ブログ

ポッドキャスト

ポッドキャスト RSS

2024.07.18[Thu] 09:00

कार्यक्रम तथा मनोरन्जन(イベント・娯楽)

【दोयोनो उसिनो हि】

जापानमा "दोयोनो उसिनो हि" भनेर चिनिने "मौसमको परिवर्तनको दिन" मा उनागी खाने परम्परा छ।

वर्षाको मौसमको अन्त्य पछि चरम गर्मीको मौसम सुरु हुने यस समयमा, शरीरको हेरचाह गर्न र शारीरिक शक्ति बढाउनका लागि, उनागी उत्तम मानिन्छ। यसले थकान हटाउने र भोक बढाउने प्रभावकारी काम गर्छ। यसलाई खाने सबैभन्दा सामान्य तरिका भनेको सोया सस र चिनी मिसाइएको तारे हालेर पोल्नु वा यसलाई सोझै कोइलामा पोलेर ''शिरायाकी'' गरेर खानु हो।

उनागीबाहेक, उसिनो हिको दिनमा "उ(う)" अक्षरले सुरु हुने खानेकुराहरु खानु पनि शुभ मानिन्छ, जस्तै "उडोन", "उमेबोशी", "उरी" (काँक्रो, खरबूजा) आदि । यस वर्ष, जुलाई २४ र अगस्ट ५ मा ''दोयोनो उसिनो हि'' पर्छ।

गर्मीको यस मौसममा पौष्टिक र स्वादिष्ट खानेकुरा खाएर, स्वस्थ र तन्दुरुस्त रहौं!

 

 

फुकुओका शहरको सूचना

“Fukuoka City Official Tourist Guide” सम्बन्धि

यसपटक Fukuoka City Official Tourist Guide” सम्बन्धि जानकारी रहेको छ।

यस वेबसाइटमा, पर्यटकीय सुविधाहरू, कार्यक्रमहरू, पर्यटकीय स्थलहरू, स्वादिष्ट खाना आदि जस्ता जानकारीहरु ४ वटा भाषाहरू (अंग्रेजी, कोरियाली, परम्परागत चाइनिज, र सरलीकृत चाइनिज) मा बुझ्न सजिलो हुने गरि प्रदान गदै आईरहेको छ। 

स्थानीय खानेकुरा, इतिहास-संस्कृति, प्रकृति-आउटडोर आदि विषयहरुको आधारमा खोज्न सजिलो अनि, भ्रमण गर्न चाहानु भएको क्षेत्रको पर्यटकीय जानकारीहरू सजिलै प्राप्त सक्नुहुन्छ।

यो गाइड पर्यटकहरुलाई मात्र नभई, फुकुओकामा बसोबास गर्नुहुनेहरुका लागी पनि, फुकुओकाको बारेमा अझै धेरै जानेर मनोरञ्जन लिन सकिने उपयोगी जानकारीहरुले भरिपूर्ण छ।

कृपया Fukuoka City Official Tourist Guide” मा खोजि हेर्नुहोला।

 

 

“फुकुओका सिटी चाइल्डकेयर एक्सचेन्ज समय”

अर्को, फुकुओका सिटी इन्टरनेशनल फाउण्डेसनको सूचना रहेको छ।

तपाईँहरु आफ्ना बच्चासँगै रमाइलो समय बिताउन मिल्ने ठाउँमा गएर हेर्न चाहनुहुन्छ भने, हाकाता वार्डमा रहेको नाराया सामुदायिक केन्द्रमा, महिनामा एक पटक बच्चा हुर्काउने सम्बन्धि आदानप्रदान सलोन सुरु भएको छ।

हरेक महिनाको चौथो मंगलबार, अभिभावकहरु आफ्ना बच्चाहरूसँगै रमाइलो समय बिताउन सकिने, शिशु तथा बालबालिका अन्तरक्रिया कक्षा संचालन भईरहेको छ। जुलाईमा यो कक्षा २३ तारिखमा सञ्चालन हुनेछ। समय बिहान १०:३० देखि ११:३० सम्म हो। जुलाई महिनाको विषय "अभिभावक तथा शिशु व्यायाम" हो। बाल स्याहार विशेषज्ञको उपस्थिति हुने यस दिनमा, अभिभावक र बच्चाहरूले नाचजस्ता गतिविधिहरूमा सहभागी भई रमाइलो समय बिताउन सक्छन्।

आवेदन विधि र विस्तृत जानकारीको लागि, कृपया फुकुओकासिटीइन्टरनेशनलफाउण्डेसनको होमपेज वा फेसबुकमा हेर्नुहोस्।

2024.07.11[Thu] 09:00

अन्य(その他)

【समुद्री तट】

अब चाँडै नै गर्मीको चरम समय आउन लागेको छ! यसै मौका पारेर, फुकुओका शहर भित्रका सिफारिस गरिएका समुद्री तटहरूको जानकारी लिएर आएकी छु।

पहिलो छ, सावारा वार्डमा अवस्थित Momochi Seaside Park

सुरक्षित र आरामदायक समुद्रीतटको रुपमा रहेको यस समुद्रमा पौडी खेल्नुका साथै समुद्री खेलहरू पनि खेल्न सक्नुहुन्छ। समुद्रीतटको वरपरको क्षेत्रमा रेस्टुरेन्ट र पसलहरू पनि छन्। जिग्योहामा क्षेत्रमा सांगीतिक महोत्सव जस्ता कार्यक्रम पनि आयोजना गरिएको छ।

दोस्रो, हिगाशी वार्डमा रहेको शिखानोशिमा समुद्रीतट। 

शिखानोशिमा जमिनसँग जोडिएको हुनाले कारमा जानुभयो भने स्थानीय दृश्यको आनन्द लिन सक्नुहुन्छ। त्यसैले ड्राइभ कोर्समा जान पनि उत्तम हुन्छ। यहाँको समुद्र अत्यन्त पारदर्शी हुने भएकोले, सेतो बलौटे समुद्र तट सुन्दर देखिन्छ। उत्तरी छेउमा [शिरोसे] नामको फुकुओका शहरको एक मात्र डाइभिङ स्पट रहको छ, त्यहाँबाट देखिने दृश्य पनि अत्यन्तै मनमोहक छ। 

