Life in Fukuoka "Nepali"

【Fukuoka हिगासीकु हानाबी ताईखाई】

यस हप्ताको अन्त्यदेखि गोल्डेन वीक शुरु हुँदैछ। बाहिर घुमघाम गर्ने योजना भएका व्यक्तिहरू पनि धेरै हुनुहुन्छ होला। 

गोल्डेन विकको पहिलो दिन, २७ तारिक शनिबार आयोजना हुन गईरहेको, "Fukuoka हिगासीकु हानाबी ताईखाई" को बारेमा जानकारी लिएर आएकी छु।

आयोजना स्थल, फुकुओका सिटी, हिगासी वार्ड, खाशिहामाको समुन्द्री तट "मिशिमा ग्रीन बे वाक" हो। राति ७:३० बजेदेखि, लगभग ७,००० पटाकाहरु पड्काउने योजना रहेको छ। यो ३६० डिग्रीमा कहींबाट पनि हेर्न सकिने आतिशबाजी महोत्सव हो।

महोत्सव भनेपछि खानाका स्टलहरू हुने नै भयो! स्टलहरू तीन स्थानहरूमा हुनेछन्: आतिशबाजीको नजिक अनि हेर्नमा कुनै अवरोध नभएको "आइल्यान्ड सिटी गाइस्यु र्योकुचि" क्षेत्र।अनि अर्को स्थल हो, निःशुल्क हेर्न मिल्ने, शौचालय भएको र स्टलहरू धेरै भएको "खाशिहामा च्युओ कोउएन्"। 

त्यसतै, शुल्क तिरेर सिटमा बसेर हेर्ने ठाउँको नजिकै रहेको "खाशिहामा किता कोउएन्" मा पनि खानाका स्टलहरु उपलब्ध हुनेछन्। तर, यो क्षेत्र राजमार्गमा भएकोले आतिशबाजीको पूर्ण सीमा देख्न सक्नुहुन्न, त्यसैले अन्य दुई स्थानहरुबाट हेर्दा राम्रो हुन्छ।

आयोजना स्थलमा जानको लागि, "JR चिहाया स्टेशन" उपयुक्त हुन्छ। " JR खाशिहामा स्टेशन" बाटको मार्ग, "AEON MALLखाशि हामा" वरीपरीका सडकहरू भीडभाड हुन सक्छन् र फेरी घुमाउरो बाटो लिनुपर्ने पनि हुन सक्छ। यसैले, "JR चिहाया स्टेशन" बाट झरेर, निशुल्क आतिशबाजी हेर्न मिल्ने क्षेत्र, "खाशिहामा च्युओ कोउएन्" र "आइल्यान्ड सिटी गाइस्यु र्योकुचि" को बाटोतिर जानु बेस हुन्छ। पार्किङ स्थल उपलब्ध नभएकोले, कृपया सार्वजनिक यातायातको सुविधा प्रयोग गर्नुहोस्।

फुकुओकामा यस वर्षको पहिलो आतिशबाजी महोत्सव, गोल्डेन वीकको शरुवातमा भरपुर आनन्द लिनुहोस्!

【Golden Weekबालबालिकाहरुको लागि विशेष छुट टिकट】

गोल्डेन वीक अवधिभरि प्रयोग गर्न सकिने, बालबालिकाहरुको लागि विशेष छुट टिकटको बारेमा जानकारी लिएर आएकी छु।

शुरुमा, "JRक्युशु"। अप्रिल २७, शनिवारबाट मेको ६, सोमबारसम्मको अवधिमा, "कोदोमो बोउकेन् किप्पु" बिक्रीमाराखेको छ। यो JR क्युशुको लोकल ट्रेन र र्यापिड ट्रेनमा, १०० येनमा १ दिन अनलिमिटेड यात्रा गर्न मिल्ने टिकट हो। विशेष टिकट खरिद गर्नुभएमा, बुलेट ट्रेन र एक्सप्रेस ट्रेनमा पनि प्रयोग गर्न सक्नुहुनेछ।

यो टिकट खरिद गर्नका लागि, अघिल्लो दिनको राति ११ बजेसम्म खरीद गर्न आवश्यक छ, त्यहि दिन खरिद गर्न भने मिल्दैन। यो टिकट "JR क्यूशू इन्टरनेटो रेस्या योयाकु" र JR क्यूशूका प्रत्येक स्टेशनका आरक्षित सीट टिकट भेन्डिंग मेशिनमा खरिद गर्न सकिन्छ।

अर्को छ, "फुकुओका सिटी सबवे"। यहाँ पनि फुकुओका सिटी सबवे सम्पूर्ण लाइनहरुमा एक दिनको लागि १०० येनमा अनलिमिटेड रूपमा यात्रा गर्न मिल्ने एक दिनको यात्रा पास, "स्योउगाकुसेइ ह्याकु येन पासु" अर्थात् "प्राथमिक विद्यार्थी १०० येन पास"बेचिन्छ। यो पास प्रत्येक स्टेशनको टिकट काउन्टर र ग्राहक सेवा केन्द्रहरूमा त्यहि दिन खरिद गर्न सकिन्छ।

अन्तमा, " निशितेचुबस"। निशितेचुको सबै मार्गका बसहरू र विशेष बसहरूमा, जहाँसम्म यात्रा गरे पनि १ पटकको लागि ५० येन मात्र लाग्छ। नगद वा निमोका कार्ड दुवै प्रयोग गर्न सकिन्छ। झर्ने बेला चालकलाई "म प्राथमिक विद्यार्थी हुँ" भनेर ५० येन तिर्नु पर्छ।

यी तीनवटा टिकटहरू सबै "प्राथमिक विद्यार्थी" का लागि हुन्। 

अवश्य पनि यी टिकटहरूको उपयोग गरेर फुकुओका शहर घुम्न जानुहोस्।

【बेल्जियन बियर विकेन्ड】

बाहिर समय बिताउन राम्रो मौसम हुँदै आएको छ।यो सप्ताहको १७ तारिकबुधबारदेखि २१ तारिक आइतबारसम्म, फुकुओका सिटी हलको पश्चिम तिरको फुरेआई हिरोबामा "बेल्जियन बियर विकेन्ड" को आयोजन भइरहेको छ।

तपाईंहरुलाई बियर मन पर्छ? यहाँ फुकुओकामा बेल्जियम बियर आउँदैछ!

