावटका साथसाथै, तातो वाइन, तातो चकलेट आदि जस्ता न्यानो पेय र स्वादिष्ट खानाको मजा लिने महोत्सव हो।

यस वर्ष, “Hakata Ekimae Hiroba”, “Fukuoka Shiyakushomae Fureai Hiroba”, “EL Gala Passage Hiroba" र “IMS Square”, गरि चार स्थानहरुमा.आयोजना गरिनेछन्I

【कोरोना भाइरस संक्रमण रोकथामका लागि अनुरोध】

आजकल, कोरोनाभाइरस संक्रमण बिरूद्ध कदम चाले पछि, मानिसहरुको सम्पर्कमा आउने गतिबिधि अलि बढेर आएको छ, तर अबबाट क्रिसमस, नयाँ वर्ष पूर्वसंध्या, र नयाँ वर्ष जस्ता मौसमी कार्यक्रमहरूमा भेला हुने अवसरहरू बढ्नेछन्। मास्क लगाउने, हात धुने, राम्ररी मुख कुल्ला गर्ने, साथै सान्मिचु (तीन कुरा बन्द) बाट टाढा रहौं। ३ कुराहरु भन्नाले, हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, कसैसँग पनि सम्पर्कमा आउँदा वा कुराकानी गर्दा दूरी बनाएर बस्ने होI प्रत्येक व्यक्तिले, आधारभूत संक्रमण रोकथामका उपायहरू अपनाउन हुन विनम्र अनुरोध गर्दछौंI

【Labour Thanksgiving Day】

यो वर्ष सकिन अब केवल एक महिना मात्र बाँकी छI

नोभेम्बर २३, बर्षको अन्तिम सार्वजनिक बिदाको दिन, “Labour Thanksgiving Day” हो। श्रमको सम्मान गर्ने, उत्पादनलाई मनाउने र एक अर्कालाई धन्यवाद दिने उद्देश्यले, सन् १९४८ मा सिर्जना गरिएको जापानका अन्य बिदाहरूमध्ये एक हो।

निइनामेसाई भन्ने, त्यस वर्षको फसल भगवानलाई चढाएर धन्यवाद दिने र अर्को वर्ष पनि राम्रो फसल होस् भनि कामना गर्ने यस बिदाको मुख्य उदेश्य मानिन्छI

नोभेम्बर २३, दैनिक अन्नदातालाई धन्यवाद दिंदै, आफ्ना वरिपरिका मानिसहरूको कडा दैनिकि परिश्रमका लागि एक अर्कालाई धन्यवाद ज्ञापन गर्ने दिन होI यस आधारमा, “Labour Thanksgiving Day” एउटा रमाईलो बिदाको दिन होI

यस बिदाको दिन घरमा आरामले दिन बिताउने, वा ओन्सेन्मा गएर फ्रेस हुने, तथा बच्चाहरुले आमाबुबालाई धन्यवादको रुपमा उपहार दिने आदि तरिकाले मनाउने गर्दछन्I

तपाईं चाहिँ नोभेम्बर २३ कसरी मनाउनुहुन्छ होला?

【विश्व एड्स दिवस १२/१】

डिसेम्बर १ विश्व एड्स दिवस हो।

एड्स फैलिनबाट रोक्न तथा बिरामी र संक्रमित व्यक्तिहरू विरुद्ध भेदभाव र पूर्वाग्रह हटाउने उद्देश्यले, WHO द्वारा सन् १९८८ मा स्थापना गरिएको यस दिवस, प्रत्येक वर्ष डिसेम्बर १ लाई केन्द्रित गरि, विश्वभर एड्स सम्बन्धि जनचेतना जगाउने गतिविधिहरू आयोजना गरिन्छ।

प्रत्येक वार्डको Health and Welfare Center मा, HIV परिक्षण निःशुल्क र गोप्य रूपमा गर्न सक्नुहुन्छ।

HIV संक्रमणको प्रारम्भिक पहिचान र उचित स्वास्थ्य सेवा र उपचारले एड्स फैलिने गतिलाई ढिलाइ गर्न सक्दछ। त्यसैले, प्रारम्भिक परिक्षण गर्ने गरौँ।

परिक्षण गर्न मिल्ने दिनको निश्चित समय भएकोले, कृपया जानुअघि अग्रिम जानकारी लिनुहोला।

यसका अतिरिक्त, एड्स पीडित व्यक्तिहरूलाई बुझ्ने र समर्थन गर्ने ईच्छुकत्तालाई रातो रिबनको प्रतिकले दर्शाउँछI

रातो रिबनले, एड्सको बारेमा कुनै पूर्वाग्रह नभएको र एड्स भएकासाथ बस्नेहरूसँग भेदभाव गर्दैनौं भन्ने सन्देश दिन्छ।

विश्व एड्स दिवसको लागि, एड्सको बारेमा सही ज्ञान र यसको रोकथाम उपायहरूको बारेमा सबैजनाले मनन गरेर हेरौं।

