Life in Fukuoka "Nepali"

【Christmas Event र Light Up】

जापानमा, हेलोवीन सकिएसँगै शहरहरुमा क्रिसमसको माहोल बनेको छ।

 

<तपाईंहरु क्रिसमसमा के गर्नुहुन्छ? >

 तपाईंहरु क्रिसमस मनाउनुहुन्छ कि हुँदैन? आजकल, क्रिश्चियन धर्मसँग सम्बन्धित नभएका घरपरिवारमा पनि क्रिसमस मनाउने चलन छ। चाडपर्व एउटा उत्साह हो जसलाई धर्म भन्दा पनि संस्कार, संस्कृती, सौहार्दता अनि नितान्त खुशीको अभिब्यक्तिका रुपमा लिन जरुरी छ जस्तो लाग्छ।

क्रिसमसका अवसरमा नेपालमा खास गरि, काठमाडौंको ठमेल, दरबारमार्गका साथै ललितपुर, भक्तपुर, पोखरा र उपत्यका बाहिरका ठूला पर्यटकीय शहरहरुमा क्रिसमस ईभ कार्यक्रम आयोजना गर्ने र विविध सांस्कृतिक कार्यक्रम गरी पर्व मनाउने चलन छ। प्रायःजसो साथीहरुसँग बाहिर घुम्ने र खानपिन गर्ने अवसरको रुपमा क्रिसमस मनाउने गरेको देखिन्छ। क्रिसमसको ठूलो आकर्षण भनेको सान्टा क्लस हुन्, उनले सबैलाई उपहार दिने र खुशी बाँड्नेछन् भन्ने विश्वास छ । आजकल धेरैजसो शिशुस्याहार र विद्यालयहरुमा क्रिसमसको अवसरमा सान्टा क्लसको भेषमा केटाकेटीहरुलाई उपहार दिई रमाइलो गर्छन्। प्रायःजसो देशहरुमा क्रिसमसको समयमा, फ्राइड कुखुराको मासु र रोष्ट गरिएका कुखुराको मासु खाने परम्परा छ। सबैतिर झिलिमिली बत्तीमा सजिएका क्रिसमस ट्री र सान्टा क्लसको राता लुगाको पहिरनमा अधिकांशले 'हेप्पी क्रिसमस डे' भन्दै शुभकामना साटासाट गरेको देख्न पाईन्छ।

 

＜Christmas Illumination＞

 तेन्जिन र हाकाता शहरहरूमा, व्यावसायिक पसलहरु तथा निजी घरहरुको छाना आदि, ठूलासाना  विभिन्न बत्तीहरूले सजाइएको हुन्छ।

एउटै ठाउँमा पनि, गत वर्षको भन्दा फरक तरिकाले सजाएको हुन सक्ने भएकोले, विभिन्न झिलिमिलीहरूको आनन्द लिन सक्नुहुन्छ।

 

 

＜फुकुओका शहर नजिकको Illumination स्थलहरूको बारे＞

विदेशीहरूलाई "उपयोगी" जानकारी प्रदान गर्ने Fukuoka Now मा,  फुकुओका शहर नजिकको Illumination स्थलहरूको सूचीबद्ध विशेष लेख छ ।

फोटो सहित बुझ्न सजिलो हुने गरि तयार गरिएको यो लेख एकपटक हेरेर, आफ्नो परिवार, साथीभाई वा प्रेमीसँग घुमघाम गर्दा कसो होला?

 

 

＜क्रिसमस मार्केट＞

फुकुओका क्रिसमस मार्केट, हरेक वर्ष नोभेम्बरदेखि डिसेम्बरको क्रिसमसको दिनसम्म, हाकाता र तेन्जिनमा एकै साथ आयोजना हुँदै आईरहनु, फुकुओका शहरको हिउँदको एक किसिमको परम्परा हो।

जापानको सबैभन्दा ठूलो क्रिसमस मार्केटमा, खुला परिसरमा धेरै स्टलहरू पंक्तिबद्ध राखिएका हुन्छन्, जहाँ क्रिसमसको झिलिमिली बत्ती वा सजावटका साथसाथै, तातो वाइन, तातो चकलेट आदि जस्ता तातो पेय र स्वादिष्ट खानाको मजा लिने महोत्सव हो।

यस वर्ष, “Hakata Ekimae Hiroba” र तेन्जिनको “Fukuoka Shiyakushomae Fureai Hiroba” मा क्रिसमस मार्केट आयोजना गरिनेछI

यसका साथै गत वर्षदेखि नाकासु क्षेत्रलाई ‘नाकासु किबोउ नो हिकारी’ भनेर, बेलुकी ५ बजेदेखि मध्यरात १२ बजेसम्म सडक छेउका रुखहरूमा बत्ति बालि झिलिमिलीको स्थल बनाईएको छ।

 

तपाईंहरु पनि अवश्य यस झिलिमिलीको आनन्द लिनुहोला।

【कोसमस फूल】

जीवनयापन गर्न आरामदायक यस शरद ऋतुमा, शहरमा मात्र नभई प्रकृतिलाई छुने पर्यटकीय स्थलहरुको पनि आनन्द लिन सक्नुहुन्छ। फुकुओकाको प्रत्येक क्षेत्रहरुमा शरद ऋतुका फूलहरू र कोसमसहरू फुलिरहेका छन्।

कोसमस फूल, गुलाबी र सेतो रंग बाहेक गाढा रातो, पहेंलो र सुन्तला रङहरूका साथ हरेक बर्ष रङ्गीन बन्दै गईरहेको छ। यदि घमाइलो र राम्रो हावायुक्त ठाउँ भएमा, कम माटोमा पनि यो फूल फूल्ने गरेको देखिन्छ।

फुकुओका शहरबाट पुग्न सकिने कोसमस फूलका लागि केहि प्रसिद्ध स्थलहरु भन्न गईरहेकीछु।