बेल्जियम ''बियरको स्वर्ग'' भन्दा पनि हुन्छ। तपाईंहरुलाई थाहा छ, बेल्जियममा, १६०० प्रकारभन्दा बढी बियरहरु बनाईन्छ र युनेस्कोको अमूर्त सांस्कृतिक सम्पदाको रूपमा पनि दर्ता भएको छ।

बेल्जियमको प्रतिनिधित्व गर्ने प्रमुख प्रकारहरू "व्हाइट बियर" र "फ्रुट बियर" जस्ता, १२ प्रकारका ५२ थरीका बेल्जियम बियरहरु चाख्न सकिन्छ। अनि, बियरको साथ रमाइलो गर्नको लागि गउरमेन्ट खानाको रूपमा, फ्लफी बेल्जियन फ्राइहरू ``फ्राइट्स'' र स्ट्युड बीफ ``कार्बोनेड'' जस्ता परम्परागत बेल्जियमका परिकारहरूको पनि मजा लिन सक्नुहुन्छ।

 थप रूपमा, बेल्जियमबाट "MaxPacemaker" को फुकुओकामा उपस्थिति हुनुका साथै, सप्ताहन्तको रातमा टेक्नो ध्वनिहरूको साथ कार्यक्रम स्थललाई जीवन्त बनाईनेछ। LOVEFM बाट पनि DJ को सहभागीता हुने, वार्ता, खेल, आदि मार्फत् कार्यक्रम निकै मनोरञ्जक हुनेछ!

सोमबारदेखि शुक्रबार १६:००देखि २२:००सम्म, तथा शनिबार र आइतबार ११:००देखि २०:०० सम्म कार्यक्रम आयोजना हुनेछ।

यस वसन्त ऋतुको राम्रो मौसममा, बाहिर घुमघाम गर्ने, अनि बेल्जियमको बियर, खाना र संगीतको आनन्द लिएर हेर्दा कसो होला! 

 【फुकुओका शहरको सूचना】

 फोहर फ्याँक्ने नियम सम्बन्धी

फुकुओकामा नयाँ जीवनयापन शुरु गर्नुहुने धेरै संख्यामा हुनुहुन्छ होला।

यसपटक, फोहर फ्याँक्ने नियम सम्बन्धी सूचना रहेको छ।

फुकुओकामा फोहरलाई "जल्ने फोहर", "नजल्ने फोहर", "खाली सिसाको बोतल/प्लास्टिकको बोतल", अनि "ठूला आकारको फोहर" मा विभाजन गरी फ्याँक्ने गरिन्छ। "ठूला आकारको फोहर" बाहेक अन्य सबै फोहरहरूका लागि, कन्भिनियन्स स्टोर वा सुपर मार्केटमा बेची राखेको, फुकुओका शहरको फोहर-फाल्ने-झोला प्रयोग गरेर फोहोर फाल्ने गर्नुहोस्।

जल्ने फोहरको लागि, रातो रंगको फोहर-फाल्ने-झोला हो।

कच्चा फोहोर, कागज, कपडा, प्लास्टिक आदि फाल्ने बेलामा, रातो झोला प्रयोग गर्नुहोस्।

खाली क्यान र गिलास जस्तालाई, नजल्ने फोहरको रुपमा, निलो फोहर-फाल्ने-झोलामा फाल्ने गर्नुहोस्।

खाली सिसाको बोतल र प्लास्टिकको बोतल फाल्नको लागि, पहेंलो रंगको फोहर-फाल्ने-झोला प्रयोग गर्नुहोस्।

बसोबास गर्ने ठाउँ अनुसार फाल्ने दिन तोकिएको हुन्छ।  

जल्ने फोहर हप्तामा २ पटक, खाली सिसाको बोतल/प्लास्टिकको बोतल र नजल्ने फोहर चाहिँ महिनाको १ पटक संकलन हुन्छ।

फोहर मध्यरात संकलन हुनेभएकोले अँध्यारो भएदेखि रातिको १२ बजे सम्ममा, फोहर फाल्ने निश्चित ठाउँमा फाल्ने गर्नुहोस्।

फुकुओका शहरको आधिकारिक LINE ID मा Friendadd गरेर, तपाईंको ठेगाना सेट गर्नुभयो भने, फोहोर फाल्ने दिनमा सूचना प्राप्त गर्नुहुनेछ।

फाल्न चाहनुभएको फोहोरको नाम राख्नुभयो भने, फोहोरको किसिम पनि जान्न मिल्ने भएकोले यो एकदम उपयोगी छ।

एउटा झोलामा नअट्ने ठूला आकारको फोहर वा झोला नै च्यात्ने किसिमको भारी फोहरलाई, ठूला आकारको फोहरको रुपमा फाल्नुहोस्।

ठूला आकारको फोहरका लागि, फोन, इन्टरनेट, वा LINE द्वारा ‘फुकुओका शी सोदाई गोमी उकेचुके’ मा सम्पर्क गर्नुहोस्। शुल्क, फोहोर फाल्ने ठाउँ, फाल्ने दिन, इत्यादि जाँच गरेर फोहोर बाहिर राख्नुहोस्।

फोनमार्फत सम्पर्कका लागि, ठुलो आकारको फोहर फाल्ने सेन्टरको फोन नम्बर, ०९२-७३१-११५३ । 

टेलिफोन अनुवाद मार्फत् १८ वटा  भाषाहरुमा सेवा उपलब्ध छ।

यस अतिरिक्त, QR कोड स्क्यान गरेर १० विभिन्न भाषाहरूमा फोहोर फाल्ने नियमहरूको बारेमा जानकारी प्रदान गर्ने सेवा पनि राखिएको छ। कृपया फुकुओका शहरको वेबसाइट हेर्नुहोस्।

【फुकुओका विमानस्थल/ घरेलु टर्मिनलको लागि नयाँ बहु-तले पार्किङ स्थल】

यस हप्ता, फुकुओका विमानस्थलको पार्किङ सुबिधाको बारेमा जानकारी छ।

अर्को हप्ता, अप्रिल १६ (मङ्गलबार), फुकुओका विमानस्थलको घरेलु टर्मिनलमा रहेको बहु-तले पार्किङ स्थल खुल्ने भएको छ।

समायोजन गरिएका कारहरूको संख्या पहिलेको भन्दा झन्डै दोब्बर छ! हाल १,६१७ कारहरू अटाउने भएको छ।

पार्किङ भवनको बाहिरी भाग, फुकुओकाको परम्परागत कलाशिल्प, "हाकाताओरी" बाट प्रेरित छ। प्रत्येक तला रङ र चित्रहरूमार्फत् लेबल गरिएको छ भने फुकुओकाको विशेषता मानिने स्ट्रबेरी, प्रिफेक्चरको फूलको रुपमा चिनिने प्लम, र रामेन आदि जस्ता फुकुओकासँग सम्बन्धित डिजाइनहरू समाबेश गरिएका छन्।

सेवा शुल्क ३० मिनेट सम्मको लागि नि:शुल्क छ, र त्यसपछिको प्रत्येक ३० मिनेटको लागि आधारभूत शुल्क २५० येन हो। प्रत्येक २४ घण्टाको प्रयोग दरमा सामान्यतया ३,५०० येन, र नयाँ वर्षको बिदाहरू जस्तो व्यस्त समयमा ४,५०० येन लाग्छ।

