Life in Fukuoka "Nepali"

【मरीन वर्ल्ड उमी नो नाखामिचीमा डल्फिनको बच्चा जन्मियो!】

फुकुओका शहरको हिगासी वार्डमा रहेको एक्वेरियम "मरीन वर्ल्ड उमी नो नाखामिची" मा अक्टोबर महिनामा डल्फिनको बच्चा जन्मिएको छ।
जन्मिएको बन्डो डल्फिनको भाले बच्चा हो, जुन अक्टोबर २७ मा जन्मिएको हो, र यसको लम्बाई करिब १ मिटर छ।सामान्यतया, डल्फिनको बच्चा जन्मिन २ घण्टा भन्दा बढी समय लागेमा बच्चाको जीवित रहने सम्भावना कम हुन्छ भन्ने भनाइ छ। तर यो पटकको डल्फिनको जन्मलाई करिब साढे ३ घण्टा लागे पनि आमा र बच्चा दुवै स्वस्थ छन् र राम्रोसँग हुर्किरहेका छन्।

डल्फिन हेरचाह गर्ने व्यक्तिका अनुसार, "बच्चाको शरीर राम्रोसँग विकसित भएको देखिन्छ र पौडनमा पनि एकदम सिपालु छ। चम्किलो र ठूलो आँखा बच्चा डल्फिनको विशेष आकर्षण हो। नयाँ डल्फिनले सबैलाई खुशी बनाउने नाम पाओस् र सबैको मन जितोस्।"

बच्चाको नाम आगन्तुकहरूको भोटबाट चयन गरिनेछ, त्यसैले मरीन वर्ल्ड जानु भयो भने भोट गर्न नबिर्सनुस्।

यस बाहेक, "मरीन वर्ल्ड उमी नो नाखामिची" मा विभिन्न रमाइला कार्यक्रमहरू पनि नियमित रूपमा आयोजना गरिन्छ। नयाँ क्षेत्र "खाइज्यु आइल्याण्ड" मा आज़ारासीको रमाइलो हाउभाउ र आवाज नजिकैबाट हेर्न पाइने स्टेज प्रदर्शन र डल्फिन तथा आज़ारासीलाई खुवाउने अनुभवले धेरैलाई आकर्षित गरिरहेको छ।

थप जानकारी र कार्यक्रमहरूका विवरणका लागि वेबसाइटमा हेर्नुहोस्।

 🔎https://marine-world.jp/news/post-6963/

【फुकुओका शहर/ फुकुओका सिटी इन्टरनेशनल फाउण्डेसनको सूचना】

 “विश्व मानव अधिकार दिवस र मानव अधिकार सप्ताहबारे”

"मानव अधिकार" भन्नाले हरेक व्यक्तिले जन्मदेखि नै पाउने "मानिसले मानिसजस्तै बाँच्न पाउने अधिकार" लाई जनाउँछ। डिसेम्बर १० तारिकलाई "विश्व मानव अधिकार दिवस" भनिन्छ, र यो दिन जापान मात्र नभई विश्वभर मानव अधिकारको महत्त्वबारे सोच्ने अवसरका रूपमा मनाइन्छ। डिसेम्बर ४ देखि १० सम्मको अवधिलाई "मानव अधिकार सप्ताह" मानिन्छ, र फुकुओका शहरले यसलाई "मानव अधिकार सम्मान सप्ताह" का रूपमा मनाउँदै, सबैको अधिकारको सम्मान हुने र भेदभावबाट मुक्त, बस्न योग्य शहर बनाउने लक्ष्य लिएको छ।

आफू मात्र होइन, अरू व्यक्तिहरू पनि बिशेष र महत्त्वपूर्ण छन् भन्ने कुरा अनुभूति दिने यो महत्त्वपूर्ण सप्ताह हो। SDGs(सस्टेनेबल डेभलपमेन्ट गोल्स) को "कसैलाई पनि पछाडि नछोड्ने" समाज निर्माण गर्न, महिला, बालबालिका, ज्येष्ठ नागरिक, विदेशी, र शारीरिक रूपमा असक्षम व्यक्तिहरूका विरुद्ध हुने भेदभाव र पूर्वाग्रहलाई हटाउनु आवश्यक छ। एक अर्काको अधिकारको सम्मान गर्न हामी सबैको भूमिका महत्त्वपूर्ण छ।

शहर प्रशासनको डिसेम्बर १ को अंकमा, "फुकुओका शहरमा सक्रिय विदेशीहरू र बहुसांस्कृतिक सहकार्य" भन्ने विषय समेटिएको छ। यसमा फुकुओका शहरमा योगदान दिइरहेका विदेशीहरू र स्थानीय बासिन्दासँगको सहकार्य सम्बन्धी गतिविधिहरूको परिचय दिइएको छ। अवश्य हेर्नु होला।

हामीहरु सबैजनाले "दयालु हृदय" र " अमूल्य जीवन" बारे फेरि एक पटक सोच्ने प्रयास गरौँ।

डिसेम्बर १० तारिक, नाराया सामुदायिक केन्द्रमा “शिशु तथा बालबालिका अन्तरक्रिया कक्षा” सम्बन्धी सूचना

तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, आमाबुबा र बच्चाहरुले रमाइलो समय बिताउन सक्ने "शिशु तथा बालबालिका अन्तरक्रिया कक्षा" (याराना हिरोबा) सञ्चालन भइरहेको छ।

डिसेम्बर महिनामा यो कार्यक्रम१० तारिक मंगलबारहुनेछ। समय बिहान१०:३० देखि ११:३० सम्महो। कार्यक्रमको मुख्य विषय "क्रिसमस उत्सव"रहेको छ। यसमा, कथा पुस्तकको वाचन, गीत गाउँदै रमाइलो गर्ने, र स्टिकर जस्ता सामग्रीले खेल्ने गतिविधिहरू समावेश छन्। सबै मिलेर रमाइलो वातावरणमा समय बिताऔं।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनकोहोमपेज वा फेसबुकमा हेर्नुहोस्।

【Christmas Advent】

यस वर्ष पनि फुकुओकाको जाडो मौसमलाई रंगिन बनाउने "Christmas Advent"शुरु भएको छ। क्रिसमसको दिनसम्म "पाँच इन्द्रियहरूलाई गुन्जाउने क्रिसमस" भन्ने विषयमा, फुकुओकाको शहर पैदल घुम्न रमाइलो र अनुभव गर्न रमाइलो क्रिसमसको माहोल बनाइएको छ। यहाँका झिलिमिली सजावटहरू हेर्दै हिँड्न सक्नुहुन्छ, "फुकुओका क्लासिक संगीत महोत्सव" मा सहभागी हुन सक्नुहुन्छ। त्यस्तै,स्वादिलो खाना र कलाका रमाइला प्रदर्शनीहरूको मनोरञ्जन लिन सक्नुहुन्छ।