【आगोबाट सावधानी】

शरददेखि हिउँदसम्म, हावा सुक्खा भई आगलागि हुने यो मौसम होI

गत वर्ष, फुकुओका शहरमा ३०७ वटा आगलागिको घटनाहरु घटेका थिए।

आगलागिको मुख्य कारणहरू चुरोट, ग्याँस चूलो, स्टोभ आदि हुन्।

कपडा वा पर्दा, स्टोभमा छोएर आगलागी भएका धेरै उदाहरणहरु छन्I

त्यस्तै, सुतिरहेको बेला सिरक वा ओछ्यान स्टोभमा छोएर आगलागी हुन सक्छI

त्यसैले, स्टोभ नजिक ज्वलनशील वस्तु राख्नु अत्यन्त खतराजनक हुन्छ।

स्विच अफ गर्न नबिर्सन सावधान हुनुहोस्I

साथै, ग्याँस चूलोको आगोबाट पनि सावधानी अपनाउनु जरुरी छ।

जाडो बढ्दै आए पछि, नाबे आदि, ग्याँस चूलोको धेरै प्रयोग हुन्छI यसको प्रयोग गर्दा, कहिल्यै त्यतिकै छोडेर नराख्नुहोस्।

त्यस्तै, चुरोट पनि आगोको एक कारण हो।

ओछ्यानमा बसेर कहिल्यै चुरोट नपिउनुहोस्, चुरोटको ठुत्ताहरु जम्मा गरि नराख्नुहोस् अनि चुरोटको आगोलाई पूर्ण रुपमा निभाउने गर्नुहोस्I

आफ्नो घरको फायर अलार्म र आगो निभाउने उपकरणहरूको मिति सकिएको छ-छैन नियमित रूपमा जाँच गराउने गरौँ।

हामी प्रत्येकले, हरेक दिन आगलागी हुनबाट रोक्न प्रयास गरौं।

【Halloween】

जापानमा Halloween राम्रोसँग स्थापित भैईसकेको छ।

यस वर्षको Halloween अक्टोबर ३१ आउने शनिबारमा परेको छI

जापानमा, अक्टुबरको अन्तिम हप्तातिर Halloweenको कार्यक्रमहरु धेरै आयोजना हुन्छ।

फुकुओकामा पनि विभिन्न ठाउँहरुमा कार्यक्रमहरुको आयोजना हुँदै आएकोले, Halloween शुरु नै भैसकेको जस्तो देखिन्छI यो पर्व विगतका केही वर्षदेखि अत्यन्त उत्साहित बन्दै आईरहेको छ।

जापानमा,  विभिन्न पात्रहरूको भेष बदल्ने महोत्सवको रुपमा Halloween को मनोरञ्जन लिंदै आईरहे पनि, मूल रूपमा, यो क्रिश्चियन धर्मको "All Hallow’s Day" को रुपमा, नोभेम्बर १ को पूर्व सन्ध्यामा,  "All Hallow’s Eve" नामले  Halloweenको कार्यक्रमहरु रहि आएको छI त्यसैले धार्मिक रुपमा यसको महत्वपूर्ण अर्थ रहेको देखिन्छI

Tokyo, Shibuya को Scramble intersection, हरेक वर्ष Halloween को लागि लोकप्रिय ठाउँ हो, तर यस वर्ष नयाँ कोरोना भाइरसको प्रकोपका कारण, ३ मुख्य कुराहरु; हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, कसैसँग पनि सम्पर्कमा आउँदा वा कुराकानी गर्दा दूरी बनाउने जस्ता अभ्यासको अपरिहार्य आवश्यक्ता भएकोले Halloween को दिनमा, Shibuya मा भेला नहुन  आग्रह गरिएको छI

यस बर्षको Halloween, अरु बेलाको भन्दा भिन्न तरिकाले, अनलाइनमार्फत रमाईलो गर्ने Halloween बन्छ होला कि है!

【नयाँ कोरोना भाइरस र इन्फ्लुएन्जा रोकथाम】

प्रत्येक वर्ष जाडो शुरु भयो कि, इन्फ्लूएन्जाको संक्रमण देखा पर्दछ।

यस वर्ष, नयाँ कोरोना भाइरससँगै दुवै रोगहरू एकै समयमा हुने सम्भावना छ।

यदि कोरोना भाइरस र इन्फ्लुएन्जा दुबै एकै साथ लाग्यो भने, त्यसको असर गम्भीर हुन सक्छ भनिएको छI

साथै, यी दुबै रोगहरूमा, ज्वरो र शारीरिक कमजोरी जस्ता समान लक्षणहरू पनि भएकोले,  यदि तपाईंले परीक्षण गर्नुभएन भने, सही उपचार प्राप्त गर्न सक्नुहुन्न।

त्यसकारण, सकेसम्म ईन्फ्लुएन्जा हुनबाट जोगौं।

सबैजना कोरोना भाइरसको रोकथाम बारे सावधान छन्I हात धुने र मास्क लगाउने, कुनै व्यक्तिको सम्पर्कमा आउँदा पर्याप्त दूरी बनाएर बस्ने आदि जस्ता अभ्यास जारी राख्नुहोस्।

इन्फ्लूएन्जाले छोएको बेला, गम्भीर बिरामी हुनबाट बच्नको लागि, इन्फ्लूएन्जा खोपको पनि सल्लाह दिने गरिन्छI