त्यस्तै अर्को छ, निशी वार्डमा रहेको नोकोनोशिमा क्याम्प समुद्रीतट।

प्रकृतिले भरिपूर्ण यस टापुमा पाल्म रूखहरूले घेरिएको समुद्री तटमा अवस्थित, क्याम्पिङ क्षेत्रमा विश्रामगृह, होटेल, रेस्टुरेन्टर पसलहरू स्थापित छन्। सोही टापुमा नोकोनोशिमा आइल्याण्ड पार्क पनि छ, जहाँ आगन्तुकहरूले मौसमी फूलहरूको मजा लिन सक्नुहुन्छ र समुद्रमा पौडी खेल्ने बाहेक, अन्य धेरै गतिविधिहरूको मनोरञ्जन लिन सक्नुहुन्छ।

साथै, निशी वार्डमा रहेको ओहारा समुद्री तट पनि घुमफिरको लागि राम्रो छ। 

फुकुओकाको सबैभन्दा लामो समुद्री तटमा बिना कुनै अवरोधपौडी खेल्न सक्नुहुन्छ। समुद्र किनारमा विश्रामगृहको राम्रोव्यवस्था छ, जहाँ तपाईँले BBQ Banana boat जस्ता समुद्री मनोरञ्जनहरुको आनन्द लिन सक्नुहुन्छ।

फुकुओका शहरमा प्रकृति र रिसोर्टको आनन्द लिन सकिने थप्रै समुद्री तटहरु छन्। यस गर्मीमा पक्कै त्यहाँको मज्जा लिनुहोस् बरु बाहिर जानुहुँदा, लू लाग्नबाट बच्न सावधानीहरु अपनाउनुहोस्!

 

 

【फुकुओका शहरको सूचना 】

“नेच्च्युस्योउ अर्थात् लू लाग्नुबाट सावधान हुनुहोस् !”

अत्याधिक गर्मीको बेला, गाह्रो ब्यायाम वा तीव्र शारीरिक क्रियाकलापका कारण शरीरले आफ्नो तापक्रम ठीकसँग नियन्त्रण गर्न सक्दैन, जसले गर्दा शरीरमा पानी र नुनको मात्रामा असन्तुलन पैदा भई नेच्च्युस्योउ अर्थात् लू लाग्छ नेच्च्युस्योउका लक्षणहरूमा टाउको दुख्ने, चक्कर आउने, वाकवाकी लाग्ने र झाडापखाला लाग्ने जस्ता हुन्।

यस्तो बेलामा शरीरलाई चिसो पार्ने तथा नुन पानी पिउने गर्नुपर्दछ। यदि यस्तो गर्दा पनि निको नभएमा, ११९ मा फोन गरेर एम्बुलेन्स बोलाउनुपर्छ।

विशेष गरी, भारी वर्षा समाप्त भएपछि, जुलाईबाट अधिकतम तापमान बढ्ने समयमा आकस्मिक कक्षमा ल्याउनेहरुको सङ्ख्या ह्वात्तै बढ्छ। यस समयमा, उच्च आर्द्रता हुने र शरीरलाई अधिकतम गर्मीको बानि नहुने हुनाले धेरै ध्यान दिनु आवश्यक छ। लू, घर बाहिर मात्र होइन घर भित्र पनि हुन सक्छ।

अब केही नेच्च्युस्योउबाट बच्ने उपायहरु बताउन गईरहेकी छु।

  • तरल पदार्थ बारम्बार पिउने गर्नुहोस्। 

नियमित रूपमा जौको चिया र पानी पिउने, व्यायाम गर्दा Sports drinks पिउनु पनि उपयुक्त मानिन्छ। पसिना आउँदा, नुनपानी पिएर शरीरमा पानीको मात्रा कायम राखौं।

  • टोपी वा छाताको प्रयोग गरेर प्रत्यक्ष घामबाट जोगौं।

  • कोठाको तापक्रम २८ डिग्री सेल्सियसभन्दा कम राख्न, बुद्धिमानीपूर्वक air conditioner र फ्यानको प्रयोग गरौँ।

  • Cooling sheet र Ice pillow जस्ता चिसो पार्ने सामानहरूको प्रयोग गरौं।

  • सन्तुलित आहार र पर्याप्त निद्रा लिएर, स्वास्थ्यको ख्याल गरौं।

2024.07.04[Thu] 09:00

अन्य(その他) , नियम तथा आचरण(ルール・マナー)

【हियाशी च्युखा अर्थात् चिसो चाइनीज नूडल्स】

 यस समयतिर, खानपानका पसलहरुमा "हियाशी च्युखा शुरु गरियो!" भन्ने सूचना बोर्ड कहिल्यै देख्नुभएको छ? वा तपाईंहरूले यो "हियाशी च्युखा" कहिल्यै खानु भएको छ? "हियाशी च्युखा" को अर्थ के होला भनेर सोचिरहनुभएकाहरु पनि हुनुहुन्छ होला!

हियाशी च्युखा भन्ने शब्दमा "चाइनीज" भाषा छ, र यसको अर्थ "चाइनीज नूडललाई चिसो पानीमा भिजाएर बनाइएको परिकार" हो तर, वास्तबमा यो चाइनीज परिकार भने होइन। यसको उत्पत्ति जापानमा भएको हो। पहाड जस्तै धेरै हालिएको नूडलमा, काक्रो, ह्याम, गोलभेंडा आदि वरिपरि घेरामा राखिन्छ, जसले माउन्ट फुजीको सम्झना दिन्छ रे। यसलाई खाँदा, भिनेगर सोया सस वा तिलको सस हालेमा ताजा र स्वादिलो हुन्छ।

 चासो लाग्ने "हियाशी च्युखा शुरु गरियो" भन्ने वाक्यांशको उत्पत्तिका बारेमा विभिन्न भनाइहरू छन्, तर सामान्य अर्थमा "गर्मीको मौसम आएकोले चिसो नूडल्स तयार छ, खान आउनुहोस्!" भन्ने कुरा संक्षेपमा व्यक्त गर्छ।

अत्यधिक गर्मीले खानाको इच्छा घट्ने गर्मीमा, गर्मीको थकान रोक्नका लागि यो मेनु उत्तम छ!