मुख्य स्थानहरूमा, फुकुओका एयरपोर्ट,JR हाकाता स्टेशन अगाडिको चोक, किहिन्खान् अगाडिको चोक, तेंन्जिन सेन्ट्रल पार्क, फुकुओका सिटी हलको पश्चिमपट्टि रहेको चोक, र फुकुओका डाइम्यो गार्डेन सिटी पर्दछन्। यहाँ हाकातादेखि नाकासु हुँदै तेंन्जिनसम्म झिलिमिली बत्तीहरू र क्रिसमस मार्केट राखिएको छ।

प्रत्येक स्थानमा बत्तीका आकर्षक सजावट र काठका साना बुथहरू राखिएका छन्, जहाँ तातो वाइन, तातो चकलेट, ससेज र युरोपबाट ल्याइएका क्रिसमस सजावटका सामानहरू पाइन्छन्। यसरी फुकुओकामै बसेर युरोपको वास्तविक क्रिसमसको माहोल अनुभव गर्न सक्नुहुन्छ। यो शहरकै बिचमा आयोजना हुने भएकाले, किनमेलको बिचमा पनि सजिलै जान सक्नुहुन्छ। 

त्यसैगरी, प्रत्येक घण्टामा एक पटक हुने संगीत मञ्च, र केही स्थानहरूमा हुने कार्यशालाहरूलेसबै उमेरका मानिसहरूलाई रमाइलो गर्ने मौका दिन्छ। हरेक वर्ष छिट्टै बिक्ने विशेष मग कप किन्न चाहनुहुन्छ भने, छिट्टै जानुहोस्। फुकुओकामा क्रिसमसको आनन्द लिनुहोस्।

【फुकुओका सिटी इन्टरनेशनल फाउण्डेसनको सूचना】

“नोभेम्बर २६ तारिक, नाराया सामुदायिक केन्द्रमा शिशु तथा बालबालिका अन्तरक्रिया कक्षा” सम्बन्धी सूचना

तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, हरेक महिनाको चौथो मंगलबार, आमाबुबा र बच्चाहरुले रमाइलो समय बिताउन सक्ने "शिशु तथा बालबालिका अन्तरक्रिया कक्षा" (याराना हिरोबा) सञ्चालन भइरहेको छ।

नोभेम्बरमा यो कार्यक्रम २६ तारिकमा हुनेछ। 

समय बिहान १०:३० देखि ११:३० सम्म हो। 

यसपटकको कार्यक्रमको विषय "आइकुरु डेमाए" हो।

केन्द्रीय बालबालिका केन्द्र "आइकुरु" नाराया सार्वजनिक हलमा आउनेछ। विभिन्न खेलकुद तथा कथा किताबहरू सुनेर अभिभावक र बालबालिकाहरुले सँगै रमाइलो समय बिताउन सक्नुहुन्छ।
साथै, अभिभावकहरू बीचमा पनि कुराकानी र अन्तरक्रिया गर्ने अवसर हुनेछ।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनकोहोमपेज वा फेसबुकमा हेर्नुहोस्।

“विदेशीहरुका लागि आप्रवासन, आवास र राष्ट्रियता सम्बन्धि परामर्श”

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्श लिन चाहनुहुने महानुभावहरुले, २ हप्ता अगाडि सम्ममा सम्पर्क गर्नुहोला।

जुनसुकै परामर्श पनि गोपनीयता कडा पालन गर्ने भएकोले ढुक्क भएर परामर्श लिनुहोस्।

बिस्तृत जानकारीका लागि, फोन नम्बर, ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

【शिचिगोसान्】

नोभेम्बरमा प्रवेशसँगै मौसम शरदबाट ग्रीष्म ऋतुतर्फ सर्दैछ। अहिलेको समयमा मन्दिरहरूमा परम्परागत पोशाक लगाएका परिवारहरू धेरै देख्न पाइन्छ। यो जापानको विशेष पर्व “शिचिगोसान्” हो, जहाँ बालबालिकाको वृद्धि र राम्रो स्वास्थ्यको कामना गरिन्छ। शिचिगोसान्को मिति हरेक वर्ष नोभेम्बर १५ मा हुन्छ। ३, ५, र ७ वर्ष पुगेका बालबालिकाहरूले राम्रो कपडा लगाएर परिवारसँग मन्दिरमा गएर पूजा गर्छन्। यो देवतालाई धन्यवाद दिने र भविष्यमा पनि स्वस्थ रहून् भनेर प्रार्थना गर्ने परम्परा हो।

पहिलेको समयमा बालबालिका सानो उमेरमा नै बिरामी हुने गर्थे, त्यसैले ७ वर्षसम्म स्वस्थ रहनु दुर्लभ मानिन्थ्यो। त्यसैले यो उमेरमा पुगेका बालबालिकाको स्वास्थ्य र लामो जीवनको लागि प्रार्थना गर्न थालियो। अहिलेको समयमा यो परम्परा परिवर्तन भएर बालबालिकाहरूले विशेष पोशाक लगाएर मन्दिरमा पूजा गर्न जाने चलन बनेको छ।

शिचिगोसान्को दिन “चितोसे आमे” भन्ने विशेष ललीपप पनि खाने गरिन्छ। रातो र सेतो रङको यो लामो ललीपप स्वास्थ्य र लामो जीवनको प्रतीक मानिन्छ।

रंगीन पोशाकमा सजिएका, कपाल मिलाएका, र विशेष जुत्ता लगाएका बालबालिकाहरू हिँडिरहेको दृश्य साँच्चै मनमोहक हुन्छ। यदि तपाईंले सहरमा यस्तो पोशाकमा सजिएको परिवार देख्नुभयो भने, केही बधाईका शब्दहरू भन्नुहोस्, जसले उनीहरूलाई खुशी मिल्नेछ।

【फुकुओका शहरको सूचना】

"फुकुओका किबो च्युउ गाक्कोमा विद्यार्थीहरूका लागि आवेदन खुला" को सूचना

पछिल्लो महिनाको प्रसारणमा भनिएको "फुकुओका किबो च्युउ गाक्को" तपाईहरुलाई याद छ? अहिले यो विद्यालयमा अर्को वर्ष भर्ना हुने विद्यार्थीहरूका लागि आवेदन खुला छ, त्यसैले थप जानकारी लिएर आएकी छु।