पार्किंग स्थल उपलब्ध छ कि छैन भनेर आधिकारिक वेबसाइट वा SNS "X" मा जाँच गर्न सक्नुहुन्छ। यसबाहेक, अन्तर्राष्ट्रिय टर्मिनलको लागि मात्र, वेबसाइटमा पार्किङ स्थानको लागि अग्रिम आरक्षण लिन सक्नुहुन्छ।

यस जानकारीले तपाईंहरुको यात्रालाई सहज अनि सुखद बनाओस् भन्ने कामना गर्दछु।

【फुकुओका सिटी इन्टरनेशनल फाउण्डेसनको सूचना】

विदेशीहरुका लागि आप्रवासन, आवास र राष्ट्रियता सम्बन्धि परामर्श

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ।

हरेक महिनाको दोस्रो आइतबारको दिउँसो १ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ। परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्श लिन चाहनुहुने महानुभावहरुले, १ हप्ता अगाडि सम्पर्क गर्नुहोला।

कानूनी परामर्श

अर्को जानकारी, फुकुओकामा बस्नु हुने विदेशीहरूका लागि निःशुल्क कानूनी परामर्शको बारेमा छ।

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि, हरेक महिना दुई पटक निःशुल्क परामर्शहरु प्रदान गर्दै आईरहेको छ।

“कानूनी परामर्श”, हरेक महिनाको पहिलो शनिबार, बिहान १०:३० बजेदेखि दिउँसो १:३० बजेसम्म र, तेस्रो बुधबारको दिउँसो १:०० बजेदेखि ४:०० बजेसम्म, परामर्श अवधि ४५ मिनेट हो।

बुकिंगको आधारमा फुकुओका बार एसोसिएसनको प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ।

भाषा अनुवादकको आवश्यकता भएमा, निःशुल्क अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

बुकिंगको लागि फुकुओका सिटी इन्टरनेशनल फाउण्डेसनको होमपेजमा राखिएको फारमबाट आवेदन दिन सक्नुहुन्छ। तर पहिले सम्पर्कमा आउनेलाई प्राथमिकता दिने भएकोले, आफ्नो परामर्श लिन चाहेको मिति अग्रिम रुपमा फोन मार्फत आरक्षित गर्नुभएमा राम्रो हुन्छ।

बिस्तृत जानकारीका लागि, फोन नम्बर, ०१२०-६६-१७९९ मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

जुनसुकै परामर्श पनि गोपनीयता कडा पालन गर्ने भएकोले ढुक्क भएर परामर्श लिनुहोस्।

【वसन्तको राष्ट्रिय ट्राफिक सुरक्षा अभियान】

यस सातादेखि अप्रिलमा, नयाँ आर्थिक वर्षको सुरुवात भयो। यस सप्ताहन्त, ६ (शनिबार) देखि १५ (सोमबार) सम्म, ‘वसन्तको राष्ट्रिय ट्राफिक सुरक्षा अभियान’ आयोजना हुन गईरहेको छ।

・बालबालिकाहरूलाई सुरक्षित रूपमा आवतजावत गर्न सक्ने गरि सडक ट्राफिक वातावरण सुनिश्चित गर्ने र सुरक्षित तवरले बाटो काट्ने विधिहरू अभ्यास गराउने

・ पैदल यात्रुहरूलाई प्राथमिकता दिने र "सोचविचार र पारस्परिक समझदारी" मा गरिने ड्राइभिङलाई प्रोत्साहन गर्ने

・साइकल, इलेक्ट्रिक स्कुटर आदि प्रयोग गर्दा हेलमेट लगाउने र ट्राफिक नियमको पालना गर्ने 

・ मादक पदार्थ सेवन गरी सवारी चलाउने कार्यलाई रोक्ने

यी चार बुँदाहरु प्राथमिकताका साथ यस अभियान अवधिमा फुकुओका प्रिफेक्चरको प्रत्येक क्षेत्रहरुमा,  विभिन्न पहलहरू कार्यान्वयन गरिनेछन्।

अप्रिलमा, प्राथमिक विद्यालयका कक्षा १ का विद्यार्थीहरू ट्राफिक वातावरणमा भर्खरै पाईला राखेका हुन्छन्। तिनीहरूलाई सडक जोखिम बारे ज्ञानको कमी हुन्छ। थप रूपमा, बच्चाहरूको दृष्टिको क्षेत्र वयस्कहरूले सोचेको भन्दा साँघुरो हुन्छ, र तिनीहरू आफ्नो वरपरको दृश्य देख्न असमर्थ हुन्छन्। बच्चाहरु अचानक यताउता गई हाल्ने वा र सडक पेटिभन्दा बाहिर बाटोमा एक्कासी कुद्ने प्रति सजक रहनु आवश्यक छ।

धेरै नयाँ विद्यार्थीहरू, नयाँ कर्मचारीहरु वा स्कूल वा काममा जाँदा नयाँ मार्गहरू लिने व्यक्तिहरू पनि हुन्छन् होला। एक त अपरिचित मार्ग र त्यसमाथि बिहानको ब्यस्त समय हुने भएकोले दुर्घटना हुने सम्भावना हुन्छ। त्यसैले, ट्राफिक सुरक्षाको लागि हतारमा होइन,  आफ्नो सोचबूझले यात्रा गरौं।

आफ्नो समय र सोचबूझ लिएर, आज पनि सुरक्षित ढंगले बाहिर निस्कनुहोला!

【फुकुओका शहरको सूचना】

विदेशीहरूले परामर्श लिन सकिने काउन्टरको परिचय

नयाँ जीवनमा कुनै समस्या वा नबुझेको कुरा छ कि?