 

 

फुकुओका शहरको सूचना

फुकुओका शहरबाट, “फुकुओका शहर राष्ट्रिय स्वास्थ्य बिमा” सम्बन्धि सूचना छ।

जापानमा, बिरामी पर्दा वा चोट लागेमा, कम खर्चमा निश्चिन्त भएर उपचार सेवा प्राप्त गर्नका लागि, सबै व्यक्तिहरूलाई सार्वजनिक स्वास्थ्य बिमा प्रणालीमा सामेल हुने व्यवस्था गरिएको छ। ३ महिनाभन्दा बढी समयसम्म जापानमा बस्न अनुमति प्राप्त गरेका व्यक्तिहरूले, कम्पनीको स्वास्थ्य बिमा नभएका हकमा, राष्ट्रिय स्वास्थ्य बिमा लिनु अनिवार्य छ। यो बिमा लिन, तपाईं बसोबास गरिरहनु भएको क्षेत्रको वार्ड कार्यालयमा गएर प्रक्रिया पूरा गर्नु पर्छ।

फुकुओका शहरको राष्ट्रिय स्वास्थ्य बिमा लिनुभएको व्यक्तिले बिमा शुल्क तिर्नु पर्छ। बिमा शुल्क तपाईंहरूको स्वास्थ्य उपचार खर्चका लागि महत्त्वपूर्ण स्रोत हो। २०२४ अप्रिलदेखि २०२५ मार्चसम्मको बिमा शुल्क, गत वर्षको आम्दानी लगायतका आधारमा जुन महिनामा निर्धारण गरिएको छ।

राष्ट्रिय स्वास्थ्य बिमा लिने व्यक्तिहरूलाई, जुन महिनाको मध्यमा नीलो रंगको खाममा तिर्नुपर्ने सम्बन्धि सूचना पठाइएको छ, कृपया जाँच गर्नुहोस्। खामभित्रका कागजातमा लेखिएको बिमा शुल्कको रकम जाँच गरेर, तोकिएको म्याद भित्र बिमा शुल्क तिर्नुहोस्। यदि बिमा शुल्क समयमै तिरेन भने, तपाईंको सम्पत्ति छानबिन गरेर, बचत वा तलब जफत गर्न सकिन्छ, त्यसैले ध्यान दिनुहोस्। 

यदि कुनै कुरा बुझ्न गाह्रो भएमा, फोन मार्फत १८ वटा भाषाहरुमा परामर्श लिन सकिन्छ। फोन नम्बर ०९२-७५३-६११३ हो। यो नम्बरमा फोन गर्दा पहिले दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ। आफू बस्ने वार्ड अनि तपाईंले बुझ्न चाहेको कुरा भन्नुहोला।

 

 

【फुकुओका सिटी इन्टरनेशनल फाउण्डेसनको सूचना】

“विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४” आयोजना

फुकुओका सिटी इन्टरनेशनल फाउण्डेनमा, NPOफुकुओका कम्युनिटी लिभिङ टुगेदर पब्लिक इन्टरेस्ट इन्कर्पोरेटेड फाउन्डेसन फुकुओका YWCA सँगको सहकार्यमा, "विदेशी मूलका बालबालिकाहरूका लागि शैक्षिक र करियर परामर्श कार्यक्रम २०२४" आयोजना हुने भएको छ।

यस परामर्श कार्यक्रममा, विदेशी मूलका बालबालिकाहरूका लागि प्रिस्कूलरदेखि हाई स्कूल सम्मको शैक्षिक परामर्श दिईन्छ। यस अतिरिक्त, अध्यागमन ब्यूरो र प्रशासनिक कानूनी सल्लाहकारहरूद्वारा बसोबास सम्बन्धी परामर्श पनि लिन सक्नुहुन्छ।

परामर्श नि:शुल्क हो। जापानी, अंग्रेजी र चाइनिज भाषाहरुमा परामर्श उपलब्ध छन्।

कार्यक्रम हुने दिन: जुलाई १३, शनिबार दिउँसो १:०० देखि बेलुकी ५:०० बजेसम्म

आयोजना स्थल: हाकाता वार्डको तेन्यामाचीमा स्थित फुकुओका सिटी इन्टरनेशनल सेन्टर

सोधपुछको लागि, कृपया फुकुओका सिटी इन्टरनेशनल फाउण्डेसनमा सम्पर्क गर्नुहोस्। 

फोन मार्फत् वा फाउण्डेसनको वेबसाइटमा राखिएको सोधपुछ फारम मार्फत् सम्पर्क गर्न सक्नुहुन्छ। फोन नम्बर, ०९२-२६२-१७४४ हो।

2024.06.27[Thu] 09:00

राइड सेयर

यहाँ फुकुओकामा पनि शुरु भएको सेवा, "राइड सेयर" को बारेमा तपाईंहरुलाई थाहा छ

साधारण चालकहरूले शुल्क तिरेर ट्याक्सी कम्पनीको व्यवस्थापन अन्तर्गत आफ्नो निजी कार प्रयोग गरेर यात्रुहरूलाई चढाउन र छोड्न मिल्ने यातायात सेवा हो।

 ट्याक्सी कम्पनीसँग सम्झौता भएका, सेतो नम्बर प्लेटका सवारीसाधनहरु अब व्यावसायिक सञ्चालनका लागि उपलब्ध छन्। राइड सेयरको प्रयोग, साधारण ट्याक्सी प्रयोग गरेझैं, स्मार्टफोनको ट्याक्सी बोलाउने एप प्रयोग गरी, साधारण ट्याक्सी वा निजी कार ट्याक्सी बीच कुन प्रयोग गर्ने भनेर छान्न सक्नुहुन्छ।