फुकुओका किबो च्युउ गाक्को भनेको, विभिन्न कारणले अनिवार्य शिक्षा नपाएका वा विद्यालय नआउन सकेका व्यक्तिहरूका लागि फुकुओका शहरले स्थापना गरेको सार्वजनिक रात्रीकालीन जुनियर हाई स्कूल हो। यहाँ राष्ट्रियता जेसुकै भए पनि विद्यार्थीहरूलाई भर्ना गरिन्छ।

यो स्कूलमा दिउँसोका स्कूलहरूमा पढाइने सबै बिषयहरू पढाइन्छ। जापानी भाषामा कठिनाई हुनेहरूका लागि, जापानी भाषा आधारस्तरबाट पढाउने शिक्षक पनि छन्। अध्ययन पूरा गरेपछि, विद्यार्थीहरूले आधिकारिक स्नातक प्रमाणपत्र प्राप्त गर्न सक्छन्।

कक्षा सोमबारदेखि शुक्रबार साँझ ५:५० बजेबाट राती ९:१५ बजे सम्म हुन्छ। विद्यालयको ठेगाना सवारा वार्ड, मोमोची क्षेत्रमा रहेको फुकुओका शिक्षा केन्द्रको चौथो तल्लामा छ। मेट्रो वा बस टर्मिनलबाट पैदल १० मिनेटमा पुग्न सकिने स्थानमा छ।

पढाई शुल्क र पाठ्यपुस्तक शुल्क कुनै पनि लाग्दैन। आर्थिक रुपमा समस्यामा परेका व्यक्तिहरूलाई शिक्षाका लागि सहयोगको व्यवस्था पनि गरिएको छ, जसबाट मासिक टिकटको शुल्क पनि प्राप्त गर्न सकिन्छ।

यस किसिमको सुबिधा भएको फुकुओका किबो च्युउ गाक्कोले अर्को वर्षको अप्रिलदेखि भर्ना हुने विद्यार्थीहरूका लागि आवेदन खुला गरेको छ। आवेदनका लागि शर्तहरू २०१० अप्रिल १ सम्म जन्मेका, फुकुओका शहरमा बसोबास दर्ता भएका, र विभिन्न कारणले जुनियर हाई स्कूल पूरा गर्न नसकेका व्यक्तिहरू पर्दछन्।

 थप जानकारीको लागि, विद्यालयको वेबसाइटमा रहेको भर्ना जानकारी हेर्नुहोस्। "फुकुओका किबो च्युउ गाक्को भर्ना" भनेर खोज्नुहोस्। नगर कार्यालय र वडामा पनि जानकारी पाउन सकिन्छ, तथा विभिन्न भाषाहरूमा जानकारी उपलब्ध छ।

भर्ना चाहनेहरूले २०२५ जनवरी ३१ सम्म विद्यालयमा फोन वा इमेलबाट सम्पर्क गर्न सक्छन्। 

फोन नम्बर ०९२－४००－०७५१  हो। 

सोमबारदेखि शुक्रबार, दिउँसो २ बजेबाट राति ९:१५ बजेसम्म कल स्वीकार गरिन्छ। इमेल ठेगाना विद्यालयको वेबसाइटमा दिइएको छ। 

सोधपुछ तथा परामर्शको लागि इमेल मार्फत् सम्पर्क गर्न नहिचकिचाउनुहोस्। इमेलबाट सम्पर्क गर्नुहुँदा, नेपाली भाषा प्रयोग गर्न सक्नुहुन्छ।

【नोभेम्बरमा मनाईने स्मरणीय दिन】

नोभेम्बरमा प्रवेश गरिसक्यौँ। यस हप्ता, आभार व्यक्त गर्ने स्मरणीय दिनहरूको बारेमा कुरा गरौं। जापान धेरै स्मरणीय दिनहरू भएको देशको रूपमा चिनिन्छ। तिनैमध्ये, नोभेम्बरमा मनाइने दुईवटा विशेष दिनहरूको बारेमा जानकारी लिएर आएकी छु: "राम्रो जोडीको दिन" (いい夫婦の日) र "श्रम आभार दिवस" (勤労感謝の日)।

२२ तारिखको "राम्रो जोडीको दिन" ११＝いい र २२＝ふうふ भन्ने मिल्दोजुल्दो ध्वनिलाई मिलाएर  いい夫婦の日 बनाइएको हो। यो दिन श्रीमान-श्रीमती तथा जोडीहरूले एकआपससँग बिताएको समयलाई सम्मान गर्ने दिन हो। दैनिक रूपमा प्रशंसा व्यक्त गर्न नसकिने भावनाहरू र विशेष अवसर बिना व्यक्त गर्न गाह्रो पर्ने भावनाहरू यस दिनमा व्यक्त गर्ने राम्रो मौकाको रुपमा लिईन्छ। यस दिन जोडीहरू मात्र नभई, आमाबाबु, बच्चाहरू, साथीहरू, आदिलाई पनि आभार व्यक्त गर्ने अवसरका रूपमा धेरैले मनाउँछन्। पछिल्ला वर्षहरूमा यस दिनलाई विवाह वार्षिकोत्सवको रूपमा पनि चिनिँदै आएको छ। यस दिनमा "राम्रो जोडी- नाइस कपल अवार्ड" दिने कार्यक्रमहरू, जोडीहरूले भाग लिने गतिविधिहरू पनि आयोजना हुने गर्छ।

अर्को दिन अर्थात् २३ तारिखमा मनाइने "श्रम आभार दिवस" श्रमिकहरूलाई आभार व्यक्त गर्ने दिन हो। यो दिन पहिलेको समयमा वर्षको उत्पादनको आभार प्रकट गरी नयाँ अन्नलाई देवतालाई चढाएर, आगामी वर्षको राम्रो उत्पादनको कामना गर्ने पर्वको रुपमा मनाइने गरिन्थ्यो। "श्रम आभार दिवस" लाई कामप्रतिको लगाव र कार्यप्रति सम्मान व्यक्त गर्ने दिनका रूपमा स्थापना गरिएको हो। यस दिनमा विशेष रूपमा केही गर्नुपर्ने आवश्यकता नभए पनि, कामको थकान मेटाउने वा मनपर्ने तरिकाले बिताउने दिनका रूपमा चिनिन्छ। परिवार, साथीहरू, कार्यस्थलका वरिष्ठ वा सहकर्मीहरूलाई, उहाँहरुको निरन्तर मेहनतका लागि आभार व्यक्त गर्ने दिन पनि हो।