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धि परामर्श कहाँ लिने भनेर थाहा नभएको समयमा, उपयुक्त सम्पर्क काउन्टर तथा अन्य जानकारीहरु प्रदान गर्दै आईरहेको छ।

फोन नम्बर, (०१२०-६६-१७९९) ।

सम्पर्क समय ९:०० देखि ५:३० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२१ वटा विदेशी भाषाहरूमा यो सेवा उपलब्ध छ।

राष्ट्रिय स्वास्थ्य बीमा, फोहोर, कर, आदि जस्ता फुकुओका शहरका प्रक्रियाहरूको बारेमा बुझ्नु परेमा, दोभाषे सेन्टरमा कल गरेर, आफू बस्ने वार्डमा सम्पर्क गरि परामर्श लिन सक्नुहुन्छ। 

फोन नम्बर, (०९२-७५३-६११३) । 

सम्पर्क समय ९:०० देखि ५:०० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

१८ वटा विदेशी भाषाहरूमा यो सेवा उपलब्ध छ।

यस अतिरिक्त, चिकित्सा संस्था खोज्दा, अस्पतालमा डाक्टरसँग कुरा गर्दा, अस्पताल वा सिफारिस गरिएको फार्मेसीमा औषधि लिँदा, Fukuoka City Medical Interpreting Call Center मार्फत टेलिफोन अनुवाद हुन्छ।

विदेशीहरूबाट मात्र नभई, अस्पताल र प्रिस्क्रिप्शन फार्मेसीहरूबाट पनि टेलिफोन अनुवादको लागि अनुरोध गर्न सकिन्छ।

फोन नम्बर, (०९२-७३३-५४२९) हो।

चौबीसै घण्टा हरेक दिन लिन सकिने यो सेवा, २० वटा भाषाहरुमा उपलब्ध छ। 

【को प्रदशनी】

Vincent Van Gogh, एक प्रसिद्ध डच प्रभाववादी चित्रकार हुनुहुन्छ। उहाँलाई 

"आधुनिक कलाका पिता" भनेर पनि चिनिन्छ।उहाँका धेरै प्रशंसक छन्। Gogh को

 "Digital Fine Art Exhibition", Moving Vincent Van Gogh हाल फुकुओका सिटी साइन्स म्युजियममा आयोजना भइरहेको छ!

"Digital Fine Art Exhibition"भनेको Fine Art विषयमा, 3DCG animation, VFX (special effects), जस्ता कम्प्युटर ग्राफिक्स टेक्नोलोजीहरू प्रयोग गरिएका कलाकृतिहरुको संग्रह प्रदर्शनी हो। अमेरिका, फ्रान्स र अष्ट्रेलिया जस्ता देशहरूमा, पहिले नै कलात्मक अभिव्यक्ति विधाको रूपमा स्थापित भइसकेको छ र लोकप्रिय बन्दै गईरहेको छ।

यस पटक, संसारभरबाट सङ्कलन गरिएका Gogh का लगभग ८६०वटा कलाकृतिहरूको संग्रह रउहाँको जीवनको ३७वर्षको अवधिमा सिर्जना गरिएका कलाकृतिहरू, नवीनतम डिजिटल प्रविधि प्रयोग गरी दृश्यमा रुपान्तरण गरिएको छ। डिजिटल प्रविधिको माध्यमबाट Gogh को कलाको नयाँ संसार जीवन्त बनाईएको छ र "मुभिङ पेन्टिङहरू" मा रूपान्तरण गरिएकोले आश्चर्य र नयाँ खोजले भरिपूर्ण छ। साथै, उनका केही उत्कृष्ट कृतिहरूमा तारायुक्त आकाशहरू चित्रित छन्। उनले छाडेका ९०० भन्दा बढी पत्रहरूसँगै, त्यस समयको ताराहरूले भरिएको आकाशको मनोरञ्जन सहितको तारामंडल कार्यक्रम पनि प्रसारण गरिनेछ।

कार्यक्रम जून १६ सम्म चल्नेछ ।

अवश्य पनि "Moving  Vincent Van Gogh " को अनुभव लिनुहोस् र नयाँ तरिकामा कलाको आनन्द लिनुहोस्।

【DJ बाट जीवनको नयाँ अध्यायको लागि कामना】

अर्को हप्ता अप्रिल शुरु हुन्छ! जापानमा अप्रिल महिनालाई, नयाँ भर्ना हुने वा नयाँ रोजगार शुरु गर्ने आदि जस्ता नयाँ जीवनयापन शुरु हुने महत्वपूर्ण महिनाको रुपमा लिईन्छ। तपाईंहरु पनि जीवनको नयाँ अध्यायको लागि प्राप्त गर्न सकिने लक्ष्यहरू सेट गर्नुहोस् र तिनीहरूतर्फ कसरी काम गर्ने भन्ने योजना बनाउनुहोस्। 

नयाँ अध्यायमा प्रवेश गर्दा, नियमित रूपमा आहार, व्यायाम गर्ने, नेटवर्किङ र सम्बन्ध बनाउँदै जाने, आफ्नो ज्ञान र कौशललाई बढाउदै जाने आदि कदमहरूले आफ्नो जीवनलाई सकारात्मक दिशामा ल्याउन सकिन्छ।

नयाँ समयमा नयाँ मित्रहरू बनाउँदै जानुहोस् र नेटवर्किङमा सहभागी हुनुहोस्। यसले तपाईंलाई नयाँ अनुभवहरूमा मद्दत गर्न सक्छ र नयाँ अवसरहरू पनि खोज्न साहयक हुन सक्छ।

चुनौतीहरूलाई अवसरमा परिणत गर्न र सिक्न मेहनत गर्नुहोस्। साहस गर्नुहोस् र नयाँ अनुभवहरू अनुभव गर्नुहोस्। नयाँ अध्यायमा प्रवेश गर्दा, यी सिद्धान्तहरूलाई अमलमा ल्याउनुहोस् र आफ्नो जीवनलाई सकारात्मक दिशामा ल्याउने प्रयास गर्नुहोस्।

वर्ष २०२० कोअप्रिलमा शुरु भएको यो कार्यक्रम " Life in Fukuoka", अर्को हप्ताबाट पाचौं वर्षमा प्रवेश गर्न गईरहेको छ! प्रसारण वा पोडकास्टहरू सुनि दिनुहुने सबैजनालाई धेरै धेरै धन्यवाददिन चाहन्छु।

फुकुओकामा बस्नु हुने विदेशीहरूका लागि दैनिक जीवनमा उपयोगी जानकारीहरु तथा रमाइला विषयबस्तुहरू आउँदा दिनहरुमा पनि निरन्तर प्रस्तुत गर्नेछु।

कुनै प्रश्न, सन्देश, वा अनुरोधहरू भएमा पक्कै पनि यस लाईफ इन फुकुओका नेपाली कार्यक्रममा मेसेज पठाउनुहोला!