ट्रेनबाट सजिलै जान सकिने, समुद्री हावाको आनन्द महसुस गर्न सकिने लोकप्रिय घुमघामको स्थल हो, Umino-nakamichi-kaihin-kohen । यस समय ट्युलिप, नेमोफिला, गुलाफ र तोरीको फूल आदि विभिन्न फूलहरू विशाल क्षेत्रमा फुलिरहेका छन्।

अर्को स्थल छ, Fukuoka City Meino-hama बाट ferry मार्फत लगभग १० मिनेटमा पुग्न सकिने रिसोर्ट जस्तो टापु, Nokono-shima । Nokono-shima-island-park  मा चेरी, तोरीको फूल र कोसमस आदि मौसमी फूलहरुको साथसाथै समुद्रको आनन्द एकै साथ लिन सकिने रमणीय स्थलको रूपमा चिनिन्छ।

तपाईंहरु पनि बिदाको दिन आफ्नो परिवार तथा साथीहरुसँग यी पार्कहरुमा घुमघाम गर्न जानुहोला।

 

 

यस पटक फुकुओका सिटी इन्टरनेशनल फाउण्डेसनको सूचना रहेको छ।

【‘अन्तर्राष्ट्रिय विद्यार्थीहरुको लागि आवास- परिवारिक कोठा’ सम्बन्धि आवेदन जानकारी】

फुकुओका शहर क्षेत्र भित्रको विश्वविद्यालय र स्नातकमा भर्ना भएका अन्तर्राष्ट्रिय विद्यार्थीहरुका लागी, अन्तर्राष्ट्रिय विद्यार्थी परिवारिक कोठामा सर्न चाहानेहरुको आवेदन लिईदैछौं।

 

सर्नको लागी विद्यार्थीको योग्यता, फुकुओका सिटी इन्टरनेशनल फाउण्डेसनको गतिविधिहरुमा सक्रिय रूपमा भाग लिन सक्ने र सहयोग गर्न सक्ने हुनुपर्छ।

बस्न पाउने अवधि, बसेको मितिबाट २ बर्ष हो।

यस पटकको आवेदनमा, एक्लै बस्न पनि सम्भव छ।

 

आवेदनको निर्देशनहरु आदि अधिक जानकारीको लागी, कृपया "फुकुओका सिटी इन्टरनेशनल फाउण्डेसन" को होमपेजमा हेर्न वा ईमेल (dorm@fcif.or.jp) मा सम्पर्क गर्नुहोला।

 

【प्रसाशनिक वकिलद्वारा परामर्श सम्बन्धि】

आवासको स्थिति र आवास अवधिको बारेमा, तपाईंले केही कुरा नबुझेको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ।

हरेक महिनाको दोस्रो आइतबारको दिउँसो १ बजेदेखि ४ बजेसम्म, प्रसाशनिक वकिलद्वारा तपाईंको प्रश्न र परामर्शको उचित सल्लाह दिनुहुन्छ। काउन्टर दिउँसो ३:३० बजेसम्म खुल्ला रहनेछ।

 

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैनI

अन्य भाषाहरुमा परामर्श गर्न चाहने महानुभावहरुले, १ हप्ता अगाडि सम्पर्क गर्नुहोला।

गोपनीयता कडा पालन गर्ने भएकोले ढुक्क भएर परामर्श लिनुहोस्I

 

विस्तृत जानकारीका लागि, फोन नम्बर ०९२-२६२-१७९९ मा सम्पर्क गर्नुहोलाI

सोमबारदेखि शुक्रबार ८:४५ देखि १८:०० सम्म कल स्वीकार गरिन्छ I

 

नयाँ कोरोनाभाइरस संक्रमण रोक्नको लागि, यहाँ आउनुहुँदा सकेसम्म मास्क लगाउन र हात धुनका लागि अनुरोध गर्दछौंI

【ओओजुमोउ क्युउश्यु बास्यो】

के तपाईंले कहिल्यै सुमो रेसलिंग लाइभ हेर्नुभएको छ?

नोभेम्बर १४ देखि २८ सम्म, फुकुओका ईन्टरनेसनल सेन्टरमा ओओजुमोउ क्युउश्यु बास्यो आयोजना हुन गईरहेको छ।

हरेक वर्ष नोभेम्बरमा, फुकुओका शहरमा युकाटा लगाएका सुमो रेस्लरहरू देख्न पाईन्छ, तर पछिल्ला दुई वर्ष नयाँ कोरोनाभाइरसको प्रभावका कारण, खेल रद्द गरिएको थियो।

शहर वरिपरि हिड्ने सुमो रेस्लरहरू भर्खरका भए पनि, भविष्यमा प्रसिद्ध हुनेहरुको गन्तिमा धेरै पर्छन्।

समाचार र पत्रपत्रिकामा नाम छापिएका सुमो रेस्लरहरू लोकप्रिय हुनेभएकाले उनीहरू सार्वजनिक रूपमा बाहिर देखा पर्दैनन्।

प्रवेश शुल्कको हकमा, यदि बिहानदेखि लाइनमा बस्नु भयो भने सबैभन्दा सस्तो बुकिंग नभएको सिट प्रति व्यक्ति २००० येनमा पाउन सक्नुहुन्छ।

तामारी भनिने सबैभन्दा राम्रो सिटको शुल्क प्रति व्यक्ति २०,००० येन पर्छ।

भनिन्छ कि, एक पटक तामारीमा बसेर खेल हेर्ने सुमो फ्यानहरुको सपना हुन्छ रे।

करिब दुई वर्षको अन्तरालमा हुन गईरहेको क्युउश्यु बास्यो, निकै रोमाञ्चक होला जस्तो छ नि है।

 

【Autumn National Fire Prevention Campaign】

नोभेम्बर ९ देखि नोभेम्बर १५ सम्म “Autumn National Fire Prevention Campaign”को अवधि होI