त्यसैगरी, यी स्मरणीय दिनहरूमा अरूलाई मात्र होइन, आफैंलाई पनि "राम्ररी गरें" भनेर प्रशंसा गर्नु पनि महत्त्वपूर्ण छ। तपाईंले दैनिक रूपमा आफ्नो वरिपरिका लागि गरिरहेको मेहनतको कदर गर्दै आफैंलाई पनि आत्मसम्मान दिनुहोस्♪

【ओइस्टर हट्स】

फुकुओकाको हिउँद ऋतुको परम्पराहरुमध्ये एक,इतोशिमाको "''ओइस्टर हट्स", यस वर्ष पनि खुलेको छ! हरेक वर्षको यस समय, स्थानीय माझीहरूले चलाउने सानो घरहरू र प्लास्टिकका घरहरू सीमित अवधिका लागि खुल्छन्। "समुद्रको दूध" भनिने ओइस्टरमा प्रशस्त मात्रामा भिटामिन र खनिज पाइन्छ, जुन कम क्यालोरीका साथ राम्रो प्रोटीन र पोषक तत्वले भरिएको हुन्छ। यो प्रतिरक्षा प्रणाली बढाउन, थकान कम गर्न, र जीवनशैलीसँग सम्बन्धित रोगहरुको रोकथामका लागि लाभदायक मानिन्छ, साथै छाला र कपालका लागि पनि उपयोगी हुन्छ।

विशेष गरी, इतोशिमाको ओइस्टर ताजा, सुरक्षित, ठूलो र स्वादिष्ट हुन्छ, जसको मूल्य पनि उचित हुने हुँदा स्थानीय बासिन्दा मात्र नभई अन्य प्रान्तहरूबाट पनि मानिसहरू बारम्बार आउँछन्। अनलाइन बिक्री पनि उपलब्ध भएकोले, घरमै बसेर इतोशिमाको ताजा काकीको स्वाद लिन सकिन्छ।

ओइस्टर विभिन्न तरिकाले पकाएर खान सकिन्छ।काँचो, पोलिएको, वा बाफिएको ओइस्टरलाई लेमन वा सोया सॉसमा चोपेर त्यत्तिकै खानु पनि राम्रो हुन्छ। बटर र गार्लिकमा फ्राइ गर्दा पनि ओइस्टरको स्वाद मज्जाको हुन्छ। अनि, अहिजो (लसुन र तेलमा पकाइने स्पेनिश डिश) पनि छुटाउन मिल्दैन। जापानमा, ओइस्टरलाई फ्राइ गरेर खाने चलन लोकप्रिय छ, र यो मौसममा धेरै रेस्टुरेन्टहरूमा ओइस्टर फ्राइ सेटको मेनु उपलब्ध हुन्छ। ओइस्टरबाट राम्रो सुप र स्ट्यू पनि बन्छ, जुन जाडोमा शरीर तताउन उत्तम हुन्छ।

पक्कै पनि यस जाडोमा स्वादिष्ट ओइस्टरहरूको आनन्द लिनुहोस्।

【२०२४ को नोबेल पुरस्कार】

यस शरद ऋतुमा, नर्वेको नोबेल पुरस्कार समितिले २०२४ को नोबेल शान्ति पुरस्कार "Japan Confederation of A- and H-Bomb Sufferers Organizations" लाई प्रदान गर्ने निर्णय गरेको छ। जापानले शान्ति पुरस्कार पाएको यो ५० वर्षपछि पहिलो पटक हो।

"Japan Confederation of A- and H-Bomb Sufferers Organizations" भनेको परमाणु हतियारको आक्रमणबाट पीडितहरूलाई सहयोग गर्ने र युद्धको भयावहता भावी पुस्तालाई सम्झाउने काम गर्ने संस्था हो। करिब ७० वर्षदेखि, परमाणु हतियारमुक्त विश्वको स्थापनाका लागि गरेको प्रयास र परमाणु हतियार फेरि कहिल्यै प्रयोग हुन नहुने सन्देशलाई निरन्तर रूपमा फैलाउँदै आएको योगदानको उच्च मूल्यांकन गरिएको छ।

नोबेल समितिका अध्यक्ष फ्रिडनेसले भनेका छन्, "कुनै दिन पीडितहरू इतिहासका साक्षीका रूपमा अब हुँदैनन्। तिनका अनुभव र सन्देशलाई निरन्तर रूपमा सुनाइरहने नयाँ पुस्ताको आवश्यकता छ। ती व्यक्तिहरूले संसारभरिका मानिसहरूलाई प्रेरित गर्ने, शिक्षा दिने र यसै प्रक्रियामा, परमाणुको प्रयोगबारेको निषेधलाई कायम राख्न मद्दत गर्नेछन्। किनभने मानव जातिको शान्तिपूर्ण भविष्यका लागि परमाणु निषेध आधारभूत शर्त हो।"

"Japan Confederation of A- and H-Bomb Sufferers Organizations" का प्रतिनिधिका अनुसार, "परमाणु हतियारको उन्मूलन र शान्तिको स्थापना गर्न विश्वभरका मानिसहरूलाई सन्देश पुर्‍याउने कार्यलाई निरन्तरता दिईनेछ।" 

यो नोबेल शान्ति पुरस्कारको प्राप्ति, परमाणु हतियार उन्मूलनको लामो प्रयासलाई विश्वले मान्यता दिएको संकेत हो। भविष्यका पुस्तालाई परमाणु हतियारको भयावहता बताउन र शान्तिपूर्ण संसार बनाउनको लागि कदम चाल्न प्रेरित गराउन सकून् भन्ने आशा गरौं।

【शरद ऋतुको पठन सप्ताह】

यस हप्ताको आइतबारबाट, शरद ऋतुको 【पठन सप्ताह】 शुरु हुँदैछ।
हरेक वर्ष, अक्टोबर २७ देखि नोभेम्बर ९ सम्मको दुई हप्ता पठन सप्ताहका रूपमा मनाइन्छ, जसको उद्देश्य मानिसहरूलाई पढ्नप्रति चासो जगाउनु र पढ्न प्रेरित गर्नु हो।
शरद ऋतुमा मौसम सुहाउँदो हुन्छ, र ध्यान केन्द्रित गर्न पनि सजिलो हुन्छ, त्यसैले यो पढ्नको लागि उपयुक्त समय हो।