 लक्षित क्षेत्र, फुकुओका शहर र वरपरका शहरहरू हुन्। प्रयोगको समय अवधि, मुख्यतया साँझबाट रातसम्म सीमित गरिएको छ। मिटर नभएका निजी कारहरू योग्य भएकाले, पिकअप पोइन्ट र गन्तव्य सेट गरेर भाडा अग्रिम हिसाब गरिन्छ, र मुख्य मार्ग परिवर्तन नभएको खण्डमा अग्रिम रुपमा हिसाब गरिएको शुल्क मात्र तिर्ने प्रणाली हो।

कान्तो लगायत अन्य क्षेत्रहरूमा अप्रिलदेखि संचालन भएको यो सेवा, अन्ततः यहाँ फुकुओकामा पनि शुरु भएको छ। यस सेवाले हाल भईरहेको ट्याक्सीको अभाव समाधान गर्ने अनि फुकुओका शहरलाई थप राम्रो र बस्न योग्य बनाउने आशा गरिएको छ।

यो हप्ता "राइड सेयर" को जानकारी यति नै।

 

 

हाकाता गिओन् यामाकासा

अर्को हप्तादेखि अन्ततः "हाकाता गिओन् यामाकासा" शुरु हुँदैछ!

यो जुलाई १ देखि १५ सम्म आयोजना हुने, फुकुओका हाकाताको परम्परागत पर्व हो।

हरेक वर्ष जुलाई महिनामा प्रवेश गरेपछि, फुकुओका शहरका विभिन्न ठाउँहरूमा कुशल मूर्तिकारहरूले बनाएका, लगभग १० मिटर अग्ला भव्य र प्रभावशाली "खाजारियामा", सरल अर्थमा भन्नु पर्दा भव्य सजाईएका रथहरु प्रदर्शन गरिन्छ। यस वर्ष, जापानी एनिमे पात्र "गन्डम" को कल्पना गरेर बनाइएको नयाँ खाजारियामा पहिलो पटक निर्माण गरिएको छ, जुन खामीखावाबाता स्योउतेन्गाईमा देख्न सक्नुहुनेछ।

पर्वको समाप्तिको अन्तिम दिन, जुलाई १५ मा "ओइयामा" नामक कार्यक्रम आयोजना हुन्छ। यो हाकाता गिओन् यामाकासाको मुख्य आकर्षणहरूमध्ये एक हो। लगभग ५ किलोमिटरको दौड, हाकाता वार्डको कुशिदा जिन्ज्याबाट, बिहान ४:५९ बजे ड्रमको सङ्केतसँगै शुरु हुन्छ। पुरुषहरूले करिब १ टन तौलको र करिब ३ मिटर अग्लो भएको यामाकासालाई आफ्नो काँधमा बोकेर, उत्साहजनक स्वरमा, सडकमा रथ दौडाउँछन्। सूर्योदय हुनु अघि नै, धेरै संख्यामा स्थानीय निवासीहरू लगायत पर्यटकहरूको घुइँचो लाग्ने गर्छ, जसले गर्दा उल्लासमय वातावरणको सिर्जना हुने गर्छ। 

साथै, गन्डमको यामाकासा रथ पनि सडकमा दौडाएको देख्न सक्नुहुन्छ। 

"यामाकासा समाप्त हुँदा गर्मी आउँछ" भन्ने उखान झैँ, स्थानीय क्षेत्रमा यस हाकाता गिओन् यामाकासा, प्रारम्भिक गर्मीको पर्वको रुपमा रहँदै आईरहेको छ।

 

2024.06.20[Thu] 09:00

नियम तथा आचरण(ルール・マナー)

【हाकाता ओरी】

फुकुओका हाकाताको परम्परागत शिल्पकला उत्पादन "हाकाता ओरी" को बारेमा थाहा छ

"हाकाता ओरी" भनेको, फुकुओका शहरको मुख्यतया हाकाता क्षेत्रमा विशेष उत्पादन गरिएको रेशमी कपडा हो।

धेरै चरणहरू र कुशल कालिगरहरूको मेहनतबाट, कयौ महिना देखि आधा वर्षसम्मको लामो समय लिएर तयार गरिने, यो जापानको परम्परागत शिल्पकला उत्पादनहरू मध्ये एक हो।

"हाकाता ओरी" भन्ने बित्तिकै, हाकाता ओबीको नाम आई हाल्छ। यो बलियो अनि टिकाउ कपडाले बनेको हुन्छ, जसलाई कडा तान्दा पनि चाँडै बिग्रँदैन, त्यसैले यो किमोनोको ओबीको रूपमा अत्यन्त लोकप्रिय छ। वास्तवमा, यो ओबीलाई सुमो पहलवानहरूले पनि धेरै प्रयोग गर्छन्। ओबी सजिलै खुकुलो हुँदैन, र कस्सिने गरि बाँध्न सकिन्छ। ओबीलाई कसाउँदा आउने "क्युचु" आवाज, यसको विशेषता मानिन्छ।

"हाकाता ओरी" का ढाँचाहरूमा केही प्रकारहरू छन्, तर प्रमुख "खेन्ज्योउ गारा" भनेको फुकुओका सहरको प्रतीकको रूपमा JR हाकाता स्टेशन र फुकुओका एयरपोर्ट जस्ता ठाउँहरूमा प्रयोग गरिएको देख्न सकिन्छ।

हाल, दैनिक जीवनमा प्रयोग गर्न मिल्ने किसिमका हाकाता ओरीको प्रदर्शनी सावारा वार्डकोमोमोचीहामा स्थित "Hakata Traditional Craft and Design Museum"मा भइरहेको छ। यस प्रदर्शनीमा बलपेन, पेनकेस जस्ता लेखन सामग्रीहरू, वालेट, पाउच, नेमकार्ड राख्ने केशहरू जस्ता साना सामानहरू, व्यापारिक प्रयोजनका सामानहरु लगायत उपहारको रूपमा दिन मिल्ने करीब २०० थरि वस्तुहरूको प्रदर्शनी र बिक्री भइरहेको छ। यो प्रदर्शनी यस हप्ताको आइतबार, २३ तारिखसम्म सञ्चालन हुनेछ।