【साकुराको ओहानामी अर्थात् साकुरा फूल फुलेको हेर्ने मेला】

 फुकुओकामा साकुराको ओहानामी अर्थात् साकुरा फूल फुलेको हेर्ने सिजन आउनै लागेको छ।

यस हप्ता, फुकुओका शहरमा साकुराको ओहानामी हेर्ने ठाउँहरूको जानकारी लिएर आएकी छु।

सर्वप्रथम, तेन्जिनबाट १५ मिनेट पैदल दूरीमा रहेको, माइजुरु पार्क।

यस पार्कको प्रतीक चिन्ह भन्नु पर्दा, पक्कै पनि फुकुओका दरबारको भग्नावशेष हो! फुकुओका दरबार वरपरका १००० वटा साकुरा रूखका फूलहरू अति सुन्दर, अनि त्यस माथि रातमा लाइट अप डिस्प्ले अति मनोरञ्जक हुने गर्छ। पानीको सतहमा प्रतिबिम्बित सुन्दर साकुराहरू देख्न सक्नुहुन्छ। यस सिजनको समयमा, त्यहाँ धेरै स्टलहरू र खानाका भ्यानहरू लाग्ने, अनि धेरै मानिसहरुको भीड हुने गर्छ।

अर्को छ, फुकुओका शहरको लगभग केन्द्रमा अवस्थित निशी पार्क ।

यो प्रिफेक्चरमा एक मात्र यस्तो स्थल हो, जुन ‘जापानमा १०० प्रसिद्ध साकुरा ओहानामी स्पटहरू’ मा पर्न सफल भएको छ। निशी पार्कमा १३०० साकुरा रूखका फूलहरूको आनन्द लिन सक्नुहुन्छ। यहाँ पनि, रातमा लाइट अप डिस्प्ले र धेरै स्टलहरूको मजा लिन सक्नुहुन्छ। यहाँको प्रसिद्ध ‘इमाया ह्याम्बर्गर’ खान चाहिं नछुटाउनु होला।

अन्य स्थलहरुमा, Fukuoka Zoo & Botanical Garden वरिपरीको Minami Park, हिगाशी वार्डको Uminonakamichi Seaside Park, र पैदल यात्रा गर्दै जंगलको स्वच्छ हावा र दृश्यको आनन्द लिन सकिने Aburayama Citizen's Forest, त्यस्तै, ‘शुभ साकुरा फूल’ भनि लोकप्रिय रहेको आतागो जिन्ज्या आदि थुप्रै साकुरा ओहानामी स्पटहरू छन्।

साकुरा ओहानामीको सिजन छोटो भएकोले यसलाई नछुटाउनुहोस्!

आशा छ, यस वर्ष पनि सुन्दर साकुरा फूलहरू देख्न सक्छौं ♪

【फुकुओका शहरको सूचना】

बसाईसराई फोहर सम्बन्धि

वसन्त ऋतुमा स्थान परिवर्तनको कारण फर्निचर र घरेलू उपकरण जस्ता ठूला आकारको फोहर बढ्ने समय हो।

यस पटक, ठूला आकारको फोहोर फाल्ने तरिका सम्बन्धि जानकारी दिनेछु।

ठूला आकारको फोहोर फाल्न, फोन, इन्टरनेट वा फुकुओका सिटीको LINE मार्फत अग्रिम आवेदन दिई, कन्भिनीयन्स स्टोर आदिमा प्रशोधन टिकट खरीद गर्नुहोस्।

फोहर संकलन, आवेदन दिएको मितिबाट एक हप्ता लाग्नेछ।

संकलनको दिनमा बिहान ८:३० सम्म तोकिएको ठाउँमा राख्नुहोस्।

ठूला आकारको फोहोर रिसेप्शन सेन्टरको फोन नम्बर ०९२-७३१-११५३ ।

इन्टरनेट वा LINE मार्फत २४ घण्टा जहिलेपनि आवेदन दिन सकिने भएकोले सुविधाजनक छ।

टिभी, फ्रिज, फ्रिजर, वाशिंग मेशिन, कपडा ड्रायर र एयर कन्डिशनरहरूको हकमा घरायसी सामान प्रशोधन कानुन बमोजिम फोहर फाल्ने विधि तोकिएको छ। 

नयाँ खरिद गर्नु हुँदा भएको पुरानो झिकेर लैजाने वा खरिद गर्नुभएको पसलबाट नै पुरानो झिकिदिने गर्नुहोस्। खरिद गर्नुभएको पसल थाहा नभएमा, नजिकैको Yamada Denki मा सङ्कलन बारे सोधपुछ गर्नुहोस्। संकलन गर्न लगाउँदा, रिसाइकल शुल्क, संकलन र यातायात शुल्क तिर्नु पर्छ।

नागरिक विपद् रोकथाम दिवस

फुकुओका शहरमा, सन् २००५ मार्च २० मा गएको फुकुओका प्रान्त पश्चिम अपतटीय भूकम्पको अनुभवलाई नबिर्सन मार्च २० लाई "नागरिक विपद् रोकथाम दिवस" को रूपमा तोकिएको छ।

पछिल्ला वर्षहरूमा विभिन्न ठाउँहरुमा भूकम्प, भारी वर्षा जस्ता ठूला प्रकोपहरू भएका छन्। विपद् कहिले आउँछ भनेर थाहा हुँदैन। 

विपद् आईपर्दा, प्रत्येक व्यक्तिले उपयुक्त कदम चाल्नको लागि, दैनिक आधारमा तयारी गर्न महत्त्वपूर्ण छ।

फुकुओका शहरको वेबसाइटबाट Hazard Map वा विपद् सम्बन्धि जानकारी लिने, आश्रय लिने स्थानमा जाँदा लिएर जानुपर्ने सामान पहिलेदेखि तयारी र जाँच गरि राख्ने गर्नुहोस्।

"नागरिक विपद् रोकथाम दिवस" को अवसरमा, आफ्नो, आफ्नो परिवार र समुदायको सुरक्षाको लागि विपद् रोकथामको बारेमा सोचौं।

【हारु नो कोउशिएन्】

अर्को हप्ताको १८ तारिकबाट चयनात्मक हाई स्कूल बेसबल प्रतियोगिता वा "हारु नो कोउशिएन्" शुरु हुन गईरहेको छ। हरेक वर्ष वसन्तमा आयोजना हुने, यो जापानी हाई स्कूल बेसबल प्रतियोगिता हो। खेल मैदान ह्योगो प्रिफेक्चरको कोउशिएन् स्टेडियममा हुने भएकोले, यसलाई "कोउशिएन्" भनेर चिनिन्छ। जापानीहरूका लागि, कोउशिएन् लामो समयदेखि विशेष प्रतियोगिताको रुपमा रहीआएको छ। यो प्रतियोगिता हाई स्कूल बेसबल खेलाडीहरूका लागि मात्र नभई, बेसबल प्रशंसकहरूका लागि पनि उत्तिकै विषेश छ। यस वर्ष ३२ वटा विद्यालयहरुले बिजय पदकका लागि प्रतिस्पर्धा गर्नेछन्।

फुकुओकाबाट मुनाकाता शहरमा अवस्थित टोकाई विश्वविद्यालय फुकुओका हाई स्कूललाई ​​प्रतिनिधि चयन गरिएको छ।

जापानभरिमा बिजय लक्ष्यकासाथ उत्कृष्ट प्रदर्शनका लागि अग्रिम शुभकामना।

यो प्रतियोगिता, मार्च ३० सम्म १३ दिनको लागि, रेडियो र टिभीमा प्रसारण हुनेछ।त्यसैले, पक्कै पनि हाई स्कूल बेसबल खेलाडीहरूको उत्कृष्ट प्रदर्शन हेर्नुहोला!