फुकुओका शहरमा १२ वटा पुस्तकालयहरू छन्। यी सबै पुस्तकालयहरू निःशुल्क प्रयोग गर्न सकिन्छ, र त्यहाँबाट पुस्तकहरू सापट पनि लिन सकिन्छ।
तीमध्ये, 【फुकुओका सिटी पब्लिक लाइब्रेरी】 सबैभन्दा ठूलो हो, जहाँ करिब १२ लाख भन्दा धेरै पुस्तकहरू छन्। यहाँ बालबालिकाहरूका लागि कथा वाचन र अन्य कार्यक्रमहरू पनि आयोजना गरिन्छ। पुस्तकालयभित्र सानो सिनेमा हल पनि छ, जहाँ हरेक दिन नयाँ-नयाँ चलचित्रहरू देखाइन्छन्, साथै रेस्टुरेन्ट, अध्ययन कक्ष, र छलफल कक्ष पनि छन्।

त्यस्तै, हरेक वर्ष आयोजना हुने 【Bookuoka】 भन्ने पुस्तक मेला पनि हुन्छ! यो मेला नोभेम्बर २३ सम्म चल्नेछ। फुकुओका शहरको विभिन्न ठाउँमा कथा वाचन र टक शो जस्ता कार्यक्रमहरू आयोजना गरिन्छ। मुख्य कार्यक्रम नोभेम्बर ३, आइतबारको दिन हुनेछ, जहाँ तेनजिनदेखि गोकोकु मन्दिरसम्मको "केयाकी सडक" मा पुराना पुस्तकहरूको खुला बजार लाग्छ। यहाँ प्रकाशकहरू, पुस्तक पसलहरू र सामान्य पुस्तक प्रेमीहरूले छानेका पुराना पुस्तकहरू बिक्रीमा राख्छन्। दुर्लभ र अब नपाइने पुस्तकहरू भेटिन पनि सक्छन्!

यसका साथै, तेंन्जिनको 【फुकुओका PARCO】 मा पनि देशभरका प्रकाशक र पुस्तक पसलहरूले भाग लिने विशेष कार्यक्रम हुनगईरहेको छ।
यसमा करिब ३० वटा साना प्रकाशकहरू र फुकुओकाका ६ वटा स्वतन्त्र पुस्तक पसलहरूले चयन गरेका पुस्तकहरू राखिनेछन्।
विस्तृत जानकारीका लागि, 【Bookuoka】भनि खोज्नुस्।

पक्कै पनि शरद ऋतुको पठनको आनन्द लिनुहोस्♪

【NAKASU JAZZ】

फुकुओकाको म्युजिक मन्थ। यो एक महिना फुकुओका शहर संगीतले भरिपूर्ण हुनेछ।सेप्टेम्बरको दोस्रो हप्ताको शनिबार र आइतबार, अर्थात् १४ र १५ तारिकमा, फुकुओका शहरहाकाता वार्डको नाकासुमा, निःशुल्क JAZZ फेस्टिवल, " NAKASUJAZZ" को आयोजना हुन गईरहेको छ। 

दुईदिनकोयसफेस्टिवलमा, नाकासुकोसडकहरूमास्टेजहरूठडिएकाअनिरोमान्चककलाकारहरूकोप्रत्यक्षप्रदर्शनहरुलेसडकहरूभरिएकादेख्नसक्नुहुन्छ। ज्याज प्रेमीहरू लगायत ज्याज थाहा नभएकाहरुले पनि यसको मनोरञ्जन लिन सक्नुहुन्छ।

स्ट्यान्डर्डदेखि लिएर नवीनतम JAZZ नम्बरसम्मका विविधता प्रत्यक्ष हेर्न पाउँदा जोश र उत्साहले प्रभावित  हुनु हुनेछ। त्यसमाथि सबै स्टेजहरु नि:शुल्क हेर्न पाउने भएकोले यो अवसरलाई पक्कै पनि नछुटाउनु होला!

यस वर्ष १६ औं पटक आयोजित यस कार्यक्रम, स्थानीय बासिन्दाहरू र JAZZ प्रेमीहरूको स्वयंसेवक सहयोगले सम्भव भएको हो। यो संगीत महोत्सव प्रेम र जोशले भरिपूर्ण विशेष कार्यक्रम हो। "नाकासुमा JAZZ फिट हुन्छ" भन्ने स्लोगनलाई, एकपटक अनुभव गरेर हेर्नुभए कसो होला!

【फुकुओका सिटी इन्टरनेशनल फाउण्डेसनको सूचना】

सेप्टेम्बर २४ तारिक, नाराया सामुदायिक केन्द्रमा शिशु तथा बालबालिका अन्तरक्रिया कक्षा” सम्बन्धी सूचना

तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, हरेक महिनाको चौथो मंगलबार, आमाबुबा र बच्चाहरुले रमाइलो समय बिताउन सक्ने "शिशु तथा बालबालिका अन्तरक्रिया कक्षा" (याराना हिरोबा) सञ्चालन भइरहेको छ। 

सेप्टेम्बरमा यो कक्षा २४ तारिकमा सञ्चालन हुनेछ।

समय बिहान १०:३० देखि ११:३० सम्म हो।

सेप्टेम्बर महिनाको कार्यक्रमको विषय हो, "बाल पालन सहयोग कन्सर्ट (रिलाक्सेशन हार्प र गिटार)" । संगीत सुन्दै, आमाबुबा र बच्चाहरूले आरामदायी समय बिताउन सक्छन्।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनको होमपेज वा फेसबुकमा हेर्नुहोस्।

 कानूनीपरामर्शरमानसिकपरामर्शअर्थात्व्यक्तिगतपरामर्शकोपरिचय

 फुकुओका सिटी इन्टरनेशनल सेन्टरमा रहेको फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क “कानूनी परामर्श” र “मानसिक परामर्श अर्थात् व्यक्तिगत परामर्श” प्रदान गर्दैआईरहेको छ।

 “कानूनी परामर्श”, हरेक महिनाको पहिलो शनिबार, बिहान १०:३० देखि दिउँसो १:३० बजेसम्म र 

तेस्रो बुधबारको दिउँसो १:०० बजेदेखि ४:०० बजेसम्म, प्रदान गरिंदै आइरहेको छ।परामर्श अवधि ४५ मिनेट। 

बुकिंगको आधारमा Fukuoka Bar Association को प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ।भाषा अनुवादकको आवश्यकता भएमा, निःशुल्क अंग्रेजी अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

मानसिक परामर्श अर्थात् व्यक्तिगत परामर्श, हरेक हप्ताको सोमबार, मंगलबार, र विहिबार, जापानी क्लिनिकल मनोवैज्ञानिकहरुद्वारा, अंग्रेजी र जापानी भाषामा परामर्श प्रदान गरिंदै आइरहेको छ। चाहनुहुने महानुभावहरुले बुकिंग गर्नुहोला।