"Hakata Traditional Craft and Design Museum",  फुकुओका हाकाता क्षेत्रसँग सम्बन्धित परम्परागत शिल्पकला उत्पादनहरूको उत्कृष्ट सिर्जनाहरूको प्रदर्शनी र परिचय गराउने निःशुल्क थलो हो। प्रत्येक महिनाको पहिलो, दोस्रो, र तेस्रो आइतबार परम्परागत शिल्पकला कार्यशाला कक्षाहरू पनि सञ्चालन गरिन्छ।

सजिलैसँग हाकाताको संस्कृति अनुभव गर्न सकिने भएकाले, अवश्य पनि यस संग्राहलयको भ्रमण गर्नुहोस्। विस्तृत जानकारीका लागि, Hakata Traditional Craft and Design Museumको होमपेज हेर्नुहोस्।

 

 

फुकुओका शहरको सूचना

“कर सम्बन्धि”

जनवरी १ देखि फुकुओकामा बस्दै आउनुभएको व्यक्तिको यदि अघिल्लो वर्षको आय १० लाख नाघेको भएमा फुकुओका प्रान्तको कर तिर्नु पर्ने हुन सक्दछ।

 जुन १५ तिर कर तिर्न सूचना आउन सक्ने भएकोले, अवश्य पनि खामभित्रको ध्यानपूर्वक पढ्नुहोला। 

तिर्नुपर्ने म्याद र शुल्क लेखिएको हुन्छ। कोन्भिनी, बैंक वा हुलाक मार्फत तिर्नुहोला।

त्यस्तै, कम्पनीमा कार्यरत व्यक्तिहरुको हकमा, कर सीधै तलबबाट कटौती हुन सक्छ।

शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना हुन सक्दछ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत् परामर्श लिन सक्नुहुन्छ। 

फोन नम्बर, (०९२-७५३-६११३) हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

2024.06.13[Thu] 09:00

प्राकृतिक प्रकोप(災害)

【उमे जुस अर्थात् आलुबखडाको जुस】

उमे अर्थात् आलुबखडाको सिजन लागि नै सकेको छ! उमेको सिजन मे देखि जुलाई सम्म हो। आलुबखडामा भोक बढाउने शक्ति अनि थकान कम गर्ने तत्व हुने भएकोले, अत्यधिक गर्मी महिनाहरूमा थकान मेटाउनको लागि यो खानु अति उत्तम हुन्छ।

आलुबखडा दुई प्रकारका हुन्छन्, जसमध्ये हरियो आलुबखडा अमिलो अनि ताजा स्वादको हुन्छ। 

यो कडा अनि धेरै अमिलो हुने भएकोले, काँचो खान मिल्दैन। यसलाई प्रशोधन गरेर, यसको अमिलो स्वादलाई स्वादिलो पेयपदार्थ र खाद्यपदार्थहरूमा परिणत गरेर, आलुबखडाको रक्सी, सिरपमा खाँदेको आलुबखडाको अचार, अनि कुरुम्कुरूम आलुबखडाको कुरकुरे आदि बिभिन्न तरिकाले स्वादको मज्जा लिन सकिन्छ। 

त्यस्तै, पाकेको आलुबखडा चाहिं पहेंलो, मीठो र फलफूलको जस्तै सुगन्धित हुन्छ। यसको स्वाद सजिलै पच्ने भएकोले यो अचार र जुस बनाउन उपयुक्त हुन्छ। हरियो आलुबखडाबाट बनेको उमेबोशी कुरकुरे प्रकारको हुन्छ भने, पाकेको पहेंलो आलुबखडाबाट बनेको उमेबोशी नरम हुन्छ।

आज आलुबखडाको जुस बनाउने तरिका भन्नेछु। आवश्यक सामग्री, हरियो आलुबखडा र मिश्री बराबर मात्रामा। सबैभन्दा पहिले, आलुबखडालाई राम्ररी पखाल्नुहोस् र यसको अमिलोपन हटाउन लगभग २घण्टा जति पानीमा भिजाउनुहोस्। त्यसपछि, पानीबाट निकालेरआलुबखडाको डाँठहरू हटाउनुहोस्, अनिझोलामा राखेर रातभर फ्रिजरमा राख्नुहोस्। अर्को दिन, उमालेर कीटाणुरहित पारेको भण्डारण बोतलमा, आलुबखडा र मिश्री सँगसँगै राखेर, सामान्य तापक्रममा राख्नुहोस्। लगभग एक हप्तामा जुस तयार हुन्छ, यसलाई कार्बोनेटेड पानी वा साधारण पानीसँग मिसाएर आलुबखडा जुसको आनन्द लिन।

काँचो हरियो आलुबखडा र मिश्री सुपरमार्केटहरूमा सजिलै उपलब्ध हुने भएकोले, पक्कै पनि एकपटक बनाएर हुर्नुहोला है♪♪♪

 

 

फुकुओका शहरको सूचना

"चुयु र भारी वर्षा सम्बन्धि"

 

जापानमा जुनदेखि जुलाईसम्मलाई  "चुयु" अर्थात् वर्षा ऋतु भनिन्छ र यस अवधिमा भारी वर्षा हुने गर्दछ।

भारी वर्षाको कारण प्रकोपहरू हुने सम्भावना भएकोले ध्यान दिनुहोला। हालैका वर्षहरूमा पनि, वर्षाको मौसममा रेकर्ड-ब्रेक भारी वर्षाको कारणले, फुकुओका प्रान्तमा पनि धेरै क्षति पुर्याएको थियो।

भारी वर्षा हुँदा, नदी, तट वा पहाड नजिकको चट्टानहरू जस्ता खतराजनक ठाउँहरू नजिक नजानुहोस् र आफ्नो जीवन रक्षाको लागि कदम चाल्नुहोस्।

फुकुओका सिटिको होमपेजमा Hazard map र विपद् रोकथाम सम्बन्धि जानकारी प्राप्त गर्न सक्नुहुन्छ।