【फुकुओका शहरको सूचना】 

“भीडभाड नगरी बसाईसराईको प्रक्रिया चाल्नु”

मार्च र अप्रिलमा बसाईसराई धेरै हुने भई वार्ड अफिसको काउण्टरमा भीड हुने समय हो।

विशेष गरी मार्च २१ देखि अप्रिल ८ सम्म, २-३ घण्टा कुर्नुपर्ने जत्तिको भीड हुने भएकोले, सकेसम्म यस अवधिमा कार्यालय भ्रमण नगरिदिनु होला। 

सप्ताहका दिनहरुमा व्यस्त भई बसाईसराईको सूचना दर्ता गर्न जान असमर्थ हुनुहुने महानुभावहरुले, बिदाका दिनमा बसाईसराईको प्रक्रिया गर्न सकिने गरि मार्च ३१ र अप्रिल ७ को आइतबार, प्रत्येक वार्ड कार्यालय र शाखा कार्यालयका काउण्टरहरू अस्थायी रूपमा खोलिनेछन्। बिहान ९:०० बजेदेखि दिउँसो १:०० बजेसम्म,बसाईसराईको सूचना वा बसाईसराई सम्बन्धित सूचना दर्ताहरू स्वीकार गर्दछौं।

फुकुओका शहरभन्दा बाहिर बसाई सर्दै हुनुहुन्छ भने, वार्ड अफिसमा नगईकन पनि, हुलाक मार्फत् वा माइनम्बर कार्ड हुनेहरुले अनलाइनबाट सूचना दर्ता गर्न सक्नुहुन्छ।

यद्यपि, विदेशमा सर्दै हुनुहुन्छ भने, कृपया ध्यान दिनुहोस् कि अनलाइनबाट बसाईसराईको प्रक्रिया गर्न सक्नुहुन्न।

यदि फुकुओका शहरभित्र बसाई सर्दै हुनुहुन्छ भने, बसाईसराई सूचना दर्ता गर्न आवश्यक छैन तर, नयाँ ठेगानामा बस्न थाल्नु भएदेखि आफू सर्नुभएको वार्ड अफिसमा बसाईसराई सूचना बुझाउनुपर्छ।

वार्ड अफिसमा बसाईसराईको प्रक्रियाका लागि सुविधाजनक अनलाइन सेवा पनि छ।

शनिवार, आइतवारर सार्वजनिक बिदाहरुमा बाहेक, प्रकिया चलाउन अपेक्षित मिति भन्दा कम्तिमा ५ दिन अगाडि ८:३० बजेसम्ममा स्मार्टफोन आदिबाट, ठेगाना परिवर्तन वा प्रक्रियाको अपेक्षित मिति आदिको जानकारी पठाउनुभयो भने, बुकिङ गर्न सक्नुहुन्छ र काउण्टरमा प्रक्रियाको समय कम लाग्ने र प्रकिया पनि सहज हुन्छ।

नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

फोन नम्बर, ०९२-७५३-६११३ हो।

तपाईं आफू बस्ने वार्ड र बसाईसराईको प्रक्रियाको बारे बुझ्न चाहेको भन्नुहोला।

यस अतिरिक्त, बसाईसराई गर्दा, खानेपानी आपूर्ति शुरु गर्न वा रोक्नका लागि सुचना दिन आवश्यक छ। शनिवार, आइतवार र सार्वजनिक बिदाका बाहेक, सर्ने दिनभन्दा कम्तिमा ४ दिन अगाडिसम्ममा फोनमार्फत सम्पर्क गर्नुहोस्।

फोन नम्बर ०९२-५३२-१०१० हो। आफूले चाहेको विदेशी भाषामा कल गर्न सक्नुहुन्छ।

अनलाइनबाट पनि आवेदन दिन सक्नुहुन्छ।

【अन्तर्राष्ट्रिय नारी दिवस】

मार्च ८ अन्तर्राष्ट्रिय नारी दिवस पर्छ।महिला अधिकारको रक्षा गर्न र उनीहरूका उपलब्धिहरूको सम्मान गर्न संयुक्त राष्ट्र संघद्वारा स्थापित गरिएको यो दिवस विश्वभरी मनाइन्छ।

अन्तर्राष्ट्रिय नारी दिवसको प्रतीकको रुपमा रहेको फूल मिमोजा हो। तपाईहरुले आजकल शहर वरिपरि मिमोजा फूलहरु देख्नुभएको छ कि छैन होला। जाडो मौसमको अन्त्य र वसन्तको सुरुवातको सङ्केतको रुपमा, फेब्रुअरीदेखि मार्चसम्म फुल्ने मिमोजालाई `कृतज्ञता` र `खुशीको फूल` पनि भनिन्छ। यसको चम्किलो पहेंलो भिटामिन रङले गर्दा हेरेर मात्र पनि ऊर्जा महसुस हुन्छ, यो फूल सुन्दर अनि बिशेष रुपले मनमोहक छ!

जसरी जापानमा आमाको दिनमा कार्नेशन फूल दिने चलन छ, त्यसरी नै, यो मिमोजा फूल अन्तर्राष्ट्रिय नारी दिवसमा आफ्नो कृतज्ञता व्यक्त गर्ने रुपमा दिंदा पनि राम्रै होला कि!

【फुकुओका सिटी इन्टरनेशनल फाउण्डेसनको सूचना】

"संयुक्त राष्ट्र संघकाकर्मचारीहरूसँग मिलेर शहरको विकास गरौं! सहभागिताको लागि आह्वान" सम्बन्धि सूचना

फुकुओका सिटी इन्टरनेशनल फाउण्डेसनले UN-Habitat Fukuoka Headquarter का कर्मचारीहरूलाई लेक्चरका लागि आमन्त्रित गर्ने र सहरी विकास सम्बन्धी कार्यशाला आयोजना गर्ने भएको छ।

यो कार्यशाला कार्यक्रम, प्राथमिक विद्यालयको ४कक्षादेखि जुनियर हाई स्कूलको ३कक्षाका विद्यार्थीहरूका लागि, मार्च २३ शनिबार बिहान १०:०० बजे देखि ११:३०बजे सम्म आयोजना हुनेछ। कार्यक्रम स्थल ACROS Fukuoka हो।

"मानव अधिवासन" सम्बन्धि क्रियाकलापहरु आयोजना गरिंदै आएको UN-Habitat Fukuoka Headquarter, क्युशुमा रहेको एक मात्र संयुक्त राष्ट्र एजेन्सी हो।