जुनसुकै परामर्श पनि, गोपनीयता कडा पालन गर्ने भएकोले ढुक्क भएर परामर्श लिनुहोस्।

सम्पर्क काउन्टर खुल्ने समय, सोमबारदेखि शुक्रबार, बिहान ९ बजेदेखि बेलुका ५:३० बजेसम्म हो। 

फोन नम्बर ०१२०-६६-१७९९ हो।

【ISLA DE SALSA】

यस वर्ष २५ औं वार्षिकमा टेकेको छ, आउटडोर वर्ल्ड बीट एण्ड डान्स फेस्टिवल【ISLA DE SALSA】। 

अगस्ट ३१ र सेप्टेम्बर १ गरि दुई दिनको यो फेस्टिवल,नोकोनोशिमा क्याम्पमुरामा आयोजना हुन गईरहेको छ। जापानको प्रख्यात साल्सा ब्यान्ड "Orquesta De La Luz" लगायत, देशभित्र र विदेशका उत्कृष्ट स्तरका संगीतकार र नृत्य कलाकारहरुको उपस्थिति हुनेछन्। दर्शकहरु सबै एकसाथ, तालमा ताल मिलाएर नाच्ने र रमाइलो गर्ने यस फेस्टिवलमा, अन्य आकर्षणहरु जस्तै, समुद्र किनारमा आराम गरेर घाम ताप्ने, BBQ र स्वादिष्ट परिकारहरुको स्वाद लिने आदि सबै उमेरकाले आफ्नै तरिकाले रमाइलो गर्न सक्ने कार्यक्रम हो। क्यारेबियन समुद्रको भ्रमण जस्तो अनुभव गराउने यस बिशेष वातावरणमा, साल्साको मजा लिएर हेर्ने होइन त!

【फुकुओका सिटी इन्टरनेशनल फाउण्डेसनको सूचना】

“अगस्ट २७ तारिक, नाराया सामुदायिक केन्द्रमा शिशु तथा बालबालिका अन्तरक्रिया कक्षा” सम्बन्धी सूचना

 तपाईँहरु आफ्ना बच्चासँग रमाइलो समय बिताउन मिल्ने ठाउँको खोजीमा हुनुहुन्छ भने,

हाकाता वार्डमा रहेको नाराया सामुदायिक केन्द्रमा, हरेक महिनाको चौथो मंगलबार, आमाबुबा र बच्चाहरुले रमाइलो समय बिताउन सक्ने शिशु तथा बालबालिका अन्तरक्रिया कक्षा, जसलाई "याराना हिरोबा" पनि भनिन्छ, सञ्चालन भइरहेको छ। 

अगस्टमा यो कक्षा २७ तारिखमा सञ्चालन हुनेछ।

समय बिहान १०:३० देखि ११:३० सम्म हो।

अगस्ट महिनाको कार्यक्रमको विषय "अंग्रेजीमा कथा वाचन र फ्री स्पेस" हो। आमाबुबा र बच्चाहरुले अंग्रेजी प्रयोग गरेर चित्रकथा रमाइलो गर्न सक्छन् र अंग्रेजी गीत तथा हातले खेल्ने खेलहरुमा पनि सँगै भाग लिन सक्छन्।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनको होमपेज वा फेसबुकमा हेर्नुहोस्।

“विदेशीहरुका लागि आप्रवासन, आवास र राष्ट्रियता सम्बन्धि परामर्श”

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्श लिन चाहनुहुने महानुभावहरुले, २ हप्ता अगाडि सम्ममा सम्पर्क गर्नुहोला।

जुनसुकै परामर्श पनि गोपनीयता कडा पालन गर्ने भएकोले ढुक्क भएर परामर्श लिनुहोस्।

बिस्तृत जानकारीका लागि, फोन नम्बर, ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

【फुकुओका एयरपोर्ट इन्टरनेशनल टर्मिनलको पर्यटक सूचना केन्द्रमा “Fukuoka Yatai Concierge”】

फुकुओकाको पर्यटकीय आकर्षणहरू मध्ये एक हो,“याताई”। तपाईंहरूले याताईको अनुभव गर्नुभएको छ? 

तेन्जिन, नाकासु र नागाहामाको रातको सडकमा लाइन लगाएका याताईहरू देख्नुभएको पनि होला। हाकाता गउरमेन्ट फूडदेखि लिएर अन्तर्राष्ट्रिय व्यञ्जनसम्मका विभिन्न याताईहरु हुने भएकोले, कुन पसल छनौट गर्ने भनेर दोधारमा हुन सक्छ। यदि तपाईं फुकुओका शहरमा लामो समयदेखि बस्नुभएको छ भने, तपाईंलाई शायद कुन याताईमा जाँदा हुन्छ भनेर सोधिएको अनुभव पनि होला।

याताईको शहर फुकुओकामा, जापानको पहिलो “Yatai Concierge” को थालनी भएको छ!

फुकुओका एयरपोर्ट इन्टरनेशनल टर्मिनलको पर्यटक सूचना केन्द्रमा Yatai Concierge नामक सूचना कुना खोलिएको छ। यहाँ तपाईंलाई याताईको बारेमा जानकारी, प्रयोग गर्ने तरिका, र मनोरन्जन लिने बिधि आदि लगायत याताईको विशेषता पनि बताउनेछ।

यो सूचना कुना, बिहान ८ बजे देखि रातको ९:३० बजे सम्म बर्षभरी खुल्ला रहनेछ।

पक्कै पनि फुकुओकामा भ्रमण गर्नुहुने व्यक्तिहरूमाझ याताईको बारे जानकारी दिएर, फुकुओकाको याताई संस्कृतिको अनुभव लिन लगाउनुहोस्।

【फुकुओका सिटी इन्टरनेशनल फाउण्डेसनको सूचना】

"कानूनी परामर्श" र "मनोवैज्ञानिक परामर्श" को परिचय

 फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क “कानूनी परामर्श” र “मानसिक परामर्श अर्थात् व्यक्तिगत परामर्श” प्रदान गर्दैआईरहेको छ।

“कानूनी परामर्श”, हरेक महिनाको पहिलो शनिबार, बिहान १०:३० देखि दिउँसो १:३० बजेसम्म र, तेस्रो बुधबारको दिउँसो १:०० बजेदेखि ४:०० बजेसम्म, परामर्श अवधि ४५ मिनेट।बुकिंगको आधारमा Fukuoka Bar Association को प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ। भाषा अनुवादकको आवश्यकता भएमा, निःशुल्क अंग्रेजी अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