आफू बस्ने क्षेत्रमा हुन सक्ने सम्भावित खतरा र आश्रय स्थलमा जाने सुरक्षित तरिका आदिको बारेमा अग्रिम जानकारी राख्ने गरौँ।

बिस्तृत जानकारी, ‘Fukuoka City Multilingual Portal’ भनि खोजि, साईगाईको पेजमा हेर्नुहोला।

फुकुओका शहरको महत्वपूर्ण जानकारीहरु, फुकुओका सिटिको आधिकारिक Facebook ‘Global Community Fukuoka’ वा फुकुओका सिटी इन्टरनेशनल फाउण्डेसनको Facebook ‘फुकुओका शी कोकुसाई खाईखान्/ आत्ताखा फुकुओका「福岡市国際会館/あったか福岡」बाट पनि बहुभाषामा प्राप्त गर्न सक्नुहुन्छI पेजलाई follow गरेर, सामान्यदेखि महत्वपूर्ण जानकारीहरु लिनु होला।

2024.06.06[Thu] 09:00

अन्य(その他)

【फादर्स डे अर्थात् बुबाको दिन】

जापानमा, जुन महिनाको तेस्रो आइतबार फादर्स डे पर्छ। यस वर्ष, यो जुन १६ मा पर्न गएको छ! हामी नेपालीहरुको बुबाको मुख हेर्ने दिन, यस बर्ष सेप्टेम्बर २ मा पर्छ।

जापानमा, कार्नेशन फूललाई मदर्स डे को र पहेंलो गुलाफ फूल चाहिं फादर्स डे को फूल भन्ने गरिन्छ। पहेंलो गुलाफले "निष्ठा" र "स्फूर्ति" को अर्थ दिन्छ।

साथै, फादर्स डेमा, गर्मीको शुरुवातमा फूल्ने सूर्यमुखी फूल दिनेहरु पनि धेरै हुन्छन्। फूल बाहेक, नेकटाई जस्ता प्रयोग गर्न मिल्ने सामानहरु, वा ओसाके, आफ्नो बुबालाई मनपर्ने खाद्यपदार्थ दिनेहरु पनि धेरै हुन्छन्।

बुबाको दिन, दैनिक रुपमा व्यक्त गर्न नसकिएका बुबाप्रतिको कृतज्ञता व्यक्त गर्ने अवसर पनि हो। पक्कै पनि यस बिशेष दिनमा आफ्नो बुबासँग समय बिताउनुहोस्, उहाँलाई उपहार दिनुहोस् अनि अविस्मरणीय पल बनाउनुहोस्।

 

 

फुकुओका सिटी इन्टरनेशनल फाउण्डेसनको सूचना

रेइवा ६ को “अन्तर्राष्ट्रिय विद्यार्थीहरुद्वारा पढाइने विदेशी भाषा कक्षाहरुमा विद्यार्थी भर्ना” को सूचना

 

फुकुओका सिटी इन्टरनेशनल फाउण्डेसनमा, रेइवा ६ को अन्तर्राष्ट्रिय विद्यार्थीहरुद्वारा पढाइने विदेशी भाषा कक्षाहरुमा विद्यार्थी भर्ना लिईदैछ।

यस कक्षामा;चाइनिज, कोरियाली, भियतनामी, स्पेनी, जर्मन आदि विश्वका विभिन्न देशहरूका भाषाहरू सिक्न सक्नुहुन्छ। अन्तर्राष्ट्रिय विद्यार्थी प्रशिक्षकहरूसँगको अन्तरक्रिया मार्फत, भाषा मात्र नभई, तिनीहरूको आफ्नो देशको खाना, संस्कृति आदिको बारेमा पनि सिक्न सक्नुहुनेछ। 

स्थान रहेको छ, फुकुओका सिटी सबवे नाकासु कावाबाटा स्टेशन वा कुशिदा जिन्ज्या स्टेशनबाट केवल ५ मिनटको दूरीमा पर्ने फुकुओका सिटी इन्टरनेशनल सेन्टर।

पाठ्यक्रम, रेइवा ६ को जुलाईदेखि अर्को वर्षको फेब्रुअरीसम्म चल्नेछ, जसमा कुल २६ देखि २७ पाठहरु हुनेछन्। ट्युसन शुल्क, कर सहित ३३,००० येन हो।

उपलब्ध भाषा कक्षा, समयतालिका जस्ता विस्तृत जानकारीका लागि, कृपया फुकुओका सिटी इन्टरनेशनल फाउण्डेसनको होमपेजमा हेर्नुहोला। इन्टरनेटमा, Ryugakusei kara manabu gaikokugo kyoushitsu” भनि खोज्नु भएमा, बिस्तृत जानकारी पाउन सक्नुहुन्छ। 

आवेदन अवधि जुन २० सम्म हो। हामी तपाईंहरुको आवेदन पर्खिरहेका छौँ। 

 

 

 "LINE कल प्रयोग गरेर परामर्श गर्न सकिन्छ!"

फाउण्डेसनको LINE आधिकारिक Account मा, LINE कल मार्फत्, जीवनयापन सम्बन्धि परामर्श तथा निःशुल्क विशेष परामर्शको बुकिंग आदिका लागि सम्पर्क गर्न सक्नुहुन्छ। टेलिफोन अनुवाद सेवाको प्रयोग गरेर २२ वटा भाषाहरूमा परामर्श लिन सक्नुहुन्छ। 

साथै, फाउण्डेसनको कार्यक्रमहरुको जानकारी तथा बिदेशी नागरिकहरुप्रति लक्षित जानकारीहरु पनि लिन सकिने भएकोले, फुकुओका सिटी इन्टरनेशनल फाउण्डेसनको होमपेजबाट, अवश्य पनि Friend add गर्नुहोला।

तर chatमार्फत् परामर्श सेवा उपलब्ध छैन। textमार्फत् परामर्श लिन चाहनु हुने महानुभावहरुले "फुकुओका सिटी इन्टरनेशनल फाउण्डेसन"को होमपेजमा रहेको सोधपुछ फारम प्रयोग गर्नुहोला।