शरददेखि हिउँदसम्म, हावा सुक्खा भई आगलागि हुने यो मौसम होI

गत वर्ष, फुकुओका शहरमा २६१ वटा आगलागिको घटनाहरु घटेका थिए।

आगलागिको मुख्य कारणहरू चुरोट, ग्याँस चूलो, स्टोभ आदि हुन्।

 

दाहरणको रूपमा, धुने लुगा र पर्दा, स्टोभमा छोएर आगलागी भएको घटना छI

त्यस्तै, सुतिरहेको बेला सिरक वा ओछ्यान स्टोभमा छोएर आगलागी हुन सक्छI

त्यसैले, स्टोभ नजिक ज्वलनशील वस्तु राख्नु अत्यन्त खतराजनक हुन्छ।

स्टोभको स्विच अफ गर्न नबिर्सन सावधान हुनुहोस्I

 

साथै, ग्याँस चूलोको आगोबाट पनि सावधानी अपनाउनु जरुरी छ।

जाडो बढ्दै आए पछि, नाबे आदि, ग्याँस चूलोको धेरै प्रयोग हुन्छI यसको प्रयोग गर्दा, कहिल्यै त्यतिकै छोडेर नराख्नुहोस्।

 

त्यस्तै, चुरोट पनि आगोको एक कारण हो।

ओछ्यानमा बसेर कहिल्यै चुरोट नपिउनुहोस्, चुरोटको ठुत्ताहरु जम्मा गरि नराख्नुहोस् अनि चुरोटको आगोलाई पूर्ण रुपमा निभाउने गर्नुहोस्I

 

आफ्नो घरको फायर अलार्म र आगो निभाउने उपकरणहरूको मिति सकिएको छ-छैन नियमित रूपमा जाँच गराउने गरौँ।

हामी प्रत्येकले, हरेक दिन आगलागी हुनबाट रोक्न प्रयास गरौं।

 

【iina iiha दिवस अर्थात् राम्रो दाँत दिवस】

नोभेम्बर ७ र ८ “iina iiha दिवस अर्थात् राम्रो दाँत दिवस” हो।

राम्ररी चपाएर, मिठो खाएर, सधैं स्वस्थ भई बाँच्नको लागि दैनिक रुपमा आफ्नो दाँतको ख्याल राख्नु आवश्यक छ।

 

मुख स्वस्थ राख्नको लागी, दैनिक रुपमा दाँत माझि मुख सफा राख्नु जरुरी छ। दाँत ब्रश गर्नुको बाहेक, नियमित रुपमा दाँतको परिक्षण गर्दा, दाँतमा किरा लाग्ने तथा गिजा सम्बन्धि रोगको पनि जाँच गराउने गरौं।

 

फुकुओका शहरमा, उत्कृष्ट दन्त चिकित्सा परिक्षणहरु उपलब्ध छन्।

अप्रिल १ देखि अर्को बर्षको मार्च ३१ सम्म ३५, ४०, ५०, ६० बर्षमा लाग्ने फुकुओका बासिन्दाहरुले ७०० येनमा र ७० बर्षमा लाग्ने फुकुओका बासिन्दाहरुले  नि: शुल्क दाँत र गिजाको परिक्षण गराउन सक्नुहुन्छ।

यस अतिरिक्त, गर्भावस्थाको समयमा एक पटक र बच्चा जन्मे पछि एक वर्षभित्रमा एक पटक नि: शुल्क दन्त परिक्षण गराउन सक्नुहुन्छ।

　　

दाँतको जाँच गर्दा, दाँत माझ्ने तरिका र ब्रशले नछोएको तिर जाँच्न लगाई, ब्रशले नछुने भागहरु प्रति ध्यान दिई दाँत माझ्ने गरौं।

 

यसै मौकामा, आफ्नो खानपान र मुखको हेरचाहलाई यसो विचार गरि, स्वस्थ दाँत र मुखको बारेमा सोच्ने होइन त?

【अपार्टमेन्टको वार्षिकोत्सव】

नोभेम्बर ६ अपार्टमेन्टको वार्षिकोत्सव हो। यसको कारण, सन् १९१० मा, यस दिन, टोकियोको उएनोमा जापानको पहिलो काठको अपार्टमेन्ट पूरा भएको थियो।

त्यस अपार्टमेन्टको नाम "उएनो क्लब" राखिएको थियो। पश्चिमी शैलीमा बनेको ५ तलाको यस रेंटल अपार्टमेन्टमा ७० वटा कोठाहरु थिए। उएनो पार्कको नजिकै बनेको यस अपार्टमेन्टमा, वाशरूम, बाथरुम, र टेलिफोन सेवा साझा थियो र बाहालमा बस्ने व्यक्तिले नुहाउँदा खेरि लागेको वास्तविक शुल्क तिर्थे।

वास्तवमा यस अपार्टमेन्टमा बस्ने मानिसहरुको पेशा मुख्यतयाः, निजामती कर्मचारी, कार्यालय कर्मचारी र शिक्षक भई, सबै विवाहित थिए। त्यहाँ जापानीहरु मात्र नभई रूसी र फ्रान्सेली विदेशीहरु पनि बस्ने गरेको देखिन्छ।

काठको अपार्टमेन्ट भएकोले उचित भाडामा बस्न त सकिन्छ, तर हल्ला चाहिं धेरै हुन्छ।

ढोका खोल्दाबन्द गर्दा र कोठाभित्र वरपर हिड्दा आउने आवाज, त्यस्तै, कुराकानी गर्दाको आवाजप्रति ध्यान दिऔं। आफू बाहेक अरू मानिसहरु पनि त्यहाँ बस्छन् भन्ने कुरा मनन गरि बसौं।