मानसिक परामर्श अर्थात् व्यक्तिगत परामर्श, हरेक हप्ताको सोमबार, मंगलबार, र विहिबार, जापानी क्लिनिकल मनोवैज्ञानिकहरुद्वारा, अंग्रेजी र जापानी भाषामा परामर्श प्रदान गरिंदै आइरहेको छ। चाहनुहुने महानुभावहरुले बुकिंग गर्नुहोला।

जुनसुकै परामर्श पनि, गोपनीयता कडा पालन गर्ने भएकोले ढुक्क भएर परामर्श लिनुहोस्।

सोधपुछ काउन्टर खुला रहने समय अवधि, सोमबारदेखि शुक्रबार, बिहान ९ बजेदेखि बेलुका ५:३० बजेसम्म हो।

फोन नम्बर （०१२०-६६-१७९९ ）हो।

【समुद्री तट】

अब चाँडै नै गर्मीको चरम समय आउन लागेको छ! यसै मौका पारेर, फुकुओका शहर भित्रका सिफारिस गरिएका समुद्री तटहरूको जानकारी लिएर आएकी छु।

पहिलो छ, सावारा वार्डमा अवस्थित Momochi Seaside Park।

सुरक्षित र आरामदायक समुद्रीतटको रुपमा रहेको यस समुद्रमा पौडी खेल्नुका साथै समुद्री खेलहरू पनि खेल्न सक्नुहुन्छ। समुद्रीतटको वरपरको क्षेत्रमा रेस्टुरेन्ट र पसलहरू पनि छन्। जिग्योहामा क्षेत्रमा सांगीतिक महोत्सव जस्ता कार्यक्रम पनि आयोजना गरिएको छ।

दोस्रो, हिगाशी वार्डमा रहेको शिखानोशिमा समुद्रीतट। 

शिखानोशिमा जमिनसँग जोडिएको हुनाले कारमा जानुभयो भने स्थानीय दृश्यको आनन्द लिन सक्नुहुन्छ। त्यसैले ड्राइभ कोर्समा जान पनि उत्तम हुन्छ। यहाँको समुद्र अत्यन्त पारदर्शी हुने भएकोले, सेतो बलौटे समुद्र तट सुन्दर देखिन्छ। उत्तरी छेउमा [शिरोसे] नामको फुकुओका शहरको एक मात्र डाइभिङ स्पट रहको छ, त्यहाँबाट देखिने दृश्य पनि अत्यन्तै मनमोहक छ। 

त्यस्तै अर्को छ, निशी वार्डमा रहेको नोकोनोशिमा क्याम्प समुद्रीतट।

प्रकृतिले भरिपूर्ण यस टापुमा पाल्म रूखहरूले घेरिएको समुद्री तटमा अवस्थित, क्याम्पिङ क्षेत्रमा विश्रामगृह, होटेल, रेस्टुरेन्टर पसलहरू स्थापित छन्। सोही टापुमा नोकोनोशिमा आइल्याण्ड पार्क पनि छ, जहाँ आगन्तुकहरूले मौसमी फूलहरूको मजा लिन सक्नुहुन्छ र समुद्रमा पौडी खेल्ने बाहेक, अन्य धेरै गतिविधिहरूको मनोरञ्जन लिन सक्नुहुन्छ।

साथै, निशी वार्डमा रहेको ओहारा समुद्री तट पनि घुमफिरको लागि राम्रो छ। 

फुकुओकाको सबैभन्दा लामो समुद्री तटमा बिना कुनै अवरोधपौडी खेल्न सक्नुहुन्छ। समुद्र किनारमा विश्रामगृहको राम्रोव्यवस्था छ, जहाँ तपाईँले BBQ र Banana boat जस्ता समुद्री मनोरञ्जनहरुको आनन्द लिन सक्नुहुन्छ।

फुकुओका शहरमा प्रकृति र रिसोर्टको आनन्द लिन सकिने थप्रै समुद्री तटहरु छन्। यस गर्मीमा पक्कै त्यहाँको मज्जा लिनुहोस्♪ बरु बाहिर जानुहुँदा, लू लाग्नबाट बच्न सावधानीहरु अपनाउनुहोस्!

【फुकुओका शहरको सूचना 】

“नेच्च्युस्योउ अर्थात् लू लाग्नुबाट सावधान हुनुहोस् !”

अत्याधिक गर्मीको बेला, गाह्रो ब्यायाम वा तीव्र शारीरिक क्रियाकलापका कारण शरीरले आफ्नो तापक्रम ठीकसँग नियन्त्रण गर्न सक्दैन, जसले गर्दा शरीरमा पानी र नुनको मात्रामा असन्तुलन पैदा भई नेच्च्युस्योउ अर्थात् लू लाग्छ। नेच्च्युस्योउका लक्षणहरूमा टाउको दुख्ने, चक्कर आउने, वाकवाकी लाग्ने र झाडापखाला लाग्ने जस्ता हुन्।

यस्तो बेलामा शरीरलाई चिसो पार्ने तथा नुन पानी पिउने गर्नुपर्दछ। यदि यस्तो गर्दा पनि निको नभएमा, ११९ मा फोन गरेर एम्बुलेन्स बोलाउनुपर्छ।

विशेष गरी, भारी वर्षा समाप्त भएपछि, जुलाईबाट अधिकतम तापमान बढ्ने समयमा आकस्मिक कक्षमा ल्याउनेहरुको सङ्ख्या ह्वात्तै बढ्छ। यस समयमा, उच्च आर्द्रता हुने र शरीरलाई अधिकतम गर्मीको बानि नहुने हुनाले धेरै ध्यान दिनु आवश्यक छ। लू, घर बाहिर मात्र होइन घर भित्र पनि हुन सक्छ।

अब केही नेच्च्युस्योउबाट बच्ने उपायहरु बताउन गईरहेकी छु।

• तरल पदार्थ बारम्बार पिउने गर्नुहोस्। 

नियमित रूपमा जौको चिया र पानी पिउने, व्यायाम गर्दा Sports drinks पिउनु पनि उपयुक्त मानिन्छ। पसिना आउँदा, नुनपानी पिएर शरीरमा पानीको मात्रा कायम राखौं।

• टोपी वा छाताको प्रयोग गरेर प्रत्यक्ष घामबाट जोगौं।

• कोठाको तापक्रम २८ डिग्री सेल्सियसभन्दा कम राख्न, बुद्धिमानीपूर्वक air conditioner र फ्यानको प्रयोग गरौँ।

• Cooling sheet र Ice pillow जस्ता चिसो पार्ने सामानहरूको प्रयोग गरौं।

• सन्तुलित आहार र पर्याप्त निद्रा लिएर, स्वास्थ्यको ख्याल गरौं।

【हियाशी च्युखा अर्थात् चिसो चाइनीज नूडल्स】

 यस समयतिर, खानपानका पसलहरुमा "हियाशी च्युखा शुरु गरियो!" भन्ने सूचना बोर्ड कहिल्यै देख्नुभएको छ? वा तपाईंहरूले यो "हियाशी च्युखा" कहिल्यै खानु भएको छ? "हियाशी च्युखा" को अर्थ के होला भनेर सोचिरहनुभएकाहरु पनि हुनुहुन्छ होला!