2024.05.30[Thu] 09:00

【चुयु (वर्षा ऋतु) र मौसमी फूल-आजिसाई】

जापानमा, वसन्तबाट गर्मी मौसममा परिवर्तन हुने अवधिमा, धेरै पानी पर्ने र बादल लाग्ने गर्छ, जसलाई चुयुभनिन्छ। फुकुओकामा औसत वर्षमा, चुयु जुनको शुरुतिर शुरु भई जुलाईको मध्यमा समाप्त हुन्छ।

यस्तो वर्षाको मौसममा आनन्द लिन सकिने मौसमी फूल हो, आजिसाई। 

आजिसाई फूल जापानको मौलिक फूल हो। फूल फुल्ने शुरुमा फूलको रङ फिक्का हुन्छ र दिन बित्दै जाँदा फूलको रंग गाढा हुँदै जान्छ। माटोको अम्लताको आधारमा फूलको रंग परिवर्तन हुन्छ।त्यसैले फरक स्थानमा फरक रङ्गका आजिसाईहरुको आनन्द लिन सक्नुहुन्छ।

फुकुओका शहरमा आजिसाई फूल हेर्नका लागि उपयुक्त स्पटहरुमध्येमा, हिगाशी वार्डमा रहेको "हाकोजाकी श्राइन" र हाकाता वार्डमा रहेको "तोखा एबिसु जिन्ज्या" हुन्।

मन्दिर परिसरमा फूलाईएका आजिसाईहरूका साथै, प्रार्थना गर्नु अघि हात र मुख धुने  पानी राख्ने भाँडोमा सजाइएको आजिसाईहरुलाई पनि हेर्न नछुटाउनुहोस्। यसलाई "हानाच्योजु"भनिन्छ। पानीको सतह टम्म भर्ने गरि राखिएका रंगीन आजिसाईहरु अति सुन्दर अनि  मन्दिरको पवित्र वातावरणसँग पनि अर्थपूर्ण रहेको यस सजावटले जोकोही आँखालाई तान्छ ।

उदास लाग्दो वर्षाको समय भएपनि, पक्कै पनि बाहिर निस्कनुस् अनि जीवन्त आजिसाई फूलहरुको साथमा आनन्द लिनुहोस्।

 

 

जुनकिरी

त्यस्तै, अर्को विषयवस्तु पनि यस समयमा हुने विशेषताहरुमध्ये पर्छ।

हजुर, जुनकिरी नाच्ने मौसम आइसकेको छ। जापानमा जुनकिरीलाई गर्मीको प्रतीक मानिन्छ। 

जुनकिरी नाच्दा बत्ती जस्तै चम्किने भएकोले यो मनमोहक र सुन्दर भई, धेरै मानिसहरूलाई यसले आकर्षित गर्ने गरेको छ। फुकुओकामा जुनकिरीहरू हेर्नका लागि सबैभन्दा राम्रो समय, हरेक वर्ष मेको अन्त्यदेखि जूनको शुरुसम्म हो। जुनकिरीहरु प्राकृतिक र स्वच्छ पानी वरिपरि बस्न मन पराउँछन्।

फुकुओका प्रिफेक्चरमा जुनकिरीहरू बस्ने प्राकृतिक धनी स्थलहरू धेरै छन्। जसमध्ये जुनकिरीहरू हेर्न सकिने ठाउँहरुमा, फुकुओका शहर च्युउ वार्डमा अवस्थित तोजिन माचीमा रहेको "म्योहोजी" मन्दिर हो। यो जुनकिरीहरू बस्ने मन्दिरको रूपमा चिनिन्छ।

हरेक वर्ष ३००० भन्दा बढी मानिसहरु, यो समयमा शहरमा बस्ने जुनकिरीहरूको आनन्द लिनको लागि हेर्न जान्छन्। साथै, यस सप्ताहन्तमा, जुन १ ( शनिबार) को दिन "जुनकिरी फेस्टिभल"आयोजना हुन गईरहेको छ।

बगैँचामा बस्ने स-साना जीवहरू अनि विशाल मन्दिर परिसर भित्रको खोलामा उड्दै नाच्ने जुनकिरीहरूको मनमोहक कोमल प्रकाशलाई हेरेर आनन्द लिऔं।

2024.05.23[Thu] 09:00

जापानी भाषा(日本語) , चिकित्सा तथा स्वास्थ्य(医療・保健)

【फुकुओका बोर्डो वाइन फेस्टिवल】

हाल फुकुओका सिटी हलको पश्चिम तर्फ रहको फुरेआई हिरोबामा  " फुकुओका बोर्डो वाइन फेस्टिवल" आयोजना भइरहेको छ।

"फुकुओका बोर्डो वाइन फेस्टिवल", फुकुओका र बोर्डो बीचको मैत्रीपूर्ण सम्बन्धको ३५औं वार्षिकोत्सव मनाउन शुरु गरिएको थियो र यस वर्ष यो वाइन फेस्टिवल ७औं वर्षमा प्रवेश गरेको छ।

यस फेस्टिवलमा, १०० भन्दा बढी प्रकारका बोर्डो वाइन अनिफुकुओकाको स्वादिष्ट परिकारहरुको पनि आनन्द लिन सक्नुहुन्छ। साथै, आयोजना स्थलमा फुकुओकाका कलाकारहरूद्वारा उत्कृष्ट ओपेरा र स्टेज प्रदर्शनहरू पनि दिनुहुनेछन्। हरेक वर्ष धेरै मानिसहरू सहभागी हुने यो फेस्टिवल, वाइन प्रेमीहरूका लागि हेर्नै पर्ने इभेन्टको रुपमा रहँदै आएको छ।

कार्यक्रम संचालन अवधि,  सोमबारदेखि शुक्रबार बेलुकी ५बजेदेखि, र शनिबार तथा आइतवार दिउँसो१२ बजे देखि बेलुकी १०बजे सम्म । जुन २ (आइतबार) सम्म फेस्टिवल सञ्चालन हुनेछ । समय भए पक्कै पनि जानुहोला

 

 

【फुकुओका शहरको सूचना】

यासासीई निहोन्गो राजीओ कोउजा अर्थात् सरल जापानी भाषा रेडियो कोर्सको परिचय

तपाईहरुले यासासीई निहोन्गो राजीओ कोउजा अर्थात् सरल जापानी भाषा रेडियो कोर्स को प्रसारण सुन्नुभएको छ?