कार्यशालामा सहभागीहरू आफूलाई Habitat गाउँका बासिन्दाको रुपमा सोची, भारी वर्षाबाट धेरै क्षति भएको गाउँको पुन:निर्माणको लागि सबैजना मिलेर योजना बनाउनेछन्।

कार्यशाला साधारण जापानी भाषामा सञ्चालन हुने भएकोले विदेशी मूलका बालबालिकाहरू पनि सहभागी हुन सक्छन्।

संयुक्त राष्ट्र संघको विश्वव्यापी गतिविधिहरूमा रुचि राख्नुहुने सबैजना, हामी तपाईंहरुको सहभागिताका लागि पर्खिरहेका छौं।

Fukuoka City Consultation Support Center for Foreign Residents को काउन्टर खुल्ने समय बारे

हाकाता वार्डको तेन्यामाचीस्थित फुकुओका सिटी इन्टरनेशनल सेन्टरको पहिलो तल्लामा Fukuoka City Consultation Support Center for Foreign Residents नामको केन्द्र छ। जहाँ, विदेशीहरूलाई फुकुओकामा आरामदायी जीवनयापनका लागि, धेरै भाषाहरूमा जानकारी प्रदान गर्नुका साथै कानूनी परामर्श र अध्यागमन स्थिति परामर्श जस्ता निःशुल्क विशेष परामर्शहरू पनि प्रदान गरिंदै आईरहेको छ।

Fukuoka City Consultation Support Center for Foreign Residents को काउन्टर अप्रिलदेखि, बिहान ९:००बजेदेखि बेलुका ५:३०बजेसम्म खुल्ला रहनेछ। 

परामर्शहरू, काउन्टरमा आमनेसामने, वा टेलिफोन वा सोधपुछ फारम मार्फत स्वीकार गरिन्छ। आमने-सामने र टेलिफोन परामर्शका लागि, टेलिफोन दोभाषे सेवा २२ वटा भाषाहरूमा उपलब्ध छ।

यस केन्द्रको ठेगाना रहेको छ, फुकुओका शहर, हाकाता वार्ड, तेन्यामाची ४-१

फोन नम्बर टोल-फ्री रहेको छ, ०१२०-६६-१७९९

फुकुओका सिटी इन्टरनेशनल फाउण्डेसनको LINE आधिकारिक Account बाट LINE कल पनि प्रयोग गर्न सक्नुहुन्छ।

विस्तृत जानकारीका लागि, फुकुओका सिटी इन्टरनेशनल फाउण्डेसनको होमपेज हेर्नुहोला।

सहभागिता नि:शुल्क हो, तर अग्रिम रिजर्भेसन गर्न आवश्यक छ।

रिजर्भेसन कसरी गर्ने भन्ने बारे विवरणहरूको लागि, कृपया फुकुओका सिटी इन्टरनेशनल फाउण्डेसनको होमपेज वा फेसबुकमा हेनुहोस्।

फुकुओका सिटी इन्टरनेशनल फाउण्डेसनको होमपेज fcif.or.jp हो

कुनै प्रश्नहरू छन् भने, कृपया हामीलाई सम्पर्क गर्नुहोस्। फोन नम्बर "०९२-२६२-१७४४" हो।

【निहोन् स्यु】

तपाईहरुले जापानी रक्सी‘निहोन्स्यु’को बारेमा सुन्नुभएको छ वा कहिल्यै पिउनु भएको छ? वर्षैभरि निहोन्स्युको स्वाद लिन त सकिन्छ, तर जाडो मौसम भनेपछि नयाँ साके बनाउने सिजन हो। यो सिजनमा नयाँ बनाईएका साकेहरु बजारमा उपलब्ध हुने गर्छ। 

‘निहोन्स्यु’बनाउनको लागि प्रयोग हुने चामल, माल्ट चामल, पानीजस्ता सरल सामाग्रीहरु र विधिहरूले स्वाद र गुणस्तर निर्धारण गर्दछ। यस बाहेक, यसको पिउने तरिकाहरु पनि थुप्रै छन्, जस्तै कि, चियो पिउने (रेशु), हल्का मनतातो पिउने(हिया), तातो पिउने (खान्जाके) आदि बिभिन्न तरिकाहरुबाट निहोन्स्युको मजा लिन सक्नुहुन्छ। यसमा अल्कोहलको मात्रा सामान्यतया लगभग १५% हुन्छ।

फेब्रुअरी लाग्यो कि, धेरैजसो रक्सि उत्पादन गर्ने स्थलहरुमा ‘कुरा बिराकी' नामको कार्यक्रम आयोजना हुने गर्छ। ती स्थलहरुमा नयाँ रक्सी चाख्दै भ्रमण गर्न सक्नुहुन्छ।

फुकुओका प्रिफेक्चरमा हाल ६८ वटा साके ब्रुअरीहरु छन्,  ती मध्ये,‘इशिकुरा स्युजोउ' हाकाता क्षेत्रको एक मात्र साके ब्रुअरी हो, जहाँ अझै पनि साके बनाउने काम जारी छ। यो ‘हाकाता ह्याकुनेन्गुरा' भनेर लिकप्रिय छ। सेतो माटोको पर्खाल र आकर्षक ईंटाको चिम्नी भएको यस भवनको निर्माण सन् १८७० मा भएको थियो। यो सुन्दर भवन रेस्टुरेन्ट, कन्सर्ट र विवाह स्थलको रूपमा पनि प्रयोग गरिन्छ। त्यहाँ प्रत्यक्ष बिक्री स्टोर पनि भएकोले नमूनामा राखेका साके चाख्दै आफ्नो मनपर्ने निहोन्स्यु किन्न सक्नुहुन्छ!

यस वर्षको ‘हाकाता ह्याकुनेन्गुरा',फेब्रुअरी २९(बिहीबार) र मार्च १ (शुक्रबार) दुई दिनको लागि आयोजना हुने भएको छ। खुल्ने समय अवधि, दिउँसो २ बजे देखि बेलुकी ८ बजेसम्म हो। त्यहाँ ताजा रक्सीका साथै विभिन्न प्रकारका मादक पेय पदार्थहरू, नोअल्कोहल पेय, तथा अन्य खाद्यसामग्रीहरु बिक्रीमा पाईन्छन्। यस बाहेक निहोन्स्युको तुलना कर्नर पनि हुनेछ।

समय भए तपाईंहरु पनि साके ब्रुअरीको भ्रमणमा जानु भए कसो होला!

【केगो जिन्ज्यामा「Blue Bottle Coffee」 खोलियो!】

तेन्जिनको केन्द्रमा अवस्थित तीर्थस्थल हो, केगो जिन्ज्या। दुई वर्ष अगाडि मात्रै ठूलो जीर्णोधार कार्य सम्पन्न भएको यस मन्दिर परिसरभित्र, क्युशुको पहिलो स्टोर "Blue Bottle Coffeeफुकुओका तेन्जिन क्याफे" मन्दिरको कार्यालय भवनको पहिलो तल्लामा खोलिएको छ!