जापानमा otagai-sama भन्ने शब्द छ। यसको अर्थ, अर्को व्यक्ति र तपाईं एकै परिस्थितिमा हुनुहुन्छ । यदि तपाईं छिमेकिको आवाज सुन्न सक्नुहुन्छ भने, तपाईं पनि आफ्नो आवाज छिमेकिलाई सुनाउँदै हुनुहुन्छ । कृपया शिष्टाचारको पालना गरि जापानमा आफ्नो जीवनयापनको आनन्द लिनुहोस्।

 

【नयाँ कोरोना भाइरस विरुद्धको खोपको सूचना】

फुकुओका शहरमा नयाँ कोरोना भाइरस विरुद्धको खोपका लागि ईच्छुक सम्पूर्ण व्यक्तिहरुले ढुक्क भएर खोप लगाउन सुनिश्चितका लागि काम भईरहेको छ।

 

खोप को लागी योग्य १२ वर्षका वा सोभन्दा माथिका फुकुओका शहरको नागरिकहरु सबैलाई , फुकुओका शहरले खोप कुपन, प्रारम्भिक चिकित्सा जाँच फाराम आदि जस्ता कागजपत्रहरु पठाइएको छ।

खोप लिन चाहाने व्यक्तिहरुमध्ये यदि अझै सम्म खोप लिनु भएको छैन भने, खोप लगाउन सकिने स्थानहरु आदिको बारेमा बुझ्न फुकुओका शहरको होमपेजमा हेर्नुहोला।

 

खोप निःशुल्क हो।

खोपको संख्या २ पटक हो, ३ हप्तादेखि ४ हप्ताको अन्तरालमा दिईन्छ।

खोप लगाउँदा खेरि, खोप कुपनको कागजमा टाँसीदिने सील, तपाईंले खोप लगाउन सकिएको हो भनेर देखाउने महत्वपूर्ण कागज हो।

यसलाई  नहराउने गरि राख्नुहोला।

 

खोप सम्बन्धि परामर्श  लिन  र बुकिंग गर्न सकिने फोन नम्बर रहेको छ, ०९२-२६०-८४०५

हरेक दिन बिहान ८ :३० देखि बेलुका ५ :३० बजेसम्म कल स्वीकार गरिन्छ।

अंग्रेजी, चाइनिज, कोरियाली, नेपाली आदि ७ वटा विदेशी भाषाहरूमा यो सेवा उपलब्ध छ।

 

【नयाँ कोरोना भाइरस र इन्फ्लुएन्जा रोकथाम】

प्रत्येक वर्ष जाडो शुरु भयो कि, इन्फ्लूएन्जाको संक्रमण देखा पर्दछ।

नयाँ कोरोना भाइरससँगै दुवै रोगहरू एकै समयमा हुने सम्भावना हुन सक्छ।

 

यसकारण, अहिले, नयाँ कोरोना भाइरसको रोकथामबारे सावधान सबैजनाले, हात धुने र मास्क लगाउने, कुनै व्यक्तिको सम्पर्कमा आउँदा पर्याप्त दूरी बनाएर बस्ने जस्ता अभ्यासहरु, इन्फ्लूएन्जा हुनबाट बच्नको लागि पनि जारी राख्ने गर्नुहोस्I

 

यदि इन्फ्लूएन्जा लागि हालेमा, गम्भीर बिरामी हुनबाट बच्नका लागि पनि, इन्फ्लूएन्जाको खोप लगाउन सल्लाह दिन्छौंI

साथै, नयाँ कोरोना भाइरस र इन्फ्लूएन्जा दुबैको खोप लिने अवस्थामा, १३ दिन वा सो भन्दा बढी दिनको अन्तरालमा लगाउनुहोलाI

【Halloween】

आउने आइतबार ३१ अक्टोबर Halloween हो!

 

＜हेलोवीन को उत्पत्ति＞

Halloween प्राचीन Celts मा उत्पन्न भएको निजी घटनाहरुमध्ये एक हो। त्यो बेला हरेक बर्ष अक्टोबर ३१ को रातमा दुष्ट आत्माहरु र बोक्सीहरु देखा पर्छन् भन्ने विश्वास थियो। त्यसैले, दुष्ट आत्माहरु र बोक्सीहरुबाट आफूलाई बचाउनको लागी मुकुट लगाउने र ताबीजलाई जलाएर आगो बाल्ने गर्थे रे । आजकल, यसको धार्मिक अर्थ लुप्त हुँदै गईरहेको छ। बच्चाहरुले आत्मा र भूतको भेषमा मिठाई पाउने र भयको आनन्द लिने इभेन्टको रुपमा धेरै देशहरुमा Halloween लोकप्रिय छ।

नेपालमा खासै Halloween मनाउने चलन छैन तर आजकल पश्चिमी संस्कृतिको प्रभावका कारण मानिसहरु यसप्रति आकर्षित हुँदै गईरहेको पाईन्छ।

 

＜जापानमा Halloween＞

जापानको विभिन्न भागहरुमा Halloween इभेन्ट आयोजना गर्ने, त्यस्तै साथीहरु मिलेर पार्टी गर्ने गर्छन्। Halloween इभेन्ट  र पार्टीमा सहभागीताको लागि इभेन्ट उपयुक्त पोशाक हुनु पनि जरूरी छ ।

पौराणिक बोक्सी र राक्षसहरुको अतिरिक्त, आजकल, फिल्मको विभिन्न पात्रहरूको भेष बदल्ने, विशेष गरी जापानमा, एनिमेसन र खेल पात्रहरुको भेष  बदल्ने मानिसहरु पनि धेरै छन्। हरेक बर्ष नयाँ विचारहरुको सिर्जना भई Halloween अधिक रोचक बन्दै गईरहेको छ।

 

＜यस वर्षको पहिरन प्रवृत्ति भन्नाले? ＞

यस बर्षको पहिरन प्रवृत्ति के होला ? हाल चलिरहेको एनिमे र फिल्महरुबाट आइडिया लिनु पनि राम्रो होला, त्यस्तै यस बर्ष आयोजित टोक्यो ओलम्पिक र पारालिम्पिकबाट आइडिया लिनु पनि ठिकै होला कि!