फुकुओका शहरमा, यस बर्ष, ६ महिनादेखि १८ वर्ष उमेरका बच्चाहरूलाई, एक जनालाई १ पटक, १००० येनमा इन्फ्लूएन्जाको खोप लगाउन सकिन्छ।

खोप लिएका बच्चाहरू र उनीहरूका अभिभावकहरुसँग स्मार्टफोन छ भने, खोप लिनु अगाडि, नयाँ कोरोना भाइरस संक्रमण app COCOA(कोकोआ) राख्न अनुरोध गरिन्छI

यस अतिरिक्त, फुकुओका प्रान्तको support system ले, ६५ बर्ष वा माथिका मानिसहरूलाई नि:शुल्क खोप दिईन्छ।

नि:शुल्क खोपका लागि अन्तिम मिति, २०२१ जनवरी ३१ होI

यसका लागि, निश्चित चिकित्सा संस्थाहरु तोकिएको छI

कृपया, चिकित्सा संस्थामा फोन मार्फत अग्रिम बुकिंग गर्नु होलाI

【९/९ प्राथमिक उपचार दिन】

हिजो सेप्टेम्बर ९ "प्राथमिक उपचार दिन" थियोI

"क्यू (९) क्यू (९)" शब्दावलीबाट, १९८२ मा जापान स्वास्थ्य, श्रम र कल्याण मन्त्रालयको स्थापना भएको थियोI सरल शब्दमा भन्ने हो भने, यो दिन आपतकालिन जान्नको लागि हो!

क्यूक्यू भन्नाले, अचानक केही गाह्रो आई पर्दा बचाउनु होI

विशेष गरी, अचानक बिरामी वा घाइते भएका व्यक्तिलाई प्राथमिक उपचार प्रदान गर्नु हो।

एम्बुलेन्स वा दमकल बोलाउन फोन गर्दा, आपतकालिन फोन नम्बर, ११९ होI

यदि अचानक बिरामी वा चोटपटक, दुर्घटना वा आपतकालिनमा मद्दत चाहिएमा, हामीलाई कल गर्न नहिचकिचाउनुहोस्।

११९ फोन नम्बरमा १८ वटा भाषाहरुको सुबिधा रहेको छI

【घुमघामको जानकारी】

आज, मैले रमाईलो घुमघामको जानकारी लिएर आएकी छु।

के तपाईं कहिल्यै फुकुओका शहरको  चिडियाघर र वनस्पति उद्यानमा जानु भएको छ?

फुकुओका शहरको च्युओकुमा अवस्थित, यस स्थलमा धेरै जनावर र बोटबिरुवासँग अन्तरक्रिया गर्न सक्नुहुन्छ।

तेन्जिनबाट बस वा सबवेबाट जान सक्नुहुन्छ तर, बाटोमा हिड्न नपर्ने गरि, सबवे “याकुइन ओडोरी स्टेशन (स्योकुबुचुएन् एक्जिट)” बाट, हिडेर जान राम्रो होलाI

टिकट शुल्क, वयस्कहरूको लागि ६०० येन, हाईस्कूलका विद्यार्थीहरू लागि ३०० येन, जुनियर हाई स्कूलका विद्यार्थी र त्यस मुनिकाहरुलाई निशुल्क हो।

इच्छुक महानुभावहरुले कृपया आधिकारिक वेबसाइट हेर्नुहोस्।

वेबसाइट रहेको छ,  https://zoo.city.fukuoka.lg.jp/

यस वर्ष जन्मेको जिराफ र कंगारुको बच्चाहरू पनि स्वस्थ भई हुर्किंदै छन्।

अवश्य हेर्न जानुहोलाI

यस अतिरिक्त, नयाँ कोरोनाभाइरस संक्रमण हुनबाट रोक्न उपायको रूपमा,  प्रवेश द्वारमा ह्यान्ड स्यानीटाइजरको व्यवस्था गरिनुका साथै, सामाजिक दूरी र नियमित हात धुने सुझावहरू कागजमा पोष्ट गर्ने र पार्कमा कार्यन्वयनका लागि प्रचार गरिंदै आईरहेकोछI

हामी सबैजना बाहिर जाँदा, मास्क लगाउनुका साथै  रोगको संक्रमणबाट बच्न आवश्यक तरिकाहरु अपनाउने गरौँI

【अगस्त ११ यामा नो हि अर्थात् Mountain Day】

जापान मा धेरै बिदाहरु छन्। ती मध्ये एक, अगस्त ११ को “यामा नो हि” अर्थात् “Mountain Day” हो।

"हिमालको देनहरुको कदर गर्ने र उनीहरूलाई चिन्ने अवसरको दिन” को रूपमा यो दिन २०१६ मा  लागू गरिएको थियो।

सार्वजनिक बिदा नभएको अगस्त महिनामा, नयाँ सार्वजनिक बिदा " यामा नो हि" थपिएको पछि,  जून मात्र  सार्वजनिक बिदा नभएको महिना भएको देखिन्छI

नेपालमा सार्वजनिक बिदा यदि, शनिबार पर्यो भने तेस्को सट्टा अर्को दिनमा सार्दैन नि होईनI तपाईंलाई थाहा छ?