यो कार्यक्रम, जापानी भाषा राम्ररी नबुझ्ने विदेशीहरू सबैका लागि हो, र यस कार्यक्रममा सरल जापानी भाषामा बिस्तारै बोलिन्छ।

विदेशीहरुले जापानमा बसोबास गर्दा थाहा पाउनु पर्ने सूचनाहरुको बारेमा जानकारी दिईनेछ।

यो कार्यक्रम प्रत्येक शुक्रवार ९:५४ बाट प्रसारण हुँदै आईरहेको छ।

बुझ्न गाह्रो भएमा, वा सुन्न छुटेको भएमा पनि ठिकै छ!

Love FM को होमपेजमा पोष्ट गरिएको स्क्रिप्टमा हेरेर Podcast मा बारम्बार सुन्न सक्नुहुन्छ।

कृपया सुनिदिनु होला।

 

 

HIV परिक्षण सप्ताहको बारेमा

 

जुन १ देखि जुन ७ सम्मको १ हप्ता "HIV परिक्षण सप्ताह" हो।

रेइवा ५ मा, फुकुओका शहर भित्रको चिकित्सा संस्थानहरूले दिएको नयाँ रिपोर्ट अनुसार HIV संक्रमित व्यक्तिहरु ३४ जना र एड्सका बिरामीहरू ७ जना थिए। HIV संक्रमणको रोकथाम, प्रारम्भिक पहिचान र प्रारम्भिक उपचार महत्त्वपूर्ण छ। HIV संक्रमण हुँदैमा, धेरैजसो लक्षणहरू नदेखिने भएकोले, संक्रमण छ कि छैन भनेर पत्ता लगाउन परिक्षण गर्न आवश्यक छ।

प्रत्येक वार्डको Health and Welfare Center मा, HIV परिक्षण निःशुल्क र गोप्य रूपमा गर्न सक्नुहुन्छ।

परिक्षण गर्न मिल्ने दिन तोकिएको हुनाले, कृपया जानुअघि Health and Welfare Center वा फुकुओका सिटीको होमपेज आदिबाट अग्रिम जानकारी लिनुहोला।

HIV संक्रमणको प्रारम्भिक पहिचान र उचित स्वास्थ्य सेवा र उपचार प्राप्त गर्नाले एड्स फैलिने गतिलाई ढिलाइ गर्न सक्दछ। 

त्यसैले, आफुलाई शंका लाग्ने बित्तिकै, प्रारम्भिक परिक्षण गर्ने गरौँ।

2024.05.16[Thu] 09:00

नियम तथा आचरण(ルール・マナー)

【पिउने पानी भर्ने स्पट / माई बोतल समर्थन स्टोर】

प्लास्टिकको प्रयोग कम गर्ने प्रयासमा, फुकुओका सिटीले शहरका बिभिन्न सार्वजनिक सुविधा स्थानहरूमा "आफ्नो बोतलमा पानी भर्न मिल्ने स्पटहरू" स्थापना गरेको छ। व्यक्तिगत बोतलको प्रयोगलाई बढावा दिन, सुरक्षित तथा स्वादिष्ट चिसो फुकुओकाको पिउने पानी निःशुल्क लाभ उठाउन सक्नुहुन्छ। आफ्नो बोतलमा जुनसुकै बेला पनि पानी भर्न सकून् भन्ने हेतुले वार्ड कार्यालयहरू, स्थानीय सामुदायिक केन्द्रहरू, व्यायामशाला र पार्कहरूमा यो सेवा उपलब्ध गरिएको छ।

यसका अतिरिक्त, फुकुओका शहरमा रहेका "फुकुओका सिटी माई बोतल समर्थन स्टोरहरु" मा बेच्न राखेका कफी र अन्य पेय पदार्थहरू, ग्राहकहरूले आफूसँग ल्याएका बोतलहरूमा दिने, त्यस्तै, स्टोर प्रयोग गर्ने ग्राहकहरूलाई निशुल्क पिउने पानी उनीहरुको बोतलमा भर्न दिने सेवा पनि प्रदान गर्दै आइरहेको छ।

"आफ्नै बोतलमा पानी भर्न मिल्ने स्पटहरू" र "फुकुओका सिटी माई बोतल समर्थन स्टोरहरू" कहाँ छन् भनेर "फुकुओका सिटी वेब म्याप" मा हेर्न सक्नुहुन्छ।

पक्कै पनि यस सेवाको लाभ लिनुहोस् र विश्वव्यापी वातावरण जोगाउन आफ्नो तर्फबाट मद्दत गर्नुहोस्।

 

 

फुकुओका शहरको सूचना】

हलुका सवारी साधन कर सम्बन्धि

मोटरबाईक वा हलुका कार भएकाहरुले, अप्रिल १ मा हलुका सवारी साधन कर तिर्नु जरुरी छ।

यदि तपाईंसँग मोटरबाईक वा हलुका कार छ भने, हुलाक मार्फत कर तिर्नका लागि सूचना आउन सक्छ, अवश्य पनि भित्र राम्ररी हेर्नुहोला। 

मे को ३१ सम्ममा कोन्भिनी, बैंक वा हुलाक मार्फत तिर्नुहोला।

स्मार्टफोन भुक्तानी एप प्रयोग गरेर पनि कर शुल्क तिर्न सक्नुहुन्छ। 

यदि तपाईंले मोटरबाईक आदिको शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना पनि छ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

१८ वटा भाषाहरुमा, फोनमार्फत परामर्श लिन सक्नुहुन्छ। 

फोन नम्बर, (०९२-७५३-६११३) ।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

 

<< previous 1 2 3 4 5 6 7 8 9

DJ紹介

  • Sarita
  • Sarita
  • 誕生日: 7月10日
    趣味: 音楽を聞く、旅行する

番組ページへ

リクエスト&メッセージ