साथै, हालका वर्षहरुमा पौराणिक बोक्सी र राक्षसहरुको भेषलाई "वास्तविकता" झल्काउने प्रवृत्ति  आएको देखिन्छ । यदि के गर्ने भनेर सोचमा हुनुहुन्छ भने, बिभिन्न सामानहरु पाईने पसलमा जाँदा कसो होला?

 

< यस बर्ष पनि सान्मिचु (तीन कुरा बन्द) बाट टाढा रही Halloween को आनन्द लिऔं! ＞

गत बर्षबाट निरन्तर, यस बर्ष पनि, नयाँ कोरोनाभाइरसको प्रभावको कारण सान्मिचु (तीन कुरा बन्द) बाट टाढा रही, प्रत्येकले आफ्नै घर वा अनलाइनमार्फत् Halloween को आनन्द लिऔं।

सुपरमार्केट र कन्भिनीयन्स पसलहरुमा, विभिन्न प्रकारको Halloween को बिशेष मिठाईहरु बिक्री मा राखिएका छन्। यस अतिरिक्त, खाना डेलिभरी सेवा पनि गत बर्ष भन्दा धेरै बढेकोले, सुविधाजनक बन्दै आएको छ।

पक्कै पनि यस वर्षको Halloween, अरु बेलाको भन्दा भिन्न तरिकाले, आफ्नो साथीभाई र घरपरिवारसँग मनाउनुहोला है।

【प्रकाशित सामग्रीहरुको सम्पर्कमा आउने, पठन सप्ताह】

शान्त र आरामदायी शरद ऋतु पढ्नको लागी एकदम उपयुक्त मानिन्छ।

सन् १९४७ मा,  अमेरिकाको पठन सप्ताहलाई आधार मानेर, जापानमा पनि पठन सप्ताह शुरू गरिएको थियो। यसको प्रतिक्रिया राम्रो भएकोले अर्को बर्षबाट नोभेम्बर ३ को "सांस्कृतिक दिवस" लाई केन्द्रित गरि, दुई हप्ताको कार्यक्रमको रूपमा  पठन सप्ताह स्थापित भएको थियो। "उल्लू" लाई पठन सप्ताहको प्रतीक चिन्हको रूपमा लिईन्छ।

एक समय, ग्रीकको पौराणिक कथाहरुमा, उल्लूलाई सौन्दर्यको देवी एथेनाको दूत मानिन्थ्यो । उनी शिक्षा, कला, र बुद्धिका प्रमुख देवी थिईन्। उहिलेका ग्रीकहरुले बुद्धिमानी देखिने गोलो आँखा भई राम्रो अनुहार भएको उल्लूलाई बुद्धिको प्रतीकको रुपमा कदर गर्थे।

किताब पसलमा जाने समय नभएका व्यक्तिहरुले, फुकुओका सिटि इलेक्ट्रोनिक पुस्तकालयको प्रयोग गरेर हेर्दा कसो होला ? इन्टरनेटमा दर्ता गरेर, कम्प्यूटर, स्मार्टफोन, वा ट्याब्लेटमा, तपाईं आफूलाई मनपर्ने किताबहरु पढ्न सक्नुहुन्छ। पक्कै पनि यसको प्रयोग गरेर हेर्नु होला है।

 

【साईकल“  चलाउने नियम　सम्बन्धि】

प्रायःजसो दैनिक रुपमा साईकल चलाउँछु भन्ने व्यक्तिहरु धेरै हुनुहुन्छ होला ।

के तपाईंहरुलाई साईकल चलाउने तरिका र नियमको बारेमा थाहा छ?

 

नयाँ कोरोनाभाइरसको प्रभावको कारण, सान्मिचु (तीन कुरा बन्द) बाट टाढा रहन प्रोत्साहन गर्ने साईकललाई, नियम पालन गरि चलाउने गरौँ।

 

जापानमा सैद्धान्तिक रूपमा साईकल, मोटर-बाटोको बायाँ पट्टिबाट चलाउनु पर्छI

सडक-पेटीमा पैदल यात्रीलाई प्राथमिकता दिनुपर्छ। सडक-पेटीबाट चलाउँदा मोटर-बाटो पट्टिको साइड भएर बिस्तारै चलाउनुपर्छ। 

राति नबिर्सिकन लाइट बाल्नुपर्छ।

साईकल सडकमा राखिएको पाईएमा, हटाइने हुनाले, साईकल पार्किंग स्थलमा पार्क गर्नुपर्छ।

दुई जना चढ्ने र समानान्तर रूपमा सँगसँगै साईकल चलाउन निषेध छ।

साथै, साईकलको हकमा पनि मादक पदार्थ सेवन गरी नचलाऔं।

छाता ओढेर चलाउने, मोबाइल फोन वा हेड फोन प्रयोग गरेर साईकल चलाउने गर्दा, दुर्घटनाको खतरा हुने भएकोले यस्ता कार्यहरु नगरौं।

 

यस अतिरिक्त, गत वर्षको अक्टोबरदेखि, फुकुओका शहरमा साईकल चालकहरूले साईकल  बीमामा अनिवार्य सामेल हुनु पर्ने गरिएको छ। साईकल दुर्घटना भयो भने, तपाईंले दुर्घटनामा परेको व्यक्तिलाई धेरै पैसा तिर्नुपर्ने हुन्छ।

तर, यदि तपाईंसँग साइकल बीमा छ भने, उदाहरणका लागि, तपाईं साइकल चलाउँदै गर्दा, यदि कसैलाई चोटपटक लाग्न गएमा, तपाईंको पक्षबाट औषधि उपचारको लागि भुक्तानी गरिनेछ।

हुन सक्ने दुर्घटनाको क्षतिपुर्तीबाट बच्न, साइकल बीमा लिऔं।

अवश्य पनि, ट्राफिक नियमहरूको पालना गर्ने गरौं!