जापानमा भने, सार्वजनिक बिदा यदि आईतबार पर्यो भने, त्यो सोमबार सार्छ नि! कति रमाईलो है!

अनि साँच्चै, यो वर्ष टोकियो ओलम्पिक र प्यारा ओलम्पिक आयोजना हुने भएकोले " यामा नो हि" १० अगस्तमा सारेको थियो। तर, नयाँ कोरोनाभाइरसको प्रभावका कारण ओलम्पिक २०२० स्थगित गरियोI त्यसैले, “यामा नो हि”, यो वर्ष किन अगस्त ११ मा भयो भनेर तपाईंहरु नझुक्किनुहोला है!

【फुकुओका शहरले जारी गरेको जानकारीमुलक सूचनाहरु】

“विशेष तथा निश्चित अनुदान रकमको बारेमा”

जापान सरकारबाट पाउने १ लाख येनको राहत रकमको लागि आवेदन बुझाउने अन्तिम म्याद अगस्त ३१ तारिख हो।

२०२० अप्रिल २७ सम्ममा जापानको आधारभूत बसोबास दर्ता पुस्तिकामा दर्ता भएकाहरुलाई, फुकुओका शहरले  आवेदन फारम पठाएको छI

कृपया अन्तिम म्यादसम्ममा आवेदन बुझाउनुहोलाI नबुझेको केही कुरा भएमा, फोनमार्फत परामर्श लिन सक्नुहुन्छI

फोन नम्बर, ०९२-४०१-०८२६ I

सोमबार देखि शुक्रवार, बिहान ९ बजेदेखि बेलुका ६ बजेसम्म, अंग्रेजी, चाइनिज, कोरियाली, भियतनामी र नेपाली भाषामा परामर्श लिन सक्नुहुन्छ।

यस अतिरिक्त, Life in Fukuoka को विशेष एपिसोडमा ५ मिनेटमा बुझ्न सजिलो हुने गरि, ‘विशेष तथा निश्चित अनुदान रकम’ सम्बन्धि जानकारी दिने कार्यक्रम, हाल LOVE FM मा प्रसारण भईरहेको छI

नेपाली भाषामा हरेक हप्ताको विहिबार दिउँसो १:५३ बाट सुन्न सक्नुहुन्छI

“रेड इम्पोर्तेट फायर कमिला (Red Imported Fire Ant), पछाडी रातो भएको माकुरा (Red back spider)  र निलो चक्का भएको अक्टोपस(Blue-ringed octopus) बाट सावधान हुनुहोस्!”

गर्मीको बेला, रेड इम्पोर्तेट फायर कमिला (Red Imported Fire Ant), पछाडी रातो भएको माकुरा (Red back spider)  र निलो चक्का भएको अक्टोपस(Blue-ringed octopus) जस्ता विषालु जीवहरुदेखि सावधान रहनुहोस्।

रेड इम्पोर्तेट फायर कमिला,२.५ मिलिमिटरदेखि ६ मिलिमिटर लम्बाई जतिको रातो खैरो रंगको कमिला हो। यसले टोक्दा, पोलेको बेला जस्तै दुखाईको अनुभव हुन्छI तपाईंको प्रतिरक्षा प्रणाली अनुसार, एनाफिलाक्टिक झटका भन्ने एक किसिमको कडा एलर्जी हुन सक्छ।

पछाडी रातो भएको माकुरा (Red back spider), एक किसिमको विषालु माकुरा हो, जुन घाम भएतिरको  बोटबिरुवाको छेउमा, नालीको ढकनको पछाडि वा बेंचमुनि बस्दछन्।

यसको लम्बाई १ सेन्टीमिटर हो, र यदि यसको खुट्टाहरू फैलायो भने, यो ३ सेन्टीमिटरदेखि ४ सेन्टीमिटरको हुन्छ।

शरीर सबै कालो,तर पछाडी पेटतिर चाहिं रातो hour-glass आकारको बुट्टा हुन्छI

यदि यसले टोक्यो भने, दुखाई, ज्वरो र वाकवाकी लाग्ने जस्ता लक्षणहरू देखा पर्न सक्दछन्I

यदि तपाईंले रेड इम्पोर्तेट फायर कमिला वा पछाडी रातो भएको माकुरा फेला पार्नुभयो भने, यसलाई आफ्ना खुला हातले नछोइकन, व्यावसायिक रूपमा उपलब्ध कीटनाशकको प्रयोग गरि, मार्नुहोस्।

यदि तपाईलाई टोकेमा, तुरुन्तै अस्पताल जानुहोस्।

निलो चक्का भएको अक्टोपस, हाकाता बेभित्र र बाहिर फेला परेको छ र यसको शरीरको लम्बाई १० सेन्टीमिटर भन्दा कम छ र यसको बिशेषता भनेको, यो उत्तेजित हुँदा यसको सम्पूर्ण शरीरमा निलो चक्का देखा पर्छI

यो फुगु भन्ने माछा जत्तिकै घातक हुन्छI यदि यसले टोक्यो भने, सबैभन्दा डरलाग्दो अवस्था, मृत्यु हुन सक्छ।

यदि यसले तपाईंलाई टोक्यो भने, विषलाई आफ्नो मुखबाट नतान्नुस् र हातले थिचेर निचोर्दै, तुरुन्तै अस्पताल जानुहोस्।