"Blue Bottle Coffee" अमेरिकाको ओकल्यान्डबाट शुरु भएको थियो।  `मिठो ​​कफीको चुस्कीले जीवनलाई आनन्ददायी बनाउँछ' भन्ने मुलधारसँगै, कपमा रहेको कफीमा मात्र नभई, त्यहाँभित्रको वातावरण, सरसामान, आदिद्वारा पनि कफी पिउँदाको वरपरको अनुभवलाई उत्तिकै महत्व दिने, अनि विशेष स्वादिलो कफी प्रदान गर्ने क्याफे हो।

ठूल्ठूला सीसाका भित्ता भएको यस क्याफेमा बाहिरी दृश्य हेर्दै, कफी पिउँदै आराम गर्न सक्नुहुन्छ, वा मन्दिर घुमेर घर फर्कने बेलामा कफी टेकआउट लिन पनि सक्नुहुन्छ! यो क्याफे बिहान ८ बजे देखि बेलुकीको ८ बजे सम्म खुला रहनेछ।

【माउन्ट फुजी】

भोलि शुक्रबार, फेब्रुअरी २३ तारिख "माउन्ट फुजी दिवस" ​​हो। के तपाईंले कहिल्यै "Mt. Fuji" देख्नुभएको छ? जापानका हिमालहरु भनेपछि, पहिलो नाम आउँछ माउन्ट फुजीको। यो जापानको सबैभन्दा अग्लो हिमाल हो, जसको उचाई ३,७७६ मिटर छ। अहिले पनि यो हिमालमा ज्वालामुखी सक्रिय छ। 

यो यामानाशी प्रिफेक्चर र शिजुओका प्रिफेक्चरको बीचमा अवस्थित छ, उत्तरमा यामानाशी प्रिफेक्चर र दक्षिणमा शिजुओका प्रिफेक्चर पर्दछन्। तर, पहाडको टुप्पोतिर भने कुनै प्रीफेक्चरल सीमानाहरू छैनन्, त्यसैले कुनै पनि प्रान्तमा पर्दैन जस्तो देखिन्छ। यद्यपि, पहाडको टुप्पोमा रहेको हुलाक कार्यालय भने शिजुओका प्रिफेक्चरभित्र पर्छ। त्यहाँ एउटा मन्दिर पनि छ, जहाँ विवाह समारोह पनि गरिन्छ। माउन्ट फुजी जापानमा स्कीइङको उद्गम स्थल हो, त्यसैले यहाँस्कीइङका लागि बर्सेनि ठूलो घुइँचो लाग्ने गर्छ। माउन्ट फुजीलाई फोटोमा वा टेलिभिजनमा हेर्दै आए पनि एकचोटी वास्तबमा गएर हेर्न भने मलाई मन छ।

जापानका सार्वजनिक स्नानगृहमा जानुभएकाहरुले, पक्कै पनि त्यहाँ माउन्ट फुजीको सुन्दर कला कोरिएको देख्नु भएको हुनुपर्छ। माउन्ट फुजी प्रायः जापानी सार्वजनिक स्नानगृहको नुहाउने ठाउँको भित्तामा चित्रित हुन्छ। त्यस्तै, जापानी कविता, साहित्यिक लेख, पैसाको नोट आदिमा पनि जापानको प्रतीकको रुपमा यसलाई प्रयोग गर्दै आईरहेको छ। माउन्ट फुजी विश्वभर चिनिएको, दायाँबायाँ दुबैबाट समान आकार भएको दुर्लभ सुन्दर हिमाल हो, जुन विश्व सांस्कृतिक सम्पदा स्थलको रूपमा पनि दर्ता भएको छ।

 【फुकुओका शहरको सूचना】

“शहर तथा प्रान्तीय करफाइल गर्ने सम्बन्धि”

फुकुओका शहरले रेइवा ६ को शहर तथा प्रान्तीय कर फाइल लिईदैछ। 

कर फाइल गर्ने म्याद, मार्च १५ शुक्रबारसम्म हो। 

कर फाइल बुझाउने काउन्टर चाहिं वार्ड कार्यालयको कर बिभागमा, सोमबारदेखि शुक्रबार बिहान ९:०० बजेदेखि बेलुका ५:०० बजेसम्म खुला रहनेछ।

काउण्टर भिडभाड हुने भएकोले, कृपया हुलाक वा अनलाइन मार्फत् कर फाइल गर्न अनुरोध गरिन्छ।

फुकुओका शहरमा कर फाइल गर्न आवश्यक व्यक्तिहरु भन्नाले, २०२४ को जनवरी १ देखि फुकुओका शहरभित्र ठेगाना भई २०२३ मा आम्दानी भएका व्यक्तिहरु पर्दछन्।

कर कार्यालयमा अन्तिम कर फिर्ती निवेदन पेश गर्नुहुने वा तलब आय मात्र भएको व्यक्तिको हकमा कम्पनीमा वर्षान्तको समायोजन गर्नुहुने आदिले कर फाइल गर्न आवश्यक छैन

 कर फाइलका लागि आवश्यक कागजातहरु,

• माइनम्बर कार्ड वा माइनम्बर बुझ्न सजिलो कागजपत्र 

• सवारीचालक परिचय पत्र, पासपोर्ट, बसोबास कार्ड आदि पहिचान खुल्ने कागजातहरू

• गेन्सेन्च्योउस्युउह्योउ आदि जस्ता गतवर्ष २०२३ को आय देखाउने कागजातहरु

• २०२३ मा गरिएका कटौतीहरुको कागजातहरू

आवश्यक कागजात वा कर फाइल गर्न आवश्यक छ छैन आदि बारे बिस्तृत जानकारीका लागि कृपया आफू बसोबास गर्दै आएको स्थानीय वार्ड कार्यालयको होमपेजमा हेर्नुहोला। नबुझेको कुरा भएमा टेलिफोन अनुवाद हटलाइन प्रयोग गरेर वार्ड कार्यालयमा सोध्न सक्नुहुन्छ।

अंग्रेजी, चाइनिज, कोरियाली, भियतनामी र नेपाली जस्ता १८ वटा भाषाहरुमा परामर्श लिन सकिन्छ।

फोन नम्बर, ०९२-७५३-६११३ हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुन्छ।

तपाईं आफू बस्ने वार्ड र कर फाइलबारे बुझ्न चाहेको भन्नुहोला।

यस अतिरिक्त, वार्ड कार्यालयमा जानुहुँदा पनि आफ्नो फोन प्रयोग गरेर यस सेवा मार्फत् अनुवाद गर्न सकिने भएकोले नहिच्किचाइकन यसको प्रयोग गर्नुहोला।