साईकल चलाउँदा हतार नगरी ध्यानपूर्वक चलाउने गरौं।

 

【Share Cycle Service - Charichari को परिचय】

 फुकुओका शहरले Share Cycle Service अर्थात् Charichari (च्यारीच्यारी) शुरु गरेको छ।

अहिले साइकल पोर्टहरु, शहरभित्र ३७० भन्दा बढी छन्, र प्रयोग गर्न सकिने एरिया पनि विस्तार गरिएको छ।

Charichari को app प्रयोग गरी साइकल भाँडामा लिनुहोस् र प्रयोग गरिसकेपछि, गन्तव्यको नजिकको पोर्टमा फिर्ता गर्नुहोस्।

शुल्क, प्रति मिनेट ६ येन हो। जस्तै कि, यदि तपाईं १० मिनेटमा तेन्जिनबाट हाकाता स्टेशनमा पुग्नुभयो भने, तपाईंले ६० येनमा साइकल प्रयोग गर्न सक्नुहुनेछ। नहिच्किचाईकन यसको प्रयोग गरेर हेर्नुहोस्I

 

【किन्मोकुसेई】

सुन्तला रंगको हाँगामा फुल्ने सानो फूल, किन्मोकुसेई। अंग्रेजीमा ओस्मन्थस भनिन्छ भने नेपालीमा चाहि के भनिन्छ थाहा भएन। तपाईंहरुलाई थाहा भएमा पक्कै पनि भन्नु होला। यो फूल हिड्दै टाढाबाट हेर्नु भए पनि यसको मिठो सुगन्ध हावामा फैलिएको पाउनुहुन्छ। यो फूल शरद ऋतुको आभास दिलाउने फूलहरुमध्ये एक हो।

विगतमा जापानमा प्रायःजसो किन्मोकुसेईको कडा सुगन्धको कारण दुर्गन्ध हटाउने हेतुले पम्पिंग शौचालयको नजिक रोप्ने गरिन्थ्यो, अनि टोइलेट डिओडोरेंटको रुपमा पनि यो फूललाई लिईन्थ्यो। यस कारण, परिपक्व पिढीमाझ यस फूलप्रति त्यति राम्रो छवि छैन। 

अर्कोतर्फ, युवा पिढी जसलाई यस्तो याद छैन, उनीहरुले किन्मोकुसेई फूल मनपराउँछन्। 

किन्मोकुसेईको उत्पति स्थान- चीनमा, यसलाई खाद्य पदार्थको रुपमा पनि प्रयोग गर्ने, Sugar pickled वा liqueur बनाएर राख्ने गरिन्छ। त्यस्तै, सुन्दरी भनेर चिनिने योउकिहि पनि किन्मोकुसेईबाट बनेको रक्सि पिउने गर्थिन् रे।

 

【फुकुओका सिटी इन्टरनेशनल फाउण्डेसनको सूचना】

यस पटक फुकुओका सिटी इन्टरनेशनल फाउण्डेसनको सूचना रहेको छ।

 

【”विदेशीहरूका लागि जापानी भाषामा वक्तित्व प्रतियोगिता” सुन्न जानुहुन्न?】

अक्टोबर १६ मा आयोजना हुने "विदेशीहरूका लागि जापानी भाषामा वक्तित्व प्रतियोगिता” मा फुकुओका महानगर क्षेत्रमा रहेका जापानी भाषा कक्षाका विद्यार्थी र जापानी भाषा स्कूलका विद्यार्थीहरूले, फुकुओकामा बसेर महसुस गरेको कुरा वा भविष्यको सपना आदि, स्वतन्त्र रुपले कुनै विषयवस्तुमा जापानी भाषामा वक्तव्य दिनेछन्। प्रतियोगीहरुको दैनिक अध्यनको प्रतिफल सुन्न, कार्यक्रम स्थल वा अनलाईनमा अवश्य आउनुहोला।

सहभागीताको लागि बुकिंग वा रेकर्ड गरिएको फिल्म हेर्नको लागि, फुकुओका सिटी इन्टरनेशनल फाउण्डेसनको होमपेजमा हेर्नुहोला।

 

 

【"अन्तर्राष्ट्रिय विद्यार्थी छात्रावास परिवार कोठा" मा बस्नको लागि आवेदन जानकारी】

फुकुओका शहर क्षेत्र भित्रको विश्वविद्यालय र स्नातकमा भर्ना भएका अन्तर्राष्ट्रिय विद्यार्थीहरुका लागी, अन्तर्राष्ट्रिय विद्यार्थी छात्रावासको परिवारिक कोठामा सर्न चाहानेहरुको आवेदन लिईंदैछ।

सर्नको लागी विद्यार्थीको योग्यता, फुकुओका सिटी इन्टरनेशनल फाउण्डेसनको गतिविधिहरुमा सक्रिय रूपमा भाग लिन सक्ने र सहयोग गर्न सक्ने हुनुपर्छ।

बस्न पाउने अवधि, बसेको मितिबाट २ बर्ष हो। यस पटकको आवेदनमा, एक्लै बस्न पनि सम्भव छ।

आवेदनको निर्देशनहरु आदि अधिक जानकारीको लागी, कृपया "फुकुओका सिटी इन्टरनेशनल फाउण्डेसन" को होमपेजमा हेर्न वा ईमेल (dorm@fcif.or.jp) मा सम्पर्क गर्नुहोला।

 

 

【Mail Magazine को परिचय】

“Fukuoka City International Foundation Mail Magazine” भन्नाले, फुकुओकाको अन्तर्राष्ट्रिय अन्तर्क्रिया, अन्तर्राष्ट्रिय सहयोगको बारेमा, हरेक महिना अंग्रेजी र जापानी भाषामा समाचार दिने Mail Magazine हो।

वेबसाइटबाट सजिलै यस सेवाको लागि आवेदन दिन सक्ने भएकोले, कृपया "fcif" भनि खोजेर प्रयोग गर्नुहोला।

फुकुओका सिटी इन्टरनेशनल फाउण्डेसनको सुचना सम्बन्धित विस्तृत जानकारीका लागि फोन नम्बर ०९२-२६२-१७९९ मा सम्पर्क गर्नुहोलाI

सोमबारदेखि शुक्रबार, बिहान ८：४५ देखि बेलुका १८：०० बजेसम्म काउन्टर खुल्ला रहनेछI

【कफी दिवस】

अक्टोबर १ कफी दिवस थियो। तपाईंहरु दिनमा कति कप कफी पिउनुहुन्छ होला?