【गर्मीको योजना】

आजकल गर्मी एकदम बढीरहेको छ ।  तपाईंहरु  यस वर्षको गर्मीमा के गर्ने सोच्दै हुनुहुन्छ होला?  तपाईंमध्ये कतिपयले वजन घटाउने भनेर योजना बनाउनु भएको होला वा गर्दै पनि हुनुहुन्छ होलाI अनि कतिपयले घरमै वेब सिरिज हेरेर रमाईलो समय बिताउने सोच्दै हुनुहुन्छ होला वा केही नयाँ परिकार बनाएर खाने, त्यस्तै नयाँ कुराको थालनी गर्ने आदि जस्ता योजना बनाउँदै हुनुहुन्छ होलाI मलाई त गर्मी महिना भने पछि नेपालको जनैपूर्णिमा र गाईजात्रामा क्वाटी र रोटिको खाएको याद आउँछI गर्मीको बेला गेडागुडीको टुसा राम्ररी आउने भएकोले, यहाँ जापानमा पनि म, क्वाटी र रोटि पकाएर खाने गर्छुI क्वाटी स्वादिलो मात्र नभई गर्मीमा थकित शरीरमा उर्जा ल्याउनुका साथै स्वास्थ्यमा धेरै फाईदा गर्दछI यो वर्ष पनि क्वाटी मज्जाले खाने र जापानी साथीहरुलाई पनि खुवाउने विचार छ I तपाईंहरु पनि खाने होइन त क्वाटी!

【घुमघामको जानकारी】

आज, मैले रमाईलो घुमघामको जानकारी लिएर आएकी छु।

 तपाईंहरुले कहिल्यै "फुकुओका ओपन टप बस" चड्नु भएको छ?

यो बस, फुकुओका शहरको पर्यटकिय स्थलहरू,  तेन्जिन क्षेत्र, हाकाता क्षेत्र र समुद्री किनारको क्षेत्र आदिको वरिपरि घुमाउने भ्रमण बस हो। सुविधाजनक यो बस, साधारण बस भन्दा भिन्न भई, छत बिनाको डबल डेकर बस हो। जमिन माथि करीव ३.२ मिटर बाट देखिने शहरको दृश्य सामान्य भन्दा फरक देखिन्छ, र यो उत्साहजनक हुन्छ! यसमा तीन किसिमको कोर्सहरू छन्, तपाईं आफूलाई  मनपर्ने कोर्समा एक घण्टाको लागि चढेर, फुकुओका शहरको अवलोकन गर्न सक्नुहुन्छ। साथै बसमा उद्घोषकले जानकारी पनि प्रदान गर्दछ।

 टिकट शुल्क, वयस्कहरूको लागि १,५७० येन र बच्चाहरूको लागि ७९० येन हो।

इच्छुक महानुभावहरुले कृपया आधिकारिक वेबसाइट हेर्नुहोस्।

वेबसाइट रहेको छ,  fukuokaopentopbus.jp

 नयाँ कोरोनाभाइरस विरुद्धको सावधानीका रूपमा, चालक दल र बस उद्घोषकहरूले मास्क लगाउने र गाडीलाई विसंक्रमण गर्ने जस्ता वातावरणीय सरसफाइलाई उचित ध्यान दिएर दुक्क र सुरक्षित सेवाहरू प्रदान गरिरहेको छI

यो बस चढ्दा, सबै जनाले मास्क लगाउने र खोक्दा शिष्टाचार का साथ गर्ने गरौं!

【नयाँ कोरोना भाईरस सम्पर्क पत्ता लगाउने app को बारेमा】

जापानले कोरोना भाईरस सम्पर्क पत्ता लगाउने app बनाएको छ। यदि तपाईं भाईरस संक्रमित व्यक्तिको सम्पर्कमा आउनु भयो भने, app मार्फत तपाईंलाई सूचित गराईनेछ। जति धेरैले यो app को प्रयोग गर्नुहुन्छ, त्यति नै संक्रमणलाई रोक्ने सम्भावना बढी हुन्छ। त्यसैले, आफू र आफ्नो नजिकका मानिसहरुको सुरक्षाका लागि, कृपया आफ्नो मोबाइलमा यो app राख्नु होला।

【तानाबाता】

जापानमा जुलाईको ७ तारिख “तानाबाता” चाड मनाईन्छI यसलाई ताराको चाड पनि भनिन्छI लोककथाको अनुसार, हिकोबोसी र ओरिहिमे नामका केटाकेटी ताराहरु थिए र उनीहरुको मिलन, आमानोगावा नदि तरेर, बर्षको एक पटक, जुलाईको ७ तारिखमा मात्रै हुन पाउने भन्ने प्रेम कथामा आधारित चाड हो I भनिन्छ कि, यदि, तानाबातामा पानी पर्यो भने, दुई प्रेमीहरूले भेट्न अर्को वर्ष पर्खनुपर्दछ रे! यस दिन, जापानमा लामो अनि साँघुरो रङ्गिन कागजमा आफ्नो ईच्छा लेखेर, बाँसको रुखमा झुन्ड्याउने चलन छI तपाईंहरु पनि मौका मिल्यो भने, आफ्नो ईच्छा लेखेर हेर्नुस् है!