हियाशी च्युखा भन्ने शब्दमा "चाइनीज" भाषा छ, र यसको अर्थ "चाइनीज नूडललाई चिसो पानीमा भिजाएर बनाइएको परिकार" हो तर, वास्तबमा यो चाइनीज परिकार भने होइन। यसको उत्पत्ति जापानमा भएको हो। पहाड जस्तै धेरै हालिएको नूडलमा, काक्रो, ह्याम, गोलभेंडा आदि वरिपरि घेरामा राखिन्छ, जसले माउन्ट फुजीको सम्झना दिन्छ रे। यसलाई खाँदा, भिनेगर सोया सस वा तिलको सस हालेमा ताजा र स्वादिलो हुन्छ।

 चासो लाग्ने "हियाशी च्युखा शुरु गरियो" भन्ने वाक्यांशको उत्पत्तिका बारेमा विभिन्न भनाइहरू छन्, तर सामान्य अर्थमा "गर्मीको मौसम आएकोले चिसो नूडल्स तयार छ, खान आउनुहोस्!" भन्ने कुरा संक्षेपमा व्यक्त गर्छ।

अत्यधिक गर्मीले खानाको इच्छा घट्ने गर्मीमा, गर्मीको थकान रोक्नका लागि यो मेनु उत्तम छ!

【फुकुओका शहरको सूचना】

फुकुओका शहरबाट, “फुकुओका शहर राष्ट्रिय स्वास्थ्य बिमा” सम्बन्धि सूचना छ।

जापानमा, बिरामी पर्दा वा चोट लागेमा, कम खर्चमा निश्चिन्त भएर उपचार सेवा प्राप्त गर्नका लागि, सबै व्यक्तिहरूलाई सार्वजनिक स्वास्थ्य बिमा प्रणालीमा सामेल हुने व्यवस्था गरिएको छ। ३ महिनाभन्दा बढी समयसम्म जापानमा बस्न अनुमति प्राप्त गरेका व्यक्तिहरूले, कम्पनीको स्वास्थ्य बिमा नभएका हकमा, राष्ट्रिय स्वास्थ्य बिमा लिनु अनिवार्य छ। यो बिमा लिन, तपाईं बसोबास गरिरहनु भएको क्षेत्रको वार्ड कार्यालयमा गएर प्रक्रिया पूरा गर्नु पर्छ।

फुकुओका शहरको राष्ट्रिय स्वास्थ्य बिमा लिनुभएको व्यक्तिले बिमा शुल्क तिर्नु पर्छ। बिमा शुल्क तपाईंहरूको स्वास्थ्य उपचार खर्चका लागि महत्त्वपूर्ण स्रोत हो। २०२४ अप्रिलदेखि २०२५ मार्चसम्मको बिमा शुल्क, गत वर्षको आम्दानी लगायतका आधारमा जुन महिनामा निर्धारण गरिएको छ।

राष्ट्रिय स्वास्थ्य बिमा लिने व्यक्तिहरूलाई, जुन महिनाको मध्यमा नीलो रंगको खाममा तिर्नुपर्ने सम्बन्धि सूचना पठाइएको छ, कृपया जाँच गर्नुहोस्। खामभित्रका कागजातमा लेखिएको बिमा शुल्कको रकम जाँच गरेर, तोकिएको म्याद भित्र बिमा शुल्क तिर्नुहोस्। यदि बिमा शुल्क समयमै तिरेन भने, तपाईंको सम्पत्ति छानबिन गरेर, बचत वा तलब जफत गर्न सकिन्छ, त्यसैले ध्यान दिनुहोस्। 

यदि कुनै कुरा बुझ्न गाह्रो भएमा, फोन मार्फत १८ वटा भाषाहरुमा परामर्श लिन सकिन्छ। फोन नम्बर ०९२-७५३-६११३ हो। यो नम्बरमा फोन गर्दा पहिले दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ। आफू बस्ने वार्ड अनि तपाईंले बुझ्न चाहेको कुरा भन्नुहोला।

【फुकुओका सिटी इन्टरनेशनल फाउण्डेसनको सूचना】

“विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४” आयोजना

फुकुओका सिटी इन्टरनेशनल फाउण्डेनमा, NPOफुकुओका कम्युनिटी लिभिङ टुगेदर रपब्लिक इन्टरेस्ट इन्कर्पोरेटेड फाउन्डेसन फुकुओका YWCA सँगको सहकार्यमा, "विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४" आयोजना हुने भएको छ।

यस परामर्श कार्यक्रममा, विदेशी मूलका बालबालिकाहरूका लागि प्रिस्कूलरदेखि हाई स्कूल सम्मको शैक्षिक परामर्श दिईन्छ। यस अतिरिक्त, अध्यागमन ब्यूरो र प्रशासनिक कानूनी सल्लाहकारहरूद्वारा बसोबास सम्बन्धी परामर्श पनि लिन सक्नुहुन्छ।

परामर्श नि:शुल्क हो। जापानी, अंग्रेजी र चाइनिज भाषाहरुमा परामर्श उपलब्ध छन्।

कार्यक्रम हुने दिन: जुलाई १३, शनिबार दिउँसो १:०० देखि बेलुकी ५:०० बजेसम्म

आयोजना स्थल: हाकाता वार्डको तेन्यामाचीमा स्थित फुकुओका सिटी इन्टरनेशनल सेन्टर

सोधपुछको लागि, कृपया फुकुओका सिटी इन्टरनेशनल फाउण्डेसनमा सम्पर्क गर्नुहोस्। 

फोन मार्फत् वा फाउण्डेसनको वेबसाइटमा राखिएको सोधपुछ फारम मार्फत् सम्पर्क गर्न सक्नुहुन्छ। फोन नम्बर, ०९२-२६२-१७४४ हो।