जापानमा पहिलो पटक कफी आएको, सन् १६४० को दशकतिर हो। त्यस समयमा नागासाकी शहर सबैभन्दा प्रभावशाली थियो।

बिदेशीहरुलाई प्रतिबन्दित त्यस समयको जापानमा, संसारसँग अन्तरक्रिया गर्नको लागी अनुमति दिइएको Dejima मा नियुक्त एक डच व्यापारीद्वारा कफी ल्याइएको थियो भनिन्छ।

जे होस्, त्यस समयमा, कफी पिउन सक्षमहरु भनेको, उनीहरुसँग सम्पर्कमा आउन सक्ने अधिकारी, व्यापारी, दोभाषे, गेईस्या आदि सिमित व्यक्तिहरु मात्र थिए।

हालका वर्षहरुमा, कफीको स्वास्थ्य समारोह सम्बन्धित संसारभर विभिन्न संगठनहरुद्वारा अनुसन्धानहरु प्रस्तुत गरि, मिडियाको माध्यमबाट कफीलाई विश्वसामु पेश गरिंदैआईरहेको छ। साथै, यस किसिमको जानकारी इन्टरनेटबाट पनि पाउन सकिन्छ।

फुकुओका शहरमा आकर्षक क्याफेहरु धेरै छन्। विश्व च्याम्पियनशिपमा पुरस्कार विजेता Barista पनि छ । यदि रुचि भएमा, एक पटक भ्रमण गरेर हेर्दा कसो होला!

 

【नयाँ कोरोना भाइरस विरुद्धको खोपको सूचना】

फुकुओका शहरले फुकुओका शहरमा आवासीय कार्ड प्राप्त गर्नुभएका १२ वर्षका वा सोभन्दा माथिका व्यक्तिहरुलाई नयाँ कोरोना भाइरस विरुद्धको खोपको सूचना पठाइएको छl

खोप कुपन, प्रारम्भिक चिकित्सा जाँच फाराम आदि जस्ता कागजपत्रहरु पठाइएको हुनाले जाँच गर्नुहोलाl

फुकुओका शहरमा बसोबास गर्दैहुनुभए पनि अहिलेसम्म प्राप्त गर्नुभएको छैन भने, कार्यक्रमको अन्त्यमा दिइने फोन नम्बरमा सम्पर्क गर्नुहोस्।

अहिले बस्दै गर्नुभएको ठेगाना यदि आवासीय कार्डमा भन्दा फरक भएका व्यक्तिहरुले, सर्वप्रथम वार्ड अफिसमा ठेगाना परिवर्तनको प्रकिया शुरु गर्नका लागि अनुरोध गर्दछौं।

सूचना प्राप्त गर्नुभएपछि, बुकिंग गरेर खोप केन्द्रमा खोप लगाउन सक्नुहुन्छ।

खोपको संख्या २ पटक हो, ३ हप्तादेखि ४ हप्ताको अन्तरालमा दिईन्छ।

खोप दिने स्थानहरु, स्थानीय क्लिनिक, प्रत्येक वार्डको सामूहिक खोप केन्द्र, र च्यूओउ फुतोउ क्रूज़ सेन्टर हुन्।

तेन्जिनबाट नि:शुल्क शटल बसबाट च्यूओउ फुतोउ क्रूज़ सेन्टरमा जान सक्नुहुन्छ।

साथै फुकुओका सिमीन् ब्योउइन्मा राती १०:०० देखि भोलिपल्ट बिहान ८:०० सम्म मध्यरातमा खोप लगाउन सकिन्छ।

 

खोप लिन इच्छुक व्यक्तिहरुले कृपया अग्रिम बुकिंग गर्नुहोस्।

बुकिंग साइटबाट एकै समयमा दोस्रो पटकको खोपको लागि पनि बुकिंग गर्नुहोस्।

साइटबाट बुकिंग गर्न गाह्रो भएमा, फोन मार्फत पनि बुकिंग गर्न सक्नुहुन्छ।

बुकिंगका लागि खोप कुपन नम्बरको आवश्यक पर्छ।

 

खोपको दिनमा; खोप कुपन, प्रारम्भिक चिकित्सा जाँच फाराम एक प्रति र पहिचान खुल्ने कागजातको आवश्यक पर्दछ।

खोप कुपन टाँस्न मिल्ने सीलको रुपमा छ। तर सील नउप्काइकन सील सहितको कागज खोप केन्द्रमा लिएर जानुहोस्।

१ पटकको खोपमा १ प्रति प्रारम्भिक चिकित्सा जाँच फाराम प्रयोग गरिन्छ। कृपया खोप निर्देशिका पढेर, अग्रिम रुपमा भरेर लैजानुहोस्।

कृपया पाखुरामा खोप लगाउन सजिलो हुने किसिमका पहिरन लगाउनुहोस्।

मास्क पक्कै पनि लगाउनुहोस्।

तयार गरिएको खोप सोही दिन प्रयोग गर्नुपर्छ।

त्यसैले शारीरिक अवस्था कमजोर भएको बेला बाहेक, सो दिनमा रद्द नगरिदिन हुन अनुरोध गर्दछौं।

खोप लगाउँदा खेरि, खोप कुपनको कागजमा सील टाँसीदिन्छ।

यो खोप लगाउन सकिएको हो भनेर देखाउने महत्वपूर्ण कागज भएकोले नहराउने गरि राख्नुहोला।