【प्लास्टिक झोलाका लागि शुल्क तिर्नु पर्ने बारेमा】

सुपरमार्केट वा कन्भिनियन्स स्टोरमा सामान किन्दा, अहिलेसम्म नि:शुल्कमा पाउँदै आउनुभएको प्लास्टिकको झोला, जुलाई १, २०२० बाट शुल्क तिर्नु पर्नेछI

त्यसैले प्लास्टिकको झोलाको सट्टा, आफ्नै झोला लिएर जाने गरौँ।

प्लास्टिक फोहोरलाई घटाएर, तपाईंले झोलामा पैसा बचत गर्न सक्नुहुन्छ।

पट्याएर कम्प्याक्ट गरि राख्न मिल्ने झोला भएमा, तपाईं यसलाई सँधै आफ्नो ब्यागमा राख्न सक्नुहुन्छ अनि अचानक शपिंग गर्नु पर्दा ढुक्क हुन्छ।

प्लास्टिकको झोला सुविधाजनक छ तर यसको व्यापक प्रयोगले गर्दा, समुद्री फोहोरको समस्या र ग्लोबल वार्मिंगको कारण भएको मानिन्छ।

सकेसम्म धेरै प्लास्टिक झोलाको फोहर कम गर्नका लागि तपाईंहरु सबैको सहयोग र साथको अनुरोध गर्दछौंI

साथसाथै, सामान्यतयाः पाउँदै आउनुभएको प्लास्टिकको झोला वास्तवमै चाहिने हो त भन्ने बारे सोची,  हामीहरुले जीवनशैलीलाई सच्याउँदै जाऔं।

【अत्याधिक गर्मीमा सावधानी सम्बन्धि जानकारी】

अत्याधिक गर्मीको बेला, गर्मीबढ्ने जस्ता गाह्रो ब्यायाम गरेमा शरीरले तापक्रम नियन्त्रण गर्न सक्दैन, अनि शरीरमा पानी र नुनको मात्रामा असन्तुलन पैदा हुन्छI

अत्याधिक गर्मीले गर्दा टाउको दुख्ने, चक्कर आउने, बान्ता हुने र झाडापखाला लाग्ने जस्ता लक्षणहरु देखा पर्न सक्छ | यस्तो बेलामा शरीरलाई  चिसो पार्ने तथा नुन पानी पिउने गर्नुपर्दछI यदि यस्तो गर्दा नी ठिक नभएमा, ११९ मा फोन गरेर एम्बुलेन्स बोलाउनुहोस्|

विशेष गरि यो जुलाईमा चर्को घामसँगै बढेको अत्याधिक गर्मीका कारण आपतकालीन वाहकहरु धेरै परिचालन गरिन्छ|

यस्तो अत्याधिक गर्मी र आर्द्रतालाई शरीरले सामान्य रुपमा लिन नसक्ने हुनाले कृपया सावधान हुनु होलाI

यो वर्ष हामीले कोरोनाभाइरसको संक्रमणलाई फैलिन नदिन घरमै धेरै समय बिताई रहेका छौंI

अत्याधिक गर्मीले घर बाहिर मात्र नभई, भित्र पनि उत्तिकै प्रभाव पर्दछI

गर्मीमा मास्क लगाउँदा अझ धेरै गर्मीको प्रभाब बढ्ने सम्भावना हुन्छ, कृपया सतर्क हुनुहोस्I

अब केही अत्याधिक गर्मीबाट बच्ने उपायहरु बताउन गईरहेकी छुI

निरन्तर पानी पिउँदै गर्नुहोस्I साधारणतयाः, एक दिनमा १.२ लिटर जति पानी पिउनुहोस्I

शरीरमा पानीको आपूर्तिको लागि आफ्नो दैनिकीमा चिया र पानीको सक्दो धेरै प्रयोग गरौंI

व्यायाम गर्दा Sports drinks पिउनु पनि उपयुक्त मानिन्छI

यदि तपाईको धेरै पसिना निस्किरहेको छ भने, नुन र पानी पिएर शरीरमा पानीको मात्रा कायम राखौंI

कोठाको तापक्रम २८ डिग्री भन्दा बढी नबनाउनका लागि, air conditioner र फ्यान राम्रोसँग प्रयोग गर्ने गरौँI

【बुबाको मुख हेर्ने बारे】

आज हामी बुबाको दिन अर्थात् फादर्स् डे को बारेमा केही कुरा  गरौँI  अब आउने आइतबार जापानमा, फादर्स् डे परेको छ I हरेक वर्ष, जुनको तेश्रो आइतबार, जापानमा फादर्स् डे मनाईन्छ I जापानमा यो दिन, प्राय जसो, बुबालाई जापानी रक्सी, राम्रो ब्रान्डको खानेकुरा र मिठाईहरु दिने चलन छ I यसैगरि, यस दिन बुबालाई धन्यवाद ज्ञापन चिठ्ठी लेखेर दिने वा बाहिर सँगै खान जाने चलन पनि रहेको छ I हामी नेपालीहरुको बुबाको मुख हेर्ने दिन तिथि अनुसार यो वर्ष भाद्रको ३ गते अर्थात् अगस्तको १९ मा परेको छI