 

खोप लिन सकिने चिकित्सा संस्थानहरू आदिको, ताजा जानकारीहरुका लागि फुकुओका शहरको होमपेज हेर्नुहोला।

खोप सम्बन्धि परामर्श लिन सकिने फोन नम्बर रहेको छ, ०९२-२६०-८४०५

हरेक दिन बिहान ८ :३० देखि बेलुका ५ :३० बजेसम्म कल स्वीकार गरिन्छ।

अंग्रेजी, चाइनिज, कोरियाली आदि ७ वटा विदेशी भाषाहरूमा यो सेवा उपलब्ध छ।

 

साथै, खोप निःशुल्क हो। पैसा माग्ने, फोन वा ईमेलबाट व्यक्तिगत विवरण सोध्ने जस्ता गतिविधिहरु पाईएको हुनाले सावधान रहनुहोस्।

【च्याउको किसिम】

शरद ऋतुमा विभिन्न प्रकारका मौसमी खानाहरु पाईन्छन्, तर बिर्सनै नहुने मध्येमा एक हो, च्याउ।

तुलनात्मक रुपमा च्याउलाई मासु र माछाको जति उच्च मानिँदैन, तर वास्तवमा यो एक उत्तम खाना हो।

Shiitake, Shimeji, Maitake, Eringi, Enoki आदि विभिन्न किसिमका च्याउहरु छन्। तर शरद ऋतुको स्वादको राजा भनेर Matsutake लाई मानिन्छ। यसको बास्ना अति सुगन्धित र स्वादिलो हुन्छ, साथै यो च्याउ उच्च श्रेणीको खानाको रूपमा बिक्रि गरिन्छ।

 

धेरै जापानीहरु Matsutake च्याउ मन पराउँछन्, तर यसको आफ्नै अलग किसिमको बास्ना हुने भएकोले विदेशी पाहुनाहरुको लागी उपयुक्त नहोला कि भनेर सोच्नेहरु पनि छन्।

लगभग सबैजसो च्याउहरुमा पाईने सामान्य कुरा भनेको यिनीहरुमा कम क्यालोरी भई फाइबर र भिटामिन D प्रशस्त मात्रामा हुनु हो। डाईटिंग गरिरहनु भएका वा कब्जियत भएका व्यक्तिहरुले च्याउलाई आफ्नो भोजनमा संलग्न गराउनु लाभदायक हुन्छ।

अब यसो विचार गरि हेर्दा, के च्याउ तरकारी हो त?

पक्कै पनि होइन, वास्तवमा च्याउ एक प्रकारको ढुसी हो। प्रकृतिमा विभिन्न किसिमका च्याउहरु छन्, जसको संख्या १०,००० भन्दा बढी छ भनिन्छ।

 

आज यहाँ नाम लिएका केही च्याउहरु तपाईंहरुले पनि खानुभएको छ नै होला। यदि खानु भएको छैन भए एकपटक चाखेर हेर्दा कस्तो होला!

 

【क्षयरोग रोकथाम सप्ताहको बारेमा】

सेप्टेम्बर २४ देखि सेप्टेम्बर ३० सम्म क्षयरोग रोकथाम सप्ताह हो।

क्षयरोग एक यस्तो रोग हो, जसमा क्षयरोग ब्याक्टेरियाको कारण मुख्यतया फोक्सोमा जलन हुन्छ।

यो एक सरुवा रोग हो।

२०२०मा, फुकुओका शहरमा १४९ नयाँ क्षयरोग बिरामीहरु पाईएका छन्।

 

क्षयरोगका लक्षणहरूमा खोकी, खकार, ज्वरो, खकारमा रगत, छाती दुख्ने, अस्वस्थता, राती पसिना, र तौल घट्नु आदि समावेश छन्। शुरुका लक्षणहरू रुघाको जस्तै देखिन्छन्।

"खोकी २ हप्ता भन्दा बढि रहेमा", "खकार निस्केमा", "शरीर गलेमा", "अचानक तौल घटेमा" आदि केहि लक्षणहरु देखा परेमा, तुरुन्तै चिकित्सालयमा परामर्श लिनुहोस्।

प्रारम्भिक पहिचान र उपचारले रोगलाई गम्भीर हुनबाट बचाउने मात्र नभई, परिवारका सदस्य, साथीभाई र कार्यस्थल आदिमा संक्रमण रोकथाम गर्न पनि महत्त्वपूर्ण भूमिका खेल्छ।

 

क्षयरोग, सँधै संक्रमित भएको कारणले मात्र विकसित हुँदैन।

यदि शरीरको प्रतिरोधात्मक क्षमताले क्षयरोग ब्याक्टेरियालाई नियन्त्रण गर्न सकेन भने,

यो समयसँगै बढ्न र विकास हुन सक्छ।

 

क्षयरोग लागि हाल्यो भने पनि, डाक्टरको निर्देशन अनुसार, हरेक दिन उचित औषधी सेवन गरी यसबाट छुटकारा पाउन सक्नुहुन्छ।

 

संक्रमण र रोग रोक्नको लागि पर्याप्त निद्रा, सन्तुलित आहार, मध्यम व्यायाम, आदि दैनिक स्वास्थ्य हेरचाह प्रभावकारी हुन्छ।

 

फुकुओका शहरमा, Fukuoka City Medical Interpreting Call Center छ, त्यहाँ अस्पताल खोज्नको लागि फोन मार्फत सल्लाह लिन सक्नुहुन्छ।

२४ घण्टा, हरेक दिन यो सेवा प्रयोग गर्न सक्नुहुन्छ।

फोन नम्बर रहेको छ, ०९२-७३३-५४२९, फेरी एकपटक ०९२-७३३-५४२९ । २० भाषाहरुमा यो सेवा उपलब्ध गरिएको छ।