【विपद् सम्बन्धि】

जापानमा जूनदेखि जुलाईसम्मलाई  "वर्षा ऋतु" भनिन्छ र यस बखत भारी वर्षा हुने गर्दछI

जसका कारण प्रकोपहरू हुने सम्भावना हुन्छ।

जुलाई २०१७ मा, फुकुओका प्रान्तमा पनि भारी वर्षाले धेरै क्षति पुर्याएको थियोI

अधिक वर्षा हुँदा, नदी, तट वा पहाड नजिकको चट्टानहरू जस्ता खतरनाक ठाउँहरू नजिक नजानुहोस् र आफ्नो जीवन रक्षाको लागि कदम चाल्नुहोस्I

यस अतिरिक्त, फुकुओका सिटिको होमपेजमा Hazard map र विपद् रोकथाम सम्बन्धि जानकारी प्राप्त गर्न सक्नुहुन्छI

‘Fukuoka Support for Foreigners’ को साइटमा गएर, Fukuoka City Support for Foreigners को पेजबाट विपद् रोकथाम सम्बन्धि जानकारीहरु हेर्न सक्नुहुन्छI

आफू बस्ने क्षेत्रमा हुन सक्ने सम्भावित खतरा र आश्रय स्थलमा जाने सुरक्षित तरिका आदिको बारेमा अग्रिम जानकारी राख्ने गरौँI

फुकुओका शहरको महत्वपूर्ण जानकारीहरु, फुकुओका सिटिको आधिकारिक Facebook ‘Global Community Fukuoka’ वा Fukuoka City International Foundation को Facebook ‘फुकुओका शी कोकुसाई खाईखान्/ आत्ताखा फुकुओका「福岡市国際会館／あったか福岡」बाट पनि प्राप्त गर्न सक्नुहुन्छI

पेजलाई follow गरेर, सामान्यदेखि महत्वपूर्ण जानकारीहरु लिनु होलाI

त्यस्तै, फुकुओका शहरमा छाताको Sharing service ‘आइकासा’「アイカサ」को शुरु गरिएको छI

तपाईंले सजिलै र सस्तोमा आफ्नो स्मार्टफोनको लाइनबाट छाता भाँडामा लिन सक्नुहुन्छ।

सबवे स्टेशन र डिपार्टमेन्ट स्टोरहरूमा छाताहरू राखिएको हुनाले, अचानक वर्षा हुँदा आदि जस्तोमा कृपया

प्रयोग गरेर हेर्नुहोस्I

बिस्तृत जानकारी ‘आइकासा फुकुओकाश शी’ 「アイカサ　福岡市」मा हेर्नुहोलाI

【फुकुओका शहरबाट राष्ट्रिय स्वास्थ्य बीमा सम्बन्धि सूचना】

जापानमा, सबैको स्वास्थ्य बीमा भएको हुनुपर्दछ। तपाईंहरुले पनि बीमा सदस्यता लिनु भएको हुनुपर्छ। स्वास्थ्य बीमाको शुल्क तिर्नाले, यदि तपाई घाइते वा रोगका कारण अस्पताल जानुभयो भने, कम पैसा लाग्छ।

स्वास्थ्य बीमा ३ प्रकारका छन्, तर आज, राष्ट्रिय स्वास्थ्य बीमामा प्रवेश भएकाहरुका लागि सुचना रहेको छI

बीमा शुल्क प्रत्येक वर्ष जूनमा निर्णय हुन्छ। जूनको बीचतिर बीमा शुल्कको लिखित सूचना पठाइनेछ।

बीमा शुल्क जाँच गरेर, र समयभित्र शुल्क तिनुहोस्।

बीमा शुल्क,  अघिल्लो वर्षको आयमा आधारित हुन्छ।

नयाँ कोरोनाभाइरसको प्रभावका कारण आयमा कमी भएका परिवारहरूका लागि, कर शुल्क घटाउन सकिने भएकोले, कृपया वार्ड अफिसमा परामर्श लिनुहोस्।

त्यस्तै, राष्ट्रिय स्वास्थ्य बीमामा प्रवेश भएकाहरुमध्ये, अघिल्लो वर्षको आम्दानी थाहा नभएका परिवारहरूलाई ‘राष्ट्रिय स्वास्थ्य बीमा आय रिपोर्ट’ पठाईएको छI

यदि तपाईंले अहिलेसम्म बुझाउनु भएको छैन भने, कृपया आवश्यक जानकारीका साथ फिर्ता पठाउनुहोस् वा वार्ड अफिस वा शाखा कार्यालयमा पेश गर्नुहोस्।

यदि तपाईंले केही कुरा बुझ्नुभएन भने, १८ वटा भाषाहरुमा, फोनमार्फत परामर्श लिन सक्नुहुन्छ।

फोन नम्बर, ०९२-७५३-६११३, फेरि एकपटक, ०९२-७५३-६११३

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

त्यसपछि,  आफू बस्ने वार्ड अनि तपाईंले बुझ्न चाहेको कुरा भन्नुहोला।

【हालसालै पकाएको नेपाली परिकार】

मलाई लाग्छ, कोरोना भाईरसको कारणले गर्दा तपाईहरुमध्ये धेरैको समय घरमै बितिरहेको छ होला।आजकल म पनि, शनिबार र आईतबार बिदाका दिनहरूमा घरमै बसेर नेपाली परिकार पकाएर रमाइलो गर्ने गरिरहेकी छु। गएको शनिबार मात्रै घरमै मः मः बनाएर खाएँ। अनि आईतबार नेवारी खाना; चतामारी, बारा र आलुतामाको मज्जा लिएँ। तपाईहरुले पनि आफ्नै घरमा नेपाली परिकार बनाएर खाँदै हुनुहुन्छ होला। यसरी नै विदेशमा नेपाली स्वादको आनन्द लिंदै, राम्रोसँग बस्नुहोस है!

【फुकुओका शहरले जारी गरेको जानकारीमुलक सूचनाहरु】

“कोरोना सम्बन्धि”

फुकुओका शहरबाट, सबै बासिन्दाहरुलाई कोरोना युगको नयाँ जिवनशैली अपनाउनका लागि अनुरोध गरेको छ।

जस्तै कि,

• तीनवटा मुख्य कुराहरुबाट बच्ने अर्थात्,  हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, अनि कुराकानी गर्दा दूरी बनाउने।
• त्यस्तै, बस्दा २मिटरको दूरी बनाउने
• बाहिर गएको बेला कुरा गर्दा  मास्क लगाउने
• घरमा फर्कंदा हातमुख धुने

आदि कुराहरुलाई व्यवहारमा ल्याउन अनुरोध गरेको छ।

साथै, नयाँ जीवन शैलीको रुपमा,

• सक्दो अनलाईन शपिंग गर्ने र बजारमा किनमेल गर्दा पनि इलेक्ट्रोनिक पेमेन्ट गर्ने
• खानाको लागि पनि, Takeout वा डेलिभरीबाट मगाउने
• अनि, बस्दा खेरि, दायाँबायाँतिर बस्ने

जस्ता कुराहरुमा ध्यान दिन अनुरोध गरेको छ।

विशेष गरि, नयाँ जीवन शैलीको आधारभूत ब्यवहारको रुपमा, सबवेको प्रयोग गर्दा, मास्क अवश्य लगाउनु नै होला।

फुकुओका प्रान्तमा, आफ्नो जागिर गुमाएका विद्यार्थी तथा विदेशी विद्यार्थीहरुका लागि, तुरुन्तै, छोटो अवधिको लागि रोजगारको सृजना गर्ने हेतुले, कार्यहरु अघि बढाउने निर्णय भएको छ।

त्यस्तै, जापान सरकारले, आरुबाईतो गरिरहेका विद्यार्थीहरुको आयमा उल्लेखनीय कमी आएको र तोकिएको मापदण्डहरु पूरा भएको अवस्थामा, अनुदान रकम प्रदान गर्ने निर्णय गरेको छ।

बिस्तृत जानकारी, फुकुओका सिटिको होमपेजमा राखिएको छ।

“विशेष तथा निश्चित अनुदान रकम” सम्बन्धि नयाँ जानकारीका लागि ‘Fukuoka Support for Foreigners’को साइटमा हर्नुहोला।

“हलुका सवारी साधन कर सम्बन्धि”

मोटरबाईक वा हलुका कार भएकाहरुले, अप्रिल १ मा हलुका सवारी साधन कर तिर्नु जरुरी छ।

यदि तपाईंसँग मोटरबाईक वा हलुका कार छ भने, मे ५ तिर, हुलाक मार्फत कर तिर्नका लागि सूचना आउन सक्दछ। तिर्न बाँकी व्यक्तिहरुले शिघ्र कोन्भिनी वा बैंक मार्फत तिर्नुहोला।

यसका अतिरिक्त, जनवरी १ देखि फुकुओकामा बस्दै आउनुभएको व्यक्तिको, यदि अघिल्लो वर्षको आय १०लाख नाघेको भए, फुकुओका प्रान्तको कर तिर्नु पर्ने हुन सक्दछ।

कम्पनिमा काम गर्नेहरुको तलबबाट कटाईन्छ भने कम्पनिमा काम नगर्नेहरुलाई कर तिर्न, जुन १५ तिर सूचना आउन सक्दछ। शिघ्र कोन्भिनी वा बैंक मार्फत तिर्नुहोला।

यदि तपाईंले मोटरबाईक आदिको शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले कब्जा गर्ने सम्भावना पनि छ।

यदि तपाईंलाई कोरोना भाईरसको असरले गर्दा, शहरी कर तिर्नमा समस्या परिरहेको छ भने, कृपया, वार्ड अफिसको परामर्श सेवामा सम्पर्क राख्नुहोस्।

१८ वटा भाषाहरुमा, फोनमार्फत परामर्श लिन सक्नुहुन्छ। फोन नम्बर, ०९२-७५३-६११३,

फेरि एकपटक, ०९२-७५३-६११३

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

त्यसपछि,  तपाईं बस्ने वार्ड अनि करबारे तपाईंले बुझ्न चाहेको कुरा भन्नुहोला।

यो फुकुओका शहरबाट जारी सूचना थियो।